Ħares lejn Alla u Għix

Ġunju li għadda, seħħ aċċident terribbli fil-Lesotho, pajjiż fin-nofsinhar tal-Afrika. Kien jinvolvi xarabank żgħira li kienet qed iġġorr 20 tfajla mill-Fergħa tal-Knisja ta’ Maputsoe u seba’ mexxejja tagħhom li kienu qed isuqu lejn il-belt kapitali, Maseru, għal laqgħa tat-tfajliet mid-distrett tagħhom. Hekk kif huma kienu qed isuqu fl-awtostrada b’żewġ korsiji, fis-sigħat bikrin ta’ filgħodu, karozza li kienet ġejja mid-direzzjoni opposta, biex tipprova taqbeż vettura oħra, spiċċat fil-korsija fejn kien hemm ix-xarabank. Ma kienx hemm spazju jew ħin biex tiġi evitata l-ħabta bejn iż-żewġ vetturi, u fi ftit sekondi biss, il-vetturi ħabtu f’xulxin, baqgħu ħerġin ’il barra mit-triq, u spiċċaw ħuġġieġa nar.

B’kollox, fl-aċċident mietu 15-il ruħ, fosthom sitt tfajliet, żewġ mexxejja tat-Tfajliet, u l-president tal-fergħa u martu. Dawk li baqgħu ħajjin, il-membri tal-familja, u l-ħbieb esprimew emozzjonijiet diversi, fosthom mumenti ta’ rabja, dipressjoni, anke ħtija. Minkejja dawn is-sentimenti u mistoqsijiet mhux imwieġba, huma sabu l-faraġ f’xulxin u daru lejn Alla permezz tal-mużika sagra, l-iskrittura, u t-talb, li fihom sabu s-serħan. Setso’ana Selebeli, tfajla ta’ sbatax-il sena li baqgħet ħajja qalet, “Ġesù Kristu jħobbna u jinsab magħna, minkejja l-qalb muġugħa tagħna.”

Waħda tfajla u waħda mill-mexxejja li spiċċaw l-isptar inħabba ħruq bdew jistudjaw il-Ktieb ta’ Mormon flimkien. Waħda minnhom qalet, “Dan l-aħħar, konna qed naqraw Moroni, u Moroni jgħid eżattament dak li ħassejt ġewwa fija. … Meta jitkellem, bħallikieku qed jgħidli, ‘Jeħtieġ li titgħallem dan il-kliem għax huwa miktub għalik biex jgħinek f’dak li għaddejja minnu.”

F’servizz tal-funeral konġunt għal dawk li mietu, is-Sebgħin Reġjonali l-Presbiteru Siyabonga Mkhize ta dan il-parir, “Għandna lkoll induru lejn il-Mulej f’dan il-mument u nitolbuh sabiex ifarraġ qalbna u … jtaffi l-uġigħ li qed inħossu.” Mampho Makura, il-president tat-Tfajliet mill-Fergħa ta’ Leribe, li tinsab fil-qrib, saħqet: “Duru lejn il-Mulej, u ssibu l-qawwa li taċċettaw ir-rieda tiegħu. Ġesù Kristu huwa ‘Dak ‘li minnu tibda u fih tintemm il-fidi tagħna’ [Lhud 12:2]. Tagħtuhx daharkom iżda duru lejh.”

Duru lejh. Kliemha jfakkarna fil-parir li Alma ta lil ibnu Ħelaman: “Ara li tħares lejn Alla u tgħix.” Alma kkwota l-esperjenza ta’ Leħi u l-poplu tiegħu bil-Liahona bħala raffigurazzjoni: “Għax ara, huwa daqstant faċli li tagħti widen għall-kelma ta’ Kristu, li turik rotta dritta lejn l-hena ta’ dejjem, bħal meta missirijietna taw widen għal din il-boxxla, li kienet turihom rotta dritta lejn l-art imwiegħda.” Alma qal: “Jekk huma jħarsu lejh huma jgħixu. … U jekk aħna … nħarsu lejh aħna nistgħu ngħixu għal dejjem.”

F’okkażjoni oħra, Alla kkwota l-eżempju tas-serp tal-bronż li ġie mgħolli minn Mosè meta l-Iżraelin tal-qedem marru jżuruhom is-sriep velenużi. Il-Mulej qal lil Mosè biex jagħmel figura ta’ serp u jgħollih fuq arblu bil-wegħda li “kull min jingidem u jħares lejh ifiq u jgħix.” Alma spjega li l-figura tal-bronż kienet raffigurazzjoni jew simbolu ta’ Kristu li kien se jiġi mgħolli fuq salib. Kienu bosta li ħarsu u baqgħew ħajjin, iżda oħrajn, fi kliem Alma, “tant webbsu qalbhom” li sempliċiment ma ridux iħarsu u spiċċaw inqerdu.

