Ima Isop eke Jesus Christ
Edikut erikɔk ye erifen-nnɔ kiet-kiet ke ɔyɔhɔ ndaha mmɔ ke ima isop eke Jesus Christ.
Ami mmewut ima mi nnɔ President Russell M. Nelson ye esit-ekɔm mi ke eti odudu emi enyene ekenyenede ke idem nnyin kiet-kiet. Ndien eke kpukpru nnyin, ami mmekɔm Abasi ke edisuhɔ nyuŋ ndebide eti uwem eke President Dallin H. Oaks.
Ye isua kiet-kiet ekebede, ami ndinyene akwa ima nnɔ Andinyaŋa nnyin, Jesus Christ, ye mbɔm-mbɔm Erisio-isop Esie. Mkpon-ŋkan nwaidem Esie, ɔbɔde erikan ke mkpa ye idiɔkŋkpɔ, edi ata utip emi ɔfɔnde akan ke ofuri mbuk ubonowo Ndifiɔk edisana enɔ Esie ke eke mi edi anana-utit ukpep otode heaven eke ami ndikade iso mbɔ kpa ke ami mkpade.
Odudu esit-mbɔm Andinyaŋa ke erifen idiɔkŋkpɔ ye ke erikɔk mme unan otode ke mme idiɔkŋkpɔ eke mbon efen adi ata akpan utibede idiɔŋɔ eke ima Abasi.
Udɔŋ mi edi ndinɔ idorenyin esɔk mbon emi eyomde erifen-nnɔ ke mme ikpɔ idiɔkŋkpɔ nyuŋ nnɔ ndɔŋesit esɔk mbon emi eyomde erikɔk eto mme ɔkpɔsɔŋ unan eketode mme ikpɔ idiɔkŋkpɔ eke mbon efen.
Edikut erikɔk ye erifen-nnɔ kiet-kiet ke ɔyɔhɔ ndaha mmɔ ke ima ufak eke Jesus Christ.
Mbuɔtidem ke Jesus Christ
Edieke edide afo ama anam akamba idiɔkŋkpɔ ndien odu ke usuŋ edikabare-esit mme emenyene udɔŋ ndikabare-esit ofuri-ofuri onyuŋ okop akwa idara eke erifen-nnɔ, mbɔk ediɔŋɔ ke utibe-ŋkpɔ emi ke adada ebet fi. Andinyaŋa akaka-iso edikot ete, “Etiene Mi.”
Ndisɔŋɔ mbuɔtidem nnyin ke Andinyaŋa nnyin, Jesus Christ, eyedibede udɔŋ ukpɔŋ mbufo ke edidiɔŋɔ Enye, nim Enye akpanikɔ, nyuŋ nyak esit mbufo nnɔ Enye. Enos okobup kabaŋa erifen-nnɔ esie ete, “Ɔbɔŋ, enam didie?” Jehovah ɔbɔrɔ ete, “Ke ntak mbuɔtidem fo ke Christ, emi afo akananam mukopke akpa unyuŋ ukwe.”
Ndien Moroni adian ete, “Edieke mbufo editrede idem mbufo ke ndinam kpukpru idiɔkŋkpɔ, nyuŋ mma Abasi ke ofuri ukeme, ekikere ye odudu mbufo, ke ntre mfɔn esie ɔyɔhɔ ɔnɔ mbufo.”
Ndikpɔŋ idiɔkŋkpɔ, ŋwɔŋɔre ntiene Abasi, ye ndisɔŋɔ mbuɔtidem mbufo ke Jesus Christ edi eti eritɔŋɔ. Ndisuhɔre-idenm nyak uduak nnyin nnɔ Abasi esine ndiyarare ikpɔ idiɔkŋkpɔ nnɔ bishop mme branch president fo, edi ɔyɔhɔ erifen-nnɔ eke mbufo oto Andinyaŋa. Erifen-nnɔ edi edisana enɔ emi otode ke mfɔn Jesus Christ.
Edi-nam akpanikɔ
Udɔŋ ke ndinehede mfiak ntiene Abasi asaŋa ye ubiere ke ndinam ɔyɔhɔ akpanikɔ ye Ete mbufo ke Enyɔŋ, ye idem fo, ye mbon emi afo ekeduede, ndien ye mme adausuŋ itie-oku fo. Ete fo ke Enyɔŋ adara ke ubiere fo nditiene Enye ke mbuŋɔ esit ye edinuaha spirit. Ndinyene edinuaha spirit edi ndisuhɔre-idem nyak idem fo nsin ke ubɔk Abasi; enyenede mbuŋɔ esit emi adade se Apostle Paul okowutde nte “mfuhɔ ido Abasi,” ntotuŋɔ udɔŋ eke ukpɔŋ ndifiak ntiene Enye ke ekɔm-urua se ekpededi.
