Enyiŋ Emi Ekotde Mbufo
Ndikot nyin ke enyiŋ Christ ɔwɔrɔ nso?
President Russell M. Nelson ama ekpep ete edieke Obɔŋ ekpe etiŋde ikɔ ɔnɔ nnyin iso ye iso, akpa ŋkpɔ enye ekpekutde ete ke nnyin imetim ifiɔk edi ata uduot nnyin: Nnyin idi nditɔ Abasi, nditɔ ediomi, ye mbet Jesus Christ. Enyiŋ efen ekededi idiyak-ke nnyin ikut unen.
Ami mma mkpep emi nnɔ idem mi kini ŋkpon ŋkan eyeneren nnyin ɔkɔbɔde akpa phone esie. Ye akwa inemesit, enye ama ɔtɔŋɔ ndisin enyiŋ mbon ufɔkemana esie ke ŋkpɔ utiŋ-ukɔ esie. Usen kiet ami mma ŋkut ke edi eka esie okot. Iso ŋkpɔ utiŋ-ikɔ owut enyiŋ “Eka.” Oro ekedi mbumek eti ibuot ye ukpono—ndien ami nyeyime, idiɔŋɔ ukpono eke eti eka ye ete ke ufɔkiduŋ nnyin. Nte uduot obot, Ami mma nyene udɔng ndifiɔk Nso enyiŋ ke enye ɔnɔ mi?
Ami mma nse mme enyiŋ emi edɔŋɔde ke ŋkpɔ utiŋ-ikɔ esie, nyuŋ ŋkere nte edieke Wendi edide “Eka,” ndien ana ami ndi “Ete” Iduhe do. Ami mma nyom “Dad.” Nsuk nkwe kwe. Udɔŋ mi ndifiɔk ama akabade edi ekpri afanikɔŋ. “Ndi enye okot mi ‘Corey’?” Iŋ iŋ. Ke ndidomo akpatre ukeme, ami mma ŋkere, “Nnyin idi mme ebre mbre ukot—ekeme ndidi enye okot mi ‘Pele.’” Ikpikpu ekikere. Ke akpatre, ami mma ŋkoot ŋkpɔ utiŋ-ikɔ esie ke idem mi, ndien ikɔ iba ama ɔwɔrɔ ke uso ŋkpɔ utiŋ-ikɔ esie: “ Idige Eka”!
Nditɔ-eka irenowo ye iban, nso enyiŋ ke ekot fi?
Jesus ama okoot mme Anditiene Enye ediwak enyiŋ. Nditɔ Iren ye iban. Nditɔ mme prophet. Erɔŋ. Mme Ufan. Uŋwana ererimbot. Ndisana owo Mmɔ kiet-kiet ekama nsinsi idiɔŋɔ enyuŋ ewut ebuana nnyin ye Andinyaŋa.
Edi ke otu mme enyiŋ emi, enyiŋ kiet okoŋ akan kpukpru eken—enyiŋ Christ. Ke Ŋwed Mormon, Edidem Benjamim ama ekpep ete:
“Iduhe baba enyiŋ efen enode emi adade eriyaŋa edi; ke ntre, Ami mkpoyom yak mbufo eda enyiŋ Christ edori ke idem mbufo. …
“Ndien ke edikem ini owo ekededi emi anamde ŋkpɔ emi eyetie ke ubɔk nnasia Abasi, koro enye eyefiɔk enyiŋ emi ekotde enye, koro edikot enye enyiŋ Christ.”
Mme mmɔ emi edade enyiŋ Christ edori ke idem mmɔ ekabade edi mbet ye ŋtiense Esie. Ke ŋwed Utom mme Apostle, nnyin ikoot ite ke Christ amakeset ke nkpa, ema ewuk mme ŋtiense emi ekemekde ndinɔ ikɔ ntiense ete ke owo ekededi eke enimde Jesus ke akpanikɔ, ana baptism, onyuŋ ɔbɔ Edisana Spirit eyebɔ mfen-nnɔ ke mme idiɔk ŋkpɔ mmɔ. Mbon emi ebɔde ndisana edinam ema eboho otokiet ke ufɔk Abasi, ekabade edi mme mbet, ndien ekot mmɔ Mme Anditiene Christ. Ŋwed Mormon nko anam aŋwaŋa ete ke ekekot mbon emi enimde Christ ke akpanikɔ ete Mme Anditiene Christ ndien ekot mbon ekenamde ediomi ete “nditɔ Christ, nditɔ iren ye nditɔ iban esie.”
