Ɔkpɔiso Imam ye Esit Ekɔm
Enehede ekut ata ŋwɔrɔ-nda eke Ndisana Owo ke Africa ke nte mmɔ eyɔde mme afanikɔŋ eke uwem ye utom ŋkɔri eke Ufɔk Abasi.
Esisit ini ke isua andikebe, ema eyak mi ke ubiɔŋutom mi ke Presidency eke Seventy, ukpuhɔre ekesiande mi ke akwa mbono. Koro ema ekot enyiŋ mi ekpere mbon General Authorities emi ekebade edi emeritus, ediwak owo edikere ke ami ŋko nyekure ini utom mi. Ke mbono okurede, ami mma mbɔ ediwak etop ekɔm ye nti uduak kabaŋa ndaha efen ke uwem mi. Ubakowo edinyime ndidep ufɔk mi ke North Salt Lake. Ama eye ndikut ke owo idikwe mi ndien ŋko ndidiɔŋɔ ke nnyin idinyeneke mfina ndinyam ufɔk nnyin ke ini ami ŋkurede utom. Edi ami nduhe do kaŋa.
Obufa ubiɔŋutom mi ama ada Monica ye ami aka ediye Africa, ebiet emi Ufɔk Abasi ɔtɔŋɔde nditɔt. Oro edi edidiɔŋ ke ndinam utom kotu mme eyene mbuɔtidem Ndisana Owo ke Africa South Area nyuŋ ŋkut ima emi Jehovah enyenede ɔnɔ mmɔ. Oro enem ndikut ediwak ufɔkemana eke ofuri ndaha, esinede ediwak okut-unen ye ɔdiɔŋɔ-ŋwed mbon Ufɔk Abasi, eyakde ini ye enɔ-obot mmɔ esin ke ndinam-ŋkpɔ nnɔ mbon efen.
Ke ukem ini oro, abaŋade mme ibat owo ke obio oro, ediwak mbon emi enyenede ŋkpɔ ke nti usuŋ ke eduduk Ufɔk Abasi enyuŋ ekpuhɔ uwem mmɔ oto ke mme edidiɔŋ edikpe tithe ye nti-ifet edika ufɔkŋwed emi Ufɔk Abasi enɔde. Mme Programs nte Succeed in School, EngishConnect, BYU–Pathway Worldwide, ye Perpertual Education Fund ɔdiɔŋ ediwak owo, akpan-akpan mbon mbufa emana.
Inikiet President James E. Faust eketiŋ ete, “Ema etetiŋ ete ke ufɔk Abasi isinehede inyene mme ɔwɔrɔ-iso owo edi esiwak ndinam didie-didie owo ekabare edi mme ɔwɔrɔ-iso owo.”
Enehede ekut ata ŋwɔrɔ-nda eke Ndisana Owo ke Africa ke nte mmɔ eyɔde mme mfina eke uwem ye utom ŋkɔri eke Ufɔk Abasi. Mmɔ ke ofuri ini enam oro ye nti ido. Mmɔ esin idem enam mme akpan ukpepŋkpɔ otode President Russell M. Nelson ete:
“Inemesit emi nnyin inyenede ŋkpɔ ndinam ye mme ndaha eke uwem nnyin ye ofuri ŋkpɔ ndinam ye ntiŋenyin nnyin eke uwem nnyin.
“Ke ini ediwuk-enyin eke uwem nnyin edide ke uduak erinyaŋa eke Abasi … ye Jesus Christ ye ikɔ-Abasi Esie, nnyin iyokop idara isehe se itibede—mme se mitibeke—ke uwem nnyin.”
Mmɔ enyene idara isehe mme afanikɔŋ mmɔ. Mmɔ edikpep ete ke ebuana nnyin ye Andinyaŋa aŋwam mmɔ ndiyɔ mkpɔsɔŋ ŋkpɔ ye ɔkpɔiso imam ye esit ekɔm.
Yak ami mbuana ubak ifiɔk-ukpep mi ye nti Ndisana Owo eke ewutde ukpep emi, ɔtɔŋɔde ye Mozambique.
Mozambique
Esisit mme ɔfiɔŋ emi ekebede, ami ŋketie-ibuot ke mbono stake kiet ke stake emi edide-isua-kiet emi ema ekenyenyene mme unit Duop. Awakde ebe owo Tɔsin Iba ema eyɔhɔ ekpri chapel ye mme tent ita emi ekewukde ke aŋwa esien. Stake president edi owo isua 31, ŋwan esie edi owo isua 26, ndien mmɔ enyene mkpri nditɔ iba. Enye adausuŋ ke ɔkɔkɔri ye oyom-utom stake emi inyeneke mfina—ke ɔkpɔiso imam ye esit ekɔm kpɔt.