Alma staqsa:

“Li kieku intom tistgħu tfiequ billi sempliċiment tħarsu ħarsa b’għajnejkom ħalli tkunu tistgħu tfiequ, intom ma taqbdux u tagħmlu dan fil-pront, jew tippreferu li twebbsu qalbkom u tibqgħu ma temmnux, u taqgħu fil-għażż, u b’għajnejkom ma tħarsux, u tispiċċaw tinqerdu?

“… Mela araw li tħarsu b’għajnejkom u tibdew temmnu fl-Iben ta’ Alla, li hu għandu jiġi biex jifdi lill-poplu tiegħu, u li se jbati u jmut biex ipatti għal dnubiethom; u li huwa se jerġa’ jqum mill-imwiet, u dan se jġib fis-seħħ il-qawmien, fejn il-bnedmin kollha sejrin jieqfu quddiemu, biex f’jum il-ħaqq finali jsir ħaqq minnhom skont għemilhom.”

Bla dubju, il-parir “ħares lejn Alla u għix” għandu tifsira għalina mhux biss fl-eternità, iżda wkoll jagħmel id-differenza kollha fil-karattru u l-kwalità tal-ħajja mortali tagħna. Ftakru fil-kliem taż-żagħżugħa Sister Selebeli mil-Lesotho li diġà semmejt qabel—“Ġesù Kristu jħobbna u jinsab magħna, minkejja l-qalb muġugħa tagħna.”

Huwa fin-natura ta’ dinja mitlufa—fejn ix-xitan jitmasħan u kulħadd huwa imperfett—li jkun hemm id-diżappunt u l-offiżi, it-tbatija u n-niket, il-falliment u t-telfien, il-persekuzzjoni u l-inġustizzja. Huwa biss billi nħarsu lejn Alla li l-individwi, il-familji, u anke l-ġnus jistgħu jiffjorixxu. Il-President Russell M. Nelson għallem, “Peress li s-Salvatur, permezz tal-Espjazzjoni infinita tiegħu, feda lil kull wieħed u waħda minna mid-dgħufija, mill-iżbalji, u mid-dnub, u peress li Huwa esperjenza kull uġigħ, inkwiet, u tagħbija li intom qatt esperjenzajtu [ara Alma 7:11–13], mela, hekk kif intom verament tindmu u tfittxu l-għajnuna tiegħu, intom tkunu tistgħu tegħlbu din id-dinja prekarja ta’ żmienna.”

M’hemmx wegħda li smajniha aktar fl-iskrittura tal-Ktieb ta’ Mormon minn din: “Diment li intom tħarsu l-kmandamenti tiegħi intom ikollkom ir-risq f’artkom; imma jekk ma tħarsux il-kmandamenti tiegħi intom titwarrbu minn quddiemi.” L-esperjenza li għexu bosta nies fil-Ktieb ta’ Mormon tul is-sekli turi l-verità ta’ dan il-kliem. “Li jkollhom ir-risq” ifisser li huma jgawdi l-gwida u l-barkiet tas-smewwiet f’ħajjithom. “Li jkollhom ir-risq” ifisser li jiksbu livelli ta’ ġid ekonomiku li jagħtikom iċ-ċans li jiżżewġu, irabbu l-familji, u li jaqdu lil ħaddieħor skont il-bżonnijiet tagħhom. “Li jkollhom ir-risq” tinkludi wkoll l-kapaċità li jibqgħu għaddejjin minkejja t-tbatija u l-isfidi. Permezz tal-grazzja ta’ Kristu, “kollox seħħ għall-ġid tagħhom,” irraffinahom, u saħħaħ ir-relazzjoni tagħhom miegħu.

