கிறிஸ்துவில் சோதிக்கப்பட்டு பலப்படுத்தப்படுதல்

என் அன்பான சகோதர சகோதரிகளே, நாம் ஒன்றாகச் சந்திக்கும்போது கர்த்தரின் அன்பை உணர்கிறேன். உங்களுடன் பேச நான் தாழ்மையுடன் இருக்கிறேன். நான் பேசப்போகும் வார்த்தைகளுக்கு மேலாக, நீங்கள் கேட்க கர்த்தர் விரும்புவதை ஆவியானவர் உங்கள் இருதயங்களுக்குள் கொண்டு செல்ல வேண்டும் என்று நான் ஜெபிக்கிறேன்.

நீண்ட காலத்திற்கு முன்பு, எனது கல்லூரி ஆண்டுகளில் இயற்பியல் மற்றும் கணிதம் கற்க முயன்றேன். நான் பாரமாக இருப்பதாக உணர்ந்தேன். என் திறமைக்கு அப்பாற்பட்ட ஒன்றைக் கற்றுக்கொள்ள முயற்சிப்பதாக உணர ஆரம்பித்தேன். நான் அதிகமாக பாரமாக இருப்பதாக உணர்ந்தபோது, தொடர்ந்து முயற்சி செய்வதற்கான பலம் குறைந்து போனதை உணர்ந்தேன். என்னுடைய தைரியமின்மை, என்னுடைய முயற்சிகள் கிட்டத்தட்ட பலனளிக்கவில்லை என்பதை உணர வைத்தது. நான் படிப்பை விட்டுவிடுவது, எளிதான ஒன்றைப் படிப்பது பற்றி யோசிக்க ஆரம்பித்தேன்.

நான் பலவீனனாக உணர்ந்தேன். நான் ஜெபிக்கும்போது, ​​கர்த்தருடைய அமைதியான உறுதியை உணர்ந்தேன். “நான் உன்னை சோதிக்கிறேன், ஆனால் நான் உன்னுடன் இருக்கிறேன்“ என்று அவர் என் மனதிற்குச் சொல்வதை உணர்ந்தேன்.

அந்த வார்த்தைகளுக்கு எல்லாம் அர்த்தம் அப்போது எனக்குத் தெரியாது. ஆனால் என்ன செய்வது என்று எனக்குத் தெரியும்—நான் வேலைக்குச் சென்றேன்.

தொடர்ந்து வந்த ஆண்டுகளில் சிந்தித்து வேலை செய்ததன் மூலம், வேதங்களில் உள்ள இந்த ஊக்கமளிக்கும் செய்தியை நான் புரிந்துகொண்டேன்: “என்னைப் பெலப்படுத்துகிற கிறிஸ்துவினாலே எல்லாவற்றையுஞ்செய்ய எனக்குப் பெலனுண்டு.“

இயற்பியலுடனான எனது போராட்டம் உண்மையில் கர்த்தரிடமிருந்து கிடைத்த வரம் என்பதை நான் அறிந்துகொண்டேன். அவர் எனக்கு உதவ அங்கே இருப்பார் என்ற விசுவாசம் எனக்கு இருந்தால், அவருடைய உதவியுடன், சாத்தியமற்றது என்று தோன்றும் காரியங்களை என்னால் செய்ய முடியும் என்று அவர் எனக்குக் கற்பித்துக் கொண்டிருந்தார். இந்த வரத்தின் மூலம், கர்த்தர் என்னை சோதித்து பலப்படுத்தினார்.

சோதித்தல் என்ற வார்த்தைக்கு பல அர்த்தங்கள் உள்ளன. ஒன்றை சோதிப்பது என்பது அதை வெறுமனே பரீட்சித்துப் பார்ப்பது மட்டுமல்ல. அது அதன் பலத்தை அதிகரிப்பதற்காகவே. ஒரு எஃகுத் துண்டை சோதிப்பது என்பது அதை அழுத்தத்தின் கீழ் வைப்பதாகும். அதன் உண்மையான தன்மை மேம்படுத்தப்பட்டு வெளிப்படும் வரை வெப்பம், எடை மற்றும் அழுத்தம் சேர்க்கப்படுகின்றன. சோதிக்கப்படுவதால் எஃகு பலவீனமடையவில்லை. உண்மையில், அது நம்பகமான ஒன்றாகவும், அதிக சுமைகளைத் தாங்கும் அளவுக்கு வலிமையான ஒன்றாகவும் மாறுகிறது.

