Item Eti Mbuk
Nso ke oro ekeme edibiet ke ndidian Jesus Christ awak ke uwem fo?
Edieke akananam mbufo emedi ke obio mi eke Louisiana, mbufo emenyene ifiɔk ebaŋa mme ediwak inem udia nnyin—gumbo, jambalaya, étouffée, ndien ibat oro aka iso.
Ke ini ke ini, nsikut idem mi ŋkopde uko ŋkem ke nditem kiet ke otu mme inem udia oro. Akpatre ikpehe emi owo miwetke inim ke ekurede ndibuak kpukpru mme ŋkpɔ utem ŋkpɔ ye ke nditiene mme item emi enɔde edi ndinam akpatre nditabi nkop ye ndise mme odu ŋkpɔ emi miduhe. Ke ndaha oro, ɔwɔrɔ etop etem udia owo Creole ɔdɔŋde odu ke mme utɔŋ mi, “Dɔŋ ediwak Tony ke esit oro.” Tony edi edu utem udia eke Creole enamde ke obio Opelousas, Louisiana, obio emana mi. Esisɔp ndinam enye nte “ndedibe ŋkpɔ utem udia” ke ndidiɔŋ ndudue emi enamde ke ini emi etienede item utem udia.
Nwan mi, Michelle ye ami ima ibɔ ukpono ke ndinam utom nte mme ada usuŋ mission ke Louisiana. Nnyin ima inyene edu eke ndikpep mme ɔkwɔrɔ ikɔ adaŋa nte etemde asaŋa asaŋa udia jambalaya esie ke akpatre okoneyo ke ufɔk mission mbemiso mmɔ enyɔŋ eka ufɔkemana mmɔ. Ke ndidian ke mme ikɔ ntiense eke mfiak mmendi ikɔ Abasi Jesus Christ mmɔ, mme ɔkwɔrɔ ikɔ nnyin enyɔŋ mission ye ekɔm kabaŋa mme udia.
Ke mme ɔfiɔŋ ifaŋ emi ekebede, ami ŋkoduŋɔre nto ke Church Media Library ndien nkut uyire enɔde eka mkpri vidio ekotde Nneme Mfiak-mmen-ndi ye President Russell M. Nelson. Ibuot ikɔ kiet ke otu mkpri vidio ke udim ama anam mmi ntiŋ enyin onyuŋ anam mi nsak imam. Ekot enye “mme Ŋwed Abasi Edi mme Item udia Abasi kabaŋa Idara Edidu-uwem.” Ke usɔp mma mfik ke vidio minit iba oro ndien nse President Nelson ekpepde eboho nditɔ Primary mmem-mmem ye akwa etop kabaŋa adaŋa nte ekpenemde esit. Enye ekekpep: “Edieke afo anamde cake, esitiene ndausuŋ, usutieneke? Ndien afo eyenye eti ibɔrɔ, usunyeneke?”
Enye aka iso, etiŋde abaŋa ndiyɔhɔ isua 95 esesit ini: “Mme owo edɔhɔ, ‘Nso ke adia? Nso idi ndibe ŋkpɔ fo?’” Enye ɔbɔrɔ, “Ndedibe ŋkpɔ ekotde mme ŋwed Abasi. Mbufo emekeme ndikot mmɔ enyuŋ edomo mmɔ ese.”
Ntre, do ke inyene enye. Akpan ŋkpɔ ndinyene inem uwem edi nditiene mme item udia eke Abasi nte ewetde ke mme ŋwed Abasi. Ami nkot enye “Item Eti Mbuk.”
Nso ke esinam edieke ŋkpɔ mifɔnke ke ini etienede item udia? Ntre, esinede ke Eti Mbuk Item Udia edi “ndedibe ŋkpɔ utem udia” ke ndikut ke mbufo kpukpru ini emenyene enye ke akpatre. Ibɔrɔ kpukpru ini edi Jesus Christ.
Mmekere ke kpukpru nnyin iminyene mme ini isikopde ke mme ŋkpɔ utem udia nnyin ifɔnke ikem, mme inwana ke nditiene mme ndausuŋ, mme ke akpan nnyin inam ŋkpɔ ibe adaŋa, mme ŋkpɔ etibe emi akande ukeme nnyin, ndien akade iso.
