Ka Yuŋ Ka-nam Ntre
Ami nyema ndiwut mme ɔkwɔrɔikɔ Abasi oro emi ekotde ete enam utom. Mmɔ edi uwut_ŋkpɔ enɔ nnyin.
Ke ini Andinyaŋa akakade isaŋ ke Bethsaida, ndusuk owo ema eben owo nnan esɔk Enye. Ke akpanikɔ mmɔ ekekere ndikut utibede ŋkpɔ ke enyin. Andinyaŋa “omum owo nnan oro ke ubɔk, onyuŋ ada enye ɔwɔ ke obio” man ɔkɔk enye ke ndedibe. Ke akpa erikɔk eketie nte inyeneke ufɔn. Owo oro emenere “enyin ke enyɔŋ, ɔdɔhɔ ete, nkut mme owo nte mme eto, esaŋade.” Jesus, ke mbɔm, “afiak odori ubɔk esie ke enyin esie, onyuŋ anam enye ese.” Ye ke erifiak ntuk oro eke ubɔk Andinyaŋa, owo nnan ndien okut enye ɔfɔn.”
Emi edi uwut ŋkpɔ kiet kpɔt ke adaŋa nte uwem Andinyaŋa etiede otode ke utom nsuhɔhɔre idem. Enye eti nnyin ete ke Enye “ikidihe ndibɔ edinam, edi ke ndinam” ndien okot nnyin ete itiene mme uwut ŋkpɔ Esie ke ndinam okpon, ndinɔ mbon oro eyomde eto nnyin, nyuŋ mma mbɔhɔiduŋ nnyin. Ke ini ebupde, “Anie idi mbɔhɔiduŋ mi?” Christ ama abuana nke eke eti owo Samaria, ye ikoot “Ka, yuŋ nam ntre.”
Mme ɔkwɔrɔikɔ Abasi eke Ufɔk Abasi Jesus Christ Mme Ndisa Owo ke Ukperedem Usen edi mme uwut ŋkpɔ eti owo Samaria eyo emi Christ okotde nnyin ete ikabare idi. Ami nyema ndiwut mme ɔkwɔrɔikɔ Abasi oro emi ekotde ete enam utom. MMɔ edi uwut ŋkpɔ enɔ nnyin ke adaŋa nte utom (1) okubɔre mme esit ɔnɔ gospel Jesus Christ, (2) ayakde kpukpru nnyin inam utom ke misehe ndaha nnyin, ye (3) adade odudu Christ asin ke mme uwm nnyin.
Akpa, Utom Okubɔre mme Esit ɔnɔ Gospel Jesus Christ.
Ke ŋkpɔ nte 91 BC, Ammon, missionary eke Ŋwed Mormon, ama etiŋ se enye edide ɔnɔ Edidem Lamoni ke ndidɔhɔ nte, “Ami menyime ndiduŋ ye mme owo emi ke esisit ini; … [ndien] nyedi eyen ufɔk fo.” Ke ntak utom esie nnɔ edidem, ema enɔ Ammon unen ɔŋnditiŋ ikɔ ye uko, …ndien ɔdɔhɔ [Edidem Lamoni] … ke ewe odudu” ke enye ekenam utom esie. Ke ndinam nnɔ, edidem ɔŋwɔ ete “ŋkpɔ ekededi [Ammon] aduakde … [edidem eyenɔ] enye.” Nkukure ebeŋe Ammon ekedi yak edidem ɔnɔ mkpaŋ utɔŋ ke etop eke gospel Jesus Christ. Utom Ammon amanam “tɔsin ukpɔŋ [enyene] nkabare esit.”
Ke usen nnyin, mme utom ke akaka iso ke ndida mbon efen nnɔ ikɔ Abasi. Sister Bevan akanam utom nte andikpep ɔkwɔrɔikɔ Abasi ke ini enye ɔkɔtɔŋɔde ndinyene mfina nsɔŋidem emi oyomde enye ete ɔŋyɔŋ ufɔk ekebɔ usɔbɔ. Utu ke enɔ enye ɔŋyɔŋ, enye ama ekeme ndikaiso ke ndinam utom nte ɔkwɔrɔ ikɔ ke mfɔn ke ufɔk.
Ke ini nkesede ebiet uka isaŋ, Sister Bevan ye ufan esie ema eenyene udɔŋ nditiŋ ikɔ ye eka ye mkpri nditɔ ŋwɔŋ inaŋ, edi mmɔ ndien ufɔkemana awat ebe. Edem usen, mmɔ efiak eka ebiet uka isaŋ, ebɔŋde ekam ete yak ufɔk emana oro edu do. Ke utibe usuŋ, eka eketie ke ata ukem ebiet nte usen oro ekebede. Idaha emi Sister Bevan ye ufan esie ebine eka, eyom ndifiɔk enye, ekut ete ke enye okodu ke ndaha oyomde unwam ɔbukidem ke usɔp. Mmɔ enɔ unwam ndien ekoot enye ete ekpep abaŋa ikɔ Abasi.
