Edimen-ŋwut
Nnyin idahaemi imika iso ye akwa mbono emi, nditɔŋɔ nte ikiduakde ye diana mme etiŋ-ikɔ ye ikwɔ emi President Nelson ekedemede-ɔnɔ etienede mbeŋe-idem eke ediwak ɔfiɔŋ.
Nditɔ-eka mi irenowo ye iban, nnyin imiso-bo nte nnyin ifuhɔde mkpa eke edima President Russell M. Nelson. Ami ntiŋ ikɔ nnɔ mbufo nte President eke Eboho Duopeba, emi edide idaha ekebemde iso enyime mi ke mme mbono ke ward, stake, ye akwa mbono nnyin kiet-kiet ke mme isua itiaba ye ubak emi ekebede.
Nnyin imika iso ye akwa mbono emi, nditɔŋɔ nte ikiduakde diana ye mme etiŋ-ikɔ ye ikwɔ emi President Nelson ekedemede-ɔnɔ etienede mbeŋe-idem eke ediwak ɔfiɔŋ. Ŋkukure se ediande edi emi, etop ntɔŋɔ eke mi, ye ami nditiŋ-ikɔ ke itie President Nelson ke akpatre ikpehe ke uwemeyo Sunday.
Emi edi akpa ini ke ŋkpɔ nte isua 75 eke President Ufɔk Abasi akakpade esisit usen mbemiso editɔŋɔ akwa mbono. Oro edinam nnyin ndiyom usuŋ nte nnyin idinimde mme akpan esop ndausuŋ emi abuanade ŋkpɔ ye akwa mbono ukeme nte mme akwa ikpehe eke mbono, ke ukem-ukem ini oro ndinim ini edibuk enye ke usɔp nte ikemede. Presidet Nelson ama ɔfiɔk ufɔn akwa mbono ke ndiyak ndausuŋ nnɔ mbon ufɔk Abasi ke mme ɔfiɔŋ emi edidide. Nnyin imikpono enye ke nditiene ini mbono emi ekeduakde enim emi enye ekenyimede.
Ke ini mfuhɔ emi, nnyin ima ibebem-iso inim esop ndikpono President Nelson mbemiso mme esop eke akwa mbono nnyin ndien edikem inim ini ikpo esie ke usɔp-usɔp nte ikemede ke mbono okurede. Ekenam kpukpru emi ye unyime eke ufɔkemana President Nelson ye eke Eboho mbon Duopeba.
Sia kpukpru nnyin emi ekenɔde ubiɔŋ nditiŋ ikɔ ke akwa mbono idimade ndiyak ini emi ekenɔde nnyin ndida mkpono President Nelson, nnyin ke ntre imidɔhɔ ofuri mme etiŋ-ikɔ nnyin ke mbono ete etiŋ esisit ikɔ-itoro, eyak ediwak ikɔ-itoro enɔ ini ikpo, emi nnyin ima ibebem iso itɔŋɔ ndinam uduak.
Esisit ikɔ-itoro mi—ekedotde ye mbono emi ye ndidian ke mme ikɔ-itoro emi nnyin ima ibebem-iso inɔ—edi emi: Ami mmema Russell M. Nelson ndien mmekpep ediwak ŋkpɔ kabaŋa ikɔ-Abasi ye ndausuŋ ikɔ-Abasi nto anyan ini edinam-ufan mi ye edisaŋa ye enye ŋkan adausuŋ efen eke ami mfiɔkde. Enye edi uwutŋkpɔ nnyin nte isuŋutom ye anditiene Ɔbɔŋ Jesus Christ. Kabaŋa mme ŋkpɔ emi ke ami nnɔ-ikɔ ntiense, ke enyiŋ Jesus Christ, amen.