Mmɔ Edi mme Ebiere Ikpe eke Idem Mmɔ

Ofuri-ofuri ntak eke uduak Ete edi ndinɔ nditɔ esie eke spirit nti-ifet ndibɔ ikpɔkidem, ndikpep “eti mkpɔŋ idiɔk” otode ke ifiɔk-ukpep eke uwem isɔŋ, ŋkɔri ke spirit, nyuŋ nnyene ŋkɔri ke nsinsi.

Se Doctrine ye Covenants owut nte “unen edimek” edi akpan-ŋkpɔ ke uduak Abasi ndinam uwem unana-mkpa ye nsinsi uwem nnɔ nditɔ irenowo ye iban Esie. Ewut akpan ukpep emi ŋko ke ŋwed Abasi nte unen-edimek ye unen ndimek nyuŋ nam ŋkpɔ.

Ikɔ oro “unen edimek” edi ikɔ item. Mme ikɔ efen nnɔ ikɔ oro “eti” esine “ɔfɔn,” “akpanikɔ,” ye “edisana.” Mme ikɔ efen nnɔ ikɔ oro “edimek” esine “erinam,” “enyene-uwem,” ye “utom.” Ke ntre, ekeme edidiɔŋɔ “eti edimek” nte ukeme ye ufaŋ ndimek nyuŋ nam ŋkpɔ nnɔ idem fo ke mme usuŋ emi ɔfɔnde, akpanikɔ, edisana, ye eyede.

Mme ŋkpɔ se Abasi obotde esine mbiba “mme ŋkpɔ ndinam ye mme ŋkpɔ emi edinamde idori do.” Ndien eti edimek edi edisana “odudu eke edinam ŋkpɔ ke idem ikpɔŋ” emi ekenimde emi ɔnɔde nnyin odudu nte nditɔ Abasi ndikabare ndi asaŋa-utom ndinam ŋkpɔ ndien idige ŋkpɔ emi enamde-enam ŋkpɔ edori.

Ekebot isɔŋ nte ebiet emi nditɔ ekemede edidomo nditɔ eke Ete Heaven nse mme mmɔ eye “nam kpukpru ŋkpɔ ekededi emi Jehovah Abasi mmɔ editemede mmɔ.” Akpan ntak eke Edibot ye nnyin edidu ke isɔŋ edi ndinɔ nnyin ufaŋ ndinam ŋkpɔ nyuŋ ŋkabare ndi se Jehovah oyomde nnyin ete ikabarede idi.

Jehovah eketeme Enoch ete:

“Sese nditɔ-ete fo emi; mmɔ edi ŋkpɔ-utom eke ubɔk mi, ndien Ami mma nnɔ mmɔ ifiɔk mmɔ, ke usen eke Ami ŋkobotde mmɔ; ndien ke Iŋwaŋ Eden, ke Ami ŋkɔnɔ owo unen mbumek esie;

“Ndien kabaŋa nditɔ-ete fo emi ke Ami ŋketiŋ, ndien ŋko ŋkɔnɔ mbet, man mmɔ ekpema kiet eken, ndien man mmɔ ekpemek mi, Ete mmɔ.”

Mme akpan ufɔn ke ndinam mbumek edi ndima kiet eken nyuŋ mmek Abasi. Ndien mme ufɔn mbiba emi enehede adiana ye akpa ye udiana ikpɔ ibet eke edima Abasi ke ofuri esit, ukpɔŋ, ye ekikere nnyin, ye edima mbɔhiduŋ nnyin nte idem nnyin.

Kere-baŋa ke ekewuk nnyin—idige edidɔdɔŋ mme editeteme edi ediwuk—ndida mbumek nnyin man ima kiet eken inyuŋ imek Abasi. Yak ami nnɔ ekikere ete ke ŋwed Abasi, ubak edikpuhɔ ikɔ oro “eti” inehede idi ikɔ emi ɔdiɔŋde edi ndusuk ŋko edi edisana item kabaŋa nte ikpkamade unen edimek nnyin.

Enɔ ikwɔ kiet emi ifiɔkde ibuot-ikɔ “Emek Se Inende” ke ntak oro. Abasi ikinɔhɔ unen edimek ndinam ŋkpɔ ekededi emi nnyin iyomde ndinam. Edi, nte asaŋade ye uduak Ete, nnyin ikibɔ eti edimek ndida nyom nyuŋ nam ŋkpɔ nte asaŋade ye nsinsi akpanikɔ. Nte “mme asaŋa-utom nnɔ [idem nnyin],” ana nnyin isɔŋɔ ke ndinam nti ŋkpɔ, “inam ediwak ŋkpɔ ke odudu idem [nnyin], inyuŋ ida ediwak edinen-ido idi.”

Ewut nsinsi ufɔn eke eti edimek ke mbuk ŋwed Abasi eke esop premortal. Lucifer ɔkɔsɔŋ ibuot ye uduak emi Ete enyenede ɔnɔ nditɔ Esie ndien okoyom ndibiat odudu erinam ŋkpɔ ke idem owo. Ke akpanikɔ, emiom eke andidiɔk ekenehede ese ukpepŋkpɔ eke eti edimek.

