నవ్వుతున్న ముఖాలు మరియు కృతజ్ఞతగల హృదయాలు

కొన్ని నెలల క్రితం, అప్పటికే 10 విభాగాలున్న ఒక సంవత్సర కాలపు స్టేకు యొక్క స్టేకు సమావేశానికి నేను అధ్యక్షత్వం వహించాను. 2,000 కంటే ఎక్కువ మంది ప్రజలు చిన్న ప్రార్థనా మందిరం మరియు బయట ఏర్పాటు చేసిన మూడు గుడారాలలో నిండిపోయారు. స్టేకు అధ్యక్షుడికి 31 సంవత్సరాలు, ఆయన భార్యకు 26 సంవత్సరాలు మరియు వారికి ఇద్దరు చిన్న పిల్లలు ఉన్నారు. అతను ఈ పెరుగుతున్న మరియు సవాలుతో కూడిన స్టేకును ఎటువంటి ఫిర్యాదులు లేకుండా—నవ్వుతున్న ముఖం మరియు కృతజ్ఞతగల హృదయంతో నడిపిస్తున్నాడు.

గోత్రజనకునితో జరిగిన ఒక ఇంటర్వ్యూలో, ఆయన భార్య తీవ్ర అనారోగ్యంతో ఉందని, ఆమె సంరక్షణకు ఆయన చాలా కష్టపడుతున్నారని నేను తెలుసుకున్నాను. స్టేకు అధ్యక్షుడితో సమస్యను గురించి ప్రస్తావించిన తర్వాత, మేము ఆమెకు యాజకత్వ దీవెన ఇచ్చాము. సగటున ఎన్ని గోత్రజనక దీవెనలు ఇస్తారని నేను గోత్రజనకుడిని విచారించాను.

“ఎనిమిది నుండి పది,” అని అతను అన్నాడు.

“ఒక నెలకా?”, అని నేను అడిగాను.

“వారానికి!”, అని అతను జవాబిచ్చాడు. వారాంతంలో అంత ఎక్కువ చేయడం తెలివైన పని కాదని నేను అతనికి సలహా ఇచ్చాను.

“ఎల్డర్ గోడోయ్, వారు ప్రతీ వారం వస్తూనే ఉంటారు, కొత్త సభ్యులతో సహా చాలామంది యువకులు కూడా వస్తూనే ఉంటారు,” అని అతను అన్నాడు. మరలా, ఎటువంటి ఫిర్యాదులు లేవు—నవ్వుతున్న ముఖం మరియు కృతజ్ఞతగల హృదయం మాత్రమే.

శనివారం సాయంత్రం స్టేకు సమావేశం తర్వాత, నేను హోటల్‌కు వెళ్తుండగా, రాత్రి ఆలస్యంగా రోడ్డు పక్కన ప్రజలు ఆహారం కొంటున్నట్లు నేను గమనించాను. పగటిపూట కాకుండా చీకటిగా ఉన్నప్పుడు వాళ్ళు ఎందుకు ఇలా చేస్తున్నారని నేను నా డ్రైవర్‌ను అడిగాను. ఆహారం కొనడానికి డబ్బు కోసం వారు పగటిపూట పని చేస్తున్నారని అతను బదులిచ్చాడు.

“అంటే, వాళ్ళు రేపు తినడానికి ఈ రోజు పని చేస్తున్నారు,” అని నేను అన్నాను.

అయితే అతను నన్ను సరిచేశాడు: “లేదు, వాళ్ళు ఈ రాత్రి తినడానికి పగటిపూట పని చేస్తున్నారు.” మన సభ్యులు మెరుగైన పరిస్థితిలో ఉంటారని నేను ఆశించాను, కానీ దేశంలోని ఆ ప్రాంతంలో చాలామంది ఇలాంటి సవాళ్లను ఎదుర్కొన్నారని అతను ధృవీకరించాడు. వారి పరిస్థితుల గురించి కొత్తగా తెలుసుకున్న నేను, మరుసటి రోజు ఉదయం మా ఆదివారపు సభ‌లో, వారి నవ్వుతున్న ముఖాలు మరియు కృతజ్ఞతగల హృదయాలను చూసి మరింత కదిలిపోయాను.

