Abasi Kɔsɔp Anam Utom Esie

Charles Dickens ama ɔtɔŋɔ ɔwɔrɔ etop ŋwed esie The Tale of Two Cities ye ikɔ ete ke “Ekedi mme ini emi efɔnde ekan; ekedi mme ini emi ediɔkde ekan.” Ke ekikere kiet, emi edi akpanikɔ abaŋa eyo nnyin.

Nnyin idu ke idiɔk eyo emi “ofuri ererimbot [edude] ke ndutimede.” Item President Russell M. Nelson ɔnɔde ete idi mme anam emem, nte mme anditiene Jesus Christ, edi se Elder Gary E. Stevenson eketimde etiŋa usenubɔk emi. Emi edi akpan ubak ke ndinam edidiana kiet, emem, ye edikɔk ɔnɔ “mme ini emi ediɔkde ekan.”

Nnyin ŋko idu ke “ke mme ini emi efɔnde ekan,” emi edidide se ami nditiŋde mbaŋa. Jehovah, ke ntɔŋɔ Doctrine and Covenants, section 1, ama ɔdɔhɔ ke uyɔhɔ gospel ke “editiŋ … inɔ mme utit ererimbot.” Jehovah ke akpanikɔ ke anam utom Esie ɔsɔp ke eyo nnyin. Ana nte nnyin itim inem esit ibaŋa edisɔp emi, emi etibede onyuŋ akade iso isehe mme mfina eyo emi. Nnyin idu ke usen emi mme anditiene Jehovah enyenede ifet ndikop uyo Esie nyuŋ mbɔrɔ ye iŋwaŋ-iŋwaŋ esiy ye ekikere. Mbon Ufɔk Abasi Jesus Christ Mme Ndisana Owo ke Ukperedem Usen, emi etienede Andinyaŋa ye ibet Esie, ke ekut ntak ye ata emem enɔ idem mmɔ.

Ke nsio nsio ini ke mbuk Ufɔk Abasi, ibat mbon emi edukde usuŋ ediomi etɔt eti eti. Ini kiet ke se etiŋde emi ekedi ke tɔŋɔ 1837 sim 1850. Usuk mme ada iso mme Apostle ke Ufɔk Abasi Jehovah emi ekefiakde emen edi ema eka mme mission ke United Kingdom. Mme mission emi ema eda mme tɔsin owo edisin ke Ufɔk Abasi, ndien ke 1850 mbon Ufɔk Abasi emi ekedude ke United Kingdom ema ewak ekan eke United States. Ke ini oro, Jehovah ama ɔnɔ mme Ndisana Owo emi uyo ete esobo ke Utah. Ata ediwak mme owo ema ewɔrɔ, usuk edi ebuɔt emi Perpetual Emigration Fund ekenwam mmɔ.

Ami mema mbuk edidi ke Salt Lake Valley eke ata ediwak mbon emi ekabadere esit ke England ye Wales ke 1852. Otu owo emi edi First Presidency ye Band eke Captain Pitt ekesobo ye mmɔ ke inua Emigration Canyon. Ŋwed Deseret News etiŋ abaŋa mmɔ nte “otu mme aka isaŋ [esinede] iban ye nditɔ, emi esaŋade, ke eyo, ye ke edim, edi ikpaha mba; enem esit enyuŋ edorienyin, emi ekewutde inemesit ye idaresit ke ɔkpɔ-iso mmɔ.”

Nte mmɔ “ebede Ufɔk temple, … tɔsin iden, iban, ye nditɔ, ema eboho, eto mme nsio nsio ebiet ke obio oro, ke ndidiana ke ediye ye idara ekɔm.” President Brigham Young ɔkɔdɔhɔ mmɔ ete “Yak Abasi Israel ɔdiɔŋ mbufo. … Nnyin imibɔŋ akam inɔ mbufo ke ofuri ini; mme tɔsin akam ke ebɔŋ ebaŋa mbufo, ke usen ke usen, enɔ Enye emi ɔnɔde nnyin uyo ete ibok Israel, enyaŋa nditɔ owo ke ndikwɔrɔ gospel, nyuŋ mbeŋe mmɔ idem nnɔ edidi eke Messiah.”

