Efiɔk Owo emi Afo Enehede Edide
Ke misehe ebiet emi idude ke usuŋ owo mbet nnyin, uwem nnyin eyenehede okpuhɔre edieke nnyin ifiɔkde owo emi nnyin inehede idi.
Ediwak isua emi ekebede eyen-aŋwan nnyin ama enyene akamba ifiɔk-ukpep ke mission esie. Ke unyime esie, ami mbuana se enye ekewetde ɔnɔ nnyin ke udua oro ete:
“Mkpɔŋ owo emi akafiakde edi ufɔk Abasi ama okot nnyin ete isɔsɔp idi. Ke ini isimde do, nnyin ima ikut enye ke isɔŋ, enehede atua-eyet eti-eti. Ke mmɔŋeyet oro, nnyin ikut ite ke enye ama anana utom esie, ke akana nte ebin enye esio ke ebiet enye ɔkɔduŋde, ndien ini kiet efen akabare anana ebietiduŋ.”
Eyen-aŋwan nnyin akaiso: “Ami mma ntɔŋɔ ke mbre ndiduŋɔre mme ŋwed Abasi mi, ndomode ndikut ŋkpɔ—ŋkpɔ—ekededi emi ekemede ndiŋwam enye. Nte nkoyomde eti ibuot ŋwed, mma nkere, ‘Nso ke ami nam? Emi idihe se Christ akpanamde. Emi idihe mfina emi ami ŋkpɔyɔde, dei emi edi ata eyen-aŋwan Abasi emi oyomde uŋwam.’ Ntre mma nkubi mme ŋwed Abasi mi, ntɔŋɔ edon ke nkaŋ esie, ndien mmum enye ke ini nnyin ituade ɔtɔ kiet, tutu enye odu ke mbeŋe idem ndi daha nda nyuŋ nsobo idomo emi.”
Ke ŋwan emi ama ɔkɔbɔ ndɔŋ esit, eyen-aŋwan nnyin ndien ada ŋwed Abasi odomo ndinwam enye ɔfiɔk ata ndaha edinen esie ndien ekpep enye kiet ke otu ata akpanikɔ eke edidu nnyin—ete ke nnyin idi ndima nditɔ iren ye iban Abasi, Abasi emi okopde eti ima abaŋa nnyin ke ini nnyin idude ke ukut emi ebeŋede idem ndiŋwam nnyin nte nnyin idahade ida.
Edi ifiɔk ke akpa ŋkpɔ emi mme ɔkwɔrɔ ikɔ nnyin esikpepde ete ke Abasi edi edima Ete eke Heaven nnyin. Kpukpru mme akpanikɔ efen odori ke enyɔŋ ifiɔk se nnyin inehede idi
Susan H. Porter, PrimaryGeneral President, ekekpep: “Ke ini ɔfiɔkde adaŋa nte enehede ema fi nte eyen Abasi, oro okpuhɔre ofuri ŋkpɔ. Oro okpuhɔ adaŋa nte afo ekerede abaŋa idem fo kini anamde ndudue. Oro okpuhɔ adaŋa nte afo ekerede ke ini mme mkpɔsɔŋ ŋkpɔ etibede. Oro okpuhɔ nte afo okutde mme mbet Abasi. Enye okpuhɔre adaŋa nte okutde owo efen ye ukeme fo ndikpuhɔre.”
Ewut ukpuhɔre emi nte nnyin ikotde ibaŋa ifiɔk Moses ekenyenede ke ini eketiŋde ikɔ ye Abasi iso ye iso. Ke ini nneme oro Abasi etiŋ ɔnɔ Moses ediwak ini abaŋa edisana ubon esie, ɔdɔhɔ de “Moses, … afo edi eyen mi.” Abasi anam aŋwaŋa ete ke Moses ekedi ukem ye Ikpɔŋ-ikpɔŋ Eyen Esie. Moses edifiɔk ɔfɔn owo emi enye ekedide, ke enye enyene utom ndinam, ndien ke enye enyene edima Ete eke Heaven.
Ke ifiɔk emi okurede, andidiɔk ndidomo enye ndien ke ndo-ndo oro okot enye ke ndidɔhɔ, “Moses, eyen owo.” Emi edi se iwakde-nditibe ye idiɔk ŋkpɔ-utom ke afia andidiɔk. Ke ini Ete eke Heaven nnyin akade iso ye ke ima eti nnyin ete ke nnyin idi nditɔ Esie, andidiɔk eyeka iso ndikot nnyin ke mmem idem nnyin. Edi Moses ama ebemiso ekpep ete ke enye okpon akan “eyen owo.” Enye aduari Satan ete: “Afo edi anie? Sese, ami ndi eyen Abasi.” Ukem oro, ke ini nnyin isobode ye idomo eke obukidem mme ke ini ikerede ke owo ndomo kiet odomo ndidot nnyin ikɔ otode ke mmem idem nnyin, ana nte nnyin ida ɔfɔn ke ifiɔk eke se nnyin inehede idi. Ana nte iyom ndifiɔk nnen nnen idihe ndinana. Ndien nte inamde oro, nnyin nko imikeme nditŋ ye uko ite, “Ami ndi eyen Abasi.”
