Ŋwed Mormon—Akwa Ŋkpɔuto ke Isaŋ Nnyin
Nte nnyin ikpepde mme ikɔ Christ emi edude ke Ŋwed Mormon, Spirit eyeŋwam nnyin ndifiɔk nsinsi akpanikɔ.
Ndi afo emeti ini emi owo ɔkɔɔde fi enɔ emi ekekpuhɔre uwem fo? October emi anam isua Aba tɔŋɔde ŋkɔbɔ kiet ke otu mme mkpon-ŋkan enɔ ke uwem mi. Ke ini nkedude ke akamba ufɔkŋwed, mma nkut nte ke kiet ke otu owo class nnyin ama enyene uŋwana emi edide isio isio ye eke mkpri owo efen. Ami mma nkop inem ndidu ye enye. Usen kiet eye ɔdɔhɔ mi ete ami ndi owo Ufɔk Abasi Jesus Christ eke mme Latter-day Saint. Ndien enye ɔnɔ mi enɔ: idem Ŋwed Mormon. Enye ɔdɔhɔ mi ete nkot esisit ikpa ŋwed nyuŋ nsobo ye mme ufan iba emi ekemede ndibɔrɔ mme mbume. Mme ufan oro ekedi mme ɔkwɔrɔ ikɔ Abasi.
Ke ini nkesobode ye mme ɔkwɔrɔ ikɔ Abasi, mmɔ ema ekpep mi mme ubono ŋkpɔ Christ ndien ekot mi ete ntiene ikoot eke prophet Moroni: “Ke ini mbufo edibɔde mme ŋkpɔ emi, ami mkpe mbufo ubɔk nte mbufo ebup Abasi, Nsinsi Ete, ke enyiŋ Christ, edieke mme ŋkpɔ emi midihe akpanikɔ, edieke mbufo ebupde ke esit akpanikɔ, ye akpan ekikere, enyene mbuɔtidem ke Christ, enye eyeyarare akpanikɔ esie ɔnɔ mbufo, oto ke odudu Edisana Spirit.” (Moroni 10:4).
Ami mma nkot ediwak ikpa ŋwed ke Ŋwed Mormon nyuŋ mbɔŋ akam. Ɔkpɔsuk edi nte mikinyeneke ntotuŋɔ ifiɔk mbaŋa kpukpru ŋkpɔ emi mme ɔkwɔrɔikɔ ekekpepde mi, mma nkop ke esit mi nte ke se ami ŋkekotde ama ɔfɔn ndien ke okoto Abasi. Mma mbɔ ɔsɔŋɔ ke eŋwɔŋɔ Moroni: “Ndien ke odudu eke Edisana Spirit afo emekeme ndifiɔk akpanikɔ eke kpukpru ŋkpɔ (Moroni 10:5).
Ke mma ŋkɔduɔk mmɔŋ nduk ke Ufɔk Abasi Jesus Christ Mme Ndisana Owo ke Ukperedem Usen, ndusuk mme ufan mi ema edomo ndidɔhɔ mi ke mma nam idiɔk ubiere. Edi kpukpru ini eke ami ŋkutde mme utɔ afanikɔŋ oro, mma mbɔ ɔsɔŋɔ otode ke ndikpep ikɔ Abasi nyuŋ mbɔŋ akam nyom ndinam akpanikɔ ke ediomi emi ŋkedukde ye Abasi. Tɔŋɔ ke ini oro, Ŋwed Mormon edi nsaŋa mi ndien akabare edi akwa ŋkpɔuto ke isaŋ uwem isɔŋ mi.
Ŋwed Mormon okpon akan ndidi ata ŋwed. Enye edi testament Jesus Christ efen, ewetde eto mme ediwak prophet eset otode k spirit prɔfesi ye eriyarare.
Ata akpan ŋkpɔ-ntibe ewetde ke Ŋwed Mormon edi utom ukwɔrɔ ikɔ eke Ɔbɔŋ Jesus Christ ke otu mbon Nephi ke esisit ini etienede Eriset ke mkpa Esie. Ŋwed Mormon “ɔnɔ edu unam ŋkpɔ eke ikɔ Abasi, etiŋ mme uduak erinyaŋa ukpɔŋ, onyuŋ ɔdɔhɔ mme owo se akpanade mmɔ enam ndinyene emem ke uwem emi ye nsinsi erinyaŋa ukpɔŋ ke uwem emi edidide” (ŋtɔŋɔ eke Ŋwed Mormon).
