Sempliċità fi Kristu

Tlieta u tletin sena ilu, jiena rċevejt is-sejħa tiegħi biex inservi bħala missjunarju fil-Missjoni ta’ Ogden ta’ Utah. M’hemmx dubju, peress li jiena ġejt mill-Ewropa, xi tradizzjonijiet lokali ta’ Utah bħal “green Jell-O with carrots” u “funeral potatoes” kienu xi ftit partikolari għalija!

Madankollu, jiena verament impressjonajt ruħi bid-devozzjoni u d-dixxipulat ta’ ħafna mill-Qaddisin, bin-numru kbir ta’ nies li kienu jattendu l-laqgħat tal-Knisja, u l-iskala tal-programmi tal-Knisja li kienu jiffunzjonaw kompletament. Meta l-missjoni tiegħi waslet fi tmiemha, jien ridt niżgura li l-ferħ li ħassejt u li l-qawwa u l-maturità spiritwali li jiena osservajt għad ikunu disponibbli wkoll għall-familja futura tiegħi. Kont determinat li nerġa’ lura malajr biex ngħix ħajti fid-“dellijiet tal-għoljiet ta’ dejjem.”

Madankollu, il-Mulej kellu pjanijiet differenti. Fl-ewwel Ħadd tiegħi id-dar, l-isqof għaqli tiegħi sejjaħli biex inservi bħala l-president tal-Ġuvintur fil-qasam tagħna. Meta kont qed inservi lil dan il-grupp meraviljuż ta’ ġuvintur, malajr tgħallimt li l-ferħ li tikseb meta tkun dixxiplu ta’ Kristu ftit li xejn għandu x’jaqsam mad-daqs tal-laqgħat tal-Knisja jew bl-iskala tal-programmi.

Għalhekk meta jiena żżewwiġt lill-mara sabiħa tiegħi, Margret, b’ferħ iddeċidejna li nibqgħu fl-Ewropa u nrabbu lill-familja tagħna f’pajjiżna l-Ġermanja. Flimkien assistejna għal dak li l-President Russell M. Nelson għallimna ħafna snin ilu: “Il-ferħ li nħossu ma jiddependix miċ-ċirkustanzi ta’ ħajjitna iżda jiddependi fuq xiex qed niffokaw f’ħajjitna.” Meta aħna niffokaw ħajjitna fuq Kristu u l-messaġġ tal-evanġelju tiegħu, aħna nistgħu nesperjenzaw il-barkiet sħaħ tad-dixxipulat kull fejn ngħixu.

Madankollu, f’dinja li aktar ma tmur aktar qed issir waħda sekulari, kumplessa, u konfuża, permess ta’ messaġġi u domandi differenti u ta’ spiss konfliġġenti, kif nistgħu nevitaw li għajnejna jispiċċaw għomja u qlubna jitwebbsu u jibqgħu ffokati fuq “il-ħwejjeġ sempliċi u prezzjużi” tal-evanġelju ta’ Ġesù Kristu? Fi żmien ta’ konfużjoni, l-Appostlu Pawlu ta parir kbir lill-Qaddisin ta’ Korintu billi fakkarhom biex jiffokaw fuq “is-sempliċità li hemm fi Kristu.”

Id-duttrina ta’ Kristu u l-liġi tal-evanġelju huma tant sempliċi li anke t-tfal ċkejknin ikunu jistgħu jifhmuhom. Aħna nistgħu naċċessaw il-qawwa feddejja ta’ Ġesù Kristu u nirċievu l-barkiet spiritwali kollha li Missierna fis-Smewwiet ħejja għalina billi neżerċitaw il-fidi tagħna f’Ġesù Kristu, nindmu, nitgħammdu, nitqaddsu permezz tad-don tal-Ispirtu s-Santu, u nibqgħu sodi sat-tmiem. Il-President Nelson iddeskriva dan il-vjaġġ b’mod tant sabiħ bħala “it-triq tal-patt” u l-proċess li nsiru “dixxipli devoti ta’ Ġesù Kristu.”

