Odudu Ndinam Utom Uŋwam nnɔ Owo Kiet
Nte nnyin iŋwamde owo kiet, nnyin ikoot owo kiet nditiene Christ nyuŋ ntuak ibuot ke ufɔk Jehovah.
Nditɔ-eka iban ye irenowo, esɔsɔŋɔ ke mbuɔtidem mbufo ndidi ntiene Jesus Christ ke mme ini afanikɔŋ emi. Mbufo edi nti; mbufo emeye; mbufo kiet kiet edi eyen Abasi. Edi ebeŋe mi ete ke nnyin iyefiɔk odudu Edisana Spirit nte nnyin ikabade idi inyuŋ iŋwamde mbon efen ndikabare nehede ndi nti mbet Jesus Christ inyuŋ ikop idara Esie nte nnyin ituakde ibuot ke ufɔk Jehovah.
President Russell M. Nelson ama ɔdɔhɔ ete: “Idahaemi edi ini anade afo ye ami ibeŋidem ibaŋa Edifiak Ndi Ɔbɔŋ ye Andinyaŋa nnyin, Jesus Christ. Idahaemi edi ini ɔnɔ nnyin ndinam owo-mbet nnyin edi ata akpa akpan-ŋkpɔ. Ke ererimbot emi ɔyɔhɔde ye mme ŋkim-enyin ubiɔŋɔ, didie ke nnyin idikeme ndinam emi?
Enye ama ɔnɔ ibɔrɔ ete: Ndiwak ndituak ibuot ke temple eyeŋwam nnyin. Ke ufɔk Jehovah, nnyin ise Jesus Christ. … Nnyin idi ndidiɔŋɔ Enye. … Ofuri mbon emi enehede eyom Jesus Christ eyekut Enye ke temple.”
Ntem didie ke nnyin ikabare inyuŋ iŋwam owo efen ndidi mme esinifik mbet Jesus Christ? Edi nnyin ndiŋwam owo kiet. Ndiŋwam nte Andinyaŋa akanamde esine esit-mbɔm, mfɔnido, ime, ye ima ke muyomke udori. Nte nnyin iŋwamde owo kiet, nnyin ikoot owo kiet ndidi ntiene Christ nyuŋ ntuak ibuot ke ufɔk Jehovah man ɔbɔ odudu erifak Esie. Ke nditiŋ ke ikɔ efen, nnyin iŋwam kiet eken ndidi eti mbet nte nnyin inamde utom uŋwam inɔ owo kiet ke mme usuŋ emi adade aka ufɔk Jehovah.
Nnyin ikpep odudu ndiŋwam owo kiet ke ima ye ke unana edibiom ikpe ito Jesus Christ. Afo emeti ŋwan Samaria oro ke mben obube mmɔŋ. Ekeme ndidi ŋwan oro ama ekere ke imɔ idige baba ŋkpɔ kiet, ke imɔ idi ikpɔŋ, ikop ubiɔŋɔ, ndien ke owo inyuŋ ikwe imɔ. Enye ekeme edikikere ke imɔ iduhe do. Ke ofuri uwem esie enye ama enyene ebe ition, ndien erenowo emi enye okoduŋde kiet ikidige ebe esie. Ekeme ndidi mbon efen ema ebiom enye ikpe ke ukwaŋ ke mmifiɔkke ndaha uwem esie. Emi ekeme ndidi ntak emi enye ekesaŋade ikpɔŋ edi obube mmɔŋ ke ata-ndaha ufiop uwemeyo oro. Ndien edi, enye ekedi kiet ke otu akpa owo emi Jesus Christ akasiande ke imɔ idi Messiah. Ke eke Esie, ŋwan emi ekedi eyen-aŋwan Abasi.
Jesus Christ ama ekpep ŋwan oro ete ke oto ke Imɔ owo ekeme ndibɔ nsinsi uwem ke ndibuana ke odu-uwem mmɔŋ. Enye ama ɔdɔhɔ ete “Owo ekededi eke ɔŋwɔŋde mmɔŋ emi Ami ndinɔde … idikopke nsat-itɔŋ aba; edi mmɔŋ oro ndinɔde … eyekabare edi … idim mmɔŋ otopde akabare ɔwɔrɔ edisim nsinsi uwem.”
Ŋwan Samaria oro ama okop ima Andinyaŋa onyuŋ ɔbɔ ntiense oto Spirit ete ke Enye edi Messiah. Ke ntiense emi okurede, enye ama afiak aka obio, onyuŋ okoot mbon efen ete edi edise, ndien ediwak owo ema enim ke akpanikɔ ete ke Jesus “ke akpanikɔ ekedi Christ, Andinyaŋa ererimbot.” Christ ama aŋwam owo kiet ke ima; nte udori, mbon efen ema ekabare edi nti mbet Esie.
