Profeti ta’ Alla

Għeżież żgħażagħ, x’sezzjoni tal-konferenza mill-isbaħ qed nattendu għaliha! Diġà smajna minn tlett Appostli ħajjin ta’ Ġesù Kristu. X’barka meraviljuża! U għad baqgħalna nisimgħu minn wieħed ieħor, mill-Presbiteru Henry B. Eyring. Il-festa spiritwali tkompli!

Meta jien tkellimt is-sena l-oħra, tgħallimna kif nistgħu niffaċċjaw din id-dinja permezz tal-esperjenza ta’ David ma’ Gulija. Tiftakruhom il-ħames ġebliet? Illum, se naqsam magħkom storja mit-Testment il-Qadim li jiena qrajt meta kont daqskom, li nibtet fija x-xewqa li nkun bħall-protagonista. Il-Bibbja ma tgħidilniex x’jisimha, għalhekk se nsejħuha l-mara ta’ Sunem għax hekk jismu r-raħal li ġejja minnu.

Darba waħda, il-profeta Eliżew kien jinsab għaddej minn Sunem, u naqraw li hemmhekk “kienet toqgħod mara għanja, u din stednitu biex joqgħod jiekol għandha. U kull meta kien jgħaddi minn hemm kien idur għal għandha … biex jiekol.” Nimmaġina li l-profeta Eliżew kien kuntent ferm bl-istedina li jiekol fid-dar tagħha! Huwa kien diġà mar għandha bosta drabi, meta darba l-mara qalet lil żewġha, “Issa, jien żgura li dan ir-raġel hu raġel qaddis ta’ Alla.”

Il-mara qalet, “Issa, jien żgura.” Jidher li hija stiednet lil Eliżew f’darha mingħajr ma kienet taf li kien profeta; hija rċeviet ix-xhieda tagħha permezz tal-Ispirtu s-Santu billi semgħet bir-reqqa dak li kellu xi jgħid u x’jgħallem Eliżew. (Ftakru, dak iż-żmien ma kien hawn l-ebda ritratti! Għalhekk kien diffiċli li tagħraf il-profeta sempliċiment billi tħares lejn wiċu.)

Iżda l-istorja ma tintemmx hawn. Jum fost l-oħrajn, il-mara qalet lil żewġha, “Ħa ntellgħulu għorfa, … u nqegħdulu fiha sodda, mejda, siġġu u mnara, u meta jgħaddi għandna, ikun jista’ jidħol fiha.”

Din il-mara fidila kienet lesta li tibni kamra f’darha biex il-profeta, meta jkun għaddej mill-belt, ikollu post fejn joqgħod!

Illum, nistgħu nitgħallmu lezzjoni mill-iktar importanti minn din l-esperjenza.

Il-Mulej xehed ma’ din il-mara ta’ Sunem li Eliżew kien profeta ta’ Alla, u hija aġixxiet billi fetħet darha biex tilqgħu.

Aħna wkoll nistgħu nirċievu xhieda personali tal-profetai ta’ Alla fi żmienna u niftħu qalbna u moħħna—darna—għall-messaġġ li Missierna fis-Smewwiet għandu għalina f’dawn l-aħħar żminijiet.

Għeżież żgħażagħ, nistedinkom biex tistaqsu lilkom infuskom din il-mistoqsija: “Jiena għandi xhieda personali tal-profetai ħajjin ta’ Alla?”

Ejjew nibdew mill-bidu.

X’inhu profeta? Profeta huwa bniedem li Alla sejjaħlu biex jitkellem f’ismu. Illum hawn profeti fid-dinja l-istess kif kien hawn fiż-żminijiet tal-qedem.

Il-profeti huma veġġenti u rivelaturi. Dan ifisser li huma jistgħu jaraw dak li ħaddieħor ma jistax, u huma jistgħu jħabbru dwar avvenimenti li għad iridu jseħħu. Huma jistgħu wkoll jippreparawna għal żmien ta’ għawġ. Il-profeti jirċievu l-kmandamenti u r-rivelazzjonijiet mingħand il-Mulej. Id- disa’ artiklu tal-fidi jitkellem dwar ir-rivelazzjoni kontinwa f’dawn l-aħħar żminijiet. Hija tgħid, “Aħna nemmnu dak kollu li żvela Alla, dak kollu li qed jiżvela bħalissa, u nemmnu li għad irid jiżvela bosta ħwejjeġ kbar u importanti li jappartienu għas-Saltna ta’ Alla.”

Il-Presbiteru Gary E. Stevenson qal, “Il-Mulej ikompli jiżvela l-kmandamenti u r-rieda tiegħu lill-profeti tiegħu llum għax jixtieq li jwassalna għall-hena f’din il-ħajja u għall-glorja ċelestjali fil-ħajja li jmiss.”

Il-profeti jxandru wkoll l-evanġelju u huma għalliema u messaġġiera spirati ta’ Alla għan-nies kollha tad-dinja.

Kull membru tal-Ewwel Presidenza u l-Kworum tat-Tnax-il Appostlu huma profeti, veġġenti, u rivelaturi. Hekk kif iservu bħala kunsill taħt id-direzzjoni tal-Mulej, huma għandhom l-awtorità li jxandru u jinterpretaw id-duttrina u jistabbilixxu l-polisi għall-Knisja tiegħu. Huma jitolbu u jiddeliberaw bir-reqqa, għax id-deċiżjonijiet ta’ dawn il-kworums jeħtieġ li jkunu unanimi. B’dan il-mod, il-Mulej jiżgurana li tiġi fis-seħħ ir-rieda tiegħu.

Il-profeti jixhdu dwar Kristu—dwar l-eżistenza tiegħu, il-ministeru tiegħu, u d-divinità tiegħu.