Ke nnamde nduŋɔre ye patriarch oro, ami ndidiɔŋɔ ke ŋwan esie enehede ɔdɔŋɔ, ndien ke enye esiŋwaŋwana ndinɔ enye ukpeme. Ke mma ŋkeneme ŋkpɔ oro ye stake president, nnyin ima inɔ enye edidiɔŋ eke itie-oku. Ami ndibup patriarch oro adaŋa ibat edidiɔŋ eke patriarch emi enye ɔnɔde ke mbahade.
Enye ete “Itiaita kesim duop.”
Ami mbup nte, “Ke ɔfiɔŋ kiet?”
Enye ɔbɔrɔ ete, “Ke udua kiet!” Ami ndidɔhɔ enye ke ndinam ediwak ntre ke utit-udua kiet-kiet ifɔnke.
Enye ete, “Elder Godoy,” “mmɔ ekaka-iso ndidi ke ofuri udua, ke esit edide mbufa mbon ufɔk Abasi ye ediwak iwaad.” Inikiet efen, inyeneke mfina—ke ɔkpɔiso imam ye esit ekɔm kpɔt.
Ke ikurede ikpehe mbubreyo Saturday eke conference stake oro, ke usuŋ ke ŋkade hotel mi, ami ndikut mbonowo nte edepde udia ke usuŋ ke okoneyo oro. Ami ndibup driver mi ntak emi mmɔ enamde oro ke eyo enehede ekim akan ndidep ke uwemeyo. Enye edibɔrɔ ete ke mmɔ esinam utom ke uwemeyo man enyene okuk ndidep udia ke ekurede utom.
Ami nte “Oh, mmɔ ekenam utom mfin emi man edia udia mkpɔŋ.”
Edi enye enehede mi ete: “Iŋ-iŋ, mmɔ esinam utom ke uwemeyo man edia udia ke okoneyo oro.” Ami mma ŋkere ke mbon ufɔk Abasi ekeme edidu ke eti ndaha, edi enye ɔsɔŋɔ ete ke ediwak owo edu ke ukem-ukem ndaha oro ke ubak ebiet idut oro. Edem usenubɔk oro, ke ikpehe Sunday nnyin ye ndifiɔk obufa mbaŋa ndaha mmɔ, ami mma nehede ŋkere mbaŋa ɔkpɔiso imam ye esit ekɔm mmɔ.
Zambia
Ke usuŋ ke ikade mbono-esop eke Sunday kiet, stake president ye ami idikut ebe ye ŋwan esaŋade ke usuŋ ye nsekeyen ye mkpri nditɔ iba. Nnyin iditre man imen mmɔ. Mmɔ ema edighe enyuŋ ekop inemesit. Ini emi ŋkebupde adaŋa anyan usuŋ emi mmɔ enade nte esaŋa edisim chapel, ete ɔbɔrɔ ke oro ekeme ndida minit 45 ŋkesim hour kiet, etienede nte nditɔŋwɔŋ esaŋade. Mmɔ enam ntem ke edika ye edinyɔŋ, ofuri Sunday, ndien inyeneke mfina—edi ye ɔkpɔiso imam ye esit ekɔm kpɔt.
Malawi
Ke Sunday kiet mbemiso mbono stake kiet, ami mma ŋkese mme branch iba emi edade ufɔkŋwed obio nte ebiet mbono mmɔ. Ama akpa mi idem ke nsuhɔreidem ye ediye ndaha eke mme ufɔk oro, emi ekesuk ananade akpan ŋkpɔ ke esit. Nte ami nsobo-de ye esisit mbon ufɔk Abasi, ami mma mbeŋeidem ndikpe-ubɔk kabaŋa unana edikem ndaha eke itie-mbono mmɔ, edi mmɔ ekenem-nem esit ndinyene ebiet emi ekperede ndiboho, man etre ndisaŋa anyan isaŋ. Inikiet efen, inyeneke mfina—edi ye ɔkpɔiso imam ye esit ekɔm kpɔt.
Zimbabwe
Etienede ukpepŋkpɔ mme adausuŋ ke Saturday, stake president ada mi aka ederi Sunday enimde ke ufɔk emi ekpede okuk. Ibat owo 240 ekeduk ke esop oro. Ekem bishop emen mbufa owo Duop emi ekena baptism ke udua oro owut. Ekebahare otuowo esin ke mkpri ubetufɔk iba, ye ubak owo ŋko etiede ke esien ufɔk oro, esede mbono-esop oro eto mme window ye enyin-usuŋ. Inikiet efen, inyeneke mfina—edi ye ɔkpɔiso imam ye esit ekɔm kpɔt.
