Il-Qawwa li tiministra persuna persuna

Ħuti, nirringrazzjakom għad-devozzjoni fidila tagħkom li tersqu lejn Kristu f’dawn iż-żminijiet ta’ sfida. Intom verament meraviljużi; intom verament twajbi; intom tassew ulied Alla. Hija t-talba tiegħi li aħna nagħrfu l-influwenza tal-Ispirtu s-Santu hekk kif aħna nsiru, u ngħinu lil xulxin insiru, dixxipli devoti ta’ Ġesù Kristu u nħossu l-ferħ tiegħu hekk kif inqimu fid-dar tal-Mulej.

Il-President Russell M. Nelson iddikjara: “Issa huwa l-mument għalikom u għalija biex nitħejjew għat-Tieni Miġja tal-Mulej u s-Salvatur tagħna, Ġesù Kristu. Issa huwa ż-żmien li naraw li d-dixxipulat tagħna huwa l-ogħla prijorità tagħna. F’dinja mimlija distrazzjoni li tgħajjik, kif nistgħu nagħmlu dan?”

Hu pprovda t-tweġiba: “Il-qima regolari fit-tempju żgur li tgħinna. Fid-dar tal-Mulej, aħna niffokaw fuq Ġesù Kristu. … Aħna nsiru nafuh. … Kull min qed ifittex b’mod sinċier lil Ġesù Kristu se jsibu fit-tempju.”

Għalhekk, kif nistgħu nsiru u ngħinu lil xulxin, dixxipli devoti ta’ Ġesù Kristu? Aħna nimministraw persuna, persuna. Il-ministeru bil-mod kif jgħallem is-Salvatur jinvolvi kompassjoni, tjubija, paċenzja u mħabba mingħajr ġudizzju. Hekk kif nimministraw persuna persuna, aħna nistednuhom biex jersqu lejn Ġesù Kristu u jqimu fid-dar tal-Mulej biex jirċievu l-qawwa feddejja tiegħu. Fi kliem ieħor, aħna ngħinu lil xulxin insiru dixxipli devoti hekk kif nimministraw persuna persuna b’mod li jwassal għad-dar tal-Mulej.

Nitgħallmu mingħand il-Mulej Ġesù Kristu kemm hemm qawwa meta nimministraw bl-imħabba u mingħajr ġudizzju. Tiftakru l-mara Samaritana ħdejn il-bir. Jista’ jkun li din il-mara setgħet ħassitha li mhijiex importanti, waħedha, u ma tidhirx. Forsi ħasset li ma kinitx tappartjeni. Tul ħajjitha hi kellha ħames irġiel, u r-raġel li kienet qed tgħix miegħu ma kienx żewġha. Oħrajn setgħu imponew ġudizzju inġust mingħajr ma kienu jafu ċ-ċirkostanzi ta’ ħajjitha. Jista’ jkun li din hi waħda mir-raġunijiet għaliex ġiet ħdejn il-bir waħedha fl-iktar parti sħuna tal-ġurnata. U madankollu, hija kienet waħda mill-ewwel li Ġesù Kristu ddikjaralha li kien il-Messija. Għalih, din il-mara kienet bint Alla.

Ġesù Kristu għallem lill-mara li permezz tiegħu wieħed jista’ jikseb l-ħajja ta’ dejjem billi jixrob mill-ilma l-ħaj. Huwa ddikjara, “Min jixrob mill-ilma li nagħtih jien qatt iżjed ma jkun bil-għatx. L-ilma li nagħtih jien isir fih għajn ta’ l-ilma li jwassal sal-ħajja ta’ dejjem.”

Il-mara mis-Samarija ħasset l-imħabba tas-Salvatur u rċeviet xhieda mill-Ispirtu li hu huwa l-Messija. Wara din ix-xhieda, hija reġgħet lura fil-belt, stiednet lil ħaddieħor jiġu u jaraw u ħafna emmnu li Ġesù “huwa tassew il-Kristu, is-Salvatur tad-dinja.” Kristu imministra persuna persuna; b’hekk oħrajn saru d-dixxipli devoti tiegħu.

Aħna nitgħallmu dwar il-qawwa li għandna meta nimministraw persuna persuna bil-kompassjoni mill-Appostli ta’ Kristu Pietru u Ġwanni. Tiftakru r-raġel li kien magħtub mit-twelid, li kien jitqiegħed kuljum ħdejn il-bieb tat-tempju biex jitlob għal flus. Dan ir-raġel seta’ ħassu li mhuwiex importanti, waħdu, skuraġġit, u ma jidhirx. Jista’ jkun ħass li ma kienx jappartjeni.