Ndikot nyin ke enyiŋ Christ ɔwɔrɔ nso? Enye ɔwɔrɔ ndinam nyuŋ nnim ediomi, nditi Enye kpukpru ini, ndinim mbet Esie, ye “ndinyime … ndida nte ntiense nnɔ Abasi kpukpru ini ye ke kpukpru ŋkpɔ.” Enye ɔwɔrɔ ndida ye mme prophet ye mme apostles ŋte mmɔ edade etop Christ—ye ukpep ŋkpɔ, ediomi, ye mme edinam esie eduk ofuri ererimbot. Enye ŋko ɔwɔrɔ ndiŋwam mbon ebɔde ukut ndidi uŋwana, ye ndiyuŋ nda idorenyin ke Christ nsɔk kpukpru owo. Ke akpanikɔ, emi edi se inade nnyin ikaiso iyom ke ofuri eyo uwem. Prophet Joseph Smith ama ekpep ete, “Emi edi ndaha se baba owo kiet mmikemeke ndisim ke ini kiet”
Koro isaŋ owo mbet adade ini ye ukeme emi ebɔpde ke “udim ke udim, ukpep ke ukpep,” enye ekeme ndidi mmem-mmem nnyin ndiduɔ nduk mme enyiŋ ererimbot . Emi edinam ufɔn ke ata esisit ini kpɔt idinyuŋ ikemke ke idem mmɔ. Erifak ye ŋkpɔ nsinsi edi kpɔt “oto ye ke Edisana Messiah.” Ke ntre, nditiene item mme prophet ndinam editiene nnyin edi akpan ŋkpɔ edi se itimde ɔfɔn, akpan-akpan ke eyo ediwak uyo ye odudu emi emiade mbuba. Emi okodu ke ata esit item eke Edidem Benjamin kini enye ɔkɔdɔhɔde ete, “Eti ndinim enyiŋ [Christ] emi ewetde ke esit mbufo kpukpru ini, … man mbufo edi kop enyuŋ ediɔŋɔ uyo emi edikotde mbufo, ŋko ye, enyiŋ emi enye edikotde mbufo.”
Ami mma ŋkut emi ke ufɔkemana mi. Ema ekpuhɔde ete-etebom mi Martin Gassner ke nsinsi koro osuhɔre-idem branch president kiet ama eyere ikoot Andinyaŋa. Ke 1909 ke Germany, ekedu ke nsɔŋɔ ŋkpɔ ndien okuk ama anana. Martin akanam utom nte ɔbɔp ukwak ke ufɔk utom ebotde esaŋ-ukwak. Oto ke unyime esie, ediwak usen ukpe okuk esitre ke uŋwɔŋ mmin, uŋwɔŋ esikɔŋ, ye udep mmin nnɔ mme ufan esie ke itie uŋwɔŋ mmin. Ŋwan esie ke akpatre ama akpan enye ete edieke enye mikpuhɔke-de, ke imɔ iyekpɔŋ enye.
Usen kiet, nsaŋa-utom Martin ama osobo ye enye ke usuŋ nte enye akade itie uwɔŋ mmin ye ŋwewine babru ke ubɔk esie. Enye okokut nwed emi ke efak onyung ɔdɔhɔ Martin ete ke imɔ imikop ukpuhode ke ekikere nte imɔ ikurede ndikot ekpri ŋwed emi ekekerede Was wissen Sie von den Mormonen?, mme Nso ke afo ɔfiɔk abaŋa mbon Mormon ? Ami mmenim ke nte ekotde ɔkpuhɔre.
Ema ewet ebiet iduŋ ke edem ŋwed oro, emi ekedide se owo ekemede ndikot nyuŋ mfiɔk ebiet emi ufɔk Abasi odude. Ebiet emi ama oyom usuŋ, edi se mmɔ ekekotde ama ɔnɔ mmɔ udɔŋ ndien mmɔ ebiere ndiduk train ke usen ederi oro man eka ekenam nduŋɔre. Kini mmɔ ekesimde, mmɔ ema ekut ete ke ebiet iduŋ oro ikidige ufɔk Abasi emi mmɔ ekekerede edi ekedi ufɔk ikpo. Martin ama atuak ada—koro ke akpanikɔ, ufɔk Abasi ndidu ke itie ufɔk ikpo odude eketie nte mbubehe emi enamde ŋkari.
Edi ke ufɔk odude ke enyɔŋ, ke ufɔt-ufɔk emi ekpede okuk ebɔ, mmɔ ema ekut ekpri otu eke Ndisana Owo. Erenowo kiet ama okote mmɔ ete ediduk esop ikɔ-ntiense. Spirit ama otuk Martin ndien enye ama okop inem ke ndimem, ikɔ-ntiense akpanikɔ tutu oro anam enye eke ɔnɔ ikɔ-ntiense esie. Ndien ekedi do, ke itie oro owo mmkpidotke enyin, ke enye ɔkɔdɔhɔ ke imɔ ima ibemiso ifiɔk ke ana edi oro edi akpanikɔ.
Ke ekemde erenowo ama anam mmɔ efiok ete ke imɔ idi branch president onyuŋ obup mme mmɔ eyefiak edi. Martin ama anam aŋwaŋa ete ke ebiet imɔ iduŋde oyom usuŋ ndien ke imɔ idiyeneke okuk ndikpe usuŋ ndi kpukpru udua. Branch President ama ɔdɔhɔ enye suŋ-suŋ ete, “Tiene mi.”