స్టేకు అధ్యక్షుడు మరియు నేను ఒక ఆదివారం సమావేశానికి వెళ్ళేటప్పుడు, ఒక జంట ఒక చిన్నబిడ్డ మరియు ఇద్దరు పిల్లలతో రోడ్డు వెంట నడవడం చూశాము. మేము వాళ్ళని ఎక్కించుకోవడానికి ఆగాము. వారు ఆశ్చర్యపోయారు మరియు ఆనందించారు. ప్రార్థనా మందిరానికి ఎంత దూరం నడవాలి అని నేను అడిగినప్పుడు, పిల్లలు నడిచే వేగాన్ని బట్టి 45 నిమిషాల నుండి గంట వరకు పట్టవచ్చని తండ్రి బదులిచ్చాడు. వారు ప్రతీ ఆదివారం ఎటువంటి ఫిర్యాదులు లేకుండా—నవ్వుతున్న ముఖాలు మరియు కృతజ్ఞతగల హృదయాలతో—నడుచుకొని వెళ్లి, తిరిగి వస్తున్నారు.

స్టేకు సమావేశానికి ముందు ఒక ఆదివారం, ప్రభుత్వ పాఠశాలలను సమావేశ మందిరాలుగా ఉపయోగిస్తున్న రెండు శాఖలను నేను సందర్శించాను. కనీసం కొన్ని ప్రాథమిక సౌకర్యాలు కూడా లేని భవనాల యొక్క దుర్భరమైన మరియు నిరాడంబరమైన పరిస్థితులను చూసి నేను ఆశ్చర్యపోయాను. అక్కడ కొంతమంది సభ్యులను కలిసినప్పుడు, వారి సమావేశ మందిరం యొక్క లోపభూయిష్టమైన పరిస్థితులకు క్షమాపణ చెప్పడానికి నేను సిద్ధంగా ఉన్నాను, కానీ వారు చాలా దూరం నడిచే అవసరం లేకుండా, సమీపంలో సమావేశమయ్యేందుకు ఒక స్థలం లభించిందని సంతోషంగా ఉన్నారు. మరలా, అక్కడ ఎటువంటి ఫిర్యాదులు లేవు—నవ్వుతున్న ముఖాలు మరియు కృతజ్ఞతగల హృదయాలు మాత్రమే ఉన్నాయి.

శనివారం నాయకత్వ శిక్షణ జరిగిన తర్వాత, స్టేకు అధ్యక్షుడు నన్ను ఆదివారం సేవలు జరుగుతున్న అద్దె ఇంట్లోకి తీసుకెళ్లారు. 240 మంది వ్యక్తులు హాజరయ్యారు. ఆ తరువాత బిషప్పు ఆ వారంలో బాప్తిస్మము పొందిన 10 మంది కొత్త సభ్యులను పరిచయం చేశారు. ఆ సంఘం రెండు చిన్న గదులలో విస్తరించి ఉంది, కొంతమంది సభ్యులు భవనం వెలుపల కూర్చుని, కిటికీలు మరియు తలుపుల ద్వారా సమావేశాన్ని చూస్తున్నారు. మరలా, అక్కడ ఎటువంటి ఫిర్యాదులు లేవు—నవ్వుతున్న ముఖాలు మరియు కృతజ్ఞతగల హృదయాలు మాత్రమే ఉన్నాయి.

స్టేకుగా మారడానికి సిద్ధమవుతున్న సంఘ జిల్లాను చూడడానికి “ద మౌంటెయిన్ కింగ్డమ్” అని కూడా పిలువబడే ఈ అందమైన చిన్న దేశాన్ని నేను సందర్శించాను. శనివారం సమావేశాల తర్వాత, అద్దె ఇంటిలో ఉన్న వారి శాఖలలో ఒకదానిలో ఆదివారం సేవలకు నేను హాజరయ్యాను. సంస్కార గది నిండిపోయింది, సంస్కారంలో పాల్గొనడానికి జనులు తలుపు బయట నిలబడి ఉన్నారు. పెద్ద ఇల్లు అవసరమని నేను శాఖాధ్యక్షుడితో చెప్పాను. నా ఆశ్చర్యానికి, అది అతని సభ్యత్వంలో సగం మాత్రమే అని అతను నాకు తెలియజేశాడు. రెండవ సమావేశం తర్వాత మిగిలిన సగం మంది రెండవ సంస్కార సమావేశానికి హాజరవుతారు. మరలా, అక్కడ ఎటువంటి ఫిర్యాదులు లేవు—నవ్వుతున్న ముఖాలు మరియు కృతజ్ఞతగల హృదయాలు మాత్రమే ఉన్నాయి.

