Jesus Christ ye Obufa Eritɔŋɔ Mbufo

Jesus “ekesisaŋa ke ebiet ke ebiet anam ufɔn.” Nnyin ikot mmem mmem etop oro ke Utom mme Apostle. Nsutɔ ata-akamba mbufiɔk ke oro edi! Jesus ke akpanikɔ ama asaŋa ke ebiet ke ebiet anam ufɔn! Enye edi ata ntak—ye usuŋ—eke nti ŋkpɔ! Enye ɔkɔnɔ ofuri uwem isɔŋ Esie ke ndinam eti. Enye enyene “mbɔm ɔŋyuŋ ɔfɔn ido, anyan ukut, ye ediwak,” anana-utit mfɔn mma ye nsinsi ke mbɔm.

Udomo ekededi ke nditiŋ mbaŋa mme ndinam ibio ibio mfɔn mma Esie ye mbɔm edi etok ikɔ! Ke akpanikɔ, nte Apostle John okodomode nditiŋ, ekpedi nnyin ikidomo ndiwet kpukpru menwut eke ufɔn Andinyaŋa, “kpaŋ ererimbot ke idem esie ikemeke ndiduk ke ŋwed emi ekemede ndida ŋwed.”

Ata uwut-ŋkpɔ emi nnyin inyenede emi etorode ke nsinsi eke Jesus ndisaŋa “nam ufɔn” anam ntɔtuŋɔ edidihe ye mkpaidem, akpan akpan ke ini nnyin isede adaŋa nte ekpetiede ke ndidu do, ke ndikut mme utibe ŋkpɔ Esie, ndibɔ mme ukpep ŋkpɔ Esie, ye ke ndikut erikɔk Esie. Enye ama eneme ye mbon mbre, Enye ama otuk udɔŋɔ ye se misanake, Enye ama ada ndɔŋ esit ɔsɔk mbon ekpade mba, ama ekpep akpanikɔ uwɔrɔ ufin, ama okot mme anam idiɔk ete ekabare esit. Enɔde mbon akpamfia kiet kiet, nnan, ye esin efibe ŋwan; enɔde kpukpru andifuhɔ eka, anana iwuk ete, ye andituaŋa ebekpa; mbon ebiomde ikpe, enamde okop but, ye ebɔde ukut; ekpade ke idem ye ke spirit, se Enye akanamde ekedi ndinɔ obufa eritɔŋɔ. Iŋ, anana ɔsɔŋɔ didie didie ikɔ!

Kpukpru ŋkpɔ emi Enye eketiŋde ye akanamde ama ɔnɔ obufa eritɔŋɔ kabaŋa mbon oro Enye ɔkɔkɔkde, ɔdiɔŋde, ekpepde, ye osioride ke idiɔk ŋkpɔ. Enye ikisikke ikpɔŋ mmɔ, ndien Enye ke akpanikɔ isike ikpɔŋ mbufo. Kerebaŋa ke ini emi ndikop kiet ke otu ikɔ uwem emi otode Enye:

“Eyen, efen mme ndudue fo.”

“Ŋkaiferi, ami ndɔhɔ fi nte, dahada ke enyɔŋ.”

“Mbufo Esana.”

“Ami nnyuŋ ntipke fi ikpe: nyɔŋ okuo; kunam aba idiɔkŋkpɔ.”

“Eyen-aŋwan, du ke eti ndɔŋesit: mbuɔtidem fo akanam fi okop nsɔŋidem; nyɔŋ koduk ke emem.”

Ikɔ Andinyaŋa ɔnɔde mme owo emi ekedi ibio ibio, edi ke mmɔ Enya ama enim idiɔŋɔ erifen nnɔ, edikɔk, mfiak mmen ndi, emem ye nsinsi uwem. Ndien enyene ubɔŋ etop edi Enye ɔnɔ ukem obufa eritɔŋɔ ɔsɔk fi ye ami. Kpukpru nnyin imikeme ndinyene obufa eritɔŋɔ otode, ndien ke ntak eke, Jesus Christ. Kɔm afo. Obufa eritɔŋɔ odu ke esit uduak Ete kabaŋade nditɔ Esie. Emi edi ufɔk Abasi eke obufa eritɔŋɔ. Emi edi ufɔk Abasi obufa eritɔŋɔ.