Ndifiak-ndiɔŋ Ŋkpɔ Se Ikibiara
Udɔŋ mbufo anam mbufo eyom ndidiɔŋ se mbufo ekebiatde. Edi, ndifiɔk ubak ŋkpɔ iduhe ke odudu fo ndidiɔŋ, afo eyebɔŋ akam yak Jehovah, ke mfɔn Esie, eyeŋwam ɔkɔk mbon emi ekebɔde ubiak eto utip erinam mbufo.
Utip emi ikpɔ idiɔkŋkpɔ enyenede ke idem mbon efen esiwak ndibiak mbighe man edifre. Nte afo emetiene uwutŋkpɔ eke nditɔ irenowo Mosiah, emi eke “nehede esin ifik ndidiɔŋ kpukpru ukwaŋ-ŋkpɔ emi mmɔ ekenamde”? Etiŋ-ikɔ ye mbon emi mbufo ekponode kabaŋa se mbufo mikemeke ndikut.
Nte ami nnamde etop emi, ami ndibɔ iwiwa email kiet nto owo kiet emi odude ke usuŋ editua-mkpɔfiɔk onyuŋ oyomde ndifiak ndi Ufɔk Abasi. Akani ŋwan esie okosuk ɔbɔbɔ ufen oto edinana “nsinsi ndɔ [mmɔ], [nsɔŋɔ-ŋkpɔ ye nditɔ oro], unana ŋkpɔ okuk, … inehede [ikeme] ndiyɔ ye nte ŋkpɔ ɔsɔŋde, [ye] mme iduɔesit ekikere eke ediduɔ nduk ke abiaŋa.”
Enye edibuana ye ami nte adausuŋ itie-oku esie “okopde inemesit ndi [bup enye] ete ɔbɔŋ-akam ekere-abaŋa ŋkpɔ se [enye akpanamde awak ɔnɔ akani ŋwan esie ye nditɔ esie].” Ye unyime, ami nyekot ubak email esie:
“Ami ke [akpa ini] ŋkekere [okuk] oro ami ŋkesinde ke ŋwed ediwɔrɔ-ndɔ akawak ebe enɔ eti-esit, edi branch president mi edidɔhɔ mi ete nter-udia nyuŋ mbɔŋ-akam kabaŋa oro. …
“Ke ntɔŋɔ, ami mma nnyene mfina ye ekikere edifiak nam nyak-nnɔ. Koro mme idiɔkŋkpɔ mi ikidighe eke okuk, ami ndikere se ‘eti usiene’ enehede ɔwɔrɔ … [edi] ami ndisɔp ndiɔŋɔ ke oro ikidighe kabaŋa okuk.
“Mme adausuŋ itie-oku mi ediso-bo ye [akani ŋwan mi] ye nditɔ mi enyuŋ edikut ke mmɔ esuk ebɔ-bɔ ufen ndien ikopke inemesit. …
“Obufa uduak mi ekedi ndika iso ke mbuɔtidem. … Ami nehede ŋwut udɔŋ mi ke ndiŋwam nyomke ŋkpɔ ndomokiet. … Ami ndibiere ndinɔ [akpan ibat] ke ŋwed okuk kiet-kiet, emi ekedide akamba ubak ke ofuri okuk mi. Esisit ini mbemiso ndikpe akpa okuk, Jehovah [ ediduk esit mi ete ke ami nnyene] ndikpe [okuk oro ke itie iba].
“Ami ndikpep ke edifiak nyak-nnɔ inehekede idi kabaŋa okuk. Ke oro edi abaŋa ami edibiere nsuhɔre uwem mi mi Jehovah. … Okuk oro edi ndiŋwam ndiɔŋ ŋkpɔ eke ami ŋkɔbɔde nto ufɔkemana mi otode ke ndiɔi mbumek mi. Oro edi abaŋa ndinam nyuŋ nim mme eŋwɔŋɔ ke muyomke udori ye ndiŋwam enye okufina idem kabaŋa ŋkpɔ okuk man otodo enye ekeme ndiyom Spirit.”
Ukeme fo ke ndidiɔŋ se afo akabiatde ekeme ndidi idinyeneke ŋkpɔ ndinam ye okuk, edi nte afo osuhɔrede idem eneme ye Jehovah, afo emekeme edikut ke odu ediwak se afo ekemede ndinam.