Nnyin ikpep ibaŋa odudu ndiŋwam owo kiet ke mbɔm ito mme Apostle Christ Peter ye John. Afo emeti owo kiet, ekedide mbɔŋɔ tɔŋɔ ke emana, anade kpukpru usen ke inua-otop temple ebeŋe okuk. Ekeme ndidi erenowo emi ama ekere ke imɔ idige baba ŋkpɔ kiet, ke imɔ idi ikpɔŋ, okop ubiɔŋɔ, ndien ke owo inyuŋ ikwe imɔ. Enye ekeme edikikere ke imɔ iduhe do.
“Ndien Peter ɔdɔhɔ ete, nnyeneke Silver ye gold; edi se nnyenede ke [ami] nnɔ fi : Ke enyiŋ Jesus Christ eyen Nazareth daha-da yuŋ saŋa.”
Peter ama omum enye ke ubɔk nnasia esie onyuŋ emenere enye ke enyɔŋ, ndien owo oro ama okop nsɔŋidem. Ke ndo-ndo oro enamde utibe ŋkpɔ emi ekure, owo oro ama oduk ke esit temple ye Peter ye John, “asaŋa, onyuŋ ata-ma ke enyɔŋ, onyuŋ otoro Abasi.” Peter ye John ema eŋwam owo kiet ke mme usuŋ emi akadade aka ufɔk Jehovah, ndien erenowo emi ama akabare edi eti mbet Christ.
Mme ufan mi, ama odu mme ndaha ke uwem mi kini ami ŋko ŋkekerede ke ami ndige baba ŋkpɔ kiet, ke ami ndi ikpɔŋ, ŋkop ubiɔŋɔ, nyuŋ ŋkereke ke owo ikwe mi. Ami mmasikere ke ebiet nte ami nduhe do. Ami ŋkena baptism enyuŋ edori mi ubɔk nte owo Ufɔk Abasi Jesus Christ Mme Ndisana Owo ke Ukperedem Usen ke ini ami ŋkedide owo isua Efurenaŋ. Ke isua kiet ebede, ami mma nnyime ikoot ndikinam utom nte ɔkwɔrɔikɔ Abasi eke ofuri-ini, edi ama odu ediwak ŋkpɔ eke ami mikikpepke kaŋa mbaŋa mbuk ufɔk Abasi.
Ke ntɔŋɔ utom ukwɔrɔikɔ mi, ami mma mkpep nte ke ama odu ini emi mikiyak-ke mbon etode Mbubit Africa ndibɔ kpukpru mme eridiɔŋ eke edituak ibuot ke ufɔk Jehovah. Ndikpep mbaŋa emi ke akpa ini ama ada ekikere iyatesit, ndutimere, eyighe ye ndik edi. Mme ekikere emi ama enehede ɔsɔŋ tutu ami ndinana ini ndifiɔk Edisana Spirit ke esisit ini.
Ke mfɔniso, ami mma nnyene utibe nsaŋa ukwɔrɔ ikɔ kiet, Kevin Vick, emi akaŋwamde mi ke ima, ime ye ke mfɔn-ido. Ofuri okoneyo nte enye okutde mme ekikere eyighe ye unana idorenyin mi, enye eyetiŋ ekpri Elder Johnson suŋ-suŋ ete, “Ami mmama fi” Ke ŋkpɔ nte udua iba ebede, ami ndiyak idem mi man ŋkop ima eke Kevin. Ami ndinyene ukeme ndibɔŋ-akam nnɔ Ete Heaven ke enyiŋ Jesus Christ. Nte ami mbɔŋde akam, esit mi ama aka Ikpehe Itiokiet eke Doctrine ye Covenants, ufaŋ 21 kesim 23, emi ɔdɔhɔde ete:
“Sese, Ami ndi Jesus Christ, Eyen Abasi. … Ami ndi uŋwana emi ayamade ke ekim. …
“… Ti okoneyo oro emi afo akatuade ke esit fo ɔnɔ mi, man afo ɔkpɔfiɔk kabaŋa akpanikɔ eke mme ŋkpɔ emi.
“Ndi Ami ŋketiŋke emem nnɔ esit fo kabaŋa ŋkpɔ emi? Nso akwa ntiense efen ke ekeme ndinyene nto Abasi?”
Nte ami ŋkotde, ami nditi. Ami mma nti usen oro ami ŋketiede utreudia nyuŋ mbɔŋde akam ndifiɔk ke Ŋwed Mormon edi ikɔ Abasi ye ke Joseph Smith edi Prophet eke Mfiak-mmen-ndi. Ami nditi mme ediomi ŋkanamde ke Ufɔk Jehovah emi akadade mi adian ye Jesus Christ ke ata eti usuŋ. Ami mma ŋkop ima Andinyaŋa, mbɔm Esie, ye ikɔ ɔsɔŋɔ Esie ete ke Ufɔk Abasi Jesus Christ Mme Ndisana Owo ke Ukperedem Usen edi obio-ubɔŋ Esie ke isɔŋ ndien enye odot ndibeŋe nnyin idem nnɔ Edifiak Ndi Esie. Sia ami mma ŋketi, ami mma ntɔŋɔ-ntak nnyene ukeme ndifiɔk Edisana Spirit ye ndifiɔk ata ɔyɔhɔ-ɔyɔhɔ nte ke Jesus edi Christ ndien ke ami ndi mbet Esie.