Akpa Ŋwed Mormon: Ekesio Testament Jesus Christ efen ke ekpri obio eke iduŋ New York ke 1830. Prophet Joseph Smith ekedi isua 23 kpɔt ke ini enye okokurede edikabare ŋwed oro ke 1829. Enye amakabare ata ofuri ediyak esisit ndikure ofuri ŋwed oro ke ekpride akan usen 75 ndien ndimiŋ nsio ada ɔfiɔŋ itiaba.
Mfin, mme ɔkwɔrikɔ ekperede 80,000 ke ebede mme idut 150 ke eŋwam nte mme anam-utom-mfɔn, eyakde uwem mmɔ enɔ ke nditie ntiense ete ke Ŋwed Mormon edi akpanikɔ ndien ke enye etie ntiense abaŋa Jesus Christ.
Ke ata ukpep enɔde mbufa mme adaibuot mission ke mmi-mmi-emi ke June isua emi, President Russell M. Nelson, ama abuana akwa ikɔ ntiense esie kabaŋa Ŋwed Mormon: “Ŋwed Mormon edi … ikɔ Abasi. Enye ekpep ubono ŋkpɔ Christ onyuŋ anam anwaŋa awak kabaŋa Erisio-isop Andinyaŋa akan ŋwed efen anamde.”
Ami nyema ndinɔ mme ekikere ita emi ekemede ndiŋwam ŋkabare esit nnyin ke Jesus Christ otuŋɔ otode ke ndikpep Ŋwed Mormon:
1. Etiŋ Enyin enyuŋ Ekaiso Ekpep ke Usen ke Usen.
Nte Alma ye nditɔ irenowo Mosiah, ana nte nnyin “[iduŋɔre] ŋwed Abasi ɔfɔn, man [nnyin] ikeme ndifiɔk ikɔ Abasi” inyuŋ ibɔ nsɔŋɔnda ke akpanikɔ (Alma 17:2
Ke ini ikinamde utom nte adausuŋ ke Georgia Atlanta Mission, nwan mi ye ami ikinɔ kpukpru mme ɔkwɔrɔ ikɔ Abasi ite ekpep Ŋwed Mormon ke ŋkpɔ nte minit 30 ke usen ke usen. Nwaidem edibede mbuɔtidem nnyin onyuŋ anwam nnyin iyon inyuŋ ikere ibaŋa mme utibe ŋkpɔ.
Edi mmem-mmem ŋkpɔ nte ke ekurede mission ke nnyin idinyeneke ukem ini oro ke ndikpep ikɔ Abasi kpukpru usen, edi mmɔnwɔŋɔ nnɔ mbufo nte edieke edade akam ekot Ŋwed Mormon ofuri usen nte akpan ŋkpɔ, mbufo eyenyene akamba ukeme eke spirit ye uko ke Jehovah ye mme enwɔŋɔ Esie.
2. Nam Edikot fo Enyene Ufɔn ke Ndikpep mme Ikɔ Christ.
Nephi okoot nnyin ete: “ikpep mme ikɔ Christ; sese, mme ikɔ Christ eyeteme fi kpukpru ŋkpɔ emi edinamde” (2 Nephi 32:3).
Nditabi okpon akan ndikot kpɔt—enye ɔwɔrɔ ndinam anem, ndikere, ye ndisin ke edinam. Nte mbufo ekootde Ŋwed Mormon, ekere ebaŋa mme usuŋ edinamde edikot ŋwed Abasi mbufo enyene ufɔn. Nte uwutŋkpɔ:
-
Kama ŋkpɔ unwam ukpep emi odude ke Gospel Library.