Edisana Unyime ke Nsit-nsit
Nte afo oyomde mfen-nnɔ eke Abasi, yene ime ke nte afo ebetde ofuri unyime Esie. Kere-baŋa itie ŋwed Abasi emi:
“Mmɔ … [ema] esuhɔre idem mmɔ … kpa ke ntuŋɔ nsuhɔre-idem; ndien … ema eseme ke ɔkpɔsɔŋ enɔ Abasi; iŋ, kpa ke ofuri usen. … [Edi] Jehovah ikispke ndikop eseme mmɔ ke ntak mme ukwaŋ-ŋkpɔ mmɔ.”
“Edi Jehovah ama okop mme eseme mmɔ, ndien ɔtɔŋɔ … mbiomo mmɔ efere; … ndien … mmɔ etɔŋɔ ndiforo mkpri mkpri.”
Yene ime ke nte Jehovah ɔnɔde fi edidiɔŋ ye unyime Esie mkpri mkpri.
Ke ini Abasi, afo eyekop uyo Esie ɔdɔhɔde fi, “Kuyak ŋkpɔ emi afina fi aba.” Usen kiet, nte afo akade iso ndiwɔŋɔre ntiene Andinyaŋa, Ete Heaven fo eye “men ndudue osio ke [esit fo], oto ke mme edidot Eyen esie.”
Ɔbɔ-unan ye Ndutuhɔ
Eke mbufo emi ɔkɔbɔde unan oto ikpɔ ndiɔi-ŋkpɔ eke owo efen, ami nyom nditiŋ kabaŋa ima ye esit-mbɔm eke Andinyaŋa, ndɔŋesit ye emem Esie.
Mfuhɔ, iduɔesit, unana, ekikere uanan-ibifik abiaŋa emi afo okokopde, iduɔ uwem fo nte afo ekekerede nte oro edidide—ami mmɔnɔ fi ata nsɔŋɔnda mi ke, Andinyaŋa ɔdiɔŋɔ fi onyuŋ ama fi. Saŋa kpere Enye. Enye edi idɔŋesit ye ɔsɔŋɔ fo; Enye eyenɔ mme angel Esie man edimen fi ekama. Ewe ini ke ubiak fo edikure, ke ntuaŋa edisuhɔre, ke edifre mme editi-ŋkpɔ emi afo muyomke? Ami ndiɔŋɔke. Edi emi ke ami ndiɔŋɔ ke: Enye enyene odudu ndida anyanya nnɔ ibuot ntɔŋ eke ufen fo.
Ndima nditɔ-eka nnyin irenowo ye iban eke Grand Blanc, Michigan, ye ɔsɔŋɔ mbuɔtidem mmɔ ke Jesus Christ, ye uko ye ima mmɔ, ama edibɔ onyuŋ aduak, ke mme udua ye ɔfiɔŋ eke edidide, ndinehede mbɔ anana-udomo ima ye mfɔn eke Andinyaŋa.
Nte afo akade iso ndinim mbuɔtidem fo ke Enye, eyekabare mbukpɔŋ ekim ye nta-edet ntuaeyet mbufo ke okoneyo esin ke uduɔhɔ mmɔŋeyet idara ye emem ke uŋwana usenubɔk. “Eyekabare mfuhɔ mbufo esin ke idara. … Ndien owo ndomo [kiet] idibɔhɔ mbufo idara mbufo.” Ndaha ini oro eyedi. Ami ntiŋ ikɔ-ntiense ke ini oro eyedi.
Ekeme edikut ima Isop eke Jesus Christ ke ata mkpɔsɔŋ ndaha, edi kpukpru nnyin iminehede iyom isop mfɔn eke Andinyaŋa nnyin. President Dallin H. Oaks ekekpep ete: “Otode ke ifiɔk isop Esie ke uwem isɔŋ, Andinyaŋa nnyin enyene ukeme ndidɔŋ-esit, nyuŋ nsɔŋɔ kpukpru irenowo ye iban idem ke ofuri ebiet, edi ami mmenim ke Enye anama oro kpɔt ɔnɔ mbon emi eyomde Enye enyuŋ ebupde eyom uŋwam Esie. Apostle James ekpep ete, ‘Esuhɔre idem mbufo ke iso Jehovah, ndien Enye eyemenere mbufo ke enyɔŋ’ (James 4:10). Nnyin imidot ndibɔ eridiɔŋ oro ke ini nnyin inimede Enye ke akpanikɔ inyuŋ ibɔŋ-akam iyom uŋwam Esie.”