Ejja naqraw uħud mix-xhieda tal-profeti fil-Ktieb ta’ Mormon.

Abinadi ħabbar:

“Alla nnifsu se jiġi fost ulied il-bnedmin, u sejjer jifdi lill-poplu tiegħu.

“U għaliex huwa se jgħammar fil-ġisem hu se jkun jissejjaħ Iben Alla.”

Samwel il-Lamanita xehed ukoll li Ġesù Kristu huwa “Bin Alla, Missier is-sema u l-art, il-Ħallieq ta’ kollox mill-bidu taż-żmien.”

U l-profeta Moroni qal, “Jiena rajt lil Ġesù, u … huwa tkellem miegħi wiċċ imb wiċċ.”

Meta Kristu żar lin-Nefiti, waħda mill-ewwel ħwejjeġ li għamel kienet li sejjaħ lit-tnax-il Appostlu. U Huwa qal lin-nies, “Henjin intom jekk tagħtu widen għall-kliem ta’ dawn it-tnax li jiena għażilt.”

Issa, ejja naqsmu flimkien ftit kliem għall-ġenituri jew għal membri oħra tal-familja li qed irabbu t-tfal. Il-Mulej innifsu għallem lil Adam u Eva l-veritajiet tal-pjan tas-salvazzjoni. Mbagħad qalilhom, “Jiena nagħtikom kmandament, biex tgħallmu dawn il-ħwejjeġ minn jeddkom lil uliedkom.”

Xi tfisser li ngħallmu minn jeddna? Ifisser li ngħallmu l-veritajiet tal-evanġelju, li jkollna xhieda personali tagħhom, u li naqsmu dan l-għarfien ma’ wliedna. Ifisser li tippromwovu kemm il-mumenti ta’ tagħlim formali kif ukoll informali. Ifisser li ngħixu skont dak l-għarfien u dik ix-xhieda.

Il-Ktieb ta’ Mormon jiddeskrivi lill- 2,060 gwerrier żagħżugħ bħala “nies ta’ fiduċja u bil-għaqal, għax huma kienu ġew mgħallmin biex iħarsu l-kmandamenti ta’ Alla u jimxu fis-sewwa quddiemu.” Dawn iż-żgħażagħ obdew b’fedeltà lil Ħelaman, li f’dak iż-żmien kien il-mexxej militari tagħhom kif ukoll il-profeta tagħhom, u huma rrikonoxxew li ommijiethom kienu mlewlhom qalbhom bil-verità u l-fidi.

Lilna l-ġenituri, f’din id-dinja mimlija ilħna u xi kultant dlam kbir, Alla nnifsu ordnalna biex inrabbu lil uliedna fid-dawl u l-verità. Huwa fdana bir-responsabbiltà li ngħallmu lil uliedna l-veritajiet tas-salvazzjoni tal-evanġelju. Jekk ma nagħmlux dan, id-dinja żgur mhijiex se tagħmel dan.

Għeżież ħbieb tiegħi, għandi stedina għalikom: Fil-jiem li ġejjin, nistedinkom biex tinżlu għarkubbtejkom, tiftħu qalbkom, u titolbu bil-fidi lil Missierna fis-Smewwiet u titolbuh sabiex jikkonfermalkom li l-profeta u l-appostli magħżula tiegħu huma l-leħen tiegħu fid-dinja llum.

Il-mara ta’ Sunem għallmitna li aħna jista’ jkollna din ix-xhieda permezz tal-Ispirtu s-Santu. Inwegħidkom li ladarba nsiru nafu li huma l-magħżulin ta’ Alla, ħajjitna ssir aktar faċli minkejja l-isfidi kontinwi tagħna hekk kif aħna nobdu dak li jgħidulna b’fiduċja, fidi, u tama. Li nisimgħu u nobdu dak li jgħidilna l-profeta huwa kruċjali biex aħna nadottaw kull ħaġa li hija tajba sa jum it-Tieni Miġja tas-Salvatur tagħna.

Il-ħażen fid-dinja qed jikber, iżda l-Knisja ta’ Ġesù Kristu u s-saltna tiegħu u b’saħħithom aktar minn qatt qabel. Sijon qed tilbes l-ilbies sabiħ tagħha, u t-tron ta’ Kristu mhuwiex se jaqa’. Il-Mulej jistenniena li nkunu b’saħħitna fix-xhieda tagħna, mimlijin fidi, u li nindmu kuljum. Is-Salvatur tagħna jiddependi minn kull wieħed u waħda minna biex immexxu ’l quddiem il-ħidma tiegħu.

Darba waħda, il-Profeta Joseph Smith qal, “L-aħwa m’għandniex aħna nibqgħu mexjin f’kawża daqstant kbira?” Madankollu, peress li l-messaġġ tiegħi huwa l-aktar għalikom, iż-żgħażagħ, nixtieq li nuża l-kelma żgħażagħ minflok aħwa. Lesti?

“[O żgħażagħ], m’għandniex aħna nibqgħu mexjin f’kawża daqstant kbira? Imxu ’l quddiem u mhux lura. Kuraġġ, [O żgħażagħ]; u ibqgħu, mexjin sar-rebħa! Ħallu lil qalbkom tifraħ, u kunu verament kuntenti.”

Jiena grata għall-gwida u l-ħidma kkonsagrata tal-profeti ħajjin. Naqsam ix-xhieda solenni tiegħi magħkom li huma msejħin minn Alla biex jiggwidaw, jistabbilixxu, u jmexxu s-saltna tiegħu fuq l-art illum. U dejjem se jkun dan. Dejjem se jkun il-Mulej li jagħżel lill-qaddejja tiegħu. F’isem Ġesù Kristu, ammen.