W’ankasa Ahosiesie a Wode Bɛhyia Agyenkwa no

Me nuanom mmarima ne mmaa, Ahinime bosome a ɛtwaam no, Titenani Russell M. Nelson kyerɛkyerɛɛ sɛ, “Seesei ne berɛ ma me ne wo sɛ yɛbɛsiesie yɛn ho ama yɛn Awurade ne Agyenkwa, Yesu Kristo Mmaeɛ a ɛtɔ so Mmienu no” Sɛ Titenani Nelson kasa fa Mmaeɛ a ɛtɔ so Mmienu no ho a, berɛ biara ɔde anidasoɔ ho anigyeɛ. Nanso, abaayewa bi a ɔwɔ primary ka kyerɛɛ me nnansa yi sɛ berɛ biara a wɔbɛka mmaeɛ a ɛtɔ so mmienu no ho asɛm no na ne yam hyehye no. Ɔkaa sɛ, “Mesuro ɛfiri sɛ nneɛma bɔne bɛsisi ansa na Yesu aba bio.”

Ɛnyɛ nkwadaa nko ara na ebia wɔwɔ saa atenka yi. Afotuo a ɛyɛ pa ara ma no, ma wo, ɛne me ne sɛ yɛbɛdi Agyenkwa no nkyerɛkyerɛ so. N’akwankyerɛ ahodoɔ no nyɛ nwanwa ɛna ɛnyɛ den. Sɛ yɛdi so a, ɛnhia sɛ yɛsuro anaa yɛn yam hyehye yɛn.

Ɛrekɔ N’asase so som adwuma awieeɛ no, wɔbisaa Yesu Kristo berɛ a ɔbɛba bio. Ɔrebua no, Ɔkyerɛkyerɛɛ abɛbunsɛm mmiɛnsa, a wɔatwerɛ wɔ Mateo 25, fa sɛdeɛ yɛbɛsiesie yɛn ho ahyia No—sɛ ɛyɛ Ne Mmaeɛ a ɛtɔ so Mmienu no anaa berɛ biara a yɛfiri asase yi so ho. Saa nkyerɛkyerɛ yinom ho hia yie ɛfiri sɛ w’ankasa ahosiesie a wode bɛhyia No yɛ ade titire wɔ abrabɔ botaeɛ mu.

Agyenkwa no dii kan kaa mmaabunu du ho abɛbusɛm no. Wɔ saa abɛbusɛm yi mu no, mmaabunu du kɔɔ ayefohyia apontoɔ bi. Baanum hunuu nyansa faa ngo kaa wɔn nkanea ho, ɛna baanum yɛɛ nkwaseafoɔ a wɔamfa bi. Berɛ a wɔkaa sɛ ayefokunu no reba no, mmaabunu nkwaseafoɔ no kɔɔ sɛ wɔrekɔtɔ ngo. Berɛ a wɔsan baeɛ no, na aka akyi; na wɔato apontoɔ no pono mu.

Yesu kyerɛɛ abɛbusɛm no afa mmiɛnsa a ɛbɛboa yɛn. Ɔkyerɛkyerɛɛ mu sɛ:

“Na da no, berɛ a mɛba m’animuonyam mu no, na abɛbusɛm a meka faa mmaabunu du no ho no bɛba mu.

“Ɛfirisɛ wɔn a wɔyɛ anyansafoɔ na wɔagye nokorɛ no, na wɔafa Honhom Kronkron no sɛ wɔn kwankyerɛfoɔ, na wɔannaadaa wɔn no—nokorɛ mese mo sɛ, wɔn na wɔbɛtena da no.”

Nsɛm foforɔ mu no, na ɛnhia sɛ wɔsuro anaa wɔn yam hyehye wɔn ɛfiri sɛ na wɔbɛtena ase na wɔadi yie. Na wɔbɛdi nkonim.

Sɛ yɛyɛ anyansafoɔ a, yɛgye nokorɛ no berɛ a yɛnam asɔfodie ayɛyɛdeɛ ne apam ahodoɔ so gye Yesu Kristo asɛmpa no tom. Deɛ ɛdi hɔ, yɛbɔ mmɔden sɛ yɛbɛkɔ so afata sɛ Honhom Kronkron no bɛka yɛn ho mmerɛ nyinaa. Ɛsɛ sɛ yɛnya saa tumi yi mmaako mmaako ma yɛn ankasa ho, nkakrankakra. Yɛn ankasa kokoam ahofama nneyɛɛ a ɛkɔ so daa no frɛ Honhom Kronkron no ma ɔkyerɛ yɛn kwan.

