Enam Ubiɔŋ Mbufo ke Ofuri Esit Mbufo

Ifiɔk-ukpep mi ukem ŋkpɔ-uwat oro ekedi akpan editi ke ndifɔn ke ŋkpɔ ekededi—mme oro edi ndiwatke ofim, ndiwat ke mmɔŋ, ntɔ iŋwaŋ, mme ndidɔdiɔŋɔ—oyom ata mkpeme-idem ye edinam.

Afo emekeme ndibiat mme isua ndinyene ifiɔk-utom kiet mme ndinyene nda-mana ɔniɔŋ kiet. Afo emekeme ndinehede nnam utom ke oro ndikabare ndi udiana uduot fo. Edi edieke afo ekerede ke oro ɔwɔrɔ ke afo emekeme editre ndinam nyuŋ mbɔ mkpep, afo suŋ-suŋ edinana ifiɔk ye ukeme emi afo akabakde enyene ke akwa ekɔm-urua.

Emi ebehe ifiɔk-utom nte edikpep usem, edibre ndido ikwɔ, ye ediwat ubom-enyɔŋ. Oro ŋko ebehe ndikabare ndi mbet Christ.

Nditim ntiŋ, owo-mbet oyom mkpeme-idem.

Oro idihe mmem-mmem utom, ndien oro isitibeke iwiwa.

Mbuɔtidem ke Christ edi enɔ, edi ndibɔ enɔ oro edi ntiŋ-enyin mbumek emi oyomde nsin-ifik eke ofuri “ukeme, ekikere ye ɔsɔŋɔ nnyin.” Oro edi edinam eke ofuri usen. Ofuri hour ini. Oro ada ofuri ini nsinifik edikpep ye ubiere. Mbuɔtidem nnyin, emi edide nsuhɔ-ibuot nnyin nnɔ Andinyaŋa, akabare ɔsɔŋɔ nte edomode oro ye eneni emi nnyin ikutde mi ke uwem isɔŋ. Oro eyeyɔ koro nnyin imika-iso ndibɔk enye, nnyin ika-iso ke ndida oro nnam utom, inyuŋ ikpaha mba.

Ke nkaŋ eken, edieke nnyin itrede ndida mbuɔtidem ye odudu akpanikɔ esie nnam ŋkpɔ, nnyin iyenana akpanikɔ ke mme ŋkpɔ emi nnyin ikikamade nsasana ke akpa ini—idinana uko ke mme ŋkpɔ emi nnyin ikibakde idiɔŋɔ ke ekedi akpanikɔ.

Mme idomo emi akananam ikpikemeke ndisim nnyin ɔtɔŋɔ ndisin ekpri ndik onyuŋ awak.

Ikaŋ ikɔ-ntiene eke mkpɔŋ ekeme edifure nnyin esisit anyan ini kpɔt. Oro oyom ofuri-ini edibɔk man anam enye enehede asak-ayama.

Ke Obufa Testament, Andinyaŋa ekekpep abaŋa ete-ufɔk kiet emi ɔkɔnɔde isuŋutom esie kiet-kiet nsasana ubiɔŋ—uwak okuk ekotde mme talent. Mme isuŋutom emi eketiŋde-enyin eda talent mmɔ enam ŋkpɔ ema enam talent mmɔ ɔtɔt. Ke akpatre isuŋutom oro okobukde talent esie ama anana talent oro.

Ukpepŋkpɔ oro? Abasi ɔnɔ nnyin mme enɔ—eke ifiɔk, ukeme, eti-ifet—ndien Enye oyom nnyin ida inyuŋ inam mmɔ etɔt man mmɔ ekeme edidiɔŋ nnyin nyuŋ ndiɔŋ nditɔ Esie efen. Oro iditibeke edieke nnyin isinde mme enɔ oro ke enyɔŋ okpokoro nte enɔ-utip-mbuba emi nnyin isede-inemesit kini kini. Enɔ nnyin edikpon inyuŋ itɔt ke ini nnyin idade mmɔ inam utom kpɔt.

“Edi Elder Uchtdorf,” afo emekeme ndidɔhɔ ete, “Ami nnyeneke enɔ mme talent ndomokiet—nte ekpride, iduhe enɔ eke enyenede ufɔn.” Ndusuk afo emese mbon efen emi enɔ mmɔ ɔwɔrɔde ada onyuŋ eyede ndien afo edikere nte unyeneke-ufɔn emi edade-edomo. Afo emekeme ndikere ke nkaŋ premortal, ke usen usen akwa enɔ ye ediwak talent, ke ekenim usan fo nsan-nsan—akpan-akpan ke edade edomo ye eboho ye ɔyɔhɔ-udia usan eke mbon efen.

