Ikɔ Abasi Jesus Christ Ɔkɔŋɔde ke Ufɔkemana

Ubono ŋkpɔ Ufɔk Abasi Jesus Christ eke Ndisana Owo ke Ukperedem Usen ɔkɔŋɔ ke ufɔkemana. Edide akpan ɔnɔ ubono-ŋkpɔ ke ufɔk-emana edi temple. Mme edinam emi ebɔde do anam nnyin ifiak inyɔŋ ika iso Ete eke Heaven nte nsinsi ufɔkemana.

Ke akwa mbono Ɔfiɔŋ Inaŋ 2025, President Russell M. Nelson ama okoot asiak ndibɔb obufa temple 200. Enye amama ndisian mbufa temple ke akpatre eke akwa mbono, ndien nnyin kpukpru idara ye enye. Nte ededi, ye mme ediwak ibat temple idaha emi ke ata eritɔŋɔ ikpehe eke ndiduak ye ndibɔb, edi akpan ete ana nte isuhɔre ndisian mme obufa temple. Ke ntre, ye unyime eke Eboho mme Apostle Duopeba, nnyin idisianke obufa temple ndomokiet ke mbono emi. Nnyin iyekaiso ke ndinɔ mbon Ufɔk Abasi mme edinam temple ke ofuri ererimbot, esinede ini ye ebiet emi edisiande ndibɔb mme obufa temple.

Ubak utiŋikɔ mi ke uwemeyo emi nsuk nkurede nkewet ke edima President Russell M. Nelson nnyin ama akakpa. Se itienede idahaemi nkewet enyuŋ enɔ unyime ke mme udua mbemiso, edi osuk ada ɔnɔ mme ukpep-ŋkpɔ mi, emi Jehovah ɔnɔde udɔŋ.

Etop enɔde ufɔkemana, ekesiande ke isua 30 emi ekebede, etiŋ ete “ufɔkemana edi se Abasi enimde” ndien “ke edi akpan-ŋkpɔ ke uduak Andibot ɔnɔ nsinsi akaŋa eke nditɔ Esie.” Enye ŋko etiŋ “ke mbet emi Abasi ɔkɔnɔde nditɔ Esie ke nditɔt nyuŋ nyɔhɔ isɔŋ osuk ododu.” Ndien “nnyin ifiak ifiori ke Abasi ama eteme ete ke enyene ndikama nsasana odudu edibot-owo kpɔt ke ufɔt erenowo ye ŋwan, emi enamde ndɔ nte ebe ye ŋwan.” Nte Elder Russell M. Nelson ke ini oro ekekpepde ke mbon esede ke Brigham Young University ete ke ufɔkemana edi “se idibede uduak Abasi. … Ke akpanikɔ, ntak uduak ekedi ndidibede ufɔkemana.”

Ubak-ini esidiɔŋɔ Ufɔk Abasi Jesus Christ nte Ufɔk Abasi emi ɔkɔŋɔde ke ufɔkemana. Edi ntre! Ebuana nnyin ye Abasi ye ntak eke uwem isɔŋ ema enam anwaŋa ke ndaha eke ufɔkemana. Ikɔ Abasi Jesus Christ edi uduak eke Ete eke Heaven nnyin kabaŋa ufɔn nditɔ spirit Esie. Nnyin imikeme nditiŋ ke akpanikɔ ite ke ema ebemiso ekpep nnyin uduak ikɔ Abasi ke esop eke nsinsi ufɔkemana, enam enye osu otode ke ufɔkemana eke isɔŋ, ndien akaŋa emi enimde edi ndidibede nditɔ Abasi ke nsinsi ufɔkemana.

Ke misehe ndaha ukpep ŋkpɔ oro, eneni odu. Ke United States nnyin imikut ukut ke mbiara eke ndɔ ye edinyene nditɔ. Ke ekperede isua ikie emi ekebede ndusuk ufɔk emi ebe mme ŋwan edade ibuot iwak-ke aba, ndien ŋko ye ediman nditɔ. Mme ndɔ ye ndaha emana eke mbon Ufɔk Abasi nnyin enehede awak eti-eti, edi mmɔ ŋko esuhɔre eti eti. Edi akpaŋkpɔ ete Ndisana Owo ke Ukperedem Usen inanake ifiɔk mmɔ ke ntak ndɔ ye ufɔn nditɔŋwɔŋ. Oro edi ini-Iso emi nnyin iyomde. “Edimerede ke enyɔŋ edi mbubehe ufkemana,” President Nelson ekekpep nnyin. Edi-to ke mme edinam ikɔ Abasi Jesus Christ kpɔt ke ekeme ndidibede ufɔkemana ke enyɔŋ.”

