Yɛn Soro Akwankyerɛ Nhyehyɛeɛ
Berɛ a yɛde yɛn asetena si Yesu Kristo so no, yɛbɛhunu yɛn kwan akɔ fie, agyina akɔsi awieeɛ na yɛadi ahurusie akɔ awieeɛ.
Yesu Kristo sesaa m’abrabɔ berɛ a wɔbɔɔ me asu berɛ a na madi mfeɛ 26 wɔ kurom Frutillar, a ɛwɔ Chile. Saa berɛ no, m’adwuma de me twaa Chile Patagonia fɛɛfɛ no po, nsubɔnten, ne nsutadeɛ. M’asubɔ akyi no, mehunuu m’adwuma ne m’abrabɔ wɔ kwan foforɔ a ɛyɛ sononko so, na mehunuu sɛ nokorɛ mu “nneɛma nyinaa kyerɛ sɛ Onyankopɔn bi wɔ hɔ.”
Wɔ abɔdeɛ mu no, wɔwo salmon wɔ nsubɔnten fibea. Berɛ bi mu wɔ wɔn asetena mu no, ɛwɔ sɛ wɔdware kɔ asubɔnten no anaafoɔ ansa na wɔaduru ɛpo ho, baabi a wɔbɛnya aduane ne tebea ahodoɔ a ɛhia ma wɔn nyini.
Nanso ɛpo nso yɛ beaeɛ a ɛyɛ hu, baabi a mmoa a wɔkyere mmoa afoforɔ we tetɛ ne baabi a apofoɔ bɔ mmɔden sɛ wɔde daawa hyɛnhyɛn a ɛsɛ aduane nanso ɛmma wɔmmee bɛkyere salmon no. Sɛ salmon bɛtumi agyina ahunahuna yi mu a, wɔbɛyɛ krado sɛ wɔbɛfa wɔn akwankyerɛ nhyehyɛeɛ a tumi wom no so asan akɔ asubɔnten no atifi beaeɛ korɔ no ara a wɔwoo wɔn no, a wɔbɛhyia ɔhaw ahodoɔ a wɔnim bi na ɛbi nso yɛ foforɔ. Abɔdeɛ mu nyansapɛfoɔ asua wɔn atutena nneyɛɛ no ho adeɛ mfeɛ pii na wɔahunu sɛ wɔde asase mfonin bi a magnɛte wom, a ɛte sɛ GPS na ɛkyerɛ kwan kɔ baabi a wɔrekɔ no pɛpɛɛpɛ a ɛyɛ nwanwa.
Yɛn nyinaa bɛtumi asan akɔ ɔsoro fie a yɛfiri baeɛ no da koro. Na te sɛ salmon no, yɛwɔ yɛn ankasa asase mfonin a magnɛte wom, anaasɛ Kristo Hann a ɛbɛkyerɛ yɛn kwan akɔ hɔ. Yesu kyerɛkyerɛɛ N’asuafoɔ no sɛ, “Mene ɛkwan no, nokorɛ, ne nkwa no: obi ntumi mma Agya no hɔ gye sɛ ɔnam me so.”
Berɛ a yɛde yɛn asetena si Yesu Kristo so no, yɛbɛhunu yɛn kwan akɔ fie, agyina akɔsi awieeɛ na yɛadi ahurusie akɔ awieeɛ. Titenani Russell M. Nelson kyerɛkyerɛɛ sɛ “anigyeɛ a yɛwɔ no fa yɛn abrabɔ mu tebea ahodoɔ ho kakraa bi ne biribiara ho wɔ deɛ yɛn ani si so wɔ yɛn abrabɔ mu.”
Yɛn Soro Su ne Hyɛberɛ
Yɛkenkan firi abusua mpaemuka no mu sɛ “[yɛn mu] biara yɛ ɔsoro awofoɔ honhom mu dɔ babarima anaa babaa, ne saa nti, obiara wɔ ɔsoro su ne hyɛberɛ. Ansa na yɛreba asase so asetena no, na honhom mu mma mmarima ne mmaa nim na wɔsomm Onyankopɔn sε wɔn Ɔnniawieeε Agya na wɔgyee ne nhyehyεeε too mu, a εnam so bεma ne mma atumi anya honamdua na wɔanya asase so suahunu a wɔde bεtu mpɔn akɔ pεpεyɛ mu na awieeɛ no wɔahunu wɔn nyamesu hyɛberɛ sε nkwa a ɛnni awieeɛ adedifoɔ.”
Ansa na wɔrewo No aba honam mu no, Yesu Kristo daa ne ho adi kyerɛɛ Mose na ɔgyinaa Agya no ananmu ne no kasaeɛ. Ɔka kyerɛɛ Mose sɛ ɔwɔ adwuma kɛseɛ bi ma no. Saa nhyiamu no mu no, Awurade frɛɛ no “me ba” mpɛn pii.