Ke spirit idara ini oro, yak ami mfiak nnam kpukpru mme mbufa owo ye mbon emi efiakde enyɔŋ edi Ufɔk Abasi Jehovah efiɔk ete ke: Nnyin imima mbufo; nnyin imiyom mbufo; Jehovah oyom mbufo. Nnyin ididarake mbufo ye mme otu owo, edi nnyin ibɔŋ akam ibeŋe mme edidiɔŋ inɔ mme ukeme mbufo ndika iso ke usuŋ ediomi emi adade aka Abasi Ete ye Jesus Christ ke obio ubɔŋ celestial.

Eti uwut-ŋkpɔ odu ete ke mbuɔtidem ke Jesus Christ ke ɔkɔri ke eyo nnyin. Ke Ufɔk Abasi Jesus Christ Mme Ndisana Owo ke Ukperedem Usen, ata ŋkɔri odu ke mme erikabare esit emi etienede enam ŋkpɔ. Ke ɔfiɔŋ 36 emi ebede ŋkpɔ nte mme owo 900,000 ekabade esit ediduk Ufɔk Abasi. Mme andikabare esit emi edi ŋkpɔ nte 5 ke ikie eke ofuri mbon Ufɔk Abasi. Nnyin imidara mme obufa owo ye ntat-ubɔk ye ata ekɔm ke usuŋ emi mbufo emekde.

Mme owo 900,000 emi ke mme ɔfiɔŋ 36 emi ebede ewak ekan ofuri mbon Ufɔk Abasi ke ɔyɔhɔ isua emana 110 esie ke 1940, emi akawakde akan 860,000. Emi edi isua emi Elder Jeffrey R. Holland, Elder Dieter F. Uchtdorf, ye ami ikimanade.

Mme nti andikabare esit emi eto mme nsio nsio ebiet ke ererimbot. Ke akpa ɔfiɔŋ itiokiet ke isua emi, erikabare esit ɔkɔri ke edip ke itie-ikie akan mme isua emi ekebede ke Europe, Africa, Asia, Pacific, ye Latin America. Ke United States nnyin imikut ŋkɔri eke 17 ke ikie. Utom Jehovah aka iso ndika iso ke mme enyene odudu usuŋ. Mme ibat emi ekɔride mi edi ata ntiense ete ke gospel kotuk mme esit onyuŋ okpuhɔrede mme uwem ke ofuri ebiet.

Ke eyo nnyin, mme ndima mme andikabade esit emi ibohoke aba ke ebiet kiet. Ke ntak mbuɔtidem ye enɔ mbon Ufɔk Abasi, mme ŋkpɔ edu ndinwam mme otu owo—ke ndibɔp mme ufɔk ye mme temple—ke ofuri ererimbot. Ye itie mme ukpɔhɔde itie-oku emi eyomde ye mme ŋkpɔ utom emi enɔde, mme edinam erinyaŋa edi idahaemi ke ediwak ebiet ke ererimbot.

Ke misehe ebiet emi nnyin iduŋde, ana nte mme mbon ufɔk Abasi edara mme tɔsin mbufa mbon Ufɔk Abasi nte nnyin ikidarade mme Ndisana owo eke English ye Welsh emi ami ntiŋde mbaŋa ke ntɔŋɔ mbuk eset nnyin. Ami mmema Elder etop Gerrit W. Gong ke ikpehe emi emi enye ekekpepde nnyin ete ke inaha nte owo ndomo kiet etie ikpɔŋ ke ekikere mme ke spirit.

Edisana utom nnyin edi ndinyime nyuŋ ndara mbufo ye mbon emi efiakde enyɔŋ edi. Nte Jehovah ɔsɔpde anam utom Esie, ana nte nnyin ima, ibɔk, inyuŋ inam utom inɔ mbon emi enyimede gospel Esie. Nnyin imikeme ndinwam mbɔp mbon Zion, emi nnyin idide “eke esit kiet ye ekikere kiet, ndien [iduŋ] ke edinen ido.” Man ididi kiet ye Jehovah, ana nte nnyin idi kiet ke iso Jehovah. Kpukpru mbon ufɔk Abasi, ke misehe ini uduɔk mmɔŋ ebuana ke ubiɔŋ utom ndidara mbon efen.

