Ese Abasi enyuŋ Edu Uwem

Ke ɔfiɔŋ June emi ebede, idiɔk unɔmɔ ama etibe ke idut Lesotho ke usuk-usuk Africa. Ekpri bus emi ekemende mme ŋkaiferi iban Edip eke Maputsoe Branch eke Ufɔk Abasi ye mme adausuŋ mmɔ owo itiaba ekewat eka etak obio, Maseru, eka mboho ŋkaiferi iban etode district mmɔ. Nte mmɔ ewatde ke mbahare akwa usuŋ-iba ke usenubɔk, moto kiet otode nsakiso edidi, ke odomode ndibe moto efen, ediwat oduk usuŋ emi bus oro akawatde. Ufaŋ mme ini ikoduhe ndifep ediwat ntɔ iso-ye-iso, ndien ke ata iwiwa mme mkpɔ-isaŋ editɔ kiet eken, ediwerede ekpɔŋ usuŋ, enyuŋ ebomo ebubure ikaŋ.

Ke ofuri-ofuri, owo Efut ekekpa ke unɔmɔ oro, esinede ŋkaiferi iban ition, mme adausuŋ Ŋkaiferi Iban iba, ye branch president oro ye ŋwan esie. Mme andikibɔhɔ, mbon ufɔkemana, ye mme ufan ema enyene ediwak iduɔesit ke ekikere, esinede mme ndaha ifiopesit, mfuhɔ, ye edibiom-ikpe. Kesioho mme ekikere ye mbume emi owo mibɔrɔke, mmɔ ekedv kiet eken esit enyuŋ ewɔŋɔre ebine Abasi oto ke nsasana ikwɔ, ŋwed Abasi, ye akam, nte ebiet emi mmɔ edikutde ndɔŋesit. Owo-isua Efureba andikbɔhɔ Setso’ana Selebeli etiŋ ikɔ-ntiense ete, “Jesus Christ ama nnyin onyuŋ odu ye nnyin, okposuk edi nte esit nnyin ayatde.”

Ŋkaiferi ŋwan kiet ye adausuŋ kiet emi ekebɔde usɔbɔ eto unan nta-ikaŋ ekekpep Ŋwed Mormon ɔtɔkiet. Owo kiet ete, “Ibighike-bighi nnyin nte nnyin ikikotde ŋwed Moroni, ndien Moroni etiŋ ata ukem ŋkpɔ se ami nsikerede. … Ini emi enye etiŋde ikɔ, ebiet nte enye ɔdɔhɔ ete, ‘Afo enyene ndikpep mme ikɔ emi koro ekewet mmɔ enɔ fi man aŋwam ebe mfina emi.’”

Ke ebuana edinam ikpo nnɔ mbon emi ekekpade, Area Seventy Elder Siyabonga Mkhize eketiŋ ete, “Kpukpru nnyin inyene ndiwɔŋɔre mbine Abasi ke ini emi nyuŋ ndɔhɔ Enye ete ɔdɔŋ nnyin esit onyuŋ … osuhɔre ubiak emi nnyin ikopde.” President Ŋkaiferi Iban otode mbɔhɔ Leribe Branch, Mampho Makura, editeme ete: Ewɔŋɔre etiene Abasi, enyuŋ ekut ɔsɔŋɔ ndinyime uduak Esie. Jesus Christ edi ‘ntɔŋɔ ye utit mbuɔtidem nnyin’ [Hebrews 12:2]. Ekuse itie efen, edi ese Enye.”

Ese Enye. Ikɔ esie afiak etiŋ item emi Alma ɔkɔnɔde eyen esie Helaman ete: “Kut ete ke afo ese Abasi onyuŋ odu uwem.” Alma akada ifiɔk-ukpep eke Lehi ye ikɔt esie owut Liahona nte uwutŋkpɔ ete: “Emem ndikpaŋ-utɔŋ nnɔ ikɔ Christ, emi ediwutde mbufo nnen-nnen usuŋ ndisim nsinsi inemesit, nte ekedide ɔnɔ mme ete nnyin ndikpaŋ-utɔŋ nnɔ compass emi, emi ediwutde mmɔ nnen-nnen usuŋ ndika isɔŋ eŋwɔŋɔ.” Alma ete, “Edieke mmɔ edisede mmɔ eyedu uwem. … Ndien edieke nnyin … isede nnyin imikeme ndidu uwem ke nsinsi.”