Ke ntak utom oro ye ke ikoot oro, eka ye mkpon nkan eyen esie ema eduɔk mmɔŋ, etienede ye udiana mkpon nkan ke isua efen. Mmɔ eda ke eti ndaha ke ufɔk Abasi mfin. Sister Bevan ama ɔfiɔk ke ŋkpɔ emi ekedi edisana ntuk ndien enye “anam owut [enye] ete ke [enye] odu ke ebiet emi Abasi okoyomde [enye] odu.”
Nte Ammon ye Sister Bevan, nte nnyin inwamde mbon efen, nnyin “iwut mmɔ eti uwut ŋkpɔ” ndien mmɔ eyom ndifiɔk “ntak eke idorenyin emi odude ye [nnyin].”
Jesus okoot nnyin ete “eka, enyuŋ eke-nam ntre.”
Udiana, Utom Anam Kpukpru Nnyin Ikwɔrɔ ikɔ ke Misehe mme Ndaha Uwem Nnyin.
President Russell M. Nelson okoot “kpukpru mme ndinen, mme enyene ukeme iwaad ete ebeŋe idem ebaŋa enyuŋ eka mission” ye kpukpru nkaiferi ete “ebɔŋ akam efiɔk mme Abasi eyema [enye] aka mission.” Enye ama ɔŋwɔŋɔ ete “ubiere mbufo ke ndika mission, mme ekpedi mbon emi esaŋade ekwɔrɔ mme mbon enamde ke mfon, eyediɔŋ mbufo ye ediwak mbon efen.” Ndinam utom ukwɔrɔ ikɔ ke mfɔn okpuhɔre mbuk eke ndinyene ukeme. Idahaemi kpukpru ndinen iwaad ye nkaiferi emi enyimede ndinam utom mission nnɔ Abasi ekeme ndinam oro, ye ata esisit usioro eto.
Elder Holgado edi uwut ŋkpɔ kiet eke ndikeme ndinyene ukeme ndinam utom ke misehe me ndaha ekeidem owo. Enye akamana ye anana utɔ mfina emana emi ekesioride enye ke ndinam utom nte andikpep ke mission. Ema ekot Elder Holgado nte andinwam ke mfɔn ye andise enyin ke ubet ubono ŋkpɔ bishop, ebiet emi enye akanwamde mme owo efen enyene unwam emi mmɔ ekeyomde. Enye ɔdɔŋ ŋkpɔ ke okpokoro udori ŋkpɔ, mme ikɔŋ ubɔŋ, mme ekebe paper.
Nte Elder Holgado eketiŋde ke mbono sacrament ke okurede mission, enye ekebuana ete ke “Abasi oyom mme ɔkwɔrɔ ikɔ Abasi ke mfɔn. Enye oyom mme owo ete ema enyuŋ enam-ŋkpɔ enɔ mbon efen. Mme owo emi edɔŋ paper ukwohore efut, ekpat eto udia, enam ŋkpɔ ufɔk, ndien edi mme nti owo.”
Inaha enyene ubiɔŋ utom mme ndikɔŋɔ idiɔŋɔ ke ndinam eti ŋkpɔŋ. Andinyaŋa okut kpukpru utom. Nnyin kpukpru mikeme ndinwam mbon efen edi etiene Christ otode ke ndinwam ye mfɔnido nte Enye akpanamde. Kpukpru nnyin imikeme ndinam ke enyiŋ Christ inɔ owo otode ke odudu eke Edisana Spirit inyuŋ idu nte uwut ŋkpɔ mbuɔtidem ke Jesus Christ. Utom ayak nnyin ndiwut idem nnyin nte oduwem uwa emi enyimede Abasi.
Jesus okoot nnyin ete “eka, enyuŋ eke-nam ntre.”
Ɔyɔhɔ ita, Utom Ada Odudu Christ esin ke Uwem Nnyin.
Ekpri ɔkwɔrɔ ikɔ Abasi emi okpuhɔre oto ke utom ndikpep oduk ke unam utom ke mfɔn odomo ye ndusuk mfina idem emi anamde enye oyom odudu erikɔk Christ. Ndinɔ ini ke mfɔn amada odudu oro esin ke uwem esie. Enye ɔdɔhɔ ete, “mma nkop oro ke ini nkewanade, mekop nte Christ emenerede mi ke enyɔŋ. Odu asaŋa saŋa ŋkpɔ emi odude kabaŋa ndikut Enye ɔdiɔɔŋ mme owo otode ke unam udia, ke temple, ye otode ke ikɔ Abasi Esie.
Eelder emi amatɔŋɔ ndikop ntɔŋɔ idara, ndien obufa ekikere emi enye okokutde ama ɔdiɔŋ enye ye ofuri ufɔk emana esie. Spirit enehede oduk ke ufɔk mmɔ, mmɔ eka temple ɔtɔ kiet ke ubɔk ke ubɔk, ndien Christ akabare edi akamba ntiŋ enyin ke ufɔk emana mmɔ. Missionary emi anim ete ke Christ ama anyaŋa uwem esie onyuŋ ɔdiɔŋ ufɔk emana esie oto ke utom.