Jekk dan il-messaġġ huwa daqshekk sempliċi, għalfejn ħafna drabi jkun ta’ sfida li ngħixu l-liġi ta’ Kristu u nimxu wara l-eżempju tiegħu? Jista jkun li aħna ninterpretaw ħażin is-sempliċità bħala xi ħaġa li faċli niksbuha mingħajr ebda sforz jew diliġenza. Li nimxu wara Kristu jeħtieġ sforz kontinwu u bidla kontinwa. Jeħtieġ li aħna “ninżgħu minn fuqna l-bniedem naturali u nsiru bħat-tfal ċkejknin.” Dan jinkludi li npoġġu l-“fiduċja fil-Mulej” u li nħallu l-kumplessità tmur, l-istess kif jagħmlu t-tfal ċkejknin. Li napplikaw id-duttrina pura ta’ Kristu b’mod simplifikat u ffukat jgħinna nsibu l-ferħ fil-ħajja tagħna ta’ kuljum, nagħtu gwida fis-sejħiet tagħna, inwieġbu wħud mill-aktar mistoqsijiet kumplessi tal-ħajja, u nipprovdu l-qawwa biex niffaċċjaw l-akbar sfidi tagħna.

Iżda kif nistgħu prattikament nimplimentaw din is-sempliċità fil-vjaġġ tagħna tul ħajjitna bħala dixxipli ta’ Kristu? Il-President Nelson fakkarna biex niffokaw fuq “verità safja, duttrina safja, u rivelazzjoni safja” hekk kif infittxu li nimxu wara s-Salvatur. Li nistaqsu regolarment, “X’iridni nagħmel il-Mulej Ġesù Kristu?” jiżvela direzzjoni profonda. Li nimxu wara l-eżempju tiegħu jipprovdilna triq sigura qalb l-inċertezza u id ta’ gwida u ta’ mħabba biex tiggwidana minn jum għall-ieħor. Huwa l-Prinċep tal-Paċi u r-Ragħaj it-Tajjeb. Huwa l-Farraġ u l-Ħellies tagħna. Huwa l-Blata u r-Refuġju tagħna. Huwa Ħabib—il-ħabib tagħkom u l-ħabib tiegħi! Huwa jistedinna lkoll biex inħobbu lil Alla, inħarsu l-kmandamenti tiegħu, u nħobbu lil għajrna.

Hekk kif nagħżlu li nimxu wara l-eżempju tiegħu u nimxu ’l quddiem b’fidi fi Kristu, inħaddnu l-qawwa tal-Espjazzjoni Tiegħu, u niftakru fil-patti tagħna, l-imħabba timla qalbna, it-tama u l-fejqan jgħollu l-ispirti tagħna, u l-imrar u n-niket jinbidlu fi gratitudni u l-paċenzja li nistennew għall-barkiet imwiegħda. Xi kultant, jista’ jkun li jkollna bżonn inbiegħdu lilna nfusna minn sitwazzjoni mhux sana jew infittxu l-għajnuna professjonali. Iżda f’kull każ, l-applikazzjoni ta’ prinċipji sempliċi tal-evanġelju tgħinna ninnavigaw dawn l-isfidi bil-mod li jrid il-Mulej.

Xi kultant aħna nissottovalutaw il-qawwa li nirċievu permezz ta’ għemejjel sempliċi bħat-talb, is-sawm, l-istudju tal-iskrittura, l-indiema ta’ kuljum, li kull ġimgħa nieħdu sehem fis-sagrament, u l-attendenza regolari fid-dar tal-Mulej. Iżda meta nagħrfu li m’għandniex għalfejn “nagħmlu xi ħaġa kbira” u niċċentraw irwieħna fuq duttrina pura u sempliċi, aħna nibdew naraw kif l-evanġelju “jaħdem b’mod meraviljuż” għalina, anke fl-aktar ċirkustanzi diffiċli. Aħna nsibu l-qawwa u ‘l-kunfidenza quddiem Alla,” anke meta nesperjenzaw uġigħ il-qalb. Il-Presbiteru M. Russell Ballard fakkarna bosta drabi, “Huwa f’dik is-sempliċità li [aħna] nsibu … paċi, hena, u l-kuntentizza.”