-
Ekut nsinsi akpanikɔ emi aŋwamde nnyin ifiɔk Uduak Abasi onyuŋ adade nnyin usuŋ man inam inyuŋ inim mme ediomi ye Ete eke Heaven nnyin
-
Ewet mme akpan ibio ikɔ enyuŋ ewet mme ekikere mbufo man etum enim se mbufo ekpepde ke ini edikpep mbufo.
Ŋwed Mormon enyene odudu ndibɔrɔ mme mbume eke ukpɔŋ. Nte Nephi eketiŋde, ana nnyin inyene “ndida kpukpru mme ŋwed Abasi ndomo ye idem nnyin, man mmo edi eti utip ye ukpeb enɔ nnyin” (1 Nephi 19:23).
Nte itabide ke ikɔ Christ, ndien mmɔ eyenam usuŋ eriyarare eberede onyuŋ owut mbufo se anade nnyin inam ke mme ndaha eke uwem nnyin ke ndisik mkpere Enye.
3. Etiŋ Ikɔ Ntiense ebaŋa Akpanikɔ eke Ŋwed Mormon.
Kpa nte Lehi ekenyenede udɔŋ ndibuana mfri eto uwem ye ufɔkemana esie (se 1 Nephi 8:12), ke ini inyenede ikɔ ntiense eke Ŋwed Mormon, nnyin inyene udɔŋ ndibuana idara emi otode ke ndifiɔk ikɔ Abasi Jesus Christ.
Kiet ke otu mme ɔkwɔrɔ ikɔ nnyin, Sister Benson, emi odude ye nnyin ke ikpehe emi, ama abuanai udɔŋ esie ye ami ke ndiŋwam ekpri eyeneka eren esie. Ke ini oro, enye ekebeŋe idem ndika college ndien ikinimke ibaŋa ndika mission. Mma ŋkot Sister Benson nte okoot Ŋwed Mormon ke akpa ɔfiɔŋ inaŋ esie ke mission, edebi mme ibuot ŋwed, emi enye amade akan, ndien ɔnɔ ɔsɔk eyeneka eren esie.
Sister Benson ama ɔnɔ Ŋwed Mormon emi enye ekenimde idiɔŋɔ ɔsɔk eyeneka eren esie ete okoot ke ofuri okoneyo. Ekem enye ama abuana ye ami ete: “Mbemiso mission mi, eyeneka eren mi ikikereke ke enye eyeyom ndika. Suŋ-suŋ, ke ini ebede, nte enye okootde Ŋwed Mormon, enye enyene akamba idara ke uwem esie onyuŋ ɔtɔŋɔ ndikere mbaŋa ndika mission.
Udua iba mbemiso Sister Benson okure mission esie, eyeneka eren esie ama ɔbɔ ikoot mission esie. Idahaemi enye aka mission ke Mexico Tuxtla Gutiérrez Mission. Otode ke Ŋwed Mormon, Elder Benson okut idem esie ye edinwaŋa spirit, emi akadade enye usuŋ ke ndinam ndikinam utom nnɔ Jehovah ndien enim ke ŋkpɔ eyefɔn. Ndumek emi nkanamde ekedi utibe ŋkpɔ—emi odudu eke ikɔ Christ anamde.
Ndima nditɔ eka iren ye iban, mekoot mbufo kiet kiet nte etim ekpep Ŋwed Mormon. Mɔdiɔŋɔ ke nte nnyin ikpepde mme ikɔ Christ emi edude ke Ŋwed Mormon, Spirit eyeŋwam nnyin ndifiɔk nsinsi akpanikɔ inyuŋ ibuana ikɔ ntiense nnyin ye uko nnɔ mbon emi Jehovah ebeŋede idem enim ndikop etop Esie. Jehovah ɔdɔhɔ ete, ”Mbon eke ami mmekde ekop uyo mi inyuŋ isɔŋke esit mmɔ” (Ŋwed Ukpebŋkpɔ ye Ediomi 29:7 Mmetie ntiense nte ke mbon oro ebupde Abasi ye mbuɔtidem eyenyene ikɔ ntiense ebaŋa akpanikɔ ye edisana ndaha eke Ŋwed Mormon otode ke odudu Edisana Spirit. Ke emi ke ami ntiŋ ikɔ-ntiense ke enyiŋ Jesus Christ, amen.