Adeɛ a ɛtɔ so mmiɛnsa a Yesu sii so dua ne sɛ yɛbɛkwati nnaadaa. Agyenkwa no bɔɔ kɔkɔ sɛ:

“Monhwɛ na obi annaadaa mo.

“Ɛfiri sɛ bebree de me din bɛba abɛka sɛ, Mene Kristo no, na wɔadaadaa bebree.”

Na Agyenkwa no nim sɛ wɔn a wɔpatu sɛ wɔyɛ no bɛbɔ mmɔden sɛ wɔbɛdaadaa wɔn a wɔayi wɔn ankasa no na wɔbɛdaadaa asuafoɔ bebree. Ɛnni sɛ yɛgye wɔn a wɔdi atorɔ ka sɛ ɔsoro ama wɔn tumi no di anaa yɛkɔ mmea a hwee nni hɔ anaa kokoam adan mu sɛ atorofoɔ nkyerɛkyerɛ yɛn.

Mormon Nwoma no kyerɛkyerɛ yɛn sɛdeɛ yɛbɛtumi akyerɛ nsonsonoeɛ a ɛda adaadaafoɔ ne asuafoɔ ntam. Asuafoɔ bɔ Onyankopɔn mu gyedie, Ne som ne papayɛ ho dawuro mmerɛ nyinaa. Wɔrennaadaa yɛn berɛ a yɛhwehwɛ na yɛgye afotuo firi ankorankoro a wɔgye wɔn di a wɔn ankasa yɛ Agyenkwa no asuafoɔ anokwafoɔ hɔ.

Yɛbɛtumi nso akwati nnaadaa berɛ a yɛtaa som wɔ tɛmpol. Yei boa yɛn ma yɛkɔ so dwene daa nkwa ho na ɛbɔ yɛn ho ban firi nkɛntɛnsoɔ ahodoɔ a ɛbɛtumi atwe yɛn adwene anaa ayi yɛn afiri apam kwan no so.

Adesua a ɛho hia wɔ mmaabunu du abɛbusɛm yi mu ne sɛ yɛyɛ anyansafoɔ berɛ a yɛgye asɛmpa no tom, yɛhwehwɛ sɛ yɛbɛnya Honhom Kronkron no aka yɛn ho, na yɛkwati nnaadaa. Mmaabunu anyansafoɔ baanum no antumi ammoa wɔn a na wɔnni ngo no; obiara ntumi nnye asɛmpa no ntom, mfa Honhom Kronkron no sɛ ɔkwankyerɛfoɔ, na ɔnkwati nnaadaa mma yɛn. Ɛsɛ sɛ yɛyɛ yei ma yɛn ankasa ho.

Afei Agyenkwa no kaa adomakyɛdeɛ ho abɛbusɛm no. Wɔ saa abɛbusɛm yi mu no, ɔbarima bi de sika dodoɔ a ɛnyɛ pɛ, a wɔfrɛ no adomakyɛdeɛ, maa ne nkoa baasa. Ɔmaa akoa baako adomakyɛdeɛ num, ɔmaa ɔfoforɔ mmienu, ɛna ɔmaa deɛ ɔtɔ so mmiɛnsa no baako. Berɛ bi akyi, nkoa baanu a wɔdi kan no bɔɔ deɛ wɔnyaeɛ no ho mmienu. Nanso deɛ ɔtɔ so mmiɛnsa no de ne adomakyɛdeɛ baako no siee fam. Nkoa baanu a wɔbɔɔ wɔn adomakyɛdeɛ no ho mmienu no, ɔbarima no ka kyerɛɛ wɔn sɛ, “Mo, akoa pa ne nokwafoɔ: woadi kakra yi ho nokorɛ, mɛyɛ wo sodifoɔ wɔ nneɛma pii so: kɔ wo wura anigyeɛ mu.”

Ɔbarima no kaa akoa a ɔde ne adomakyɛdeɛ no siee fam no anim sɛ ɔyɛ “ɔbɔnefoɔ ne onihafoɔ.” Wɔgyee saa akoa yi adomakyɛdeɛ no, na wɔpamoo no. Nanso, sɛ saa akoa yi bɔɔ ne adomakyɛdeɛ no ho mmienu a, anka ɔbɛnya nkamfoɔ ne akatua korɔ no ara te sɛ nkoa nkaeɛ no.