Saa suahunu no akyi no, Satan ba bɛsɔɔ no hwɛɛe, kaa sɛ, “Mose, onipa ba, som me.”
Mose kaee ne soro su na ɔmaa sɔhwɛ no ho mmuaeɛ, sɛ: “Wo yɛ hwan? Na hwɛ, meyɛ Onyankopɔn ba.” Nokorɛ no maa Mose dee ne ho firii ɔtamfoɔ no nnaadaa ho.
Anuanom adɔfoɔ, owuo nhoma wɔ hɔ ankasa. Wɔtaa twetwe adwene, nanso wɔhwehwɛ botaeɛ baako pɛ: sɛ wɔbɛtwe yɛn afiri nkwa nsuo a ɛkɔ Agya no hɔ ne daa nkwa mu no kwan so.
Menim sɛdeɛ owuo nhoma no bɛtumi ayɛ ankasa. Kwasiada bi, sɛ obi a masakra foforɔ no, na merekyerɛ asɔfodie kuo bi adeɛ berɛ a nkɔmmɔdie bi a ɛha adwene sɔree. Mebɔɔ mmɔden sɛ mɛwie m’adekyerɛ no. Me bo fuui na ɛyɛɛ me sɛ me na na wɔreha me. Manka hwee, na mede m’ani kyerɛɛ abɔnten, a na mewɔ adwene sɛ merensan nkɔ asɔre mmerɛ kakra bi ntam.
Saa berɛ no ara mu, asɔfodie kurafoɔ bi a na ɛha no gyinaa m’anim. Ɔde ɔdɔ ka kyerɛɛ me sɛ memfa m’adwene nsi Kristo so na ɛnyɛ tebea a yɛahunu wɔ adesua no mu no so. Na mekaee me ne no nkutahodie no, ɔka kyerɛɛ me sɛ ɔtee sɛ ɛnne bi reka kyerɛ no sɛ, “Di n’akyi; ne ho hia me.”
Me nnamfonom adɔfoɔ, yɛn nyinaa ho hia No. Titenani Nelson kyerɛkyerɛɛ sɛ, “Ɛnam yɛne Onyankopɔn apam no nti, Ɔremmerɛ da wɔ Ne mmɔdemmɔ mu sɛ ɔbɛboa yɛn, na yɛrensa N’ahummɔborɔ aboterɛ ma yɛn no da.” Yɛn ɔsoro su ne apam a yɛne Onyankopɔn wɔ no ma yɛn hokwan sɛ yɛbɛnya ɔsoro mmoa.
Hia a Aduane ho hia
Sɛdeɛ salmon hia aduane wɔ ɛpo mu na anyini no, saa ara na ɛwɔ sɛ yɛma yɛn ho aduane wɔ honhom fam ama yɛakwati sɛ yɛbɛwu wɔ honhom mu kɔm mu. Mpaebɔ, twerɛnsɛm, tɛmpol, ne Kwasiada nhyiamu ahodoɔ a yɛtaa kɔ ho hia wɔ yɛn honhom mu aduane mu.
Wɔ Obubuo 1956 mu no, Ricardo Garcia bɔɔ asu wɔ Chile, na ɔbɛyɛɛ Asɔre no ba a ɔdi kan wɔ me man mu. Aka dakoro pɛ na wawuo no, ɔkaa wɔ n’abusua ne ne nnamfonom anim sɛ, “Mfeɛ pii bi a atwam, asɛmpatrɛfoɔ too nsa frɛɛ me sɛ memma me ne m’abusua ani nnye. Meyɛ onipa a ɔwɔ anigyeɛ. Ka kyerɛ obiara wɔ Chile sɛ asɛmpa no yɛ anigyeɛ.”
Wɔde Yesu Kristo asɛmpa no maa no aduane akyi no, Ricardo de n’abrabɔ nyinaa sii hɔ somm Onyankopɔn ne ne yɔnko wɔ ɔdɔ mu. N’asuafoɔyɛ nhwɛsoɔ no ahyira awoɔ ntoatoasoɔ ahodoɔ, a me ka ho. Nkɔmhyɛni Joseph Smith kyerɛkyerɛɛ sɛ “onipa a Onyankopɔn dɔ ahyɛ no ma ani nnye n’abusua nko ara nhyira ho, na mmom ɔnam wiase nyinaa, a ne ho pere no sɛ ɔbɛhyira nnipa mma nyinaa.”
