Mmɔborɔhunu Nhyehyɛeɛ

Oforisuo a ɛtwaa mu no, berɛ a anigyesɛm sɛ Asɔre no agye Kirtland Tɛmpol no akyi, Tetenani Russell M. Nelson too nsa frɛɛ yɛn sɛ yɛnsua Kirtland Tɛmpol anobue mpaeɛ no, a wɔatwerɛ wɔ Nkyerɛkyerɛ ne Apam ɔfa 109 mu. Anobue mpaeɛ no, sɛ Titenani Nelson kaeɛ no, “yɛ nkyerɛkyerɛ fa sɛdeɛ honhom mu tɛmpol ahodoɔ ma mene wo tumi a yɛde bɛhyia asetena mu haw wɔ nna a ɛtwa toɔ yi mu.”

Megye di sɛ w’adesua wɔ ɔfa 109 de nhunumu a ɛhyiraa wo baeɛ. Anwummerɛ yi, mene mo kyɛ nneɛma kakra a mesuaeɛ berɛ a medii yɛn nkɔmhyɛni nsatofrɛ no so. Asomdwoeɛ kwan a m’adesua no dii anim no kaee me sɛ Awurade yɛ mmɔborɔhunufoɔ na yɛn soro Agya nkwagyeɛ nhyehyɛeɛ no yɛ mmɔborɔhunu nhyehyɛeɛ ampa.

Sɛdeɛ ebia wonim no, “wɔhyɛ asɛmpatrɛfoɔ a wɔfrɛ wɔn foforɔ no nkuran sɛ wɔnye tɛmpol akyɛdeɛ kronkron no ntɛm so na wɔnkɔ tɛmpol mpɛn pii sɛdeɛ asetena bɛma ho kwan.” Berɛ a wɔgye akyɛdeɛ kronkron awie no, wɔbɛtumi nso “asom sɛ tɛmpol adwumayɛfoɔ ansa na wɔafiri asɛmpatrɛ adwuma ase.”

Mmerɛ a wɔdi wɔ tɛmpol ansa na wɔawura MTC no bɛtumi ayɛ nhyira ama asɛmpatrɛfoɔ foforɔ berɛ a wɔsua tɛmpol apam ho asɛm ansa na wɔne wiase akyɛ saa apam ahodoɔ no nhyira.

Nanso wɔ ɔfa 109 sua mu no, mehunuu sɛ, wɔ tɛmpol no mu, Onyankopɔn ma asɛmpatrɛfoɔ foforɔ tumi—ampa ara, yɛn nyinaa—wɔ ɔkwan foforɔ a ɛyɛ kronkron so. Wɔ ahosohyira mpaebɔ no, a wɔnam adiyisɛm so de maeɛ no, Joseph bɔɔ mpae sɛ “sɛ wo nkoa bɛfiri wo fie hɔ akɔdi wo din ho adanseɛ a, “nnipa nyinaa“ “koma” bɛyɛ mmrɛ“—asase so “akɛsefoɔ” ne “ahiafoɔ nyinaa, ahohiahiafoɔ, ne [wɔn] a wɔwɔ haw nyinaa.” Ɔbɔɔ mpaeɛ sɛ “wɔn adwemmɔne bɛma nokorɛ kwan, na wo nkorɔfoɔ anya adɔeɛ wɔ wɔn nyinaa anim; sɛdeɛ ɛbɛyɛ a asase no awieeɛ nyinaa bɛhunu sɛ yɛn, wo nkoa, ate wo nne, na wasoma yɛn.”

Yei yɛ bɔhyɛ a ɛyɛ fɛ ma ɔsɛmpatrɛfoɔ a wɔafrɛ no foforɔ—sɛ ɔbɛma adwemmɔne “afiri hɔ ama nokorɛ,” sɛ “ɔbɛnya obiara anim adom,” na wiase ahunu sɛ Awurade na asoma wɔn. Ampa yɛn mu biara hia saa nhyira korɔ yi. Nhyira a ɛbɛyɛ sɛ yɛbɛnya akoma ayɛ mmrɛ berɛ a yɛne afipamfoɔ ne adwumamfoɔ di nkutaho. Anobue mpaebɔ no nkyerɛkyerɛmu pɔtee sɛdeɛ yɛn berɛ a yɛdi wɔ tɛmpol mu no bɛma afoforɔ akoma ayɛ mmrɛ, nanso megye di sɛ ɛfam berɛ a yɛdi wɔ Awurade fie no ho ma ɛdwodwo yɛn ankasa akoma berɛ a ɛde yɛn adwene si Yesu Kristo ne Ne mmɔborohunu so no.