Ke mbono eke ofuri ererimbot eke mkpri owo, edima President Russell M. Nelson nnyin ama ekpep ete: “Ntem nso ke afo edi? Akpa ye ntɔŋɔ, afo edi eyen Abasi, eyen ediomi, ye mbet Jesus Christ. Nte mbufo emumde mme akpanikɔ emi, Ete eke Heaven nnyin eyeŋwam mbufo esim ata idorenyin mbufo eke ndidu ke nsinsi ke edisana iso Esie.”
Edi ediyok ete ke ndikut ediwak ŋwed Abasi efiakde etiŋ, Abasi eti nnyin abaŋa ebuana nnyin ye Enye. Ke kpukpru mme enyiŋ emi enye ekekemede ndisiak otoded ke akam sacrament, enye ama ɔdɔhɔ ete ekot “Abasi, Nsinsi Ete”
Nnte nnyin ifiɔkde owo emi nnyin inehede idi, nnyin iyenehede inim ite ke edima Ete eke Heaven nnyin ama ɔnɔ nnyin uduak ke ndifiak nnyɔŋ nyuŋ ŋkodu ye Enye ini kiet efen. Elder Patrick Kearon ama ekpep ete, “Ediye uduak Ete nnyin, kɔm ‘akamba’ uduak Esie, enam man ada mbufo ɔnyɔŋ ufɔkiduŋ, idighe man edibin mbufo osio. … Abasi ikpaha-mba ke ediyom mbufo.” Kere baŋa oro ke esisit ini—enyene odudu, edima Ete nnyin “ikpaha mba ke ndiyom mbufo.”
Ke misehe ebiet emi idude ke usuŋ owo mbet nnyin, uwem nnyin eyenehede okpuhɔre edieke nnyin ifiɔkde owo emi nnyin inehede idi. Yak ami nsiak usuŋ iba emi ikemede ndinam ifiɔk nnyin ɔtuŋɔ.
Akpa, Akam
Nte Andinyaŋa ɔkɔtɔŋɔde utom Esie ke isɔŋ, ema eda Enye eka ke wilderness man “okodu ye Abasi.” Ke akpanikɔ ana nte nnyin isik ekikere nnyin ikpɔŋ ndibɔbɔŋ akam nnyin ika ndida ediwak ini ke ndinehede nneme-nneme ye inyuŋ “idu ye Abasi ke usen kiet-kiet.
Mekut nte ke ndaha akam mi okpuhɔre nte ami ndade ini ke nditiŋ ikɔ ye Ete mi. Mme ŋwed Abasi owut nnyin ete ke emi edi usuŋ emi ɔfɔnde. Kɔm ekpedi Joseph Smith; Nephi, eyen Helaman; mme Enos, kpukpru owo enyene ndaha eke ndikere ye nditi mbemiso ediwet-nim nneme mmɔ ye Abasi. Enos ama ɔdɔhɔ ete ke ukpɔŋ esie okop biɔŋ nte ikɔ ete esie odukde ke esit esie. Kiet kiet ke mme uwutŋkpɔ emi ekpep nnyin abaŋa ndibeŋe idem ke spirit ke ini nnyin ke usen kiet kiet “ndidu ye Abasi.”
Abaŋade mbon Nephi, Andinyaŋa ama ɔnɔ ewuhɔ, “ke ini ebɔŋde akam, eduk ke esit ufɔk mbufo, ndien mbufo ema ekuk usuŋ mbufo, ebɔŋ akam enɔ ete mbufo.”
Mme ekpedi ke ndedibe mme ke ubet-ufɔk, ukpep edi ndinyene ebiet emi ekemede ndidu ikpɔŋ ke ndiɔŋ akam, man ayak ukpɔŋ fo ɔsuhɔre, man okop ntuk eke “suŋ-suŋ ekpri uyo.” Nnyin imikeme ndibeŋe idem ke ndikere mbaŋa mme ŋkpɔ emi nnyin inemde esit ibaŋa ye mme mbume mme mfina emi ikpimade ndida nsɔk Ete. Aana idomo man ikunyene usuŋ edibɔŋ-akam edi ke ndineme ye Ete nnyin, uyo ɔwɔrɔ edieke edide-ntre.