Lesotho
Ami mma ŋkese ediye ekpri idut emi, efiɔkde ŋko nte “obot obio-ubɔŋ,” ndikut district Ufɔk Abasi emi ebeŋede ndikabare ndi stake. Etienede mme mbono-esop eke Saturday, ami mma nduk mme ederi eke Sunday ke branch mmɔ kiet ke ufɔk emi ekpede okuk. Ubetufɔk enimde mbono sacrament ama ɔyɔhɔ ɔduɔi, ye mbonowo edade ke edem enyin-usuŋ man edibuana. Ami ndidɔhɔ pranch president ke enye oyom ufɔk emi okponde. Ke mkpaidem mi, enye edisian mi ete ke emi ekedi ubakowo eke mbon ufɔk Abasi esie. Ke ubak eken eyeduk udiana esop sacrament ke udiana hour iba okurede. Inikiet efen, inyeneke mfina, edi ye ɔkpɔiso imam ye esit ekɔm kpɔt.
Ami ndifiak ŋka Lesotho akaŋ efen oto ke idiɔk unɔmɔ usuŋisaŋ emi ediwak mme iwaad nnyin ekedude ke esit, emi Elder D. Todd Christofferson ama ekebem-iso asian. Ini eke ami ŋkesede mme ufɔkemana ye adausuŋ, ami ŋkekere edikut mfufuhɔ ndaha. Edi, ami ndikut ɔsɔŋɔ ye nsinifik Ndisana Owo emi eyɔde ndaha oro ke inem ye enyene-nyɔ usuŋ.
Mpho Aniciah Nku, edide isua 14, owo andibɔhɔ unɔmɔ oro ke ndise emi, owut oro ɔfɔn ke mme ikɔ esie ete: “Buɔtidem ke Jesus enyuŋ ese Enye ke ofuri ini, koro ke Enye mbufo eyekut emem, ndien Enye eyeŋwam fi ke utom erikɔk.”
Emi edi ata esisit uwutŋkpɔ emi nnyin ikutde nti ido koro mmɔ ewukde uwem mmɔ ke ikɔ-Abasi Jesus Christ. Mmɔ ediɔŋɔ ebiet emi edikutde uŋwam ye idorenyin.
Odudu Erikɔk eke Andinyaŋa
Ntak emi Andinyaŋa ekemede ediŋwam mmɔ ye nnyin ke mme ndaha ekededi ke uwem nnyin? Ekeme ndikut ibɔrɔ ke ŋwed Abasi ete:
“Ndien enye eyeka, eyeyɔ mme ubiak ye mme ukut ye mme idomo ke utɔ ke utɔ. …
“… Ndien enye eyeda mmemidem mmɔ ɔnɔ idemesie, man esit esie ɔyɔhɔ ye mbɔm, … man enye ɔfiɔk … nte ediŋwamde ikɔt esie nte asaŋade ye mme mmemidem mmɔ.”
Nte Elder David A. Bednar ekpepde, iduhe ubiak, ndutuhɔ, mme mmemidem emi nnyin ikemede ndinyene eke Andinyaŋa mifiɔk-ke. “Afo ye ami ke ndaha mmemidem kiet imikeme ndisioro-mkpo ite, ‘Owo ndomokiet ifiɔk-ke [ukut eke esimde mi]. …’ Iduhe owo ndomokiet, ndusuk, emi ɔfiɔkde. Edi Eyen Abasi enehede ɔdiɔŋɔ onyuŋ ɔfiɔk.” Ndien nsidi ntak? Koro “Enye ama okop onyuŋ obiom mbiomo nnyin mbemiso nnyin idibobiom.”
Ami nyetre ye ikɔ-ntiense mi eke mme ikɔ Christ emi ekutde ke Matthew 11ete:
“Etiene mi, kpukpru mbufo emi ekpade mba enyuŋ ebiomde edidobi mbiomo, ndien Ami nyenɔ mbufo nduɔk-odudu.
“Emen ɔkpɔnɔ mi ekɔŋɔ ke itɔŋ mbufo, enyuŋ ekpebe mi; koro mmenyene ifure-ifure ido nyuŋ nsuhɔre idem ke esit; ndien mbufo eyekut nduɔk-odudu enɔ ukpɔŋ mbufo.
“Koro ɔkpɔnɔ mi ememem, mbiomo mi onyuŋ efefere.”
Ukem nte mme Ndisana Owo ke Africa, ami mmediɔŋɔ ke eŋwɔŋɔ emi edi akpnikɔ. Oro edi akpanikɔ do, onyuŋ edi akpanikɔ ke ofuri ebiet. Kabaŋa emi ke ami ntiŋ ikɔ-ntiense ke enyiŋ Jesus Christ, amen.