Usuk-ini nnyin iyenyene mme mbume eke owo mibɔrɔke ye ekikere ke nnyin idighe akpan-ŋkpɔ, idikpu, idu-ikpɔŋ, owo inyuŋ ikwe nnyin. Nte ededi, mme ufan mi, ana nnyin isinifik ika-iso ye mbuɔtidem ke Jesus Christ inyuŋ iti mme ikɔ Esie nte:
“Mbufo eyekut ukut ke ererimbot: edi esɔŋ esit; ami ŋkakan ererimbot”
Ami ndi ntiense mbaŋa akpanikɔ emi ye eŋwɔŋɔ eridiɔŋ eke Andinyaŋa.
Ke ntre nso ke nnyin ikeme ndinam ndikut ete ke utom uŋwam nnyin nnɔ owo kiet ke itienede usuŋ Andinyaŋa otim ɔfɔn? Ndinam ukpepŋkpɔ Christ eyeŋwam nnyin. “Ndinam ukpepŋkpɔ Christ,” ke nte President Nelson owutde “ekeme ndinɔ ata akamba odudu eti ido, anamde inyene ukeme spirit ke uwem nnyin.
Nte nnyin iŋwanade ukeme ndinim ikpɔ ibet Jesus Christ … Andinyaŋa emenere nnyin ɔkpɔŋ idiɔk ererimbot emi ke ndidiɔŋ nnyin ye ukeme ndinyene ata-ima, nsuhɔre idem, ntat-ubɔk, eti ido, mfara ke idem, emem, ye nduɔk-odudu.”
“Ukeme [spirit emi] otode ke ndinam ukpepŋkpɔ Christ,” Elder Dale G. Renlund anam aŋwaŋa ke, “idisɔŋke edikpuhɔ edisana uduot-obot nnyin nsin ke nsinsi akaŋa kpɔt edi oro ŋko eyenam nnyin [ndiŋwam] mbon efen ke usuŋ emi odotde.” Elder Renlund eti nnyin ete “ke utom Andinyaŋa edi ndikɔk [man anam nnyin ifɔn]. Utom nnyin edi ndima—ndima nyuŋ ŋwam ke oruk usuŋ emi adade mbon efen ekpere Jesus Christ.”
Ukeme nnyin ndinam ukpepŋkpɔ Christ eyekpon edito ndikot Ŋwed Mormon kpukpru usen ye ndibuana ke udia-Ɔbɔŋ ke ofuri udua. President Nelson okofiori ete ke Ŋwed Mormon “ekpep ukpeŋpkpɔ Christ … [onyuŋ] ɔnɔ ɔyɔhɔ ye [ata aŋwaŋa] edifiɔk mbaŋa Erisio-isop Jesus Christ emi idikutde ke ebiet ekededi.” Ami mmema ŋwed emi. Ndien ndida-akam mbuana ke udia-Ɔbɔŋ ke ofuri udua eyekɔri ifiɔk nnyin kabaŋa Erisio-isop Jesus Christ onyuŋ ada edidemere eke spirit, ndɔŋesit, ye odudu Abasi esin ke uwem nnyin. Ti, “ke mme erinam oro [eke itie-oku], ke eyarare odudu Abasi,” ndien odudu emi, otode Jesus Christ, ɔsɔŋɔ udɔŋ ye ukeme nnyin ke ndiŋwam owo kiet.
Ukpep mi eke Ŋwed Mormon ye ndidia udia-ɔbɔŋ osuhɔre ekikere edikpu, anam ubiere mi ke ndiŋwam owo kiet nte Andinyaŋa anamde okpon, ndien aŋwam ndinam owo-mbet mi edi ata akpan utom mi.
Mme ufan mi, ami mmewɔŋɔ ke nte nnyin inamde ukpepŋkpɔ Christ inyuŋ iŋwam owo kiet ke mme usuŋ emi adade aka Ufɔk Jehovah, nnyin iyesin ifik ika iso ye mbuɔtidem ke Jesus Christ kpa ke ufɔt mme mbume emi owo mibɔrɔke ye ekikere ke nnyin idige baba ŋkpɔ kiet, ekikere ikpɔŋ, ubiɔŋɔ, ye ekikere ke owo ikwe nnyin. Nnyin iyekot owo kiet edi etiene Jesus Christ oyuŋ atuak ibuot ke ufɔk Jehovah man ɔbɔ odudu ufak ye ima Esie. Ke ufɔk Jehovah, nnyin “iyekop mbɔm [Andiyaŋa]. [Nnyin] iyebɔ ibɔrɔ inɔ ikpɔ mbume [nnyin]. [Ndien nnyin] iyenehede ifiɔk idara ikɔ-Abasi Esie.” Ke enyiŋ Jesus Christ, amen.