Alma spjega li aħna nduru lejn Alla meta nħarsu l-kmandamenti tiegħu, insejħulu kontinwament għall-għajnuna tiegħu, nieħdu parir mingħandu f’dak kollu li nagħmlu, u naraw li qalbna tkun mimlija gratitudni lejh lejl u nhar. Il-kmandamenti u l-pariri ta’ Alla nsibuhom fl-iskrittura u fil-kliem tal-qaddejja tiegħu. Il-prinċipji u l-ideal li nsibu f’“Il-Familja: Proklamazzjoni lid-Dinja” huma eżempju ċar. L-istess nistgħu ngħidu għall-gwida li nsibu fil-fuljett Għas-Sodizza taż-Żgħażagħ. It-tema tal-Ġuvintur u t-Tfajliet għal din is-sena hija “Ħarsu lejn Kristu,” meħuda mid-direzzjoni kollha faraġ tal-Mulej lil Joseph Smith u Oliver Cowdery: “Ħarsu lejja f’kull ħsieb; tiddubitawx, tibżgħux.” Għas-Sodizza taż-Żgħażagħ jitkellem dwar bosta mill-kmandamenti u l-istandards l-aktar urġenti ta’ Alla u jgħallimna kif nistgħu nħarsu lejn il-Mulej biex nieħdu deċiżjonijiet tajbin. Hija gwida mhux biss għaż-żgħażagħ iżda għalina lkoll.

Bħala eżempju mill-aktar importanti, Għas-Sodizza taż-Żgħażagħ jinkludi gwida mill-aktar kruċjali fil-kapitlu li jġib l-isem “Ġismek Huwa Sagru.” Huwa jgħid: “Uri rispett lejn ġismek—u lejn ġisem ħaddieħor. Hekk kif tiddeċiedi dwar l-ilbies, l-istil tax-xagħar, u d-dehra tiegħek, staqsi lilek innifsek, ‘Qiegħed jiena nonora ġisem bħala rigal sagru mingħand Alla?’”

Għas-Sodizza taż-Żgħażagħ ikompli jgħid: “Ara li għalik is-sess u s-sentimenti sesswali jkunu ħaġa sagra. M’għandhomx ikunu suġġett għad-daħq jew għad-divertiment. Barra miż-żwieġ bejn raġel u mara, hu ħażin li tmiss il-partijiet privati u sagri ta’ persuna oħra anke jekk tkun liebsa l-ħwejjeġ. Fl-għażliet tiegħek dwar x’għandek tagħmel, lejn xiex għandek tħares, x’għandek taqra u tisma’, u dwar xiex għandek taħseb, tippostja, jew tibgħat il-messaġġi, evita kull ħaġa li intenzjonalment tqajjem emozzjonijiet senswali f’ħaddieħor jew fik innifsek.”

Dan ifakkarni fi twiddiba li tana m’ilux il-President Nelson:

“Ftit huma l-ħwejjeġ li jikkumplikaw ħajjitkom aktar malajr mill-ksur ta’ din il-liġi divina tal-kastità. Għal dawk fostkom li għamiltu patti ma’ Alla, l-immoralità hi wieħed mill-aktar modi kif tistgħu titilfu malajr it-testimonjanza tagħkom.

“… Il-qawwa li wieħed joħloq il-ħajja huwa dak il-privileġġ tad-divinità li Missierna fis-Smewwiet jippermetti li l-ulied mortali tiegħu jeżerċitaw. B’hekk, Alla għamilha ċara x’inhuma l-linji gwida għall-użu ta’ din il-qawwa ħajja u divina. L-intimità fiżika qegħda biss għal raġel u mara li huma miżżewġin ma’ xulxin.

“Il-biċċa l-kbira tad-dinja ma temminx dan, iżda l-opinjoni pubblika mhijiex l-arbitru tal-verità. Il-Mulej iddikjara li l-ebda persuna li mhijiex safja mhi se tikseb is-saltna ċelestjali. … Jekk intom m’intomx safja, nitlobkom biex tindmu. Ejjew għand Kristu u rċievu l-wegħda tiegħu ta’ maħfra sħiħa hekk kif intom tindmu għal kollox minn dnubietkom [ara Isaija 1:16–18; Doctrine and Covenants 58:42–43].”

Ftakru li fil-wegħda tal-Ktieb ta’ Mormon, l-oppost tal-prosperità ma kienx il-faqar—kien li titbiegħed mill-preżenza tal-Mulej. Il-preżenza tiegħu tirreferi għall-influwenza tal-Ispirtu tiegħu fil-ħajja ta’ dak li jkun. Ilkoll nitwieldu bid-Dawl ta’ Kristu hekk kif niġu fid-dinja. Barra minn hekk, xi wħud jiddeċiedu li jitgħammdu u jirċievu d-don u d-dawl addizzjonali tal-Ispirtu s-Santu. Huwa jagħtina l-ispirazzjoni u l-gwida, ikabbar u jirrafina d-doni u l-abbiltajiet nattivi tagħna, u jgħinna nevitaw l-influwenzi u d-deċiżjonijiet ħżiena u li nsibu rwieħna f’toroq li ma jwasslu għal imkien.