Elder Robert E. Wells
Ami mmebɔ unyime nto edima ufan ye emeritus General Authority Seventy mi, Elder Robert E. Wells, idahaemi edide isua 97, ndibuana ifiɔk-ukpep esie eke ebede isua Ata ke edem:
Kini oduŋde ke Paraguay ke 1960 ndien eda-ke-utom nte akwa banker, Robert Wells, idahaoro ekedide isau 32, ye ŋwan esie, Meryl, ekedi mme awat-ubom ofim ke nsio-nsio ubom-ofim iba, emi ewatde eto Uruguay eka Paraguay. Ke esobode ye akwa idiɔk-enyɔŋ, Robert ye Meryl ikikwe inyuŋ ikopke ito radio ye kiet eken. Robert ɔsɔsɔp awat edisim isɔŋ, emi enye okopde ke ubom-ofim eke ŋwan esie ama otop-obomo. Ndien ŋwan esie mme ufan iba emi ekewatde ye enye ikibɔhɔke. Nditɔ esie, edude ke ufɔk ke Asunción, ekedi mme isua itiaba, ition, ye iba.
Elder Wells amatiŋ abaŋa mfuhɔ esie ete:
“Ikɔ ke nsinsi idikemke ndiwut ubiak emi ɔkɔyɔhɔde ke esit idem mi, emende ekikere mi onyuŋ enimede mme ekikere mi. Ata ntuaeyet eke mfuhɔ inehede ikemeke editre ndiduɔhɔ. Ndinam ŋkpɔ enehede ɔdiɔk, nte ekikere mi odomode ndiyɔ ye ubiak mkpa ŋwan mi, ami ndikut idem mi nte nnyenede akwa ndudue ke ndikere ke ami ndi ntak ediduɔ-mbomo oro.”
Robert edibiom idemesie ikpe ke ndikitre edikenehede nduŋɔre ubom-ofim oro nse ye edikitre ndinɔ ŋwan esie nti item ŋkpɔ-utom ediwat ubɔm-ofim. Enye edikere ke imɔ inam ndudue eke unana ntiŋ-enyin.
Robert ete:
“Esit mi ama ebe oduk ŋkim enyin. … Ami ŋkoyuŋ ndodu—[ke ntak nditɔ oro,] ŋkpɔ efen iduhe.”
“Ami … mma nnana udɔŋ mi ndika iso.”
Ke ini akade iso, Robert ama edinyene ntotuŋɔ ifiɔk-ukpep eke spirit. Enye editiŋ ete:
“Mbubreyo kiet, ke isua ebede, kini ntɔŋɔde-edɔŋ mbɔŋ akam, utibe ŋkpɔ kiet ada-itie. Kini mbɔŋde akam nyuŋ namde mkpe-ubɔk nnɔ Ete Heaven mi, ami ndikop ebietde nte Andinyaŋa edidu ke nkaŋ mi ndien ami ŋkop uyo ɔwɔrɔ etiŋde mme ikɔ emi ɔnɔ ukpɔŋ ye utɔŋ mi ete: ‘Robert, uwa ufak mi ekpe isop ɔnɔ mme idiɔkŋkpɔ ye ndudue fo. Ŋwan fo efen ɔnɔ fi. Mme ufan efen enɔ fi. Ami nyedibede mbiomo fo. …’
“Tɔŋɔde ke ini oro, ema enehede emen mbiomo ndudue [ye unana-idorenyin] ekpɔŋ mi. Ema efak mi esio! Ami … ndisɔsɔp mfiɔk ɔyɔhɔ odudu eke Erisio-isop Andinyaŋa ndien ke oro ekenehede abaŋa mi. … Ami … mmokut uŋwana ye idara emi akananam ami mfiɔk-ke akpa. … Ema edinɔ mi enɔ eke ami mikidotke ndibɔ—enɔ mfɔn eke Abasi. … Ami ŋkidotke ndibɔ enɔ oro—Ami nnamke ŋkpɔ ndomokiet ndot ndibɔ enɔ oro, edi Enye osuk ayayak enɔ oro ɔnɔ mi.”
Nditɔ-eka irenowo ye iban, yak nnyin owo kiet-kiet ibɔ “erinam-asana ke Christ ke mfɔn Abasi, otode nduɔk-iyip Christ, … [ndikabare] nsana, nnana ndo.”
Ami ntiŋ ikɔ-ntiense kabaŋa ima, mbɔm ye mfɔn eke Andinyaŋa ye Andifak nnyin. Enye odu uwem. Nnyin idi eke Esie; nnyin idi nditɔ ediomi. Nte nnyin inimde Enye ke akpanikɔ, itiene Enye, inyuŋ ibuɔt-idem ke Enye, Enye eyedide nnyin osio ke mme mfuhɔ ye idiɔkŋkpɔ nnyin. Ekem, ke ebede uwem isɔŋ emi, ke ufɔk Ete nnyin, nnyin iyeduŋ ye Enye ke nsinsi ye nsinsi. Ke enyiŋ Jesus Christ, amen.