Mary ak Caroline Rollins

Mary Rollins te gen 12 an lè misyonè yo te vizite Kirtland, Ohio. Li te tande yo pale konsènan Liv Mòmon an. Nan epòk sa a, te gen yon sèl kopi liv la nan Kirtland, epi yon dirijan Legliz la ki te rele Isaac Morley te genyen l.

Mary te ale lakay Frè Morley epi li te mande wè liv la; Frè Morley te kite l kenbe l. Mary te mande l si li te ka pote l lakay li.

Frè Morley pa t vle bay Mari kopi liv li a. Li potko li anpil ladan. Mary te sipliye Frè Morley pou li kite l prete l.

Frè Morley te dakò. Li te di Mary te kapab pote liv la lakay li si l ap pote l tounen bonè nan demen. Mary te trete l tankou yon trezò. Li te rete reveye pifò nuit la ap li.

Lè Mary te retounen liv la, Frè Morley te sezi wè tout sa li te deja li. “Ti pitit,” li te di, “pote liv sa a lakay ou epi fin li l. M kapab rete tann.”

Mary sete premye moun nan Kirtland ki te li Liv Mòmon an jiskalafen. Pa lontan apre l te fini, li te rankontre Pwofèt Joseph Smith. Lè l te aprann jan Mary te renmen Liv Mòmon an, li te di l li temèt pran kopi Frè Morley a. L a bay Frè Morley yon lòt.

Pita nan ane sa a, Mary ak fanmi l te deplase al viv Independence, Missouri. Li te kontan anpil pou l gade jan dirijan Legliz yo te kòmanse rasanble yon nouvo liv ki rele Liv Kòmandman yo. Liv sa a t ap gen anpil nan revelasyon Jezikri te bay Joseph Smith yo.

Doktrin ak Alyans 67; 70:1–4; Les Saints, 1:178

Men, kèk moun nan Independence pa t renmen Legliz la. Yo te vle pou Sen yo ale. Yon jou, gason ankòlè te kase bilding kote yo t ap enprime Liv Kòmandman an. Yo te voye près pou enprime a deyò fenèt la epi yo te gaye paj Liv kòmandman yo nan lari a.

Les Saints, 1:177–78

Mary ak sè li, Caroline, t ap obsève dèyè do yon kloti. Mary te di Caroline li te vle pran paj yo anvan yo te pèdi yo. Caroline te pè mesye ankòlè yo. “Y ap touye nou,” li te di. Men, Mary ak Caroline te konnen ke paj sa yo te gen pawòl Bondye a sou yo.

Les Saints, 1:178

Sè yo te tann jiskaske mesye yo pa t ap gade. Apresa, yo te kouri antre nan lari a epi ranmase maksimòm paj ke yo te ka pote. Pandan yo t ap prese ale, kèk nan gason yo te wè yo epi yo te rele pou yo sispann. Mary ak Caroline te kenbe paj yo pi sere epi yo kouri pi vit ke yo te kapab nan yon jaden mayi ki te tou pre.

Les Saints, 1:178–79

De nan mesye yo te kouri dèyè sè yo jis nan jaden mayi a. Mayi a te tèlman wo, Mary ak Caroline pa t kapab wè ki kote yo prale. Yo jete tèt yo atè epi yo kache paj yo anba kò yo. Yo te koute tou dousman pandan de mesye yo t ap mache nan mayi a ap chèche yo.

Les Saints, 1:179

Yon ti tan apre, mesye yo te abandone. Mary ak Caroline te an sekirite. Yo te sove paj revelasyon Senyè a pou Liv Kòmandman yo. Jodia revelasyon sa yo nan liv Doktrin ak Alyans la.

Les Saints, 1:179