Ħadd M’Għandu Joqgħod Bilqiegħda Waħdu

Jien għaddejt 50 sena nistudja l-kultura, inkluż il-kultura tal-evanġelju. Il-bidu tiegħi kien permezz tal-gallettini tal-fortuna.

F’Chinatown ġewwa San Francisco, l-ikla tal-familja Gong kienet tinkludi l-gallettina tal-fortuna u qawl mimli għerf bħal “Vjaġġ ta’ elf mil jibda permezz ta’ pass wieħed.”

Meta kont għadni daqsxejn ta’ ġuvni, jiena kont nagħmel il-gallettini tal-fortuna. B’ingwanti bojod tal-qoton, jiena kont nitwi u nifforma l-gallettini tondi li jkunu għadhom kif ħarġu mill-forn.

Kont sorpriż ħafna meta tgħallimt li l-gallettini tal-fortuna mhumiex oriġinalment parti mill-kultura Ċiniża. Biex niddistingwi l-kultura tal-gallettini tal-fortuna Ċiniżi, Amerikani u Ewropej, jiena bdejt infittex dwar il-gallettini tal-fortuna fuq diversi kontinenti—l-istess kif wieħed juża postijiet diversi biex jara minfejn ikun ġej in-nar ta’ foresta. Ir-restoranti Ċiniżi f’San Francisco, f’Los Angeles, u fi New York ilkoll iservu l-gallettini tal-fortuna, iżda mhux l-istess nistgħu ngħidu għal dawk f’Beijing, f’Londra, jew f’Sydney. Huma l-Amerikani biss li jiċċelebraw il-Jum Nazzjonali tal-Gallettina tal-Fortuna. Huma biss ir-riklami Ċiniżi li joffru “Gallettini tal-Fortuna Awtentiċi Amerikani.”

Il-gallettini tal-fortuna huma eżempju sabiħ u sempliċi. Iżda l-istess prinċipju li nqabblu d-drawwiet kulturali f’ambjenti differenti jistgħu jgħinuna niddistingwu l-kultura tal-evanġelju. U issa l-Mulej qed jiftħilna opportunitajiet ġodda biex nitgħallmu l-kultura tal-evanġelju hekk kif l-allegorija tal-Ktieb ta’ Mormon u l-profeziji tal-parabboli tat-Testment il-Ġdid qed jiġu fis-seħħ.

In-nies qegħdin jemigraw mad-dinja kollha. Il-Ġnus Magħquda tirrapporta li fid-dinja hawn 281 miljun immigrant. Jiġifieri 128 miljun aktar milli kien hawn fl-1990, u aktar minn tliet darbiet milli jaħsbu li kien hawn fl-1970. Ma’ kullimkien, numru rekord ta’ membri ġodda qed isibu l-Knista ta’ Ġesù Kristu tal-Qaddisin tal-Aħħar Żmien. Kull Jum il-Mulej, membri u ħbieb minn 195 pajjiż u territorju tat-twelid differenti qed jinġabru flimkien f’31, 916 kongregazzjoni tal-Knisja. Aħna nitkellmu125 lingwa differenti.

M’ilux, fl-Albanija, fil-Maċedonja ta’ Fuq, fil-Kosovo, fl-Isvizzera, u fil-Ġermanja jiena rajt b’għajnejja membri ġodda jġibu fis-seħħ l-allegorija tas-siġra taż-żebbuġ li nsibu fil-Ktieb ta’ Mormon. F’ Ġakobb 5, Sid l-għalqa u l-qaddejja tiegħu jsaħħu kemm l-għeruq tas-siġra taż-żebbuġ kif ukoll il-friegħi billi jiġbu flimkien u jlaqqmu dawk li ġejjin minn postijiet differenti. Illum, ulied Alla jinsabu miġburin flimkien f’Ġesù Kristu; il-Mulej joffrilna mezz naturali tal-għaġeb kif nistgħu nespandu l-milja li aħna ngħixu tal-evanġelju rrestawrat tiegħu.

Biex iħejjina għas-saltna tas-smewwiet, Ġesù jgħidilna l-parabboli tal-pranzu l-kbir u tal-festa tat-tieġ. F’dawn il-parabboli, il-mistednin iġibu ċerti skużi biex ma jattendux. L-imgħallem jordna lill-qaddejja tiegħu “Ħaffu, oħorġu fil-pjazez u t-triqat tal-belt” u “fil-mogħdijiet u fl-għelieqi” u “daħħlu hawn” il-foqra u l-magħtuba u l-għomja u z-zopop. Mill-perspettiva spiritwali, dawn jirrappreżentaw lilna lkoll.