Ke ndaha efen, Alma edida uwutŋkpɔ urukikɔt okpoho emi Moses ekemenede ɔkɔŋ ke enyɔŋ owut ke ini ndiɔi urukikɔt okodomde nditɔ Israel eke eset. Jehovah ɔdɔhɔ Moses ete anam mbiet urukikɔt onyuŋ emen ɔkɔŋ ke eto, ye uŋwɔŋɔ “ete kpukpru owo emi urukikɔt odomde, kini enye emenede enyin ese urukikɔt okpoho oro, eyedu uwem.” Alma anam aŋwaŋa ke urukikɔt okpoho oro ekedi mbiet mme idiɔŋɔ Christ, emi edimenede ekɔŋ ke cross. Ediwak ema ese enyuŋ edu uwem, edi mbon efen ekedi, ke mme ikɔ Alma, “enehede esɔŋ esit” anamde mmɔ enehede esin ndise enyuŋ etak.

Alma edibup:

“Edieke ekande ekɔk mbufo ke ndise ke enyin ikpɔŋ man ekɔk mbufo, ndi mbufo ikpesehe ke usɔp, mme ndi mbufo ekpesɔŋ esit mbufo ke unana mbuɔtidem, enyuŋ edi ifu, man mbufo ekuse ye enyin mbufo, man mbufo etak?

“… Ndien ese ke enyin mbufo enyuŋ etɔŋɔ ndinim Eyen Abasi ke akpanikɔ, ete ke enye eyedifak ikɔt esie, ete ke enye eyekut ndutuhɔ onyuŋ akpa man afak mme idiɔkŋkpɔ mmɔ; ete ke enye eyeset ke mkpa, emi edinamde eriset ke mkpa etibe, ete ke kpukpru owo eyeda ke iso esie, man ebiere ikpe ke akpatre ye usen ubiere ikpe, nte mme utom mmɔ edide.”

Nte ededi, item oro “ese Abasi enyuŋ edu uwem” enyene se ɔwɔrɔde ɔnɔ nnyin idihe ke ini nsinsi ikpɔŋ edi anam ofuri ukpuhɔde ŋko ke ido ye edifɔn eke uwem isɔŋ nnyin. Eti mme ikɔ eke ekpri Sister Selebeli ke Lesotho emi ekebemde iso etiŋ ke—“Jesus Christ ama nnyin onyuŋ odu ye nnyin, okposuk edi nte esit nnyin ayatde.”

Esine ke uduot idiɔk ererimbot—ke ebiet emi andidiɔk aŋwanade ekɔŋ ye ke ebiet emi ofuri owo mifɔnke ima—ke mme edikpu ye ndudue, ukut ye mfuhɔ, editip ye unana, ukɔbɔ ye utuk edidu do. Edi ke edise Abasi kpɔt ke mme owo, ufɔkemana, ye kpa mme idut ekeme ediforo. President Russell M. Nelson ekpep ete, “Koro Andinyaŋa, otode anana-adaŋa Erisio-isop Esie, akafakde nnyin kiet kiet osio ke mmem-idem, ndudue, ye idiɔkŋkpɔ, ye ke ntak emi Enye okokopde ofuri ubiak, mfina, ye mbiomo emi mbufo ekenyenede [se Alma 7:11–13], ndien nte mbufo ekabarede esit ke akpanikɔ enyuŋ eyomde uŋwam Esie, mbufo emekeme ndidaha ŋkoŋ ŋkan idiɔk ererimbot emi.”

Iduhe eŋwɔŋɔ emi ewakde edifiak ntiŋ ke Ŋwed Mormon akan emi ete: “Adaŋa nte mbufo edinimde ibet mi mbufo eyeforo ke isɔŋ oro; edi kadaŋa nte mbufo midinimke ibet mi eyesibe mbufo esio ke iso mi.” Ata ifiɔk-ukpep eke mbon Ŋwed Mormon ke ata ediwak mme isua ediwut mme akpanikɔ kabaŋa mme ikɔ emi. “Uforo” ɔwɔrɔ ndinyene ndausuŋ ye mme edidiɔŋ eke heaven ke uwem mmɔ. “Uforo” ɔwɔrɔ ndinyene mme ndaha nsɔŋ-idem emi anamde mmɔ edɔ-ndɔ, etɔŋɔ ufɔkemana, enyuŋ eŋwam ke mme unana eke mbon efen. “Ndiforo” edisine ukeme ndikan nsɔŋɔ-ŋkpɔ ye idomo. Otode ke mfɔn Christ, “kpukpru ŋkpɔ [eke] saŋa ɔtɔkiet enam ufɔn enɔ [mmɔ],” eneŋede mmɔ, onyuŋ ɔsɔŋɔ ebuana mmɔ ye Enye.