Item emi ami nnɔde mbon Ufɔk Abasi edi ndifat nti mbon, mbon emi emekde emi ekenyimede gospel Jesus Christ.

President Gordon B. Hinckley ama ekpep nnyin ete ke mbufa owo eyom “ufan, ubiɔŋ utom, ye edibɔk ke ‘eti ikɔ Abasi’ (Moroni 6:4).” Nnyin imikeme ndidu ke otu mme ufan oro emi enɔde mbufa emi uko ete ke mmɔ edu edi idighe mme isen owo. Nnyin imikeme ndinam mmɔ efiɔk ete ke mmɔ edi mme mbet Jesus Christ emi ekemede ndinam utom nnɔ mbon efen enyuŋ ebɔ mme ikot ndinam utom. Ana nte mme nditɔ emi ekabadere esit ekere ndika mission. Ana nte kpukpru owo ebiere ndidomo ndidu mbiet-uwem Christ.

Ediwak eduk Ufɔk Abasi ke akamba nwaidem ndien enehede eyom ima ye uŋwam eke mme ndisana owo mmɔ.

Mbufo mbon emi edide mbufa mme emi efiakde enyɔŋ edi mbuɔtidem emi, mme mfina edu emi mbufo edikutde. Enyene ime ye idem mbufo! Mme missionary ema ekpep mbufo akpan ukpep-ŋkpɔ enyuŋ enam mme ediomi ye mme edinam obio ubɔŋ eŋwaŋa, emi esinde ke mme ŋwed Abasi ye ke Preach My Gospel

Ndibɔ mme edinam ye mme ediomi ye ndinam mme ibet edi akpan. Tiŋ enyin se mme ediomi emi edide eyomde enɔ edimenede ke enyɔŋ. Gospel anam edimenede ke enyɔŋ akan etibe, emi oyomde ndinam ye ndinim mme edisana ediomi ye Abasi. Ke esiode baptism, ndori-ubɔk, ye ndinɔ irenowo Itie-oku Melchizedek, mme ediomi emi nnyin idukde edi se enamde ke temple. Eke mme akpa-mkpa, mme edinam erinyaŋa emi kiet-kiet edi se enamde ke temple ikpɔŋ. Nte asaŋade do, ndibeŋe idem mbaŋa temple ana nte edi se enamde idahaemi.

Mbufo ke usuk ini eyekere ke ikemke kabaŋa se efiɔkde. Ifiɔk gospel edi akamba edidiɔŋ emi enyenede nsit-nsit ke ini, edi idighe edinam erinyaŋa. Gospel idighe udomo ifiɔk. Edi, nte President Russell M. Nelson ɔŋwɔŋɔde, “Nte afo ekpepde Ŋwed Mormon oto ndibɔŋ akam kpukpru usenmbufo eyenam mme edimek emi efɔnde ekan—ke usen ke usen. … Nte mbufo ekerede ebaŋa se ekpepde, mme window heaven eyeberede, ndien mbufo eyebɔ mme ibɔrɔ enɔ mme mbume mbufo ye ndausuŋ enɔ uwem mbufo.”

Ke ndidian do, isua kiet kiet ke eŋwɔŋɔdere ŋwed ukpep-ŋkpɔ Ufɔk Abasi ke mme mbono Sunday esine Akani Testament, Obufa Testament, Ŋwed Mormon, ye Doctrine and Covenants. Nte ini akade iso mbufo eyenyene uko ekan akpa nte ifiɔk gospel mbufo ɔkɔride. Ndikpep mme ŋwed Abasi ke ini ke ini eyediɔŋ onyuŋ oforo uwem mbufo ke ndinam edikabade esit mbufo nnɔ gospel Jesus Christ ɔtuŋɔ.

Ndikpep mbaŋa edisana ukpep-ŋkpɔ Jesus Christ edi edinam ofuri eyo uwem, ke ndifiɔk ukpep-ŋkpɔ ye ndidu uwem nte Christ mbiba. Mme akpan ediomi enɔ idaha emi nnyin ikotde usuŋ ediomi. Mme ukpep-ŋkpɔ emi edi se President Nelason etimde ekpep. Kpukpru mbon ufɔk Abasi, akpan akpan mbufo ye mbon emi enyɔŋde edi, eyebɔ edidiɔŋ ke ndikpep nyuŋ ŋkama mme etop nte prophet esie abaŋade mme ediomi ye usuŋ ediomi.