கர்த்தர் நம்மைப் பலப்படுத்துவதற்கு கிட்டத்தட்ட அதே வழியில் சோதிக்கிறார். அந்த சோதனை நிம்மதியான அல்லது ஆறுதலான தருணங்களில் வருவதில்லை. நாம் தாங்கிக்கொள்ள நினைத்ததை விட அதிகமாக நீட்டப்பட்டதாக உணரும் தருணங்களில் இது வருகிறது. நாம் தொடர்ந்து வளர வேண்டும், நமது முயற்சிகளில் ஒருபோதும் சோர்வடையக்கூடாது, ஒருபோதும் கைவிடக்கூடாது, தொடர்ந்து முயற்சி செய்ய வேண்டும் என்று கர்த்தர் கற்பிக்கிறார்.

நாம் இயேசு கிறிஸ்துவில் தொடர்ந்து விசுவாசம் வைக்கும்போது—இந்த நேரத்தில் நமக்கு விஷயங்கள் சாத்தியமற்றதாகத் தோன்றினால்கூட—நாம் ஆவிக்குரிய ரீதியில் பலப்படுகிறோம். பரிசுத்த வேதப் பதிவுகள் இந்த உண்மையை வலியுறுத்துகின்றன.

உதாரணமாக, தீர்க்கதரிசி மரோனி, அவ்விதத்தில் சோதிக்கப்பட்டு பலப்படுத்தப்பட்டான். அவன் தனது இறுதி ஆண்டுகளை தனியாகவே கழித்தான். தனக்கு நண்பர்கள் யாரும் இல்லை என்றும், தனது தகப்பன் கொல்லப்பட்டதாகவும், தனது ஜனங்கள் அழிக்கப்பட்டுவிட்டதாகவும் அவன் எழுதினான். அவன் உயிரைப் பறிக்கத் தேடியவர்களால் அவன் வேட்டையாடப்பட்டான்.

ஆனாலும் மரோனி விரக்தியடையவில்லை. அதற்குப் பதிலாக, அவனைக் கொல்ல விரும்பிய ஜனங்களின் சந்ததியினர் உட்பட, அவன் பார்க்க, உயிருடன் இருக்காத ஜனங்களுக்காக, இயேசு கிறிஸ்துவைப் பற்றிய தனது சாட்சியத்தை தகடுகளில் பொறித்தான். அவன் நமக்காக எழுதினான். சிலர் தனது வார்த்தைகளை கேலி செய்வார்கள் என்பது அவனுக்குத் தெரியும். சிலர் அவற்றை நிராகரிப்பார்கள் என்பது அவனுக்குத் தெரியும். ஆனாலும் அவன் தொடர்ந்து எழுதிக் கொண்டிருந்தான்.

அவனது சோதனையில், மரோனியின் விசுவாசம் சுத்திகரிக்கப்பட்டு பலப்படுத்தப்பட்டது. அது மேலும் தூய்மையானது. அவனுடைய வார்த்தைகள் இறுதிவரை விசுவாசத்தோடு நிலைத்திருந்த ஒருவனின் வல்லமையைக் கொண்டுள்ளன. அவனுடைய சாட்சியத்தைப் படிக்கும்போது அந்த வல்லமையை நாம் உணர முடியும்:

“இப்பொழுதும், மரோனியாகிய நான் எனக்கு நன்மையாய்ப் படுகிற சிலவற்றை எழுதுகிறேன்; நான் லாமானியராகிய என் சகோதரருக்கு எழுதுகிறேன். கிறிஸ்து வருகையின் அறிகுறி கொடுக்கப்பட்ட பின்பு, நானூற்றி இருபதுக்கும் அதிகமான வருஷங்கள் கடந்து போயிற்று என்று, அவர்கள் அறியவேண்டுமென விரும்புகிறேன்.

“நான் உங்களுக்குப் புத்தி சொல்லும்படியாகப் பேசிய சில வார்த்தைகளுக்குப் பின்பு, இந்தப் பதிவேடுகளை முத்திரையிடுகிறேன்.

“இதோ, நீங்கள் இவைகளை வாசித்து, அதினிமித்தம் கர்த்தர் மனுபுத்திரருக்கு ஆதாமின் சிருஷ்டிப்பு தொடங்கி, நீங்கள் இவைகளைப் பெறும் சமயம் வரைக்குமாய், கர்த்தர் எவ்வளவு இரக்கமுள்ளவராயிருந்திருக்கிறார் என்று மனுபுத்திரர் வாசிக்க வேண்டுமென்பது தேவ சித்தமாயிருந்தால், அதை நீங்கள் வாசித்து உங்கள் இருதயங்களில் தியானிக்கவேண்டுமென்று உங்களுக்குப் புத்தி சொல்லுகிறேன்.