“Pietru qallu, Fidda u deheb ma għandix; imma dak li għandi se nagħtihulek: fl-isem ta’ Ġesù Kristu ta’ Nazaret, imxi!”

Pietru qabad lir-raġel minn idu l-leminija, refgħu, u r-raġel fieq. Immedjatament wara l-miraklu, ir-raġel daħal ma’ Pietru u Ġwanni fit-tempju, “jimxi u jaqbeż bil-ferħ u jfaħħar lil Alla.” Pietru u Ġwanni mministraw persuna persuna b’mod li jwassal għad-dar tal-Mulej, u dan ir-raġel sar id-dixxiplu devot ta’ Kristu.

Ħbieb tiegħi, kien hemm mumenti f’ħajti fejn jien ukoll ħassejtni mhux importanti, waħdi, skuraġġit, u ma jidhirx. Ħassejtni qisni ma kontx nappartjeni. Jiena ġejt mgħammed u kkonfermat bħala membru tal-Knisja ta’ Ġesù Kristu tal-Qaddisin tal-Aħħar Żmien meta kelli 19-il sena. Sena wara, aċċettajt is-sejħa biex inservi bħala missjunarju full-time, iżda kien hemm ħafna li kont għadni ma tgħallimtx dwar l-istorja tal-Knisja.

Fil-bidu tas-servizz missjunarju tiegħi, tgħallimt li kien hemm żmien meta dawk ta’ dixxendenza Afrikana Sewda ma setgħux igawdu l-barkiet kollha tal-qima fid-dar tal-Mulej. Din l-aħbar laqtitni bil-qawwa u ġabet miegħha sentimenti ta’ rabja, dubju u biża’. Il-konfużjoni u l-uġigħ kienu tant kbar li għal perjodu ma stajtx inħoss il-gwida tal-Ispirtu s-Santu.

Fortunatament, il-kollega missjunarju tiegħi kien mill-aqwa, Kevin Vick, li qdieni b’imħabba, paċenzja u ġentilezza. Kull filgħaxija, hekk kif kien jinduna bit-tħassib u d-dubju li kont inħoss, kien jgħidli b’sempliċità, “Presbiteru Johnson, inħobbok.” Wara xi ġimgħatejn, ħallejt lili nnifsi nħoss l-imħabba ta’ Kevin. Ksibt il-kuraġġ li nitlob lil Missierna fis-Smewwiet f’isem Ġesù Kristu. Hekk kif tlabt, ġejt miġbud lejn is-sezzjoni 6 tad-Duttrina u Patti, versi 21–23, li jiddikjaraw:

“Araw, Jiena Ġesù Kristu, Bin Alla. … Huwa “d-dawl li jiddi fid-dlam. …

‘ … Ftakar fil-lejl li fih tlabtni fil-fond ta’ qalbek, biex inti tkun taf dwar il-verità ta’ dan kollu.

“Ma wassaltlekx jiena l-paċi f’moħħok dwar din il-ħaġa? Jista’ jkollok xhieda akbar mix-xhieda ta’ Alla?”

Hekk kif bdejt naqra, ftakart. Ftakart fil-jum meta kont somt u tlabt biex insir naf li l-Ktieb ta’ Mormon huwa l-kelma ta’ Alla u li Joseph Smith hu l-Profeta tar-Restawrazzjoni. Ftakart fil-patti li għamilt fid-dar tal-Mulej, li jgħaqqduni ma’ Ġesù Kristu b’mod personali u profond. Ħassejt l-imħabba tas-Salvatur, il-ħniena tiegħu, u l-assigurazzjoni tiegħu li l-Knisja ta’ Ġesù Kristu tal-Qaddisin tal-Aħħar Żmien hija s-saltna tiegħu fid-dinja u hija meħtieġa biex tħejjina għat-Tieni Miġja tiegħu. Peress li ftakart, erġajt stajt nagħraf l-Ispirtu s-Santu u nifhem b’mod aktar sħiħ li Ġesù huwa l-Kristu u jien id-dixxiplu tiegħu.

Xi kultant se jkollna mistoqsijiet bla tweġiba u sentimenti li m’aħniex importanti, skuraġġiti, waħedna, u li ma narawx. Madankollu, ħbieb tiegħi, irridu nimxu ’l quddiem bil-fidi f’Ġesù Kristu u niftakru kliemu:

“Tħallux qalbkom titħawwad.”