Ye uduɔk mmɔŋ otode ke mmɔ ye Spirit, nnyin “imimana obufa” ndien ikeme “ndisaŋa ke obufa uwem.” Adaŋa idorenyin ewe ke obufa eritɔŋɔ oro ekeme ndida nsin ke uwem owo emi odude ke idak ufen idiɔk ŋkpɔ mme ɔbɔde ufen otode ke ntak uwem mfina ye ebuana emi mifɔnke? Jesus iyomke erifen nnɔ ke idiɔk ŋkpɔ eke Idemesie mme edifiak ntɔŋɔ ke uwem, edi Enye ama ɔduɔk mmɔŋ, owutde nnyin nkoŋ-nkoŋ mfefere usuŋ akade obufa eritɔŋɔ emi Enye ɔnɔde nnyin owo kiet-kiet.

Ndien obufa eritɔŋɔ nnyin itibeke ke ini kpɔt. Nnyin ikere ke uduɔk mmɔŋ nnyin edi ndise eke obufa eritɔŋɔ. Idighe ntre. Nnyin inyeneke ini kiet ikpɔŋ. Mme mbufa eritɔŋɔ emi ekeme nditibe ke kpukpru usen! Ndien ke ndinehede ntiŋ kpukpru udua nte idiade ekpri mbehe uyo inyuŋ iŋwɔŋ ekpri cup mmɔŋ ke nditi enɔ eke edisana Andinyaŋa nnyin, emi akakpade ke ntak ndinɔ nnyin ediwak mbufa eritɔŋɔ nte nnyin iyomde! Jesus ɔnɔ nnyin ediwak mbufa eritɔŋɔ nte nnyin iyomde.

Ye nwaidem ye ndidara ke obufa uwem ke Christ, nnyin imikeme ndidi “obufa edibot ŋkpɔ,” ebiet emi nkani ŋkpɔ ebede efep ndien kpukpru ŋkpɔ akabade obufa. Nsutɔ nduri utɔŋ ke obufa usiere oro ada esin ke ukpɔŋ owo emi odomode ndinim, otode ke ndikaiso mek mbuɔtidem ke odudu Andifak ke ndikɔk ye ndifiak nda ndi, ke misehe idiɔk mfiak edem eke ndiduŋ ke nduɔ ererimbot? Akananam Andinyaŋa itreke nwaidem Esie ke ndinam uduak Ete osu nyuŋ nkure esisana utom erisio-isop Esie, kɔm ekpedi ke ubiak emi anamde Enye enyek, ke ndiwɔrɔ iyip ke kpukpru ndudu idem, ke ndibɔ ufen ke ikpɔk idem ye spirit, nyuŋ mbɔŋ akam man ekpeben ndot ndot cup nsio. Ini kiet efen, Enye akanam abaŋa owut nnyin utɔ mbuɔtidem ye Abasi ekpetiede.

Ye kpukpru ediomi inamde ye kpukpru ukeme inɔde ke ndinim enye, nnyin imikeme ndibɔ “obufa esit” ndien ɔyɔhɔ udomo eke “obufa esit.” Mkpri mkpri, adaŋa nte ikotde mfɔn Esie isin ke esit nnyin inyuŋ isio uyo emi akande idem ke ibuot nnyin, nnyin ikabare idi mbon Esie ke ntak emi inamde Enye Abasi nnyin. Jesus enehede oyom ndidi Edidem nnyin ndien Ekpeme-erɔŋ ye Ɔbɔŋ emem, ndien ana nte nnyin imek ndinam Enye edi oro ke esit ye ekikere nnyin.

Nkabare esit eberede usuŋ ɔnɔ mbufa eritɔŋɔ nnyin, ndifiak ntɔŋɔ, ye ɔyɔhɔ ufaŋ ikaba. Ukpep ŋkpɔ edima President Russell M. Nelson nnyin anam efaŋa kabaŋa edisana enɔ eke nkabare esit, ndien ami nkere ke nnyin ke akpatre imitɔŋɔ ndimum enye.