Abasɛm yi mu nkrasɛm baako ne sɛ Onyankopɔn hwɛ kwan sɛ yɛbɛma tumi a wɔde ama yɛn no ayɛ kɛseɛ, nanso ɔmpɛ sɛ yɛde yɛn tumi bɛtoto afoforɔ deɛ ho. Dwene saa nhumu a afeha a ɛtɔ so 18 Hasidni nwomanimfoɔ Zusya a ɔfiri Anipol de maeɛ yi ho. Na Zusya yɛ ɔkyerɛkyerɛni a wagye din, a berɛ a ɔrebɛn owuo no, ɔhyɛɛ aseɛ suroeɛ. N’asuafoɔ bisaa no sɛ, “Owura, adɛn nti na wo ho popo? Woabɔ bra pa; akyinnyeɛ nni ho sɛ Onyankopɔn bɛma wo akatua kɛseɛ.”

Zusya kaa sɛ: “Sɛ Onyankopɔn ka kyerɛ me sɛ, ‘Zusya a, adɛn nti na woanyɛ Mose foforɔ?’ a Mɛka sɛ, ‘Ɛfiri sɛ woamma me akoma kɛseɛ a wode maa Mose no.’ Na sɛ megyina Onyankopɔn anim na Ɔka sɛ, ‘Zusya, adɛn nti na woanyɛ Salomo foforɔ? Mɛka sɛ, ‘Ɛfiri sɛ woamma me Salomo nyansa no.’ Nanso, awerɛhosɛm ne sɛ, sɛ megyina me Yɛfoɔ no anim na Ɔka sɛ, ‘Zusya, adɛn nti na woanyɛ Zusya? Adɛn nti na woanyɛ ɔbarima a memaa wo tumi sɛ wobɛyɛ? Ao, ɛno nti na me ho popo.”

Nokorɛ mu, sɛ yɛamfa yɛn ho anto Agyenkwa no mfasodeɛ, mmɔborɔhunu ne adom so amma Onyankopɔn tumi a yɛwɔ no anyɛ kɛse a, Onyankopɔn werɛ bɛ ho. Ɔnam Ne dɔ mmoa so hwɛ kwan sɛ yɛbɛyɛ papa pa ara sɛdeɛ yɛbɛtumi biara. Sɛ ebia yɛbɛhyɛ aseɛ wɔ tumi a ɛnyɛ pɛ so ho nhia No. Na ɛwɔ sɛ ɛho hia ma yɛn.

Awieeɛ koraa no, Agyenkwa no kaa nnwan ne mmirekyie ho abɛbusɛm no. Ɔsan ba wɔ N’anuonyam mu a, “ɔbɛboaboa amanaman nyinaa ano wɔ n’anim: na ɔbɛtete wɔn mu, sɛdeɛ odwanhwɛfoɔ tete ne nnwan mu firi mmirekyie ho no: na ɔde nnwan no bɛgyina ne nsa nifa, na mmirekyie no akɔ benkum”

Wɔn a wɔwɔ ne nifa so no bɛyɛɛ adedifoɔ wɔ N’ahennie mu, na wɔn a wɔwɔ Ne benkum so no annya agyapadeɛ biara. Su a na ɛyɛ sononko ne sɛ, sɛ wɔmaa no aduane berɛ a ɛkɔm dee no, wɔmaa no nsuo berɛ a sukɔm dee no, wɔde no kɔɔ fie berɛ a ɔyɛɛ ɔhɔhoɔ, wɔfiraa no ntoma berɛ a ɔdaa adagya, na wɔkɔsraa no berɛ a ɔyaree anaa ɔdaa afiase no.

Obiara yɛɛ basaa, wɔn a wɔwɔ nifa ne wɔn a wɔwɔ benkum no nyinaa. Wɔbisaa No berɛ a wɔmaa No, anaa wɔamma No aduane, nsuo, ne ntoma anaa wɔboaa No berɛ a na Ɔyɛ mmrɛ. Ɔrebua no, Agyenkwa no kaa sɛ, “Nokorɛ mese mo sɛ, sɛ moayɛ ama me nuanom nkumaa yi mu baako no, moayɛ ama me.”