తరువాత, మన యౌవనులలో చాలామందికి జరిగిన ప్రాణాంతకమైన రోడ్డు ప్రమాదం కారణంగా నేను లెసూతోకు తిరిగి వచ్చాను. దాని గురించి ఇంతకు ముందు ఎల్డర్ డి. టాడ్ క్రిస్టాఫర్‌సన్ ప్రస్తావించారు. నేను ఆ కుటుంబాలను, నాయకులను సందర్శించినప్పుడు, అక్కడ దుఃఖంతో కూడిన వాతావరణం ఉంటుందని నేను ఊహించాను. బదులుగా, పరిస్థితిని ఉత్తేజకరమైన మరియు స్ఫూర్తిదాయకమైన రీతిలో ఎదుర్కొంటున్న బలమైన మరియు హుషారైన పరిశుద్ధులను నేను కలిశాను.

ఈ చిత్రంలో ప్రాణాలతో బయటపడిన 14 ఏళ్ల ఎంపిహెచ్ఓ అనకైయా ఎన్‌కూ తన స్వంత మాటలలో దీనిని బాగా వివరించింది: “యేసును నమ్మండి మరియు ఎల్లప్పుడూ ఆయన వైపు చూడండి, ఎందుకంటే ఆయన ద్వారా మీరు శాంతిని పొందుతారు మరియు స్వస్థత ప్రక్రియలో ఆయన మీకు సహాయం చేస్తారు.”

వారు తమ జీవితాలను యేసు క్రీస్తు సువార్తలో కేంద్రీకరించినందున వారి సానుకూల వైఖరిని మనం చూసే కొన్ని ఉదాహరణలు ఇవి. సహాయం మరియు నిరీక్షణ ఎక్కడ దొరుకుతుందో వారికి తెలుసు.

మన జీవితంలోని ఏ పరిస్థితుల్లోనైనా రక్షకుడు వారికి మరియు మనకు ఎందుకు సహాయం చేయగలరు? దీనికి సమాధానం లేఖనాలలో చూడవచ్చు:

“ఆయన ప్రతి విధమైన బాధలు, శ్రమలు మరియు శోధనలు అనుభవించుచూ ముందుకు సాగును. …

“… మరియు… ఆయన ప్రేగులు కనికరముతో నిండునట్లు, వారి బలహీనతలను బట్టి తన జనులను ఎట్లు ఆదరించవలెనో… ఆయన ఎరుగునట్లు, ఆయన వారి బలహీనతలను తనపై తీసుకొనును.”

ఎల్డర్ డేవిడ్ ఎ. బెడ్నార్ బోధించినట్లుగా, మనం అనుభవించే ఏ శారీరక బాధ, వేదన లేదా బలహీనత రక్షకునికి తెలియనిది కాదు. “బలహీనమైన క్షణంలో మీరు మరియు నేను, ‘[నేను ఏమి అనుభవిస్తున్నానో] ఎవ్వరూ అర్థం చేసుకోవడంలేదు’ అని కేకలు వేయవచ్చు. …’ బహుశా ఏ మానవుడికీ తెలియకపోవచ్చు. కానీ దేవుని కుమారునికి సంపూర్ణంగా తెలుసు మరియు అర్థం చేసుకుంటారు.” ఎందుకు? ఎందుకంటే “మనం భరించకముందే ఆయన మన భారాలను అనుభవించారు మరియు మోసారు.”

మత్తయి 11 లో ఉన్న క్రీస్తు యొక్క మాటల గురించి నా సాక్ష్యంతో నేను ముగిస్తాను:

“ప్రయాసపడి భారము మోసికొనుచున్న సమస్త జనులారా, నా యొద్దకు రండి, నేను మీకు విశ్రాంతి కలుగజేతును.

“నేను సాత్వికుడను దీనమనస్సు గలవాడను గనుక మీమీద నా కాడి ఎత్తికొని నా యొద్ద నేర్చుకొనుడి, అప్పుడు మీ ప్రాణములకు విశ్రాంతి దొరకును.

“ఏలయనగా నా కాడి సుళువుగాను నా భారము తేలికగాను ఉన్నవి.”

ఆఫ్రికాలోని ఆ పరిశుద్ధుల మాదిరిగానే, ఈ వాగ్దానం నిజమని నాకు తెలుసు. ఇది అక్కడ నిజం మరియు ఇది ప్రతిచోటా నిజం. దీనిని గూర్చి నేను యేసు క్రీస్తు నామములో సాక్ష్యమిస్తున్నాను, ఆమేన్.