Edieke mbufo enimde udomo ndibɔ ediomi kiet kietemi eyomde enɔ edimenede nte odotde, mbufo eyedu ke usuŋ emi adade aka obio ubɔŋ celestial. Temple ye mme edinam temple ana nte edi se itiŋde enyin ibaŋa. Mme ediomi emi ewakde ekan edu enɔ mme owo kiet kiet. Ediomi kiet, nsinsi ndɔ, abuana ndidian mme ukeme mbufo ye ada-nsaŋa. Utit mbuba nnyin ana edi ndikut ada-nsaŋa oro.

Edi, kuyak afina fi edieke nsinsi ndɔ mikikanke idu ke ini emi. Mme prophet ekpep ete ke edidiɔŋ ndomokiet iditipke nti mbon ufɔk Abasi emi enimde ibet. Prophet eke Ŋwed Mormon kiet, Edidem Benjamin, ama enehede etiŋ ke: “Mbon emi enimde ibet Abasi … ke ediɔŋ ke ofuri ŋkpɔ … ndien edieke mmɔ … [enyenede] mbuɔtidem esim utit … mmɔ eyedu ye Abasi ke idaha anana-utit inemesit.”

Mbufo eyekut, edieke edide ke mbufo ikwe kaŋa, ete ke mbon ufɔk Abasi ifɔnke ima. Eriyarade ukpep-ŋkpɔ owut nte aŋwaŋade ete ke isaŋ nnyin mi ke ereimbot, ke nnyin iyinam ndudue. Nnyin idu ke ererimbot emi mifɔnke ima ye emi ɔduɔde, idighe ererimbot celestial. Uwem emi edi ini ndomo nse, ye mme ufaŋ kpukpru ini ndikabare esit nyuŋ ŋwut idem nnyin.

Kpukpru nnyin imikere ke nnyin idotke nte nnyin idomode nditie nte Jesus Christ. Usio-isop Esie ayak nnyin ete ikabadere esit ke usen ke usen nte nnyin iduede. Nte Nephi, prophet Ŋwed Mormon efen eketiŋde: “Ana nte [nnyin] ika iso ye ntiŋ-enyin ke Christ, inyene uŋwana idorenyin emi ɔfɔnde ama, ye ima Abasi ye eke ofuri owo. Ke ntre, edieke mbufo edikade iso, edua eto ikɔ Christ, enyuŋ eyɔ tutu esim utit, sese, ntem ke Ete ɔdɔhɔ: Mbufo eyenyene nsinsi uwem.”

Nte nnyin ikerede ibaŋa mme mfina eyo nnyin, ana nte nnyin iti ite ke Andinyaŋa, ke ini utom Esie ke ererimbot, ŋko ama odu ke mme oyobio ye afai. Ntiŋ-enyin Esie ikidighe ke mme mfina mbre ukara eke eyo oro; ekedi ke mfɔn-mma eke Ndisana Owo.

Nditiene Andinyaŋa ye mme ukpep-ŋkpɔ Esie akananam idighe mmem-mmem ke ererimbot emi ɔyɔhɔde ye afanikɔŋ. Ikidighe mmem mmem inɔ Andinyaŋa ke idiɔk ererimbot ke ini uwem mkpa esie, ikidighe mmem mmem inɔ mme adausuŋ ke ntɔŋɔ ye mbon nnyin, ndien idighe mmem mmem inɔ nnyin. Ke mfɔniso, mme odu-uwem prophet enɔ nnyin ndausuŋ emi nnyin iyomde ke eyo nnyin. President Dallin H. Oaks eyeka iso ye ido enyene odudu ke spirit oro.

Ami mmetie ntiense nte ke ukpep-ŋkpɔ Ufɔk Abasi Jesus Christ edi nsinsi ye akpanikɔ. Ami nnɔ akpan ye ata ntiense mi nte ke Jesus Christ odu uwem ndien ke ntak Usio-isop Esie, nnyin imikeme ndidi kiet ye Enye. Ke edisana enyiŋ Jesus Christ, amen.