Fid-dinja tbatu jkollkom. Iżda agħmlu l-qalb: jiena rbaħt id-dinja.”

Jiena xhieda ta’ din ir-realtà u tal-barka mwiegħda tas-Salvatur.

X’passi nistgħu nieħdu biex il-mod kif insegwu s-Salvatur fil-ministeru tagħna jkun l-aktar ta’ frott? Li ngħixu d-duttrina ta’ Kristu se jgħinna. “Li ngħixu d-duttrina ta’ Kristu” kif iddeskriva l-President Nelson, “jista’ jipproduċielna l-aktar ċiklu qawwi u virtuż, li joħolqilna dik l-ispinta spiritwali f’ħajjitna.

“Hekk kif nagħmlu li nistgħu biex ngħixu l-ogħla liġijiet ta’ Ġesù Kristu … is-Salvatur jgħollina ’l fuq mill-ġibda ta’ din id-dinja mitlufa billi jberikna b’aktar karità, umiltà, ġenerożità, tjubija, awtodixxiplina, paċi, u mistrieħ.”

“[Din] l-ispinta [spiritwali] pprodutt meta ngħixu d-duttrina ta’ Kristu” kif jispjega l-Presbiteru Dale G. Renlund, “mhux biss isaħħaħ it-trasformazzjoni tan-natura divina tagħna fid-destin etern tagħna iżda jimmotivana wkoll biex ngħinu lill-oħrajn b’modi xierqa.” Il-Presbiteru Renlund ifakkarna li “l-ħidma tas-Salvatur hi li jfejjaqna [biex jagħmilna sħaħ]. Xogħolna hu li nħobbu—li nħobbu u naqdu b’tali mod li oħrajn jersqu lejn Ġesù Kristu.”

Meta nqattgħu ħin kuljum fl-istudju tal-Ktieb ta’ Mormon u nieħdu s-sagrament kull ġimgħa, inkomplu nissaħħu fil-ħila tagħna li ngħixu d-duttrina ta’ Kristu. Il-President Nelson iddikjara li l-Ktieb ta’ Mormon “jgħallem id-duttrina ta’ Kristu … [u] jipprovdi l-aktar għarfien sħiħ u awtorevoli tal-Espjazzjoni ta’ Ġesù Kristu li aħna nistgħu nsibu fost il-kotba kollha tal-iskrittura.” Jiena nħobb dan il-ktieb. U jekk bl-għajnuna tat-talb nieħdu sehem fl-ordinanza tas-sagrament kull ġimgħa nżidu l-għarfien tagħna tal-Espjazzjoni ta’ Ġesù Kristu u nipprovdu tiġdid spiritwali, faraġ u l-qawwa tad-divinità f’ħajjitna. Ftakru, “fl-ordinanzi [tas-saċerdozju], tidher il-qawwa tad-divinità” u din il-qawwa li tiġi mingħand Ġesù Kristu ssaħħaħ ix-xewqa tagħna u l-abbiltà tagħna li nimministraw persuna persuna.

L-istudju tiegħi tal-Ktieb ta’ Mormon u it-teħid fis-sagrament inaqqsu s-sentimenti ta’ skoraġġiment, iżidu d-determinazzjoni tiegħi li nimministra lil min qiegħed fit-triq tas-Salvatur, u jgħinuni nagħmel id-dixxipulat l-ogħla prijorità tiegħi.

Ħbieb tiegħi, nwegħidkom li hekk kif ngħixu d-duttrina ta’ Kristu u nimministraw persuna persuna b’mod li jwassal għad-dar tal-Mulej, nibqgħu mexjin ’il quddiem b’fidi f’Ġesù Kristu anke fost mistoqsijiet bla tweġiba u sentimenti ta’ innoċenza, waħedna, skuraġġiti u li ma nkunux naraw. Hekk kif niministraw persuna persuna, nistednuhom biex jersqu lejn Ġesù Kristu u jqimu fid-dar tal-Mulej ħalli jirċievu l-qawwa u l-imħabba feddejja tiegħu. Fid-dar tal-Mulej, aħna se “nħossu l-ħniena [tas-Salvatur]. [Aħna] se nsibu tweġiba għall-aktar mistoqsijiet frustranti [tagħna]. [U aħna ] nibdew nifhmu aħjar l-hena tal-evanġelju tiegħu. F’isem Ġesù Kristu, ammen.