Nso idi unwam? Edi mmem-mmem ndidian ediwak ɔkpɔ se imende Jesus Christ isin ke uwem mbufo.
Ndien, nso ke oro ekeme edibiet ke ndidian Jesus Christ awak ke uwem fo?
Ke ini ŋkanamde utom nte mission president, mma ŋkop inem ndisobo ye mkpri mme ɔkwɔrɔ ikɔ nnyin kiet kiet ke ofuri udua itiokiet. Ke ini edisobo kiet-kiet, ama emem ɔnɔ mme ɔkwɔrɔ ikɔ ndiyom ndausuŋ kabaŋa adaŋa nte ekemede ndidibede ukeme eke owo nsaŋa mmɔ.
Ke ini kiet, ɔkwɔrɔ ikɔ edi ke nduŋɔre idem esie onyuŋ osuhɔre etie. Mmekeme nditiŋ otode ke ndikut enye ke ama odu ndodobi ŋkpɔ ke ekikere esie. Ami mbup, “Elder, nso ŋkpɔ ke afo ekpema edineme mfin? Enye aka iso nditiŋ ndusuk mfina emi enye ekenyenede ye owo nsaŋa esie ye adaŋa nte akefinade ukeme mmɔ ke ndinam utom ukwɔrɔ ikɔ. Ye mmɔŋ eyet ke enyin esie, enye ese mi ndien obup, “President, nso ŋkpɔ ke mkpanam?”
Ke ndo-ndo oro, ke akpanikɔ ŋkefiɔk-ke nte mkpebɔrɔde. Ke esisit ini ebede, ami mbup enye mme ɔfɔn nte nnyin ikpitɔŋɔde edɔŋ ɔtɔkiet ke akam iyom ndausuŋ otode Spirit. Enye ama enyime, ndien nnyin itɔŋɔ edɔŋ ɔtɔkiet inyuŋ ibɔŋ akam iyom ifiɔk eke spirit.
Ke ikurede akam, nnyin ikaiso itɔŋɔ edɔŋ ke esisit ini ndien isuhɔre itetie ke ŋkpɔ itie nnyin ise kiet eken. Mma mbup mme imikeme ndikot ŋwed Abasi ɔtɔkiet. Nte nnyin ikubɔrede ŋwed Abasi, ami ntre nyuŋ ndɔhɔ enye, “Elder, nte nnyin ikotde ŋwed Abasi emi, mbɔk bup idem fo mbume emi: edieke ami nnamde mme edu emi, ndi enye eyenam nsaŋa mi ɔkpuhɔde ye utom ukwɔrɔ ikɔ nnyin?”
Ndien nnyin ikubɔre Moroni 7:45 ndien ikot uyo ɔsɔŋ: “Ndien ima enyene anyan ime, ndien ɔfɔn ido, ifibeke ufip, ndien ikohokere idem, iyomke eke esie, isɔpke ikop iyaresit, ikereke idiɔk ndomokiet, idarake ke idiɔk edi adara ke akpanikɔ, ɔyɔ kpukpru ŋkpɔ, anim kpukpru ŋkpɔ ke akpanikɔ, odotenyin ke kpukpru ŋkpɔ, ɔyɔ kpukpru ŋkpɔ.”
Ekem elder edise mi ye mmɔŋeyet ke enyin esie onyuŋ ɔdɔhɔ ete, “ Iŋ, President, edi oro edi ɔkpɔsɔŋ ŋkpɔ ndinam.” Ami nyime nyuŋ nti enye nte ke enye edi eyeneren eke Abasi ye edisana ukeme ke ndinam oro ɔtɔkiet ye Ɔbɔŋ.
Ntre nnyin ineme esesit nke eke usuhɔre isɔŋ emi Elder Clark G. Gilbert eke Seventy ekekpepde, emi etide nnyin ete ke ana nte itɔŋɔ ke ebiet emi idude, ɔtɔkiet ye Ɔbɔŋ, isaŋa ika iso ye enyɔŋ ke eti ndaha. Mekeme ndidɔhɔ nte ke enye okosuk okokop ndik ye ikpat efen, ntre mbup enye nte etiŋ abaŋa ifiɔk esie kabaŋa ŋwed Abasi “otode ke ekpri ye mmem mmem ŋkpɔ ke mme ikpɔ ŋkpɔ ɔwɔrɔ osu.” Enye aka iso nditiŋ mbaŋa ŋkpɔ oro ete ke oto ke ndinam ekpri ye mmem-mmem ŋkpɔ, ikpɔ ŋkpɔ ekeme nditibe. Ami mbup enye nte ada minit kiet owut mkpri ŋkpɔ iba ye mmem-mmem ŋkpɔ enye ekemede ndinam ke ndifɔn ido ye owo nsaŋa esie.