Li napplikaw is-sempliċità li hemm fi Kristu jagħmilna nipprijoritizzaw lin-nies fuq il-proċessi u lir-relazzjonijiet eterni fuq mġiba għal żmien qasir. Aħna niffokaw fuq “l-aktar ħwejjeġ importanti” fil-ħidma ta’ Alla tas-salvazzjoni u l-eżaltazzjoni minflok ma ninqabdu fil-ġestjoni tal-ministeru tagħna. Aħna nħallu lilna nfusna nipprijoritizzaw il-ħwejjeġ li aħna nistgħu nagħmlu minflok ma nkunu mgħobbija bil-ħwejjeġ li ma nistgħux nagħmlu. Il-Mulej fakkarna: “Għalhekk, qatt tieqfu tagħmlu t-tajjeb, għaliex intom qed tibnu l-pedament ta’ ħidma mill-aqwa. U minn ħwejjeġ żgħar joħorġu ħwejjeġ kbar.” X’inkuraġġiment qawwi biex naġixxu fis-sempliċità u l-umiltà, huma x’inhuma ċ-ċirkustanzi tagħna.

In-nanna tiegħi Marta Cziesla kienet eżempju mill-isbaħ ta’ xi ħadd li jagħmel “ħwejjeġ żgħar u sempliċi“ biex iġib fis-seħħ ħwejjeġ kbar. B’imħabba konna nsejħulha Oma Cziesla. Oma ħaddnet l-evanġelju fir-raħal żgħir ta’ Selbongen fil-Prussja tal-Lvant flimkien mal-bużnanna tiegħi fit-30 ta’ Mejju, 1926.

Marta Cziesla (lemin) fil-jum tal-magħmudija tagħha.

Hija kienet tħobb lill-Mulej u l-evanġelju tiegħu u kienet determinata li żżomm il-patti li kienet għamlet. Fl-1930 hija żżewġet lin-nannu tiegħi, li ma kienx membru tal-Knisja. F’dan il-mument kien sar impossibbli għal Oma li tattendi l-laqgħat tal-Knisja, għaliex ir-razzett tan-nannu tiegħi kien wisq ’il bogħod mill-eqreb kongregazzjoni. Iżda hija ffokat fuq dak li setgħet tagħmel. Oma kompliet titlob, taqra l-iskrittura, u tkanta l-għanjiet ta’ Sijon.

Xi nies setgħu ħasbu li hi ma baqgħetx aktar attiva fil-fidi tagħha, iżda dan kien ’il bogħod mill-verità. Meta ziti u missieri twieldu, mingħajr ebda saċerdozju fid-dar u mingħajr l-ebda laqgħat tal-Knisja jew aċċess għall-ordinanzi viċin, hija reġgħet għamlet dak li setgħet u ffokat fuq li tgħallem lil uliedha “biex jitolbu, u jimxu b’mod dritt quddiem il-Mulej.” Hija qratilhom mill-iskrittura, kantat magħhom l-għanjiet ta’ Sijon, u ovvjamnent talbet magħhom—kuljum. Kienet esperjenza tal-Knisja kollha kemm hi ċċentrata madwar id-dar.

Fl-1945, in-nannu tiegħi kien qed iservi fil-gwerra ’l bogħod mid-dar. Meta l-għedewwa waslu qrib ir-razzett tagħhom, Oma ħadet iż-żewġ uliedha u telqet ir-razzett maħbub tagħhom biex ifittxu refuġju f’post aktar sigur. Wara vjaġġ diffiċli u ta’ periklu għall-ħajja, huma finalment sabu refuġju f’Mejju tal-1945 fit-tramuntana tal-Ġermanja. Ma kellhom xejn ħlief il-ħwejjeġ li kellhom fuqhom. Iżda Oma kompliet tagħmel dak li kienet kapaċi tagħmel: hija talbet ma’ wliedha—kuljum. Hija kantat magħhom l-għanjiet ta’ Sijon li kienet tgħallmet bl-amment—kuljum.

Il-ħajja kienet mill-aktar diffiċli, u għal ħafna snin l-iktar importanti kien l-assigurazzjoni li jkun hemm l-ikel fuq il-mejda. Iżda fl-1955 missieri, li dak iż-żmien kellu 17-il sena, kien sejjer l-iskola tas-snajja’ fil-belt ta’ Rendsburg. Huwa mexa maġenb bini u ra fuq in-naħa ta’ barra sinjal żgħir li kien jgħid “Kirche Jesu Christi der Heiligen der Letzten Tage”— “Il-Knisja ta’ Ġesù Kristu tal-Qaddisin tal-Aħħar Żmien.” Huwa ħaseb, “Din hi ħaġa mill-aktar interessanti; din hi l-knisja ta’ Ommi.” Għalhekk, meta ġie d-dar, huwa qal lil Oma li kien sab il-knisja tagħha.