Enyene ifiɔk ebaŋa ŋwure ndɔ ye edinyene eyen ke ntak mbuk eset, edi edu uwem ye ukpep eke Latter-day Saint ana nte ɔfɔn—itieneke—mme udim oro.

Ke uyen mi ke isua 80 emi ekebede, ami ŋkoduŋ ke iŋwaŋ ete-ete ye ete-eka mi ke ebiet kpukpru ŋkpɔ eketibede ke usen oro ekedi ke idak ndausuŋ eke ufɔkemana. Ekebe ndise ikiduhe mme mme ŋkpɔ mbre efen emi ekemede ndiduri mkpɔŋ utom ufɔkemana. Ke usuŋ efen, ke obufa eyo mfin, esisit mbon ufɔk Abasi esiwak ndinim mme edinam ufɔkemana. Ndiduŋ ke eti ebiet ye obufa uka-isaŋ, mbre emi etimde-enam, ye ŋkpɔ edisɔp nneme-nneme anam emem ɔnɔ mme iwaad ndida ufɔkemana mmɔ nte ebiet iduŋ eke ufɔkŋwed, emi mmɔ edede-idap enyuŋ edia udia nte emade edi ukpeme ete ye eka ɔsuhɔre kabaŋa edinam mmɔ.

Edibiat odudu eke ete ye eka ke usuŋ emi mbon ufɔk Abasi mfin emi edade enyene se ediade. Ke mme ini edem, kiet ke otu uteŋe emi adiande ufɔkemana ekedi ifiɔk ndinam utom kiet ke ndiyom ini-iso—utɔ nte ndidiɔŋ isɔŋ ɔfɔn mme ndinyene udia. Ufɔkemana ekedi eboho ye edinim ebiet ediŋwana okuk. Mfin, ediwak ufɔkemana edi eboho udia okukemi miyomke akamba ndaha ediboho mme edidiana kiet.

Nte odudu eke ete ye eka ɔsuhɔre, mme Latter-day Saint esuk enyenyene ubiɔŋ utom Abasi ɔnɔde ke ndikpep nditɔŋwɔŋ ndibeŋeidem mbaŋa nsinsi ebiet iduŋ eke ufɔkemana (se Doctrine and Covenants 68:25). Ediwak nnyin ana inam emi ke ini ediwak ufɔkemana nnyin edide eke iduŋ. Uwɔrɔ ndɔ, mkpa, ye edidianade edi se iditibede. Ami mma ŋkut oro ke ufɔkemna eke ami ŋkekɔride.

Ete mi akakpa ke ini ami ŋkeedide isua itiaba, ntre ekpri eyen eka mi eren ye eyen eka mi ŋwan ikikɔri ye ebekpa eka nnyin. Ke ata ɔkpɔsɔŋ ndaha, enye aka iso. Enye ekedi ikpɔŋ onyuŋ okop mmemidem, edi ye unwam Abasi enye enyene odudu ukpepŋkpɔ esie kabaŋa ukpep eke mfiak-mmen-ndi Ufɔk Abasi ama ada nnyin usuŋ. Adaŋa nte enye ɔkɔbɔŋde akam oyom uŋwam eke heaven ke ndibɔk nditɔ esie, ndien ema ediɔŋ enye! Ekebɔk nnyin ke eti ufɔkemana emi nnyin ikifiɔkde ofuri ini ite ke ete nnyin ama akpa. Eka ama ekpep nnyin ete ke iminyene ete ke enye enyene ebe ke nnyin iyesuk idi ufɔkemana ke ntak ndɔ eke temple. Ete nnyin ikiduhe ke esisit ini ke ntak emi Abasi okokotde enye esin ke utom efen.