Oh, nte ami mkpekemeke ndifat fi nyuŋ ŋwam fi ndifiɔk akwa akpanikɔ ke: Afo ɔmɔfɔn iso ndidi uŋwana, eyen spirit eke anana-adaŋa Abasi! Ndien afo ke esit idem fo emenyene adaha emi akande ukeme idem fo ke ndikere.

Nte mme ewet-uto ewetde, afo edi ke isɔŋ “asaŋade ye ɔyɔhɔ ubɔŋ”!

Ntɔŋɔ mbuk fo edi edisana, ntre ŋko ye akaŋa fo. Afo ɔkɔkpɔŋ heaven man edi mi, edi akananam heaven ikpɔŋke fi.

Afo edi ŋkpɔ ekededi udihe didie-didie.

Afo emenyene enɔ!

Ke Doctrine ye Covenants, Abasi ofiori ete:

“Odu ediwak enɔ, ndien ke enɔ ofuri [owo] enɔ otode ke Spirit Abasi.

“Eke ubak owo enɔ enɔ kiet, [ndien] eke usuk owo enɔ enɔ eken, man otode kpukpru owo ekpenyene udori ke esit.”

Ebat usuk enɔ nnyin esin ke ŋwed Abasi. Ediwak idige ntre.

Nte prophet Moroni etiŋde ete, “Ekukaŋ mme enɔ Abasi, koro mmɔ ewak, mmɔ enyuŋ eto Abasi kiet edi.” Mmɔ ekeme ndiwut idem mmɔ ke “nsio-nsio usuŋ … ; edi Abasi kiet odu emi anamde utom ke ofuri mmɔ.”

Ekeme edidi akpanikɔ ke mme enɔ spirit isiyehe ke ofuri ini, edi oro iwɔrɔke ke mmɔ inyeneke ufɔn. Yak ami mbuana ye mbufo usuk mme enɔ spirit eke ami ŋkutde nto ata ediwak mbon ufɔk Abasi nnyin ke ofuri ererimbot? Ekere-ebaŋa mme afo ɔmɔfɔn iso ndinyene kiet mme ediwak enɔ ntem:

• Ndinyene esit-mbɔm.

• Ndikut mbon owo emi owo misehe.

• Ndikut mme ntak ndinyene idara.

• Ndidi anam-emem.

• Ndikut ŋkpri utibede-ŋkpɔ.

• Ndinɔ itoro ke ofuri-esit.

• Ndifen-nnɔ.

• Nditua-mkpɔfiɔk.

• Ndiyɔ.

• Ndinam ŋkpɔ enehede aŋwaŋa.

• Ndidiana ye nditɔ-ɔwɔŋ.

• Ndibere ye mme adausuŋ Ufɔk Abasi.

• Ndiŋwam mbon efen ndidiɔŋɔ ke mmɔ edu.

Ekeme edidi afo ukwe mme enɔ emi nte ewutde ke edinam ediwut talent ke ward. Edi ami mmenim ke afo emekeme edikut nte mmɔ esɔŋde-urua enɔ utom Abasi ye nte afo ekekemede ndituk, ndiɔŋ, mme kpa ndinyaŋa kiet kotu nditɔ Abasi oto ke mme enɔ fo. Ti ete: “Ke mkpri ye ndimem ŋkpɔ ke eda enam mme ikpɔ ŋkpɔ.”

Ntre yak nnyin kiet-kiet inam esisit ubiɔŋ nnyin.

Ndima nditɔ-eka mi irenowo ye iban, ndima ufan mi, ami mbeŋe ye Spirit oro aŋwam nnyin ndikut mme enɔ ye talent emi Abasi ɔkɔnɔde mbufo. Ekem, yak nnyin, ukem nte nti isuŋutom oro ke ŋke-mbuk Ɔbɔŋ, inam-ɔtɔt inyuŋ idemede mme enɔ nnyin.

Usen oro eyedi ke ini nnyin ididade ke iso enyene-mbɔm Ete Heaven nnyin ndinɔ ibat eyen-utom nnyin. Enye eyeyom ndidiɔŋɔ se nnyin ikinam ye mme enɔ emi Enye ɔkɔnɔde nnyin— akpan-akpan, nte nnyin ikidade mmɔ idiɔŋ nditɔ Esie. Abasi ɔdiɔŋɔ owo eke nnyin inehede idi, owo emi ekenimde nnyin ete ikabare idi, ndien ke ntre udɔŋ Esie kabaŋa nnyin okpon.