“இக்காரியங்களை நீங்கள் பெறும்போது, நீங்கள் கிறிஸ்துவின் நாமத்தில் நித்திய பிதாவாகிய தேவனிடத்தில், இக்காரியங்கள் சத்தியமற்றவையா என்று கேட்கவேண்டுமென்று உங்களுக்கு புத்தி சொல்லுகிறேன்; நீங்கள் அக்கறையுள்ள இருதயத்தோடும், உண்மையான நோக்கத்தோடும், கிறிஸ்துவில் விசுவாசம் வைத்துக் கேட்பீர்களானால், அவர் அதன் சத்தியத்தை உங்களுக்குப் பரிசுத்த ஆவியானவரின் வல்லமையிலே வெளிப்படுத்துவார்.

“பரிசுத்த ஆவியானவரின் வல்லமையினாலே, நீங்கள் சகலத்தையும்பற்றிய சத்தியத்தை அறிந்துகொள்வீர்கள்.”

மரோனியின் சாட்சியம் தனிமையில் புடமிடப்பட்டது, ஆனால் அது பரலோகத்திலுள்ள நமது பிதாவையும் இரட்சகராகிய இயேசு கிறிஸ்துவையும் தேட அனைத்து தலைமுறையினருக்கும் வழிகாட்ட ஒளியுடன் பிரகாசிக்கிறது.

மார்மன் புஸ்தகத்தின் மற்றொரு தீர்க்கதரிசியான யாக்கோபு, துன்பங்களையும் அதிக துக்கத்தையும் அனுபவித்த ஒரு குழந்தையாக சோதிக்கப்பட்டு பலப்படுத்தப்பட்டான். ஆனால் அவனது தகப்பனாகிய லேகி, தேவன் அவனை சோதனைகளின் மூலம் ஆசீர்வதிப்பார் என்று அவனுக்குக் கற்றுக் கொடுத்தான்.

“இதோ, உன் சகோதரரின் மூர்க்கத்தனத்தினாலே, உன் இளம்பிராயத்திலே உபத்திரவங்களாலும், அநேக துன்பங்களாலும் பாடுபட்டிருக்கிறாய்.

“ஆயினும், வனாந்தரத்திலே எனக்கு முதற்பிறந்தவனாகிய யாக்கோபே, நீ தேவனுடைய மேன்மையை அறிந்திருக்கிறாய், அவர் உன் உபத்திரவங்களை, உனது ஆதாயத்திற்கென மாற்றுவார்.

“ஆகையால், உனது ஆத்துமா ஆசீர்வதிக்கப்பட்டிருக்கும், நீ உன் சகோதரனாகிய நேபியோடே பாதுகாப்பாய் ஜீவிப்பாய். உன் நாட்கள் உனது தேவனுடைய ஊழியத்திலே செலவிடப்படும். “ஆகவே, மீட்பருடைய நீதியினிமித்தம் மீட்கப்பட்டிருக்கிறாய், என நான் அறிவேன். ஏனெனில் மனுஷருக்குள்ளே இரட்சிப்பைக்கொண்டுவர, காலங்களின் நிறைவிலே, உனது மீட்பர் வருவார் என்று, நீ கண்டிருக்கிறாய்.”

தீர்க்கதரிசி ஜோசப் ஸ்மித் லிபர்ட்டி சிறையில் இருந்தபோது அத்தகைய சோதித்தலையும் பலப்படுத்துதலையும் அனுபவித்தார். தனது வேதனையின் ஆழத்தில், தீர்க்கதரிசி ஜோசப்:

“தேவனே, நீர் எங்கே இருக்கிறீர்?”

“எம்மட்டும் உமது கரம், தடுக்கப்படும்?”

ஜோசப்பின் துன்பத்தில், அதை நன்றாக சகித்துக்கொள்வதன் பரிசுத்தப்படுத்தும் விளைவைக் கண்ட கர்த்தர், பதிலளித்தார்:

“என்னுடைய மகனே, உன்னுடைய ஆத்துமாவுக்கு சமாதானம் உண்டாவதாக; உன்னுடைய இக்கட்டுகளும் உன்னுடைய உபத்திரவங்களும் ஒரு சிறிய சமயத்திற்கு மட்டுமே;

“பின்னர் நீ அதில் நன்றாய் நிலைத்திருந்தால் தேவன் உன்னை உன்னதத்திற்கு உயர்த்துவார்; நீ உன்னுடைய சத்துருக்கள் யாவர்மீதும் ஜெயங்கொள்ளுவாய்.”

இரட்சகரின் பாவநிவர்த்தி மூலம் சோதித்தல் மற்றும் பலப்படுத்துதலின் மிகப்பெரிய எடுத்துக்காட்டு நிகழ்ந்தது. அவர் உலகத்தின் பாவங்களை தம்மேல் ஏற்றுக்கொண்டார். அவர் நமது வேதனைகளையும் துயரங்களையும் சுமந்தார். அவர் கசப்பான கோப்பையைக் குடித்தார். அவர் ஒவ்வொரு தருணத்திலும் விசுவாசமிக்கவராக நிரூபித்தார்.