President Nelson ama ekpep ete, “Unyime ke ndinam utom ye ndisɔŋɔ mbon efen ada nte uwut ŋkpɔ mbeŋeidem ke ndibɔ erikɔk” otode ke odudu erifak eke Andinyaŋa.
Jesus okoot nnyin ete “eka, enyuŋ eke-nam ntre.”
Mme Ɔkwɔrɔ ikɔ ke mfɔn Edi Mme Uwut-ŋkpɔ eke Mme Ɔnɔ Ini mme Mbet Jesus Christ.
Ke ini ediɔŋde fi mme ufɔk emana ye ikoot nte ɔkwɔrɔ ikɔ ke mfɔn, ini oro edi ini ndinam idara. Ufɔk emana fo idaha oro eyenyene owo emi emekde enim nte ada itie Ɔbɔŋ Jesus Christ oduŋde ke ufɔk fo. Oro eyekpuhɔre kpukpru mbufo esin ke eti. Iduhe edikpu ndomo kiet ke ndibɔ ikoot man anwam. Nnyin ikwɔ “Ami nyeka ebiet emi afo oyomde mi nka ndien “Ami nyedi se afo oyomde ete ami ndi.” Emi edi unen ke ndiwut ke nnyin iminehede inam se nnyin itiŋ!
Kabaŋa kpukpru mbufo emi enamde utom, ndien akpan akpan kabaŋa awakde akan 4,000 mkpri mme anam utom ke mfɔn mme ɔkwɔrɔ ikɔ, nnyin imima mbufo! Edieke ubiɔŋ utom ukpep ŋkpɔ edide inua Ɔbɔŋ, ntre mbufo edi ubɔk Ɔbɔŋ, ntre mbufo idihe ekpri mme ɔkwɔrɔ ikɔ. Mbufo owo kiet kiet edi akpan ke ndibok Israel. President Nelson ekpep ete Ke ini kiet ekededi “emi inwamde mme owo … ke ndinam nnyuŋ nim mme ediomi mmɔ ye Abasi, nnyin inwam ke ndibok Israel.”
Mbufo mme kwɔrɔ ikɔ ebok Israel kpukpru usen ke nsio nsio usuŋ, ndien utom mbufo ɔkpuhɔre uwem. Ususɔpke ndifiɔk owo emi enyenede ufɔn ke utom mbufo, edi Abasi ɔfiɔk. Eti kpukpru ini ete ke “kpa nte mbufo [enwamde] kiet ke otu nsip nkan emi, … mbufo [enam enɔ Enye].” Nnyin imekop mme uyo mbufo nte mbufo enyimede ndinam ke mboho obio; nte nnyin ikopde unwana nte mbufo enamde utom ke mme temple. Emenɔ mbon ɔbiɔŋ udia, esin owo ɔfɔŋ, enɔ mbɔn esatde itɔŋ mmɔŋ.
Kpukpru nnyin ana ika, inyuŋ iki-nam … ntre.
Utom Edi Iyip-uwem mme Mbet Christ.
Utom enyene odudu ndikubɔre mme esit nnɔ gospel onyuŋ ayak kpukpru nnyin inɔ Christ ofuri ukpɔŋ nnyin. Enye okpuhɔre esit nnyin man ikabare itie nte Enye, ndien ke usuŋ oro, nnyin idibede mbon efen. President Nelson ini kiet ama obup, “Ke ererimbot emi spirit abiarade, ndi owo ekeme … ndinam ukpuhɔhɔre?” Ibɔrɔ esie, “Ihn! … ‘Mbon ediomi Ɔbɔŋ, … eyɔhre … ye odudu Abasi ke aka ubɔŋ’ … ekeme ndidibede mme uwem eke kpukpru ubon owo.” Otode ke utom nnyin ikpuhɔre mme esit— ye ererimbot.
Christ “asaŋa anam nti.” Enye ɔkwɔrɔ ɔnɔ mbon udɔŋɔ, anam nnan okut usuŋ, ye ndikise mbon efikde, nko anam temple asana ediwak ini. Enye ama etem udia, anwam ke usɔrɔ ndɔ, ndien ɔnɔ tɔsin emi ekekopde biɔŋ udia. Nte nnyin inamde inɔ kiet eke ke enyiŋ Christ, nnyin inehede isana inyuŋ idot ibaŋa enɔ eke nsi nsi uwem. Jesus Christ odu uwem! Enye edi Andinyaŋa mi ye okuo. Enye edi Andifak nnyin. Enye edi akamba Uwutnkpɔ eke utom unwam nnyin. Ami nkoot nnyin kiet kiet nte ika inyuŋ iki-nam ntre. Ke enyiŋ Jesus Chrst, amen.