Ndien Idahaemi Ami Mmokut

Ye ntɔtuŋɔ ima kpukpru nnyin imitiene President Oaks itiŋ eti ikɔ ke mkpa President Russell M. Nelson. Ndien ye ukem ima ye mfuhɔ oro, kpukpru nnyin imikop mme ŋkpɔ mmɔŋ-eyet emi etibede ke Michigan idahaemi ye ke kpukpru usen ke ofuri ererimbot. Nnyin imikop mme ŋkpɔ emi inyuŋ idorienyin ke Ɔbɔŋ Jesus Christ.

Ɔyɔhɔ ibuot usukiet John ewet abaŋa ifiɔk Jesus ye mme mbet Esie ke ekebede ekpere ebeŋe-ebeŋe, edide nnan tɔŋɔ ke emana. Emi ama anam mme mbet ebup Jesus ediwak ɔkpɔsɔŋ mbume abaŋade ntɔŋɔ ye nte udɔŋɔ owo emi akasaŋade. Etubom ama ɔbɔrɔ ke ndinam ata mmem mmem ye ŋkpɔ mkpaidem. Enye ama afiari etap esin ke ntan onyuŋ anuak ekpri mbat osio do. Enye ndien emen emi ɔfiɔŋɔ ke mme enyin erenowo oro, ɔdɔhɔ yak enye ekeyet ke mmɔŋ Siloam. Kpukpru emi eren nnan emi ama anam ke ŋkop item ndien “afiak [edi] okut usuŋ,” mme ŋwed Abasi etiŋ. Emi edi akpan idiɔŋɔ, emi misaŋake ye mme ekikere mme eneni mme idiɔk-esit emi enwanade ye akpanikɔ.

Ndien, ke efehede ndik ete ke utibe ŋkpɔ emi eyefiak adian ke ndik emi Jesus ekesinde ke unen emi mmɔ ekekerede ke iminyene, mme usua Andinyaŋa ebine obufa okut usuŋ owo emi ndien etiŋ ke iyaresit ete, “Nnyin imifiɔk ke [Jesus] edi anam idiɔk-ŋkpɔ.” Owo oro ama akpaŋ utɔŋ ke esisit ini, ndien ɔdɔhɔ ete, “Mme enye edi anam idiɔk … , ami mfiɔkke [edi] ŋkpɔ kiet [ke] ami mɔfiɔk, nte, nnkedi nnan, idahaemi mokut usuŋ.”

Jesus ɔkɔnɔ akpa se emi ɔwɔrɔde ke ebiet edinam emi, ɔdɔhɔ mme mbet Esie ete ke kpukpru emi eketibe “ete man enam utom Abasi ayarade.” Ti ete ke ikaba ke mbuk emi ke ekekot edinam Andinyaŋa “uyet aran” ke enyin owo nnan, edinam emi akanade nte ekure ke ndiyeyet. Nte etiŋde emi ebaŋa “mme utom Abasi [emi] enamde ayarade” owut nte edinam ɔtɔŋɔde.

Akpanikɔ kiet efen emi ekutde mi edi mme ŋkpɔ emi Andibot Enyɔŋ ye Isɔŋ ye kpukpru se idude ke mmɔ adade anam mme utibe ŋkpɔ emi: etap ye ekpri ntan! Mme ŋkpɔ emi owo midotke enyin ewut ete ke Abasi ekeme ndidiɔŋ nnyin ke usuŋ ekededi emi Enye emekde. Nte Naaman emi ekesinde Akpa Jordan mme nditɔ Israel emi ekesinde ndise urukikɔt ke enyɔŋ esaŋ, ntem ke emem ɔnɔ nnyin ndisin ebiet emi edifak nnyin otode ke ntak emi mme ŋkpɔ utom etiede nte edi ekpri.

Edi nnyin imiti ke Ŋwed Mormon ite ke usuk ŋkpɔ edi inwaŋ inwaŋ ye nsɔŋurua ndien ke mbemiso emana Jesus, eyetiŋ nte prophet ete ke “enye [idinyeneke] ubɔŋ ye uyai; ndien ke ini [anade nte] nnyin ikut enye, uyai iduhe emi anade nte iyom enye.” Ediwak ini Abasi esinɔ enyene nti etop Esie oto ke obufa ye enyene uduɔŋ unam utom Relief Society president, mme ekpri eyeneren emi mikaha ŋwed ke iŋwaŋ ke New York mme nsekeyen ke ufɔk ufene.

Nso iditibe edieke mme ibɔrɔ mme akam nnyin otode ekpri, emi misidighe ntre, mme mme usuŋ emi esɔŋde ndifiɔk? Ndi nnyin imibeŋe idem nditim nnim, ke ndiyire ke gospel Christ isehe ibat etap ye mbat emi enye esinede? Idiŋwaŋake nnyin se enamde ye ntak emi enamde, ndien, ke ini ke ini, kpukpru nnyin iyitie ekpri nte eyen eka anwan emi ɔkɔdɔhɔde ete, “Jehovah, enye edidiɔŋ emi owo midipke?”

Kere baŋa idiɔɔ akpanikɔ efen, enye emi abaŋa edisana itie oku. Ke ndiwet nte ekesiakde akamba ufɔk Abasi, akpa udim ikɔ Luke ɔdɔhɔ ntem: “Ndien enye okot mme mbet duopeba esie, onyuŋ ɔnɔ mmɔ odudu ye unen,” mme enɔ emi mikinɔhɔ ke ntak eti utom mmɔ mme edu mme unen emana. Owo inɔhɔ ito ufɔkŋwed edu ukpono mme eke ukwɔrɔ ikɔ. Enɔ mmɔ ikpɔŋ ke ndidori mme ubɔk owo emi owo emi ekenyenede unen okodoride enye ubɔk oto ke owo kiet ekesim efen tutu afiak ekesim ntɔŋɔ edisana unen, Ɔbɔŋ Jesus Christ.