L-iskrittura tiddikjara:

“Se jkunu mistiedna l-ġnus kollha” għal “ikla fid-dar tal-Mulej.”

“Ħejju t-triq tal-Mulej, … sabiex is-saltna tiegħu tinfirex fuq l-art, ħalli dawk li jgħammru fiha jkunu jistgħu jilqgħuha, u jitħejjew għaż-żmien li ġej.”

Illum, dawk li huma mistiedna għall-ikla tal-Mulej ġejjin minn kull pajjiż u kultura. Xjuħ u żgħar, għonja u fqar, lokali u globali, aħna nagħmlu l-kongregazzjonijiet tal-Knisja tagħna bħallikieku huma l-komunitajiet tagħna.

Bħala l-Appostlu ewlieni, Pietru ra s-smewwiet jinfetħu f’dehra ta’ “liżar kbir, miżmum mill-erbat itruf … li fih kien hemm kull xorta ta’ … bhejjem.” Pietru għallem: “Issa tassew qiegħed nifhem li Alla ma jħares lejn wiċċ ħadd. Imma jilqa’ lil kull min għandu l-biża’ tiegħu u jagħmel is-sewwa, ikun minn liema poplu jkun.”

Fil-parabbola tas-Samaritan it-Tajjeb, Ġesù jistedinna biex nersqu lejn xulxin u lejh fil-lukanda tiegħu—il-Knisja tiegħu. Iridna nkunu ġirien tajbin ta’ xulxin. Is-Samaritan it-Tajjeb iwiegħed li jerġa’ lura u jrodd lura għall-kura ta’ dawk li jinsabu fil-lukanda tiegħu. Li ngħixu l-evanġelju ta’ Ġesù Kristu jinkludi li aħna nilqgħu lil kulħadd fil-Knisja rrestawrata tiegħu.

L-ispirtu tal-“kamra fil-lukanda” jinkludi li “ħadd m’għandu joqgħod bilqiegħda waħdu.” Meta tiġu l-knisja, jekk taraw lil xi ħadd waħdu, tistgħu jekk jogħġobkom tintruduċu lilkom infuskom u tpoġġu bilqiegħda miegħu jew magħha? Din taf mhijiex xi ħaġa li ssoltu tagħmlu. Il-persuna taf tidher jew titkellem differenti minnkom. U, bla dubju, kif tgħidilna gallettina tal-fortuna, “Vjaġġ ta’ ħbiberija tal-evanġelju u l-imħabba jibda permezz tal-ewwel introduzzjoni u li ħadd ma joqgħod bilqiegħda waħdu.”

“Li ħadd ma joqgħod bilqiegħda waħdu” ifisser ukoll li ħadd ma joqgħod bilqiegħda waħdu emozzjonalment u spiritwalment. Jiena mort flimkien ma’ missier b’qalbu maqsuma naraw lil ibnu. Snin qabel, ibnu kien mimli entużjażmu li kien għadu kif sar djaknu. F’din l-okkażjoni l-familja tiegħu kienu xtrawlu l-ewwel par żarbun ġdid.

Iżda meta mar il-knisja, id-djakni bdew jiddieħqu bih. Iż-żarbun veur kien ġdid iżda ma kienx tal-moda. Imbarazzat u mweġġa’, id-djaknu żagħżugħ qal li huma qatt aktar ma kien se jmur il-knisja. Għadni nħoss qalbi titnikket għalih u għal familtu.

Fit-toroq imtarrba lejn Ġeriko, ilkoll kemm aħna sibna min jidħaq bina, jimbarazzana u jweġġagħna, u forsi anke min jinsulentana u jabbuża minna. U, fi gradi varji ta’ intenzjoni, ilkoll kemm aħna wkoll ma tajniex każ ħaddieħor u ma smajnihomx, u forsi anke deliberatament weġġajnihom. Huwa sewwasew minħabba li aħna ġejna mweġġgħin u weġġajna lil ħaddieħor li Ġesù Kristu irid idaħħalna lkoll fil-lukanda tiegħu. Fil-knisja tiegħu u permezz tal-ordinanzi u l-patti tiegħu, aħna nersqu lejn xulxin u lejn Ġesù Kristu. Aħna nkunu qed inħobbu u nirċievu l-imħabba lura, inservu u niġu servuti, naħfru u niġu maħfura. Jekk jogħġobkom ftakru, “fid-dinja m’hemm l-ebda niket li s-sema ma tistax tfejqu”; it-toqol tad-dinja jiħfief—l-hena tas-Salvatur tagħna hija vera.