Mɔdiɔŋɔ ke ediwak ufɔkemana inemke esit, edi eka kpɔt ekeme ndikpep ke ima eke Ete Heaven ye mme akpatre eridiɔŋ otode ndɔ eke temple. Mbufo ŋko emekeme ndinam emi! Uduak Ete eke Heaven ɔsɔŋɔ ke emi ndidi eyemem nnɔ kpukpru owo. Nnyin kpukpru iminem esit kabaŋa ndɔ temple ye ke mme edidiɔŋ eŋwɔŋɔde ebaŋa edidian ufɔkemana ke nsinsi. Nte eka mi, nnyin imima nditi eŋwɔŋɔ Lehi ɔkɔnɔde eyen esie Jacob ete ke Abasi “eyenɔ udori ke ufen fo” (2 Nephi 2:2). Enam oro enɔ kpukpru ufɔkemana eke Latter-day Saint, ekemde ye emi mikemke idahaemi. Nnyin idi ufɔk Abasi ufɔkemana.

Ubono ŋkpɔ nnyin ye se inimde ke akpanikɔ ke ufɔkemana ɔsɔŋɔ onyuŋ adian nnyin kiet. Ami ndifreke ke nsinsi Ete eka mi Harris, ke ini emi nnyin nditɔŋwɔŋ ikiduŋde ke iŋwaŋ esie emi ekperede Payson, Utah. Enye ama ɔnɔ mi etop iduɔesit ete ke ete mi ama akpa ke anyan-usuŋ Denver, Colorado. Mma mfehe nduk ke ubet ntɔŋɔ edɔŋ ke mben bed, ntua eyet. Ete-ete etiene mi onyuŋ ɔtɔŋɔ edɔŋ ke nkaŋ mi ete, “ami nyedi ete fo.” Ediye eŋwɔŋɔ oro edi enyene odudu uwutŋkpɔ kabaŋa se ete-ete ye eka-eka ekemede ndinam ndisiri ufaŋ ke ini ufɔkemana enanade mme mikwe owo mmɔ.

Ete ye eka, edide ikpɔŋ mme edɔde ndɔ—ye mbon eken, nte mme ete-ete eka-eka, emi edade ubiɔŋ utom oro enɔ nditɔŋwɔŋ—edi akwa andikpep. Ata akpan ukpepŋkpɔ mmɔ edi uwutŋkpɔ. Otu ufɔkemana edi ata akpan ebiet ndiwut nyuŋ mkpep nsinsi edu-uwem, nte ufɔn ndɔ ye nditɔŋwɔŋ, ntak uwem, ye ata usuŋ idara. Ŋko edi eti ebiet ke ndikpep mme akpan ukpep efen ke uwem, nte mfɔnido, erifen-nnɔ, mfara-ke-idem, ye ufɔn ufɔkŋwed ye utom akpanikɔ.

Ntre, ediwak mbon Ufɔk Abasi enyene ndima mbon ufɔkemana emi miyomke edu ye idorenyin ikɔ Abasi. Utɔ mbon oro eyom ima nnyin ye ime. Ke ndibuana ye kiet eken, ana nte iti ite ke mfɔn-mma emi nnyin iyomde itreke ke ɔkpɔsɔŋ ndaha uwem emi. Akamba ukpep ke Doctrine ye Covenants 138:57-59 ɔnɔ nnyin ɔsɔŋɔ ete ke ŋkabare esit ye ŋkɔri eke spirit ekeme ndika iso ke obio spirit emi etienede uwem isɔŋ. Ata akpan-ŋkpɔ, nte ufɔkemana edianade kiet ke ndisɔŋɔ kiet eken idem, ana nte kpukpru nnyin iti ite ke mme idiɔkŋkpɔ ye mme ndudue emi kpukpru nnyin ikutde ke uwem ke ekeme ndifen-nnɔ otode ke ŋkabare esit ke ntak enyeneubɔŋ ye unyaŋa Erisio-isop eke Jesus Christ.