அவருடைய மகிமையான பாவநிவர்த்தியின் காரணமாக, இயேசு கிறிஸ்து நமது சோதனைக் காலங்களில் நம்மைப் பலப்படுத்த முடியும். பூலோகத்தில் நாம் உணரும் அனைத்து சவால்களையும் அவர் உணர்ந்திருப்பதால், நமக்கு எப்படி உதவுவது என்பது அவருக்குத் தெரியும். “அவர் ஜனங்களுடைய வேதனைகளையும், நோய்களையும் தம் மேல் ஏற்றுக்கொள்வார் … மாம்சத்தின் பிரகாரமாய், ஒத்தாசை புரிவதெப்படி என்று தாம் அறிந்துகொள்ளும்படிக்கும் அவர்களுடைய பெலவீனங்களைத் தம்மேல் ஏற்றுக்கொள்வார்.”

கெத்செமனே தோட்டத்தில் இருந்தபோது, ​​சோதனை தன்னை கடந்து செல்ல முடியுமா என்று இரட்சகர் பிதாவிடம் கேட்டார்—ஆனால் அது பிதாவின் சித்தமாக இருந்தால், இரட்சகர் அதைச் செய்வார் என்றும் அவர் கூறினார். வேறு வார்த்தைகளில் எனில், இரட்சகர் சந்தேகத்தையும் நிச்சயமற்ற தன்மையையும் கூட ஏற்றுக்கொண்டார், ஆனால் அவர் தனது பரலோக பிதாவின் மீது விசுவாசம் கொண்டிருந்தார்.

சகோதர சகோதரிகளே, உங்களின் சோதித்தலும் பலப்படுத்தலும் மரோனி அல்லது யாக்கோபின் அல்லது தீர்க்கதரிசி ஜோசப்பினுடையதைப் போல இல்லாமல் இருக்கலாம். ஆனால் அது வரும். அது குடும்ப வாழ்க்கையின் சோதனைகள் மூலம் அமைதியாக வரக்கூடும். அது நோய் அல்லது ஏமாற்றம் அல்லது துக்கம் அல்லது தனிமை மூலம் வரலாம்.

இந்த தருணங்கள் கர்த்தர் உங்களை கைவிட்டுவிட்டார் என்பதற்கான சான்றுகள் அல்ல என்பதற்கு நான் சாட்சி கூறுகிறேன். மாறாக, உங்களைச் செம்மைப்படுத்திப் பலப்படுத்தும் அளவுக்கு அவர் உங்களை நேசிக்கிறார் என்பதற்கு அவை சான்றாகும். நித்திய ஜீவனின் பாரத்தைச் சுமக்கும் அளவுக்கு அவர் உங்களைப் பலப்படுத்துகிறார்.

நாம் நமது சேவையில் உண்மையுள்ளவர்களாக இருந்தால், கர்த்தர் நம்மைப் புடமிடுவார். அவர் நம்மைப் பலப்படுத்துவார். ஒரு நாள் நாம் திரும்பிப் பார்க்கும்போது, ​​அந்த சோதனைகளே அவருடைய அன்பின் சான்றாக இருந்தன என்பதைக் காண்போம். மகிமையில் அவருடன் நிற்கும்படி அவர் நம்மை வடிவமைத்துக் கொண்டிருந்தார் என்பதை நாம் காண்போம். கர்த்தருடைய அப்போஸ்தலனாகிய பவுல் தனது சொந்த வாழ்க்கையின் முடிவில் கூறியது போல, “நல்ல போராட்டத்தைப் போராடினேன், ஓட்டத்தை முடித்தேன், விசுவாசத்தைக் காத்துக்கொண்டேன்.”

தேவன் உங்களை அறிந்திருக்கிறார் என்று நான் சாட்சியமளிக்கிறேன். நீங்கள் எதிர்கொள்ளும் சோதனைகளை அவர் அறிவார். அவர் உங்களோடு இருக்கிறார். அவர் உங்களைக் கைவிடமாட்டார். இயேசு கிறிஸ்து தேவ குமாரன் என நான் சாட்சியளிக்கிறேன். அவரே நமது பலம், நமது மீட்பர், நமது நம்பிக்கை. நாம் அவரை நம்பினால், நாம் தாங்கிக்கொள்ள அழைக்கப்படும் ஒவ்வொரு சோதனைக்கும் சமமானதாக நமது ஆவிக்குரிய வல்லமையை அவர் மாற்றுவார். அப்படியே இயேசு கிறிஸ்துவின் பரிசுத்த நாமத்தில் நான் சாட்சியமளிக்கிறேன், ஆமென்.