Ke esisit ini ebede, enye edibuana ekikere esie. Ndien ami mbup enye nte ada minit kiet owut mkpri ŋkpɔ iba ye mmem mmem ŋkpɔ enye ekemede ndinam ke ndinyee ime ye owo nsaŋa esie. Enye ke ndondo oro ama abuana mme ekikere esie iba. Ama anwaŋa ete ke enye ama ekekere abaŋa emi mbemiso mbono nnyin emi. Ami mma ŋkot enye nte ada mme ŋkpɔ ifaŋ oro ebine Abasi ke akam onyuŋ obup abaŋa edisɔŋɔ, ndausuŋ, ye ntuk spirit adaŋa nte edinamde uduak esie ye esit akpanikɔ. Enye ama enyime. Nte nnyin ikurede, ami mbup enye nte ɔnɔ esisit etop kabaŋa oro ke leta kpukpru udua esie.
Nte mme esisit udua ifaŋ ebede, mma ŋkut mme leta kpukpru udua esie nte ke mme ŋkpɔ ama okpuhɔde. Nkikutke ukpuhɔre kpɔt ke leta kpukpru udua esie mma ŋkut ŋko ke leta kpukpru udua eke nsaŋa esie. Ke ini ndisobo iso ye iso efen, mma ŋkut okoneyo-ye-usen okpuhɔre ke ɔkpɔiso esie ye spirit. Mbup enye, “Ntre, Elder, nte edi akpanikɔ ke ata-ima isikpuhɔ?” Enye ɔbɔrɔ ye akamba imam, “Ihn, otode ke mkpri ye mmem mmem ŋkpɔ ke mme ikpɔ ŋkpɔ ɔwɔrɔ osu.”
Nte mbufo etienede item Eti Mbuk kabaŋa idara edidu uwem, eti ukpep President Nelson:, “Ke ewe mbume mme mfina emi afo enyenede, eyekut ibɔrɔ kpukpru ini ke uwem ye ukpepŋkpɔ Jesus Christ. EKpep ediwak baŋa Erisio-isop Esie, ima Esie, mbɔm Esie, ndutum Esie, ye mfiak-mmen-ndi ikɔ Abasi Esie eke erikɔk ye ŋkɔri. Ewɔŋɔre ebine Enye! Etiene Enye!”
Ke ini eyomde “ndikop uyo Esie“ enyuŋ efiɔk usuŋ nte ekotde Jesus Christ esin ke uwem mbufo, ekere ebaŋa nditiene mme ndaha President Nelson ekekpepde nnyin abaŋa eriyarare eke idem owo:
“Eyom ndobo ebiet emi ekemede ndika ndien-ndien. Esuhɔre idem mbufo enɔ Abasi. Ewaŋa esit mbufo enɔ Abasi. Efiak ebine Enye ke mme ibɔrɔ ye kabaŋa ndɔŋesit.
“Ebɔŋ akam ke enyiŋ Jesus Christ ebaŋa mfina mbufo, ndik mbufo, mmem idem mbufo—iŋ, ata udɔŋ eke esit mbufo. Ndien ekem ekpaŋ utɔŋ! Ewet mme ekikere emi edide ke esit mbufo. Ewet mme ekikere mbufo enim enyuŋ etiene ye mme edinam emi mbufo ekerede ndinam. Nte mbufo efiakde enam ŋkpɔ emi ke usen ke usen, ɔfiɔŋ ke ɔfiɔŋ. isua ke isua, mbufo eyekɔri ekesim ndaha ukpeb eriyayare.’”
Ami mmɔ nnɔ ikɔ ntiense ke Jesus Christ edi Andinyaŋa ye Andifak nnyin. Enye “enyene kpukpru ŋkpɔ emi nnyin iyomde man ifiak itiene Ete eke Heaven.” Ke enyiŋ Jesus Christ, amen.