Abasi anam-aŋwaŋa ete, “Ke ntre, koro … Satan ɔkɔŋsɔŋde ibuot ye ami, onyuŋ oyomde ndibiat unen mbumek eke owo, … Ami ndidɔhɔ ete ebin enye esio eduɔk ke isɔŋ.”

Idiɔk mbufiɔk uduak uduak eke andidiɔk ekedi ndiwama mbɔ nditɔ Abasi ukeme ndikabare ndi “mme asaŋa-utom nnɔ idem mmɔ” emi ekemede erinam-ŋkpɔ ke edinen ido. Udɔŋ esie ekedi ndinam nditɔ eke Ete Heaven edi ŋkpɔ-utom emi ekemede ndinanam ŋkpɔ ndori ke idem kpɔt.

President DallinH. Oaks ama eyire-etiŋ ke ikɔ-Abasi Jesus Christ okot nnyin ete idiɔŋɔ ŋkpɔ inyuŋ ikabare iwɔrɔ ŋkpɔ mbiba oto ke edinene erinam eke eti edimek. Enye ete:

“Ediwak Bible ye ŋwed Abasi eke ini emi etiŋ abaŋa akpatre ubiere ikpe emi kpukpru owo edibɔde utip etienede mme erinam mme utom mme udɔŋ eke esit mmɔ. Edi mme ŋwed Abasi eken etiŋ okpon kabaŋa emi ke ndiwut edibiere ikpe nnɔ nnyin otode ke ndaha emi nnyin ikinyenede.

“Prophet Nephi ediwut Akpatre Ubiere Ikpe ke mme ndaha eke ŋkpɔ emi nnyin ikidide: ‘Ndien edieke mme utom mmɔ ekedide ndek ana nte mmɔ edi ndedehe; ndien edieke mmɔ edide ndedehe ana edi nte ke mmɔ ikemeke ndidu ke obio-ubɔŋ Abasi’ [1 Nephi 15:33edian ŋkpɔ]. Moroni ofiori ete, ‘Owo eke edide ndedehe eyesuk ededehe ŋko; ndien owo eke edide edinen eyesuk enene ŋko’ [Mormon 9:14emphasis added].”

President Oaks aka-iso ete: “Otode mme ukpep-ŋkpɔ ntem nnyin ibiere ite ke Akpatre Ubiere Ikpe idihe ubiere ikɔ kabaŋa ofuri ibat eti ye ndiɔi erinam—emi nnyin iki namde. Enye edi ndifiɔk akpatre utom eke mme erinam ye ekikere nnyin—se nnyin ikabare-idi.”

Mme utom ye udɔŋ nnyin ikpɔŋ idinamke inyuŋ ikemeke ndinyaŋa nnyin. “Ke ima inam kpukpru se nnyin ikemede ndinam,” edi-kpe emem ye Abasi kpɔt oto ke mbɔm ye mfɔn emi odude oto anana-utit ye nsinsi uwa ufak eke Andinyaŋa.

Alma ofiori ete, “Etɔŋɔ ndibuɔt idem ke Eyen Abasi, ete ke enye eyedifak ikɔt esie, ete ke enye eyekut ndutuhɔ onyuŋ akpa man afak mme idiɔkŋkpɔ mmɔ; ete ke enye eyefiak eset ke mkpa, emi edinamde eriset ke mkpa etibe, ete ke kpukpru owo eyeda ke iso esie, man ebiere ikpe ke akpatre ye ke usen ubiere ikpe, nte mme utom mmɔ edide.”

Nnyin iminim ke otode Erisio-isop Christ, ofuri ubonowo ekeme ndibɔ erinyaŋa, otode ke erikop mme item mbet ye mme erinam Ikɔ-Abasi.” Nnyin iminɔ ekɔm koro mme idiɔkŋkpɔ ye ndiɔi erinam nnyin ididaha nte ikɔ ntiense kabaŋa nnyin edieke nnyin inehede “imana obufa,” inyene mbuɔtidem ke Andifak, ikabare esit ke “esit akpanikɔ” ye “eti udɔŋ,” inyuŋ “iyɔ isim utit.”

Ediwak nnyin imikeme ndikere ke nnyin ndida ke iso itie Nsinsi Ekpe-ikpe edidi ukem nte ŋkaiso eke esop mbet eke ererimbot. Ekpe-ikpe kiet eyetie ibuot. Eyewut idiɔŋɔ ntiense. Eyenɔ ubiere-ikpe. Ndien nnyin idinyeneke idorenyin ndien inyene ndik tutu nnyin idikop akpatre ibɔrɔ. Edi ami mmenim ke oruk ido erinam oro inenke.

Okpuhɔde ɔkpɔŋ edi enyene ebuana ye mme ndik eke uwem isɔŋ emi nnyin isiwakde ndinyene edi se ŋwed Abasi owutde nte “mbak Abasi” mme “eke edibak Jehovah.” Ibietke ndik eke ererimbot emi anamde uyom ye nnyekidem, mbak Abasi adada emem, ɔsɔŋɔ, ye uko esin ke uwem nnyin.