Alma anam-aŋwaŋa ke ndise Abasi edi ndinim ibet Esie, ŋka-iso ndiseme nnɔ Enye nyom uŋwam Esie, nneme ye Enye ke kpukpru edinam mbufo, nyuŋ nyak esit nnyin ɔyɔhɔ ye ekɔm ɔnɔ Enye ke uwemeyo ye okoneyo. Edikuy ibet ye item Abasi ke mme ŋwed Abasi ye ke mme ikɔ eke mme isuŋutom Esie. Ukpepŋkpɔ ye mme ekikere emi ewetde ke “Ufɔkemana: Etop emi enɔde Ererimbot” edi ntɔŋɔ uwutŋkpɔ. Ŋkpɔ ndausuŋ efen odu ke ŋwed Enɔde ke Nsɔŋɔnda eke Iwaad. Ibuot-ikɔ eke Young Men ye Young Women eke isua emi edi “Ese Christ,” edade eto ndausuŋ ndɔŋesit emi Jehovah ɔkɔnɔde Joseph Smith ye Oliver Cowdery ete: “Ese mi ke ofuri ekikere; ekuyik, ekufehe ndik.” Enɔde ke Nsɔŋɔnda eke Iwaad editiŋ ɔnɔ ata ediwak iwiwa ibet ye ido Abasi onyuŋ ekpep nte edisede Jehovah ke ndinam nti ubiere. Oro edi ŋwed ndausuŋ idihe kpɔt inɔ iwaad edi ɔnɔ kpukpru nnyin.

Nte ata akpan uwutŋkpɔ kiet, Kabaŋa ke Nsɔŋɔnda eke Iwaad enyene akpan ndausuŋ ke ibuot-ŋwed ekotde “Idem Fo Edi Edisana.” Enye eteme ete: “Ekama idem mbufo—ye idem eke mbon efen—ye ukpono. Nte afo anamde ubiere kabaŋa ɔfɔŋ, utɔ-idet, ye idem mbufo, bup idem fo ete, ‘Ndi ami mmekpono idem mi nte nsasana enɔ kiet eketode Abasi?’”

Enɔde ke Nsɔŋɔnda eke Iwaad aka-iso etiŋ ete: “Enim mme ekikere eren ye ŋwan ye eke ina ndidi nsasana. Inaha nte mmɔ edi ŋkpɔ mbubure mme nyɔ. Kesioho ndɔ ke ufɔt erenowo ye ŋwan, edi ndudue ndituk mme ndedibe, nsasana nde eke idem owo efen kpa edieke esinede ɔfɔŋ. Ke mbumek mbufo kabaŋa ŋkpɔ se afo anamde, esede, ekotde, ekpaŋde-utɔŋ enɔ, ekerede ebaŋa, enɔde-aka,mme ewetde, etre ŋkpɔ ekededi emi enehede edemere ndiɔi udɔŋ ke mbon efen mme idem mbufo.”

Emi anam nditi item eke President Nelson eke mmi-mmi-emi ete

“Mme esisit ŋkpɔ edisɔp afina uwem mbufo ikan ndibiat edisana mbet [eke nsana-idem] emi. Kabaŋa mbon emi enamde mme ediomi ye Abasi, idiɔk-uwem edi usuŋ emi ekemede ndisɔp nnana ikɔ ntiense mbufo.

“… Odudu ndibot uwem edi ifet kiet eke ndaha-Abasi emi Ete ke Heaven ayakde nditɔ Esie ke ikpɔkidem ete enam. Ke ntre, Abasi ɔn̄ɔ nnen nnen usuŋ ndikama edisana odu-uwem, odudu emi. Ebuana obukidem edi ɔnɔ eren ye ŋwan ikpɔŋ emi edɔde ndɔ ye kiet eken.

“Ediwak owo ke ererimbot inimke emi ke akpanikɔ, edi se ekerede ke obio idihe andikama akpanikɔ. Jehovah ama ɔdɔhɔ ete ke ndedehe owo ndomo kiet ididukke obio ubɔŋ celestial. … Edieke mbufo misanake, mmebeŋe ye mbufo nte yak ekabare esit. Etiene Christ enyuŋ ebɔ eŋwɔŋɔ Esie eke ɔyɔhɔ erifen-nnɔ nte mbufo etuade mkpɔfiɔk ofuri-ofuri ke mme idiɔkŋkpɔ mbufo [se Isaiah 1:16–18; Doctrine ye Covenants 58:42–43].”

Eti ete ke eŋwɔŋɔ Ŋwed Mormon, nsakiso uforo ikidihe unana—oro ekedi ndisibe mfep ke iso Abasi. Iso Esie ediwɔrɔ odudu Spirit Esie ke uwem owo. Kpukpru owo enyene idiɔŋɔ ye Uŋwana Christ nte mmɔ edukde edi ke ererimbot. Ndidian do, ubakowo enam ŋkpɔ man ena uduɔkmmɔŋ enyuŋ ebɔŋ enɔŋ ye ndadian uŋwana eke Edisana Spirit. Enye ada ifiɔk ye ndausuŋ edi, ɔsɔŋɔ onyuŋ ɔdiɔŋ ata mme enɔ obot ye ukeme eke owo, onyuŋ aŋwam ndifep ndiɔi odudu, ndiɔi ubiere, ye mme edikpu utit.