F’ 1 Nefi 19, naqraw: “Anke lill-istess Alla ta’ Iżrael il-bnedmin jgħaffġu taħt saqajhom; … lilu huma jwarrbuh. … Għalhekk huma jagħtuh is-swat, u hu joqgħod għaliha; u jidorbuh, u joqgħod għaliha. Iva, jobżqulu, u joqgħod għaliha.”

Il-ħabib tiegħi, il-Professur Terry Warner, jgħid li s-sentenza, is-swat u t-tagħjir ma kenux avvenimenti li ġraw darba biss fil-ħajja mortali ta’ Kristu. Kif aħna nittrattaw lil xulxin—speċjalment lil dawn li huma bil-ġuħ, u bil-għatx, u li tħallew weħidhom—huwa sewwasew kif aħna nittrattaw lilu.

Fil-Knisja rrestawrata tiegħu, aħna nkunu f’pożizzjoni ferm aħjar meta ħadd ma jpoġġi bilqiegħda waħdu. Ejjew mhux biss sempliċiment nakkomodaw u nittoleraw. Ejjew ġenwinament nilqgħu fostna, nirrikonoxxu, u nimministraw b’imħabba. Jalla kull ħabib, sister u brother ma jkunux aktar stranġieri u barranin iżda jkunu wlied f’darhom.

Illum, bosta jħossuhom weħidhom u iżolati. Il-midja soċjali u l-intelliġenza artifiċjali jistgħu jħalluna nixxenqu għall-qrubija u l-kumpanija umana. Aħna rridu nisimgħu l-ilħna ta’ xulxin. Aħna rridu l-appartenenza u t-tjubija awtentika.

Hemm bosta raġunijiet għalfejn nistgħu nħossu li postna mhuwiex fil-knisja—li, b’mod figurattiv, aħna nkunu ninsabu bilqiegħda weħidna. Aħna nafu boqogħdu ninkwetaw dwar l-aċċent, l-ilbies, u s-sitwazzjoni fil-familja tagħna. Jista’ jkun li nħossuna inadegwati; li fuqna għandna riħa ta’ sigaretti; li aħna qed nixxenqu għas-safa morali; li għadna kif ħassarna minn ma’ xi ħadd u nħossuna mweġġgħin u imbarazzati; u li m’aħniex ċerti dwar dik jew din il-polisi tal-Knisja. Jista’ jkun li aħna single, jew iddivorzjati, jew romol. Jew li t-tfal tagħna jagħmlu l-istorbju; jew li m’għandniex tfal. Jew li ma morniex missjoni jew li tlaqna mill-missjoni kmieni. U l-lista ma tispiċċa qatt.

Mosija 18:21 tistedinna biex norbtu qlubna flimkien b’imħabba. Jien nistieden lilna lkoll biex naraw li ninkwetaw anqas, niġġudikaw anqas, u nistennew anqas minn ħaddieħor—u, meta jkun meħtieġ, ma nkunux daqstant ibsin magħna nfusna. Aħna ma noħolqux Sijon f’ġurnata. Iżda kull “kif inti” kull ġest ta’ mħabba, iressaq il-Sijon aktar qrib tagħna. Ejjew nafdaw aktar fil-Mulej, u nagħżlu b’ferħ li nobdu l-kmandamenti tiegħu kollha.

Fis-sens duttrinali, fid-dar tal-fidi u fis-sħubija tal-Qaddisin, ħadd ma jpoġġi bilqiegħda waħdu minħabba l-appartenenza tal-patt f’Ġesù Kristu.

Il-Profeta Joseph Smith għallem: “Tħalla għalina biex aħna naraw, nipparteċipaw u ngħinu mmexxu ’l quddiem il-glorja tal-Aħħar Żmien, ‘id-dispensazzjoni tal-milja taż-żminijiet … ,’ meta l-Qaddisin ta’ Alla sejrin jinġabru lkoll flimkien minn kull ġens, tribù u poplu.”