Berɛ a mesuaa Kirtland nhyirasoɔ mpaeɛ no, me nso menyaa atenka sɛ mpɛn pii Joseph koto srɛɛ mmɔborɔhunu—maa Asɔremma no, Asɔre no atamfo, ɔman no mu akannifoɔ, asase so aman. Na ɔno ankasa no, ɔkoto srɛɛ Awurade sɛ ɔnkae no na ɔnhunu ne dɔfo Emma ne wɔn mma mmɔbɔ.

Atenka bɛn na Joseph bɛnya berɛ a, nnawɔtwe baako akyi, Easter anɔpa, Oforisuo 3, 1836, wɔ Kirtland Tɛmpol mu, Agyenkwa no puee ɔne Oliver Cowdery so, na sɛdeɛ wɔatwerɛ wɔ Nkyerɛkyerɛ ne Apam ɔfa 110, mu no, ɔkaa sɛ, “Magye saa fie yi atom, na me din bɛwɔ ha; na mɛyi me ho akyerɛ me nkorɔfoɔ wɔ mmɔborɔhunu mu.” Saa mmɔborɔhunu bɔhyɛ yi bɛtumi anya asekyerɛ sononko ama Joseph. Na sɛdeɛ Titenani Nelson kyerɛɛ wɔ Oforisuo a ɛtwaa mu no, saa bɔhyɛ yi nso“fa tɛmpol biara a wɔabue ano nnɛ mmerɛ mu ho.”

Akwan bebree wɔ hɔ a yɛn mu biara bɛtumi ahwehwɛ mmɔborɔhunu wɔ Awurade fie. Yei ayɛ nokorɛ ɛfiri berɛ a Awurade dii kan hyɛɛ Israel sɛ wɔnsi ntamadan na wɔmfa “mmɔborɔhunu adwa no nsi ne mfinimfini.” Wɔ tɛmpol mu no, yɛhwehwɛ mmɔborɔhunu wɔ apam a yɛyɛ no mu. Saa apam ahodoɔ no, a asubɔ apam no ka ho no, kyekyere yɛn bɔ Agya no ne Ɔba no ho na ɛma yɛn akwanya pii wɔ deɛ Titenani Nelson akyerɛkyerɛ sɛ ɛyɛ “ɔdɔ ne mmɔborohunu sononko bi a wɔfrɛ no hesedwɔ Hebrifoɔ kasa mu.

Yɛhwehwɛ mmɔborɔhunu wɔ akwanya a yɛwɔ sɛ yɛsɔ yɛn mmusua ano ma ɛnni awieeɛ mmerɛ. Yɛsan nso ba bɛte aseɛ pefee kɛseɛ sɛ adebɔ, asehweɛ, Agyenkwa no mpata afɔrebɔ, ne yɛn tumi a yɛde bɛkɔ yɛn Soro Agya anim bio no—nkwagyeɛ ho nhyehyɛeɛ no fa biara—yɛ mmɔborɔhunu a wɔda no adi. Nokwasɛm, yɛbɛtumi aka sɛ nkwagyeɛ nhyehyɛeɛ no yɛ anigyeɛ nhyehyɛeɛ no ara pɛ ɛfiri sɛ ɛyɛ “ mmɔborohunu nhyehyɛeɛ.”

M’ani sɔ bɔhyɛ fɛɛfɛ a ɛwɔ ɔfa 110 sɛ Awurade bɛda Ne ho adi wɔ mmɔborɔhunu mu wɔ Ne tɛmpol ahodoɔ mu. M’ani san sɔ deɛ ɛda no adi fa sɛdeɛ Awurade bɛda ne ho adi wɔ mmɔborohunu mu berɛ biara a yɛn, te sɛ Joseph, koto srɛ mmɔborohunu no.