Nte mbufo, ami mmediɔŋɔ ubakowo emi ekenyenede enɔ Edisana Spirit ke inikiet edi emi otode ke editre ndinim ibet Abasi edinana edidiɔŋ oro. Akpan-akpan kiet eke ami ntide emi ndaha owo ke Ufɔk Abasi emi ekesiode oto ke ntak edidue-mbet. Enye ɔdɔhɔ ke akpa edinam esie ekedi ndikere ediyat-esit. Enye edikere ke mme ukwaŋ ebiere-ikpe ekebiere ufik-ikpe. Enye edidiɔŋɔ ke ido esie ama ɔdiɔk, edi enye edikere oro ke ediwut mme ndudue ye edikpu eke mbon efen. Ke esisit ini ebede, enye editɔŋɔ edikop inem ke edu-uwem ediwɔrɔ ke Ufɔk Abasi ke minyeneke ubiɔŋ eke mme ikoot ye ekikere ndika mme esop ntuakibuot ye ndisin-uŋwam nnɔ mbon efen.

Emi edika-iso ke esisit ini, edi enye editɔŋɔ ndinehede ŋkere kabaŋa unana Edisana Spirit—iso Abasi—ke uwem esie. Otode ifiɔk-ukpep, enye edidiɔŋɔ se oro ebiet ndinyene, ke ofuri usen, ndɔŋesit, ndausuŋ, ye ɔsɔŋɔ emi otode Spirit, ndien enye edinana oro. Ke akpatre, enye edi-nam ŋkpɔ emi akanade enam man atua-mkpɔfiɔk onyuŋ odot inikiet efen ndibɔ baptism eke mmɔŋ ye eke Spirit.

Etie nte utit iduhe inɔ nsio-nsio usuŋ emi mbonowo edade eyom ibɔrɔ, inemesit, ye uŋwam. Ediwak owo ema “ese ebe adaŋa.” Edi inaha nte nnyin idi aba “nditɔwɔŋ, emi ukpep-ŋkpɔ [ido] etode nsio-nsio edem ebara nte ofim emen etop eduɔk.” Ke ndise Abasi, nnyin imikeme edikut emem ke nsɔŋɔ-ŋkpɔ ndien mbuɔtidem nnyin ekeme edika-iso ŋkɔri kpa ke mme ini eyighe ye mfina ŋkpɔ spirit. Nnyin imikeme ndibɔ ɔsɔŋɔ ke ini iyɔde eneni ye edinim ke nsan-nsan. Nnyin imikeme ndibiere mfɔn-mma ye akpanikɔ eke idahaemi. Inehede idu usuŋ efen akan se Abasi ke Idemesie ekenimde ete: “Ekabare ese mi, ndien eyenyaŋa mbufo, kpukpru utit ererimbot: koro ami ndide Abasi, ndien efen iduhe aba.”

Ndise Abasi ɔwɔrɔ ete ke Enye idihe akpan-akpan ŋkpɔ kiet nnyin ikpɔŋ, oro ɔwɔrɔ, ete, ke Enye edi mkpon-nkan akpa-akpan ŋkpɔ nnyin. Ami ndifiak nti idiɔk unɔmɔ eke ɔfiɔŋ Itiokiet andikibe ke Lesotho. Anade ke bed ufɔkibɔk esie, kiet ke otu mme adausuŋ Ŋkaiferi Iban emi ɔkɔbɔhɔde, emi mikinimke Abasi ke akpanikɔ mbemiso ediduk Ufɔk Abasi, ete ke uduak eie idahaemi edi ndifiɔk ntak emi ekesuhɔde uwem esie. Enye ete, “Ke ndinam-ŋkpɔ nnɔ Abasi ke ofuri ini edi usuŋ nte ami ndinyenede ibɔrɔ, edieke ami ndibɔde ibɔrɔ.” “Ami ŋkesikere ke ami mmema Abasi, edi idahaemi ami menehede, nehede, nehede, nehede nehede ma Enye. Idahaemi Enye edi [akpa-akpan] ŋkpɔ ke uwem mi.”

Ami nnɔ ikɔ-ntiense kabaŋa Ete, Eyen, ye Edisana Spirit emi edude ke mfɔn-ma edidiana-kiet ke ikɔ, ekikere, uduak, ye erinam edi Abasi kiet, emi nnyin isede iyom ofuri nti ŋkpɔ. Ami nnɔ ikɔ-ntiense kabaŋa Erisio-isop Jesus Christ, emi odudu otode ndinam utibede eŋwɔŋɔ emi ete, “Ese mi, enyuŋ eyɔ esim utit, ndien mbufo eyedu uwem; koro owo emi ediyɔde ikisim utit ke ami ndinɔ nsinsi uwem.” Ke enyiŋ Jesus Christ, amen.