Bħalkom, jien naf xi wħud li kien hemm żmien meta kienu jgawdu d-don tal-Ispirtu s-Santu iżda għax naqsu li jkomplu jħarsu l-kmandamenti ta’ Alla tilfu din il-barka. Jiġi f’moħħi xi ħadd partikolari li tneħħietlu s-sħubija tiegħu mill-Knisja minħabba trasgressjoni. Huwa qal li r-reazzjoni inizjali tiegħu kienet li ħassu offiż. Ħass li kien ġie ġġudikat minn mexxejja mhux perfetti. Kien jaf li l-imġiba tiegħu kienet ħażina, iżda huwa pprova jiskużaha billi jipponta lejn id-difetti u n-nuqqasijiet ta’ ħaddieħor. Wara ftit, huwa beda jħossu komdu li jgħix ħajja lil hinn mill-Knisja mingħajr l-obbligu tas-sejħiet, u l-istennija li jattendi s-servizzi ta’ qima u li jimministra lil ħaddieħor.

Din is-sitwazzjoni kompliet għal xi żmien, iżda aktar ma jmur aktar beda jħoss in-nuqqas tal-Ispirtu s-Santu—il-preżenza ta’ Alla— f’ħajtu. Minn esperjenza, kien jaf xi jfisser li jkollok miegħek, kuljum, il-faraġ, il-gwida, u l-kunfidenza li jagħtik l-Ispirtu, u beda jħoss dan in-nuqqas. Finalment, huwa għamel dak li kien meħtieġ minnu biex jindem, u jikkwalifika għal darb’oħra biex jitgħammed bl-ilma u l-Ispirtu.

Jidher li bħallikieku huma bla qjies is-sorsi li n-nies ifittxu biex jippruvaw isibu l-iskop, il-ferħ u l-għajnuna. Ħafna jinsabu “jħarsu lil hinn mis-sinjal.” Iżda jeħtieġ li ma nkunux “aktar trabi mitfugħin ’l hawn u ’l hemm, u mkaxkra minn kull riħ ta’ tagħlim jew moda.” Meta nħarsu lejn Alla, aħna nistgħu nsibu l-paċi fi żminijiet diffiċli u l-fidi tagħna tista’ tkompli tikber anke f’mumenti ta’ dubju u sfidi spiritwali. Aħna nistgħu nirċievu l-qawwa minkejja l-oppożizzjoni u l-iżolament. Aħna nistgħu nirrekonċiljaw l-ideal mar-realtà tal-preżent. Verament li m’hemmx mod ieħor mill-mod li ordna Alla nnifsu: “Duru lejja mill-ġdid, truf kollha tal-art, u intom tkunu salvi! għax jien hu Alla, u ma hemm ħadd ħliefi.”

Li nħarsu lejn Alla jfisser li Huwa mhuwiex sempliċiment waħda mill-prijoritajiet tagħna; ifisser pjuttost li Huwa hu l-ogħla prijorità tagħna. Infakkarkom għal darb’oħra f’dik il-ħabta kerha ġewwa Lesotho f’Ġunju li għadda. Mis-sodda tagħha fl-isptar, waħda mill-mexxejja tat-Tfajliet li baqgħet ħajja, li qabel ma ngħaqdet mal-Knisja ma kenitx temme f’Alla, qalet li l-għan tagħha llum hu li tiskopri għalfejn hija baqgħet ħajja. “Li nibqa’ nservi lil Alla l-ħin kollu hija t-tweġiba tiegħi llum, jekk ikolli nsib tweġiba,” hija qalet. “Kont naħseb li kont inħobb lil Alla, iżda llum tassew nista’ ngħid li nħobbu mmensament. Illum huwa l-ogħla prijorità f’ħajti.”

Jiena naqsam ix-xhieda tiegħi tal-Missier, l-Iben u l-Ispirtu s-Santu li f’għaqda perfetta fil-kelma, fil-ħsieb, fil-għan, u fl-għemil, huma Alla wieħed li lejhom għandna nħarsu għal kull ħaġa tajba. Jiena naqsam ix-xhieda tiegħi tal-Espjazzjoni ta’ Ġesù Kristu li minnha niksbu l-qawwa biex inwettqu din il-wegħda meraviljuża, “Duru lejja, u ibqgħu sħaħ sal-aħħar, u intom ikollkom il-ħajja; għax lil dak li jibqa’ sħiħ sal-aħħar lilu jiena nagħtih il-ħajja ta’ dejjem.” F’isem Ġesù Kristu, ammen.