Enem nnyin ndikop ke iwaad nnyin etiŋ se nkabare esit adade ɔnɔ enɔ mmɔ. Ke mmi mmi emi mankop nkaiferi kiet etiŋde, ye imam ke iso esie, “Ke ini ami nkerede mbaŋa nkabare esit, nkabare esit ke usen ke usen, ami nkop ata idara ye idorenyin. Ami nkop ima ye inemesit eke Ete eke Heaven mi ye Andinyaŋa. Ami nkopke ndik ndidi ntiene Ete eke Heaven ke akam nyuŋ mbup mbaŋa uŋwam Esie ye se ŋkpɔ ekededi ami ŋwanade kiet. Mefiɔk ke mmɔ idomoke ndimum mi ke ndinam ŋkpɔ emi mifɔnke. Ubɔk mmɔ atara. Emi edi eritua-mkpɔfiɔk ɔnɔ mi,” enye ɔkɔdɔhɔ. Nkaiferi emi ɔfiɔk ete ke ntak Jesus Christ, ke enye ekeme ndinyene mbufa eritɔŋɔ!

Ndi afo omoyom obufa eritɔŋɔ? Nte amekeme ndinam obufa eritɔŋɔ, kɔm afo? Kerebaŋa mme owo emi Andinyaŋa ɔkɔkwɔrɔde ikɔ ɔnɔ—mme owo emi Enye ekekpepde, ɔkɔkde, adahade ɔnɔ, ye akafiakde anam ɔfɔn. Nte Enye ama emek mmɔ oto ndaha okuk eke ededi mme ebiet etode? Nte Enye ama abahade eti ye mme anam idiɔk osio? Nte Enye ama oso mme owo ke ntak mmɔ ekenehede edot mme enehede ema? Iŋ iŋ.

Nte uwutŋkpɔ, ŋwan emi ekenyenede ɔwɔrɔ iyip, Owo ekɔŋ Rome emi eyen ufɔk esie akakpade, owo akpa mfia, Jairus, ye owo nnan Bartimaeus. Mmɔ kiet kiet esin mbuɔtidem mmɔ ke udomo, edotde enyin ete ke mfɔn ye odudu eke andikpep otode Nazareth eyekpuhɔre uwem mmɔ ye itie mmɔ. Ndien Enye anam. Enye ayak erikɔk Esie ɔfiɔrɔ.

Edi Jesus nko ama ɔdiɔŋ mbon oro enyenede nyek nyek mbuɔtidem, nte ete eyen udɔŋɔ emi okofioride, ke akpan kpa nte afo enyenede, “Ɔbɔŋ, ami menim; nwam unana mbuɔtidem mi.” Enye nko ɔnɔ mbon oro miyomke Enye mbɔm miyomke Enye ndomo kiet, nte ŋwan emi ekemumde ke use, ebekpa Nain, erenowo mbuŋɔ ke ŋkpɔdiɔhɔ mmɔŋ eke Bethesda, ye erenowo emi akamanade nnan. Nte afo emekere nte Enye asaŋade anam ufɔn ke idem fo ɔkpɔsuk nte afo muyomke Enye mme utieneke Enye?

Kabaŋa mme owo emi ke ŋwed Abasi, ye mbon emi edikopde enyuŋ ebɔrɔ, Enye ɔnɔ oobufa eritɔŋɔ, kɔm ekpedi obufa uwem efende enɔ ke idiɔkŋkpɔ, mme obufa uwem ndikɔk udɔŋɔ mme obufa uwem esiode ke mkpa.

Nso ke oro ɔwɔrɔ ɔnɔ fi ye ami? Mfɔn Esie ye mbɔm ye mfɔnido inyeneke adaŋa. Obufa eritɔŋɔ odu ke esit uduak Ete! Obufa eritɔŋɔ edi utom eke Eyen! Obufa usiere, obufa ikpehe, ye mbufa ufaŋ edi mmem mmem ŋkpɔ eti mbuk ikɔ Abasi!

Ntre, nte afo ama ɔwɔrɔ ebihe ke edimi fo ke ndibɔ obufa eritɔŋɔ? Iŋ-iŋ. Nte afo amanam emi mme oro ke ediwak ini man enɔ ufaŋ efen? Iŋ iŋ. Nte amaka ɔniɔŋ usuŋ ɔkpɔŋ Christ man Enye ekeme ndiŋwam fi ewet obufa mbuk otode ke emi? Iŋ iŋ. Andidiɔk edi ŋkukure owo emi enyenede ufɔn oto ifiɔk afo amatak. Mbufo idighe.