Joseph Smith nkotosrɛ ma mmɔborɔhunu wɔ ɔfa 109 no nyɛ deɛ ɛdi kan a ne nkotosrɛ ma mmɔborohunu kanyann adiyisɛm. Wɔ Kwaeɛ Kronkron no mu, aberanteɛ Joseph bɔɔ mpaeɛ sɛ ɛnyɛ sɛ ɔbɛhunu asɔre ko a ɛyɛ nokorɛ nko ara, na mmom ɔkaa sɛ “ɔsu kyerɛɛ Awurade pɛɛ mmɔborɔhunu, ɛfiri sɛ na obiara nni hɔ a mɛtumi akɔ ne nkyɛn akɔgye mmɔborɔhunu.” Ɔkwan bi so no, hu a ɔhunuu sɛ ɔhia mmɔborohunu na Awurade nko ara na ɔbɛtumi de ama no no boa buee ɔsoro mpomma. Mfeɛ mmiɛnsa akyi, ɔbɔfoɔ Moroni yii ne ho adi wɔ Joseph “mpaebɔ ne adesrɛ a ɔde kyerɛɛ Otumfoɔ Nyankopɔn sɛ ɔde me bɔne ne me mfomsoɔ nyinaa bɛfiri no.”

Saa adiyisɛm nhyehyɛeɛ yi a ɛdi mmɔborohunu nkotosrɛ akyi no yɛ deɛ wɔnim wɔ twerɛnsɛm no mu. Enos tee Awurade nne berɛ a ɔbɔɔ mpaeɛ pɛɛ bɔnefafire akyi. Ɔhene Lamoni agya adwensakyera de ne mpaebɔ na ɛhyɛɛ aseɛ: “Mɛgyae me bɔne nyinaa mu na mahunu wo.” Ebia wɔrenhyira yɛn wɔ saa suahunu nwanwasoɔ yi mu, nanso wɔn a ɛtɔ mmerɛ bi a wɔpere sɛ wɔbɛte mpaebɔ ho mmuaeɛ nka no, Awurade mmɔborɔhunu hwehwɛ yɛ akwan no mu baako a tumi wom kɛse a yɛbɛfa so ate Sunsum Kronkron no adanseɛ nka.

Wɔakyerɛkyerɛ nnyinasosɛm korɔ yi ara mu fɛfɛɛfɛ wɔ Moroni 10:3–5. Yɛtaa bɔ saa nkyekyɛmu yi mua de kyerɛkyerɛ sɛ, ɛnam nokorɛ mpaebɔ so, yɛbɛtumi ahunu sɛ Mormon Nwoma no yɛ nokorɛ anaa. Mmom saa muabɔ yi bɛtumi abu ani agu mmɔborɔnunu dwumadie a ɛhohia so. Tie sɛdeɛ Moroni hyɛ n’afotuo ase: “Mɛtu mo fo sɛ, berɛ a mobɛkenkan saa nneɛma yi no, mobɛkae mmɔborɔhunu a Awurade ayɛ ama nnipa mma, ɛfiri berɛ a ɔbɔɔ Adam mpo de bɛsi mmerɛ a mo nsa bɛka saa nneɛma yi na moadwennwene ho wɔ mo akoma mu.”

Moroni hyɛ yɛn nkuran sɛ mma yɛnkenkan saa nneɛma yi nko ara—twerɛtohɔ a na ɔrebɛsɔ ano no—mmom yɛn nwene ho wɔ yɛn akoma mu deɛ Mormon Nwoma no da no adie “sɛdeɛ Awurade asi ahunu nnipa mma mmɔbɔ.” Ɛyɛ Awurade mmɔborɔhunu a yɛredwennwene ho no na esiesie yɛn ma “yɛsrɛ Onyankopɔn, Onniawieeɛ Agya no, wɔ Kristo din mu, sɛ saa nneɛma yi nyɛ nokorɛ a.”

Berɛ a yɛredwenne Mormon Nwoma no ho no, yɛbɛtumi abisa sɛ: Enti ɛyɛ nokorɛ ampa, sɛdeɛ Alma kyerɛkyerɛeɛ sɛ Onyankopɔn mmɔborɔhunu nhyehyɛeɛ no ma awerɛhyɛmu sɛ onipa biara a woatena asase yi so pɛn no bɛsɔre afiri awufoɔ mu na wɔbɛsan de wɔn “nipadua a ɛwie pɛyɛ no ama wɔn”? Enti deɛ Amulek reka no yɛ nokorɛ—enti Agenkwa no mmɔborɔhunu bɛso obiara sɛdeɛ atɛntenenee nwononwon rehwɛhwɛ sɛ ebia ɛbɛyɛ yɛn asɛdeɛ sɛ yɛbɛtua ka na mmom “[atwa yɛn ho ahyia] wɔ ɔgyeɛ nsam”?