Ndien ke Ufɔk Abasi emi efiɔkde enɔ mbɔm, ndi ikpidighe ediye uwut-ŋkpɔ akpanikɔ efen ke Ufɔk Abasi oro ndikut nte mme edidiɔŋ ye mme ediomi emi esimde nditɔ eka nnyin emi ekekpade, mbon ufɔkemana nnyin emi ekebemde nnyin iso ekpa? Ndi ana nte emia mmɔ ufen ke ntak emi mmɔ mikinyeneke ufaŋ ndibɔ gospel emi mme ke ntak emi ekemande mmɔ ke ini mme ebiet emi ndisana edinam ye mme ediomi mikiduhe inɔ mmɔ? Ufɔk Abasi Jesus eke Ndisana Owo ke Ukperedem Usen enyenede edisana, nsio-nnim ufɔk Jehovah emi enamde utom erinyaŋa emi owo efen adade ɔnɔ owo emi ekekpade, ye ndinɔ mme ufaŋ ndikpono ye ndinam mme edinam nnɔ mme odu-uwem. Nte ami mfiɔkde, idiɔŋɔ akpanikɔ eke Abasi emi, ima emi Enye enyenede ɔnɔ ofuri odu uwem ye mme akpa mkpa, iduhe ke ebiet ndomo kiet ke ererimbot—ibɔhɔke ke ufɔk Abasi kiet emi enyenede akpanikɔ ke usuŋ emi: Ufɔk Abasi Jesus eke Ndisana Owo ke Ukperedem Usen.

Akpa edikut enɔ mi, enɔ uwem ndisobo ye ata idiɔŋɔ akpanikɔ ikidighe ke ndiyet mbat mme ke mmɔŋ Siloam. Iŋ iŋ, ŋkpɔ utom akpanikɔ emi akadade edikɔk mi oto Jehovah edi ekedi nte mme ikpa ŋwed, iŋ, Ŋwed Mormon: Testament Jesus Christ Efen! Se etiŋde ebaŋa ŋwed emi edi se mbon emi minimke ke akpanikɔ enwanade enyuŋ esinde, iyaresit emi ada nka-nka ye idiɔk ikɔ mbon oro ekedɔhɔde owo oro ekesɔbɔde ete ke enye ikemeke ndinyene se enye ɔkɔfiɔkde enye ama enyene.

Edɔhɔ mi ete ke usuŋ emi ŋwed edide edidu ikemeke nditibe, idihe akpanikɔ, edi ŋkpɔ obut, onyuŋ edi se misanake. Idahaemi, oro edi idiɔk ikɔ emi otode owo emi ekerede ke enye ɔfiɔk usuŋ emi ŋwed oro okotode edidu, ke okposuk edide ete ke nkukure ikɔ emi enɔde ebaŋa mme usuŋ edi ke ekekabadere enye “eto enɔ ye odudu Abasi.” Oro edi oro. Oro edi kpukpru. Ke nte ekpededi, se Ŋwed Mormon anamde ke uwem mi idighe ekpri utibe ŋkpɔ ikan se ikidide ke ndisin etap ke ntan nyuŋ ndian ke mme enyin owo nnan oro. Edi, ɔnɔ mi, esaŋ ubɔhɔ ɔnɔ ukpɔŋ mi, unwana ediyarade emi akanadere onyuŋ ɔtuŋɔde, unwana ke usuŋ emi anade nte nsaŋa ke ini mfut ekim edide. Ndien ke akpanikɔ mmɔ edi, ndien ke akpanikɔ mmɔ eyedi.

Ndien ke ndise ŋkukut emi enye ɔnɔde mi abaŋa ima ye mfɔn edifak emi Andinyaŋa mi enyenede ɔnɔ ofuri ererimbot, ami mebuana ye mbufo ikɔ ntiense mi, emi enyenede unen mi nte ete eyen emi ediɔŋde obufa ɔdɔhɔde ete yak ekop eyen esie koro enye “okpon ekem.” Ŋko, ntre ye ami. Enye ama ɔsɔŋ ekem se ekpedade enye nte akpan-ŋkpɔ, mmɔ ekekere ntre. Ŋko, ntre ye ami. Edi ɔfiɔŋ iba ɔsuhɔ ami ndidi isua 85. Ami mesim mben mkpa ndien nyɔŋ ndi. Ami mesaŋa ye mme ndidem ye mme prophet, mme president ye mme apostle. Emi ɔfɔnde akan, ke mme ini ye ini Edisana Spirit ɔyɔhɔ mi idem. Ami menim ke akpana nte ekpaŋ utɔŋ enɔ ikɔ ntiense mi.

Idahaemi, nditɔ eka iden ye iban, ami mɔfiɔk ye ofuri ukpɔŋ mi nte ke Ufɔk Abasi Jesus Christ eke Ndisana Owo ke Ukperedem Usen edi edifiak-mmen-ndi ufɔk Abasi eke Obufa Testament ke akpanikɔ—ye ke akande emi— koro ami ŋkanke-kaŋ idiɔŋɔ eke edifiak mmen-ndi. Tɔŋɔ ke mme akpa ifiɔk oro, ami mmekere ke mmenyene tɔsin—mme tɔsin duop?—idiɔŋɔefen ete ke kpukpru se ami ntiŋde mfin emi edi akpanikɔ. Ke ntre, esit enem mi idahaemi ndidiana ye ufan mi oro ke mme efak Jerusalem, emi ami nkwɔde ye ekpri uyo mi:

Ke enyiŋ Jesus Christ, amen.