Andinyaŋa nnyin, Jesus Christ, edi akwa uwutnkpɔ nnyin. Nnyin iyebɔ eridiɔŋ edieke nnyin inamde uwem nnyin itiene mme ukpep ye nwaidem Esie. Nditiene Christ ye ndiyak idem nnyin nnɔ utom kiet eken edi mfɔn-ŋkan edinam kabaŋa uma-idem ye nda-ke-idem emi ikutde idahaemi.

Mme ete ye eka enyene ubiɔŋ ke edikpep nditɔ mmɔ ifiɔk efen emi midihe ukpep eke ikɔ Abasi. Ufɔkemana ediana kiet ke ini enamde nti ŋkpɔ ɔtɔkiet. Mme iŋwaŋ eke ufɔkemana ɔbɔp mme ebuana ufɔkemana. Idara ifiɔk ukpep eke ufɔkemana ɔsɔŋɔ ediboho ufɔkemana. Ndika camp, mme mbre, ye ŋkpɔ inemesit efen edi eti ke ndibɔk mme ufɔkemana. Ana nte ufɔkemana enam ediboho ufɔkemana man eti mbon-ntɔŋɔ-ubon, emi adade aka temple.

Ana nte ete ye eka ekpep nditɔŋwɔŋ nti ubɔk utom eke uwem, esinede ndinam utom ke iŋwaŋ-esa ye ke ufɔk. Ndikpep mme usem edi eti mbeŋeidem kabaŋa utom uŋwam ye obufa uwem. Mme andikpep mme ŋkpɔ ekeme ndidi mme ete ye eka mme ete-ete, eka-eka mme mbon ufɔkemana eken. Ufɔkemana ɔkɔri ke ini ekpepde nte eboho ye ndibɔ item ɔtɔkiet ke kpukpru ŋkpɔ abaŋade ufɔkemana ye mbon esie.

Ubakowo ekeme ndidɔhɔ ete, “Edi nnyin inyeneke ini inɔ oro.” Ndinɔ ini ke ndinam ŋkpɔ emi ɔfɔnde, ediwak ete ye eka ekeme ndikut ke ekeme ndiwɔŋɔre ufɔkemana mmɔ nnim edieke kpukpru mmɔ enimedeŋkpɔ ofim mmɔ. Ŋko mme ete ye eka, eti ete, se kpukpru nditɔ oro eyomde ke udia mbubreyo edi ini ye mbufo.

Akamba eridiɔŋ oduk ke ufɔkemana edieke mmɔ ebɔŋde akam kiet, etɔŋɔ edɔŋ ke okoneyo ye usenubɔk ke ndinɔ ekɔm kabaŋa mme eridiɔŋ ye ndibɔŋ akam mbaŋa afanikɔŋ. Ediɔŋ ufɔkemana ŋko nte mmɔ etuakde-ibuot ɔtɔkiet ke mme esop Ufɔk Abasi ye ke mme ini ukpono efen. Eboho ufɔkemana ŋko ɔsɔŋɔ oto ke mme mbuk ufɔkemana, ndinam mme ido ufɔkemana, ye ndibuana nsasana ifiɔk ukpep. President Spencer W. Kimball ama eti nnyin ete “enyene ntuk mbuk eke uwem nnyin ye eke mme ete nnyin … edi enyene odudu ŋkpɔ-utom ukpepŋkpɔ.” Mmɔ esiwak ndidi ata nti usuŋ eke mbufiɔk spirit ɔnɔ nnyin ye ubon nnyin.

Ami nnɔ ikɔ-ntiense nte ke Ɔbɔŋ Jesus Christ, emi edide Ikpɔŋ-ikpɔŋ Eyen emi Abasi, Nsinsi Ete nnyin Obonde. Enye okoot nnyin ete itiene usuŋ ediomi emi adade aka edidiana kiet eke ufɔkemana eke heaven. Odudu eridian eke itie-oku, emi ukpɔhɔde emi ekefiakde eda edi ke Kirtland Temple adade usuŋ, ada ufɔkemana obok ɔtɔkiet ke nsinsi (se Doctrine and Covenants 110:13–16). Eda mmɔ enam utom idahaemi ke ibat ŋkɔri eke mme temple Jehovah ke ofuri ererimbot. Emi edi akpanikɔ. Yak nnyin ibuana ke esit oro, ami mbeŋe, ke enyiŋ Jesus Christ, amen.