Tistgħu timmaġinaw kif ħassitha wara kważi 25 sena mingħajr kuntatt mal-Knisja. Hija kienet determinata li tattendi l-Ħadd ta’ wara u kkonvinċiet lil missieri biex jakkumpanjaha. Rendsburg kien aktar minn 20 mil ’il bogħod mir-raħal żgħir fejn kienu jgħixu. Iżda dan ma kienx se jżomm lil Oma milli tattendi l-knisja. Il-Ħadd ta’ wara, hija rikbet ir-rota tagħha flimkien ma’ missieri u saqet lejn il-knisja.

Meta bdiet il-laqgħa tas-sagrament, missieri poġġa bilqiegħda fl-aħħar ringiela, fejn kien qed jittama li l-laqgħa ma kinitx ser iddum. Din kienet il-knisja ta’ Oma u mhux tiegħu. Dak li ra ma kienx verament inkuraġġanti: kienu biss ftit nisa mdaħħlin fiż-żmien fl-attendenza u żewġ missjunarji żgħażagħ li effettivament għamlu kollox fil-laqgħa. Iżda mbagħad huma bdew ikantaw, u kantaw l-għanjiet ta’ Sijon li missieri kien sema’ sa minn meta kien għadu tifel ċkejken: “Ejjew, Qaddisin,” “O Missieri,” “Tifħir lill-Bniedem.” Din il-merħla ċkejkna tkanta l-għanjiet ta’ Sijon li huwa kien jaf sa mit-tfulija nifditlu qalbu, u hu kien jaf immedjatament u mingħajr dubju li l-Knisja kienet il-waħda vera.

L-ewwel laqgħa tas-sagrament li attendiet in-nanna tiegħi wara 25 sena kienet il-laqgħa li fiha missieri rċieva konferma personali tal-verità tal-evanġelju rrestawrat ta’ Ġesù Kristu. Huwa tgħammed tliet ġimgħat wara fil-25 ta’ Settembru, 1955, flimkien man-nannu tiegħi u z-zija tiegħi.

Għaddew aktar minn 70 sena minn dik il-laqgħa żgħira tas-sagrament f’Rendsburg. Spiss naħseb dwar Oma, kif setgħet ħassitha f’dawk l-iljieli waħedha, tagħmel il-ħwejjeġ żgħar u sempliċi li kienet kapaċi tagħmel, bħat-talb, il-qari, u l-kant. Hekk kif illum qed nieqaf hawn fil-konferenza ġenerali u nitkellem dwar Oma tiegħi, id-determinazzjoni tagħha li żżomm il-patti u l-fiduċja tagħha fil-Mulej minkejja t-tbatija tagħha jimlewli qalbi b’umiltà u gratitudni—mhux biss għaliha iżda għal ħafna mill-Qaddisin meraviljużi tagħna madwar id-dinja li jiffokaw fuq is-sempliċità fi Kristu fiċ-ċirkustanzi diffiċli tagħhom, li jista’ jkun li bħalissa jaraw bidla żgħira iżda xorta jafdaw li fil-futur se jesperjenzaw ħwejjeġ kbar.

Jiena tgħallimt permezz tal-esperjenza tiegħi li l-ħwejjeġ żgħar u sempliċi tal-evanġelju u li b’fedeltà niffokaw fuq Kristu jwassluna għal ferħ veru, iwassluna għal mirakli setgħana, u jagħtuna l-kunfidenza li l-barkiet kollha mwiegħda se jiġu fis-seħħ. Dan huwa minnu għalikom daqs kemm hu veru għalija. Fi klien il-Presbiteru Jeffrey R. Holland, “Xi barkiet niksbuhom fi żmien qasir, oħrajn jaslu aktar tard, u xi oħrajn irridu nistennew sakemm inkunu fis-smewwiet; iżda għal dawk li jħaddnu l-evanġelju ta’ Ġesù Kristu, jaslu żgur.” Dwar dan jiena nixhed f’isem Ġesù Kristu, ammen.