Mmɔ ema esaŋa ebe mme ufɔk ifaŋ eka itie utom emi ufan branch president akanamde utom. Ke ema eke eneme nneme ke ekpri ini, ema eda Martin ye ufan esie ke utom. Ndien branch president ama ada mmɔ aka odu-duŋ ufɔk kiet onyuŋ ɔbɔ ufɔk ɔnɔ mmɔ ye mbon ufɔkemana mmɔ.
Kpukpru emi eketibe ke idak hour iba. Ufɔkemana Martin ema enyɔŋ edi do ke udua kiet ke iso. Ke ɔfiɔŋ itiokiet ebede ema eduɔk mmɔ mmɔŋ. Owo emi ekefiokde inikiet nte anana idorenyin owo mmin edikabade esin ifik eti eti ke obufa edu-ukpono esie tutu mbon obio etɔŋɔ ndikot enye, ndusuk idige ke eti ete, “oku.”
Ke abaŋade branch president oro, ami ŋkemeke ndidɔhɔ fi enyiŋ esie—idiɔŋɔ esie ama osop nte ini ebede. Edi ami ŋkot enye mbet, isuŋ-utom, Anditiene Christ, eti owo Samaria, ye ufan. Ke ekokop odudu utom esie ke isua 116 ebede, ndien ami nda ke mme afara owo-mbet esie.
“Odu ŋke kiet esitiŋde ete ke afo ukemeke ndibat mme mkpasip emi esinede ke esit apple, edi afo emekeme ndibat apple emi ekemede ndiwɔrɔ nto mkpasip kiet.” Mkpasip emi branch president ɔkɔtɔde ama oŋwum anana ibat mfri. Enye ikpifiɔkke ite ke 48 ebede, ke eyedian ediwak emana eke ubon Martin edude ke edem ikpehe mbiba ke Ben Switzerland Temple.
Ndusuk mkpon ŋkan ikɔ Abasi edi eke nnyin mmidikopke edi enye edi emi nnyin ikutde ke ndobo, ndedibe edinam ye mme utom emi ekutde ke uwem mme didie-didie owo emi eŋwanade ndibiet Jesus, esaŋade enam nti utom. Se eti branch president emi akanamde ikidige kiet ke otu ŋkpɔ ewetde enim ndinam. Enye akanam ikɔ Abasi nte ekenamde aŋwaŋa ke ŋwed Alma: Mmɔ ikibinke baba owo kiet ifep … emi okokopde biɔŋ, mme emi okopde ŋsatitɔŋ, mme mbon udɔŋɔ, … mmɔ ema efɔn ido ye kpukpru owo, mbiba ikpɔ ye mkpri, … iban ye iren.” Ndien, ikɔ kiet eke minaha nnyin ifep enyin edi, ke mmɔ ikibinke baba owo kiet ifep “ekpededi enye odu ke ufɔk Abasi mme eke miduhe.”
Mbon emi edade enyiŋ Christ edori ke idem mmɔ efiɔk, ukem nte Joseph Smith eketiŋde ete: “Owo emi ɔyɔhɔde ye ima Abasi, iyuhɔke ke ndidiɔŋ ufɔk esie ikpɔŋ, edi ebe ekesim ofuri ererimbot, ye udɔŋ ndidɔŋ ofuri ubon owo.”
Ntem ke Jesus Christ okodu uwem. Ke akpanikɔ, Enye ama anam ata ediwak ŋkpɔ emi mbet esie mikikemeke ndiwet nnim. Apostle John ama ewet ete, “ Ediwak ŋkpɔ efen enyuŋ edu emi Jesus akanamde, ndien edieke ekpewetde mmɔ, etie mi nte kpa idem ererimbot ikpekemeke ndidɔŋɔ se ekpewetde.”
Yak nnyin iŋwana nditiene uwutŋkpɔ Jesus Christ, ke ndinam eti nyuŋ nnam editiene edi akpan ŋkpɔ ke ofuri uwem nnyin man ke inikiet eke nnyin isobode ye mbon efen, mmɔ eyekop ima Abasi ye odudu ɔsɔŋɔ eke Edisana Spirit. Ndien nnyin iyekeme ndidiana ye ete-etebom mi ye mbon efen ewakde esim million emi ekedɔhɔde, ukem nte owo mbet Andrew ete, “Nnyin imokut Messias.”
Ke akpatre, idiɔŋɔ nnyin idige se ererimbot efiɔkde nnyin. Edi efiɔk editiene nnyin eto mme edinam ikɔ Abasi emi nnyin ibɔde, mme ediomi emi nnyin inimde, ye ima emi nnyin iwutde Abasi ye mbɔhiduŋ ke ndinam eti ŋkpɔ. Nte President Nelson ekekpepde, ke akpanikɔ nyin idi nditɔ Abasi, nditɔ ediomi, mbet Jesus Christ.
Ami mmetie ntiense nte ke Christ odu uwem ndien ke enye ama afak nnyin. Enye edi Enye emi ɔkɔdɔhɔde ete, “Ami mmokot fi ke … enyiŋ, afo edi okim.” Ke enyiŋ Jesus Christ, amen.