Abɛbusɛm no nkrasɛm no yɛ pefee: sɛ yɛsom afoforɔ a, yɛsom Onyankopɔn; sɛ yɛanyɛ a, yɛdi No hwammɔ. Ɔhwɛ kwan sɛ yɛde yɛn adom akyɛdeɛ, talɛnte, ne yɛn tumi bɛhyira Ɔsoro Agya mma abrabɔ. Wɔayɛ ɔsoro nkanyan a wɔde som afoforɔ ho nhwɛsoɔ wɔ anwonsɛm bi a Finland kasadwumfoɔ Johan Ludvig Runeberg twerɛeɛ wɔ afeha a ɛtɔ so 19 mu no mu. Me ne me nuanom tee anwonsɛm “Farmer Paavo” mpɛn pii wɔ yɛn mmɔfraberɛ mu nyinaa. Anwonsɛm no mu no, na Paavo yɛ okuafoɔ ohiani a ɔne ne yere ne ne mma te baabi a nsutadeɛ wɔ wɔ Finland mfimfini. Mfeɛ pii a ɛtoatoa so mu, ne nnɔbaeɛ dodoɔ no ara sɛee, sɛ ɛfiri nsunsuan a ɛfiri fifiberɛ mu sukyerɛmma a ɛnane mu, ahuhuroberɛ mu asukɔtweaa, anaa awɔberɛ mfitiaseɛ asukɔtweaa. Berɛ biara a otwaberɛ ketewaa no bɛba no, na okuafoɔ no yere su sɛ, “Paavo, paavo, akwakoraa a wo ti nyɛ, Onyankopɔn apo yɛn.” Paavo nso de aboterɛ ka sɛ, “Fa abona fra rye esiam no yɛ paanoo sɛdeɛ nkwadaa no renna kɔm. Mɛbɔ mmɔden ati atɛkyɛ no. Onyankopɔn resɔ yɛn ahwɛ, nanso ɔde bɛma.”

Berɛ biara a nnɔbaeɛ no sɛee no, na Paavo ma ne yere ma abona a na ɔde fra esiam no mu de si ɛkɔm ano no yɛ mmɔho mmienu. Ɔsan yɛɛ adwumaden, yiyii mmɔnka sɛdeɛ nsuo no bɛkɔ na ate ne mfuo a na fifiberɛ mu nsunsuan ne awɔberɛ mfitiaseɛ asukɔtweaa sɛe no ntɛm no so.

Ahokyere mfeɛ pii akyi no, afei Paavo twaa nnɔbaeɛ pa bebree. Ne yere dii ahurisie sɛ, “Paavo, Paavo, yeinom yɛ anigyeɛ mmerɛ! Berɛ aso sɛ yɛto abona no gu, na yɛto paanoo a yɛde rye nko ara ayɛ.” Nanso Paavo de anibereɛ sɔɔ ne yere nsa kaa sɛ, “Fa esiam no fa fra abona, ɛfiri sɛ yɛn fipamfoɔ no mfuo ayɛ asukɔtweaa.” Paavo de ɔne n’abusua akatua no bɔɔ afɔdeɛ sɛdeɛ ɔbɛboa ne fipamfoɔ hiani a ne werɛ aho no.

Adesua a ɛwɔ Agyenkwa no nnwan ne mmirekyie ho abɛbusɛm no mu ne sɛ ɛwɔ sɛ yɛde akyɛdeɛ ahodoɔ a wɔde ama yɛn—berɛ, adomakyɛdeɛ, ne nhyira—no som Ɔsoro Agya mma, titire wɔn a wɔyɛ mmrɛ na wɔhia mmoa kɛse.

Meto nsa frɛ Primary akwadaa no a ne yam hyehye no a medii kan kaeɛ no, ne mo mu biara, sɛ di Yesu Kristo akyi na fa wo ho to Honhom Kronkron no so sɛdeɛ wobɛyɛ adamfoɔ a wopɛ n’asɛm no. Fa wo ho to wɔn a wɔdɔ wo na wɔdɔ Agyenkwa no so. Hwehwɛ Onyankopɔn akwankyerɛ ma tumi sononko a wowɔ no nnyini, na boa afoforɔ, berɛ mpo a ɛyɛ den. Wobɛyɛ krado sɛ wobɛhyia Agyenkwa no, na wobɛtumi aka Titenani Nelson ho wɔ anidasoɔ ho anigyeɛ mu. Berɛ a woyɛ saa no, woboa siesie wiase ma Yesu Kristo Mmaeɛ a ɛtɔ so Mmienu no, na wɔde anidasoɔ a ɛsɔ ani bɛhyira wo na woakɔ Awurade ahomegyeɛ ne anigyeɛ mu, seesei ne daakye.

Sɛdeɛ yɛto no wɔ yɛn nnwom afoforɔ no mu baako mu no:

Wɔ Yesu Kristo din mu, amen.