Edinen ndik ɔyɔhɔ ye ekikere uteŋe ye nyɔ ɔnɔ Ɔbɔŋ Jesus Christ, ndinim ibet Esie, edoride enyin ke Akpatre Ubiere Ikpe, ye ndibɔ edinen utip ke ubɔk Esie. Mbak Abasi ɔkɔri oto ke nnen-nnen edidiɔŋɔ edisana uduot ye iso-utom eke Andifak, uduak ndiyak uduak nnyin nsin ke uduak Esie, ye ndifiɔk ke ofuri irenowo ye iban eyenam ibat kabaŋa mme udɔŋ, ekikere, ikɔ, ye erinam mmɔ ke Usen Ubiere Ikpe.

Ndibak Abasi idihe mmeŋe-mmeŋe edimum kabaŋa ndidi ke iso Esie man edikpe ikpe nnyin. Edi, oro edi ekikere eke akpatre edinyene ifiɔk kabaŋa idem nnyin ke nte mme ŋkpɔ enehede edi ye “nte mmɔ edinehede idi.”

Eyeda ofuri owo emi ekedude uwem, emi edude ke uwem idahaemi, ye emi edidude uwem ke isɔŋ “edibono ke iso itie-ikpe Abasi, man enye ekpe ikpe nte etienede utom [mmɔ] mme utom oro edi nti mme mme mmɔ edi ndiɔi.”

Edieke mme udɔŋ nnyin ekedide ɔnɔ ndinen ido ndien mme utom nnyin ɔfɔn—ɔwɔrɔde ke nnyin ima inyene mbuɔtidem ke Jesus Christ, inam inyuŋ inim ediomi ye Abasi, inyuŋ ikabare esit ke mme idiɔkŋkpɔ nnyin—edikem itie ikpe eyenem. Nte Enos eketiŋde ke, nnyin iye “da kiso [Andifak]; do ke [nnyin] idikut iso esie ye inemesit.” Ndien ke akpatre usen eye “nɔ nnyin utip-enɔ eke edinen ido.”

Ke ndaha efen, edieke mme udɔŋ nnyin ekedide ndiɔi ndien mme utom nnyin ɔdiɔk, do ke itie ikpe edidi ŋkpɔ ndik. Nnyin iyenyene “ɔyɔhɔ ifiɔk,” “inehede iti,” ye “enyene-uwem ifiɔk kabaŋa ndudue [nnyin].” “Nnyin idikemeke ndise Abasi; ndien nnyin iyedat esit edieke nnyin idikemede ndinɔ mme itat ye mme obot uyo ete eduɔ efuk nnyin man edip nnyin ke iso esie.” Ndien ke akpatre usen nnyin “iyebɔ utip idiɔk ido [nnyin].”

Ke akpatre, ndien, nnyin idi mme ebiere ikpe idem nnyin. Iduhe owo ndomokiet emi editemede nnyin ebiet emi nnyin idikade. Ke iso Abasi, nnyin iyefiɔk se nnyin ikemekde ndikabare ndi ke uwem isɔŋ inyuŋ idiɔŋɔ inɔ idem nnyin ebiet emi nnyin ikpidude ke nsinsi.

Ndifiɔk ete ke Akpatre Ubiere Ikpe ekeme ndidi inem idihe edidiɔŋ emi ekenimde kpɔt enɔ Moroni.

Alma ama owut mme edidiɔŋ emi ekeŋwɔŋɔde enɔ ofuri mme esinifik mbet Andinyaŋa. Enye odoho ete:

“Se ikɔ oro edifiak-mmen-ndi ɔwɔrɔde edi ndifiak mmen idiɔk nnɔ idiɔk, mme obukidem nnɔ obukidem, mme eke-diɔk nnɔ eke-idiɔk—eti nnɔ eke edide eti; edinen nnɔ eke edide edinen; nnen-nnen nnɔ eke edide nnen-nnen; mbɔm nnɔ eke edide mbɔm.

“… Ena se inende, ekpe edine ikpe, enyuŋ enam nti ŋkpɔ eka iso; ndien edieke mbufo enamde kpukpri emi ekem mbufo eyebɔ utip mbufo; iŋ, eyefiak enyene mbɔm enɔ mbufo; eyefiak enɔ mbufo eti utip-ikpe; eyefiak enɔ mbufo edinen ubiere ikpe; ndien eyefiak enɔ mbufo nti utip.”

Ami mmedara nnɔ ikɔ ntiense ke Jesus Christ edi odu-uwem Andinyaŋa nnyin. Eŋwɔŋɔ Alma edi akpanikɔ onyuŋ odu ɔnɔ afo ye ami—mfin emi, mkpɔŋ, ye ke ofuri nsinsi. Ami nehede ntiŋ ikɔ ntiense emi ke nsasana enyiŋ Jesus Christ, amen.