Edi Enye iyomke nnyin ndinam ikpɔ, ɔwɔrɔ-etop, mme ata-akwa ŋkpɔ man ikisim do. Ke ererimbot emi Enye okobotde, ŋkɔri esitibe suŋ-suŋ ye ke ime—edi ke edinam ofuri-ini ye nsuhɔre-esit ŋko.

Eti, enye edi Jesus Christ emi ekebemde iso anam ata-akwa ubiɔŋ-ŋkpɔ ke ini Enye akakande mkpa ye idiɔkŋkpɔ.

Ubiɔŋ nnyin edi nditiene Christ. Edi utom nnyin ndikpɔŋ idiɔkŋkpɔ, ŋwɔŋɔre ntiene Andinyaŋa, nyuŋ nsaŋa ke usuŋ Esie, ikpat kiet ke ini kiet. Nte nnyin inade emi, isinifik ye mbuɔtidem, ke akpatre nnyin iyekeŋ mme mkpaha-ukot unana mfɔn-mma ye ndudue iduɔk ndien suŋ-suŋ ikabare ifɔn, tutu edifɔn usen oro ke ini nnyin idifɔnde-ima ke Christ.

Mme edidiɔŋ oro odu ekpere. Mme eŋwɔŋɔ oro odu. Inua-otop oro ana iŋwaŋ. Oro edi mbumek nnyin ndibe-nduk nyuŋ ntɔŋɔ.

Ntɔŋɔ ekeme edidi esisit. Edi oro ekem.

Ebiet emi mbuɔtidem ememde, etɔŋɔ ye idorenyin ke Christ Jesus ye ke odudu Esie ndiyet nyuŋ nnam-asana.

Ete nnyin oyom nnyin ete ibine eŋwan emi ye mbuɔtidem ye owo-mbet idihe nte mme mbumin ese-ŋkpɔ edi nte mme andinehde nnim ke ofuri esit emi ikikpɔŋde ye ikisinde Babylon ndien iwuk esit, ekikere, ye ikpat nnyin ika Zion.

Nnyin imidiɔŋɔ ke ukeme nnyin ikpɔŋ ikemeke ndinam nnyin idi celestial. Edi mmɔ ekeme ndinam nnyin isuk-ibuot inyuŋ inam-ubiere inɔ Jesus Christ oro, ndien Enye ekeme ndinam nnyin idi celestial.

Otode ke edima Andinyaŋa nnyin, iduhe oruk ŋkpɔ nte ikpehe emi nnyin midikanke. Edieke nnyin inimde idorenyin ye mbuɔtidem nnyin ke Enye, edikan enyene iwuk. Enye ɔŋwɔŋɔ ndinɔ nnyin ɔsɔŋɔ Esie, odudu Esie, ediwak mfɔn Esie. Ke nde ke nde, esisit ke esisit, nnyin iyenehede ikɔri ikpere akwa ye edifɔn usen oro ke ini nnyin ididuŋde ye Enye ye mbon ima nnyin ke nsinsi ubɔŋ.

Man isim do, ana nnyin inam ubiɔŋ nnyin mfin emi ye ke ofuri usuen. Nnyin iminɔ ekɔm ke mme ndaha emi nnyin ikinamke mkpɔŋ, edi nnyin itreke do. Nnyin imidiɔŋɔ ke nnyin isuk inyenyene anyan usuŋ ndisaŋa, edi nnyin idiyak-ke oro ɔbiɔŋɔ nnyin.

Oro edi idem ŋkpɔ eke owo emi nnyin idide—nte anditiene Christ.

Ami mbeŋe nyuŋ ndiɔŋ ofuri mbon Ufɔk Abasi, ye kpukpru owo emi enyenede udɔŋ ndidi ubak ŋkpɔ oro, man ebuɔtidem ye Andinyaŋa ndinam, ke ime ye ntiŋ-enyin, ke ndinam ubiɔŋ mbufo ke ofuri esit mbufo—man idara mbufo ɔkpɔyɔhɔ ndien ke, usen kiet, mbufo ekpebɔ kpukpru ŋkpɔ emi Ete enyenede. Kabaŋa emi ke ami ntiŋ ikɔ-ntiense ke enyiŋ Jesus Christ, amen.