Enti ɛyɛ nokorɛ,sɛdeɛ Alma adi ho adanseɛ, sɛ Kristo anhunu amamne amma yɛn bɔne nko ara na mmom yɛn “yeaa ne amanehunu” sɛdeɛ Ɔbɛtumi “ahunu sɛdeɛ ɔbɛboa ne nkorɔfoɔ sɛdeɛ wɔn sintɔ teɛ”? Enti Awurade yɛ mmɔborɔhunnfoɔ saa ampa, sɛdeɛ King Benjamin kyerɛeɛ no, te sɛ akyɛdeɛ kwa, Ɔdimaa “wɔn a wɔawuo na wɔnnim Onyankopɔn apɛdeɛ a ɛfa wɔn ho anaasɛ wɔn a wɔayɛ bɔne a wɔnnim no bɔne”?

Enti ɛyɛ nokorɛ, sɛdeɛ Lehi kaeɛ no, sɛ “Adam hweease sɛ nnipa bɛwɔ hɔ; na nnipa wɔ hɔ, sɛ wɔbɛnya anigyeɛ”? Na ɛyɛ nokorɛ ampa, sɛdeɛ Abinadi dii adanseɛ, kaa Yesaia nsɛm, sɛ “wɔpiraa Yesu Kristo maa yɛn mmaratoɔ, ɔpira maa yɛn bɔne; na yɛn asomdwoeɛ ho asotwe da ne so; na ne mpiretwa so yɛnyaa ayaresa”?

Tɔfabɔ mu, Agya no nhyehyɛeɛ sɛdeɛ wɔakyerɛ wɔ Mormon Nwoma no mu yɛ mmɔborɔhunu ampa? Medi adanseɛ sɛ ɛyɛ nokorɛ na asomdwoeɛ-ma ne anidasoɔ nkyerɛkyerɛ a ɛfa mmɔborɔhunu ho wɔ Mormon Nwoma no mu no yɛ nokorɛ.

Nanso, mesusu sɛ ebia ebinom repere, ɛmfa ho ne mo gyedie akenkan ne mpaebɔ no, sɛ mobɛhunu Moroni bɔhyɛ a ɛne sɛ Ɔsoro Agya no “bɛda nokorɛ no adi akyerɛ mo, ɛnam Sunsum Kronkron tumi no so.” Menim saa aperedie yi ɛfiri sɛ metee nka, mfeɛ bebree a atwam, berɛ a me ankasa me kenkann Mormon Nwoma no kakra mmerɛ a ɛdi kan no amma me mpaebɔ ho mmuae a emu da hɔ ntɛm pa ara.

Sɛ worepere a, ma mento nsa mfrɛ wo ma wonni Moroni afotuo so sɛ dwennwene akwan bebree a Mormon Nwoma no kyerɛkyerɛ “sɛdeɛ Awurade ahunu nnipa mma mmɔbɔ”? Wɔ me suahunu mu no, mewɔ anidasoɔ sɛ, sɛ woyɛ saa a, Sunsum Kronkron no asomdwoeɛ bɛtumi awura w’akoma mu na wobɛtumi ahunu, agye adi, na woate nka sɛ, deɛ Mormon Nwoma no ne mmɔborɔhunu nhyehyɛeɛ kyerɛkyerɛ no yɛ nokorɛ. .

Meda m’anisɔ adi wɔ Agya no mmɔborohunu nhyehyɛeɛ kɛseɛ no ho ne ɔpɛ a Agyenkwa no wɔ sɛ ɔbɛyɛ no ho. Menim sɛ ɔbɛda Ne ho adi wɔ mmɔborɔhunu mu wɔ Ne tɛmpol kronkron no mu ne yɛn asetena mu fa biara sɛ yɛbɛhwehwɛ no a. Wɔ Yesu Kristo din mu, amen.