Mbufa eritɔŋɔ okpon akan nnyin ndinam idiɔk mme ndudue. Otode ke mfɔn ye mbɔm eke Andinyaŋa, nnyin imikeme ndifiak ntɔŋɔ emi ɔkpuhɔre ŋkani ekikere, idiɔk edu, idiɔk ekikere unam ŋkpɔ, idiɔk edu uwem, mme ekikere unana odudu, ye ukeme ke ndibiomo mbon efen ndo nyuŋ ntre ndinam ubiɔŋ utom nnyin. Afo emekeme ndikpuhɔre mme ŋkpɔ kabaŋa fi emi okoduride fi ɔnyɔŋ isɔŋ ke mme isua. Afo emekeme ndifiak ntɔŋɔ otode ke ukeme eke Andikara eke obufa eritɔŋɔ. Enye ikpaha mba ke ndinɔ mbufa ɔsɔk nnyin.

Enɔde mbon oro enwanade ye ukem idiɔkŋkpɔ mme mfial edem ediwak ini, afo ka iso. Enye inimke ubiɔŋɔ ke iso fo. Enye inimke inɔ fi adaŋa ibat ini kiet efen. Ekaiso enam. Ekaiso edomo. Eyom uŋwam eto mbon oro edude ke ŋkan-ŋkuk mbufo. Ndien afo anim ke obufa eritɔŋɔ emi odude ɔnɔ fi kpukpru ini emi afo efiakde edem etiene Ete ke eti esit. Etre nkoi nam idiɔkŋkpɔ, ndifiak nam ke mbre, ye nkohore idem nsɔŋ ibuot odude ye mbufo ke ebiet emi mmɔ edude. Inaha nte edi owo emi ekedide akpa. Mum edifiak ntɔŋɔ fo, udiana, ɔyɔhɔ ita, ɔyɔhɔ inaŋ—mme ɔyɔhɔ ikie—ufaŋ, enɔde fi otode ke erisio-isop eke Jesus Christ.

Ami menem esit nkan se ekpetiŋde kabaŋa obufa eritɔŋɔ emi ekenɔde mi ye mbon oro emi ami minɔde kaŋa.

Andinyaŋa nnyin etiŋ akpatre ikɔ kiet, ke esiode enye iduhe ntak ndidot enyin mme ndidara mfin. Ke ukut eke Gathsemane ye ke utit ndutuhɔre ke kross, Enye ete, “Okure.” Prophecy eke Andifak ama ɔwɔrɔ osu, ndien ema ekpe ɔyɔhɔ ekɔm urua eke isɔn idiɔkŋkpɔ ubonowo ye ndutuhɔre. Enye etiŋ, “okure” ana utit ye nsinsi uwa Esie. Erisio-isop Esie ikpikemke tutu Enye ke Idemesie ɔfiɔk obufa uwem ke ɔyɔhɔ usen ita, obufa eritɔŋɔ nte enyene ubɔŋ, owo emi esetde otode ke odudu Ete.

Ke ntak emi Enye esisuk anamde mme ŋkpɔ oro emi enemde Ete Esie esit, ye ke ntak Enye “ɔkɔbɔde ufen uduak Ete ke kpukpru ŋkpɔ,” afo ye ami imikeme ndinyene mbufa eriɔŋɔ. Mbɔk ebɔ obufa eritɔŋɔ fo, kɔm mfin, idahaemi. Jesus Christ edi ntɔŋɔ ye utit mbuɔtidem nnyin, ewetde anana ibat ikpehe ye nnyin. Enye edi Ntɔŋɔ ye Utit—utit buut ye ukut nnyin ye ntɔŋɔ obufa uwem ye Enye, ayakde nnyin ibɔ mfɔn Esie, ikpɔŋ ŋkani ido nnyin ke edem inyuŋ ifiak itɔŋɔ obufa ye obufa usiere, nte awakde nte iyomde. Ke akpanikɔ mfɔn ye mbɔm Esie eyetiene [nnyin] ke kpukpru usen [uwem nnyin].” ke enyiŋ Jesus Christ, amen.