San kɔ Yɛn Soro Fie
Ɔpɛ sɛ yɛbɛsan akɔ yɛn soro fie wɔ yɛn mu biara mu tɔnn, na Yesu Kristo ne yɛn soro akwankyerɛ nhyehyɛeɛ. Ɔno ne kwan no. Ne mpata afɔrebɔ no ma ɛyɛ yie sɛ yɛne Onyankopɔn bɛyɛ apam kronkron. Sɛ yɛyɛ apam wie a, ɛtɔ mmerɛ bi a yɛbɛhunu yɛn ho sɛ yɛreyɛ nneɛma sononko. Asiane, abamubuo, sɔhwɛ, ne amanehunu bɛsɔ yɛn gyedie ne honhom mu ahoɔden ahwɛ. Bisa mmoa. Yesu Kristo te aseɛ na ɔwɔ ahokeka berɛ biara sɛ ɔne yɛn bɛkyɛ yɛn nnesoa.
Kae sɛ wɔnim no sɛ “onipa a ɔhunuu awerɛhoɔ, na ɔnim yea.” Agyenkwa no kyerɛkyerɛɛ sɛ, “Mo ho bɛhiahia mo wɔ wiase: nanso momma mo bo ntɔ mo yam; madi wiase so nkonim.” Ne mpata afɔrebɔ no ma yɛnya bɔnefakyɛ, ara a ma ɔnkae bio.
Sɛ yɛn asetena mu adesua no fa no ebia yɛn werɛ remfiri yɛn bɔne koraa, enti yɛbɛkae sɛ yɛrensan nyɛ bio. Mmom, yɛbɛkae no berɛ a yɛrefa adidikronkron no wɔ asɔre Kwasiada biara no. Saa ayɛyɛdeɛ yi yɛ ɛsom ne honhom mu nkɔsoɔ fa titire. Anigyeɛ ba berɛ a yɛte aseɛ sɛ yei nyɛ da foforɔ kɛkɛ. “Wɔyɛɛ Homeda maa onipa,” a na tirimpɔ no ne sɛ ɛbɛma yɛanya ahomegyeɛ afiri wiase na yɛayɛ yɛn nipadua ne honhom foforɔ.
Yɛsan kae No berɛ a yɛkɔ tɛmpol—Awurade fie. Tɛmpol ma yɛnya Yesu Kristo ho nimdeɛ a ɛmu dɔ sɛ apam a ɛde yɛn kɔ daa nkwa mu,Onyankopɔn akyɛdeɛ ahodoɔ no mu kɛseɛ pa ara.”
Tɛmpol a mekɔ ama me awerɛkyekyeɛ ne anidasoɔ kɛseɛ wɔ yɛn daa nkwa hyɛberɛ ho. Me ne nnipa a wɔwɔ nkatanim no afanu nyinaa anya ɔsoro abusuabɔ. Mahunu ayaresa anwanwadeɛ ahodoɔ wɔ me mma nkumaa abrabɔ mu, wɔn mu baanu wɔ nyarewa a wonhunu a ɛhia sɛ wɔhwɛ wɔn da biara wɔ nkwa nna a aka nyinaa yi mu.
Yɛn abusua ani gye berɛ a yɛka anigyeɛ nhyehyɛeɛ no ho asɛm. Me mma anim hyerɛn berɛ a wɔte sɛ, aseda nka Yesu Kristo, wɔn “amanehunu bɛyɛ berɛ tiawa bi pɛ.” Yɛdɔ yɛn mma no yie, na yɛnim sɛ da bi, sɛdeɛ Titenani Jeffrey R. Holland kyerɛkyerɛeɛ no, “wɔbɛgyina yɛn anim a wɔahyɛ wɔn animuonyam na ɛyɛ kɛseɛ, a ɛwie pɛyɛ nwanwasoɔ wɔ nipadua ne adwene mu.” Yɛn apam ahodoɔ ma yɛbɛn Onyankopɔn kɔsi sɛ ɛma deɛ ɛntumi nyɛ yie no tumi yɛ yie, na ɛde hann ne asomdwoeɛ hyɛ esum ne adwene mu naayɛ biara ananmu.
Aseda nka Yesu Kristo, anidasoɔ ne botaeɛ ahodoɔ a ɛwɔ nnyinasoɔ pa wɔ hɔ sɛ yɛbɛkɔ so anya ɔdɔ, abɔ mpaeɛ, na yɛaboa wɔn a yɛdwene wɔn ho.
Menim sɛ Ɔte ase. Ɔnim yɛn na Ɔdɔ yɛn. Ɔno ne kwan no, nokorɛ no, ne wiase nkwa no.
Meto nsa frɛ yɛn nyinaa ɛnnɛ sɛ yɛmfa yɛn abrabɔ nsi Yesu Kristo ne Ne nkyerɛkyerɛ so. Saa yɛ no bɛboa yɛn ama yɛakwati sɔhwɛ, abufuo, ne awerɛhoɔ afidie. Yɛbɛgyina te sɛ tɛmpol—kronkron, pintinn ne daa. Yɛbɛdi so nkonim, na yɛbɛduru fie, agyina akɔsi awieeɛ na yɛadi ahurusie akɔsi awieeɛ. Wɔ Yesu Kristo din mu, amen.