Alla “ma jagħmel xejn ħlief dak li huwa ta’ ġid għad-dinja; … biex ikun jista’ jressaq il-bnedmin kollha lejh. …

“… Lilhom ilkoll huwa jistieden biex imorru għandu u jgawdu mit-tjubija tiegħu; … u kulħadd l-istess għal Alla.”

Il-konverżjoni f’Ġesù Kristu teħtieġ li aħna ninżgħu minn fuqna l-bniedem naturali u l-kultura tad-dinja. Kif jgħallem il-President Dallin H. Oaks, aħna għandna nwarrbu kull tradizzjoni u drawwa kulturali li tmur kontra l-kmandamenti ta’ Alla u nsiru Qaddisin tal-Aħħar Żmien. Huwa jispjega, “Hawn kultura tal-evanġelju unika, sett ta’ valuri u aspettattivi u drawwiet komuni għall-membri kollha tal-Knisja ta’ Ġesù Kristu tal-Qaddisin tal-Aħħar Żmien.” Il-kultura tal-evanġelju tinkludi l-kastità, l-attendenza ta’ kull ġimgħa fil-knisja, li nżommu ’l bogħod mill-alkoħol, mit-tabakk, u mit-tè u l-kafè. Tinkludi l-onestà u l-integrità, li nifhmu li aħna nimxu ’l quddiem u mhux ’il fuq jew lura fil-pożizzjonijiet tal-Knisja.

Jiena nħossni nitgħallem mill-membri u l-ħbieb fidili minn kull pajjiż u kultura. L-iskrittura li tiġi studjata f’għadd ta’ lingwi u minn perspettivi kulturali differenti tkabbar l-għarfien tal-evanġelju. L-espressjonijiet differenti tal-kwalitajiet Kristjani jkabbru l-imħabba u l-għarfien tiegħi tas-Salvatur tiegħi. Ilkoll inkunu mberkin meta aħna niddefinixxu l-identità kulturali tagħna, kif għallem il-President Russell M. Nelson, bħala wlied Alla, wlied tal-patt, dixxipli ta’ Ġesù Kristu.

Il-paċi ta’ Ġesù Kristu hija għalina lkoll b’mod personali. M’ilux, wieħed żagħżugħ staqsieni bil-ħerqa, “Presbiteru Gong, jiena xorta waħda nista’ mmur fis-smewwiet?” Ma kienx ċert jekk qatt kienx se jikseb il-maħfra. Jiena staqsejtu x’jismu, smajt bir-reqqa li kellu jgħid, stedintu biex jitkellem mal-isqof tiegħu, u għannaqtu waħda kbira. Huwa telaq minn ħdejja bit-tama f’Ġesù Kristu.

Jiena kont tkellimt dwar dan iż-żagħżugħ f’okkażżjoni oħra. Aktar tard, jiena rċevejt ittra mhux iffirmata li tgħid, “Presbiteru Gong, jien u marti rabbejna disat ulied … u servejna żewġ missjonijiet.” Iżda “Jien dejjem ħassejt li ma kontx se nitħalla nidħol fis-saltna ċelestjali … għax id-dnubiet li wettaqt f’żogħżiti kienu koroh!”

L-ittra kienet tkompli, “Presbiteru Gong, meta inti tkellimt dwar iż-żagħżugħ li kiseb it-tama tal-maħfra, jiena mtlejt bil-hena, għax bdejt nirrealizza li forsi anke jien stajt nikseb il-maħfra.” L-ittra kien tagħlaq, “Issa jien anke ninsab kuntent bija nnifsi!”

L-appartenenza tal-patt tikber hekk kif aħna nersqu lejn xulxin u lejn il-Mulej fil-lukanda tiegħu. Il-Mulej iberikna lkoll meta ħadd ma jpoġġi bilqiegħda waħdu. U min jaf? Jista’ jkun li l-persuna li noqogħdu bilqiegħda ħdejha taf issir l-aktar ħabiba, gallettina tal-fortuna, tagħna. Jalla aħna nsibu u nagħmlu post għalih u għal xulxin fl-ikla tal-Ħaruf, jiena nitlob b’umiltà, fl-isem imqaddes ta’ Ġesù Kristu, ammen.