Ami mmokut nte ke mfina uwem nnyin, ke ini nnyin iŋwanade ye mkpri nditɔ mme nte idude ke ufɔt mbono, nnyin imikeme ndinana ediye ebiet ndobo mme eti mbeŋeidem—edi mme ndobo oro, usɔp, usɔp usɔp akam ekeme ndinyene ufɔn ke ini inamde ukeme “ndidu ye Abasi” ke usiere usen.
Ekeme ndidu ediwak emi mibɔŋke akam ke anyan ini mme mbon oro mikereke ke owo ibɔrɔke akam mmɔ. Menwɔŋɔ nnɔ mbufo nte ke Ete eke Heaven ɔfiɔk mbufo, ama mbufo, ndien oyom ndikop nto mbufo. Enye oyom nditiŋ ikɔ ye mbufo. Enye oyom mbufo eti owo emi mbufo edide
Elder Jeffrey R. Holland ke mmi-mmi-emi ama ekpep ete: “Nte ededi nte mbufo ewakde ndibɔŋ akam, enehede ebɔŋ akam. Nte ededi emi mbufo enehede ebɔŋ akam, ebɔŋ akam ɔsɔŋ.”
Ke ndidian ke ndimenere ibat ini ye ɔsɔŋɔ akam nnyin, ndikpep ke Ŋwed Mormon ke usen ke usen ye ndikpono ke temple eyeŋwam ebeŋe ekikere mbufo abaŋa eriyarare. Nte nnyin idomode ndinam nneme nnyin ye ete eke Heaven ɔfɔn, Enye eyeŋwam nnyin ikere awak ke nnyin idi nditɔ Esie.
Udiana, Edifiɔk-ete ke Jesus edi Christ
Akamba men-ŋwut ima Ete eke Heaven kabaŋa nditɔ Esie edi ntak emi Enye ɔkɔnɔde Eyen Esie edi, andinyaŋa eke idem nnyin, ndiŋwam nnyin inyɔŋ ufɔk. Ke ntre, ana nnyin idifiɔk Enye.
Ke mme isua emi ekebede, ke ini ŋkanamde utom nte president stake, mma nnɔ edimek nte eyeneka eren ndinam-utom nte anam-utom ke temple. Ke ŋkurede utɔ eti anam-utom emi enye edidide, ami ke ndidue-enyin mfik “Ku unyime” emi ɔnɔde ebeŋe emi aka. Ke mme ŋkemeke ndinam etop oro afiak edi, mma ŋkot president temple nyuŋ ndɔhɔ nte, “ami manam akamba ndudue.” Ke mifaŋake, eti president temple emi ete, ”President Eyre, iduhe ŋkpɔ emi anamde owo mikemeke ndidahado nnɔ ndien edinehede ke akpatre.” Nsutɔ akamba akpanikɔ. Ke akpanikɔ, Jesus “enyene-ukeme ekem ndinyaŋa.”
Ke 2019 ama odu akamba ukpuhɔre ke mme mbume edinɔ unyime ndika ke temple. Ke edem, ebup mbume kiet mme afo emenyene ikɔ ntiense ke utom Jesus Christ nte Andinyaŋa ye Andifak. Idahaemi ebup mme mbufo emenyene ikɔ-ntiense eke utom Esie nte Andinyaŋa ye andifak mbufo . Erisio-isop Jesus Christ inyeneke ufɔn kpɔt ke uwem mbon efen; enye enyene ufɔn ɔnɔ fi ye ami. Enye edi Andinyaŋa mi. Enye edi Andinyaŋa mbufo. Owo kiet kiet. Oto ke Enye kpɔt ke mbufo ye ami ikeme ndifiak ndu ye Ete nnyin.
Ntre, nditɔ-eka iren ye iban, yak nnyin iyom Enye. Yak ikpep edisana ebuana Esie ye Ete ndien ye nnyin kiet kiet. Yak nnyin inyene ikwɔ ima erifak emi edide ɔnɔ nnyin kiet kiet otode Andifak nnyin nte ikabare esit. Nte nnyin idide ndifiɔk Enye emi okponde ekem ndinyaŋa,” nnyin iyesim ifiɔk ke nnyin, nte nditɔ Abasi, idi idara Esie—ata akpan ntiŋ enyin Esie—ndien ke akpaniɔ nnyin owo kiet-kiet imidot se enyaŋade.
Ami ntiŋ ikɔ ntiense nte ke iminyene edima Ete eke Heaven. Nte nnyin ifiɔkde nsinsi akpanikɔ emi otode ke akamba akam, eriyarare eke idem owo, ye ndidi ntiene Jesus Christ, nnyin imikeme idahaemi ye kpukpru ini ye uko itiŋ ete, “Ami ndi eyen Abasi.” Ke enyiŋ Jesus Christ, amen.