Osukidem Ukpɔŋ Etɔŋɔ-edɔŋ ke Altar
Nte nnyin inamde inyuŋ ikponode ediomi nnyin, nnyin imadian idem nnyin ye Andinyaŋa, inyene akwa unen ndibɔ mbɔm Esie, ukpeme, edinam-asana, erikɔk, ye nduɔk-odudu,
Esɔsɔŋɔ, nkaikwɔ , kabaŋa ikɔ ntiense mbufo otode ke obufa ikwɔ oro.
Obufa ikwɔ udua-Ɔbɔŋ “Uyo uwem, Odu-uwem Mmɔŋ” ɔmɔyɔhɔ ukpɔŋ mi. Udim kiet ke ikwɔ oro ete, “Idahaemi ami mmedi ke altar, ndinɔ Enye mbuŋɔ esit mi.”
Ifiɔk mi kabaŋa mme ikɔ oro ama otuŋɔ ekpri ini ekuk nnyin ema ekekpɔŋ Newsbbury Park, Califonia, eka ndinam utom ke Utah Ogden Mission ke 2015. Mma mbɔ ŋwed ikoot ndisaŋa nse Hill Air Force Base ekperede Layton, Utah. Akananam nduhe ke itie-utom mbon ekɔŋ, nnyuŋ ŋkwe ɔkwɔrɔ-ikɔ mbon ekɔŋ mme irenowo ye iban emi enamde utom ndinɔ obio mmɔ ukpeme.
Chaplain Harp, nte ediwak mme ɔnɔ uŋwam-mfɔn ye mme ɔkwɔrɔ-ikɔ ke ufɔk- mkpɔkɔbi, ufɔkibɔk, ye ebiet mbon ekɔŋ nnyin ke ofuri ererimbot, ama ɔnɔ mi udɔŋ ye inemesit. Utit isaŋ nnyin ke okure ekɔŋ oro ekedi edisana ebiet. Ami mma mbup ɔkwɔrɔ-ikɔ mme enye anam ŋkpɔ ɔnɔ kpukpru owo eyomde nditie ŋkere-ŋkpɔ, ndibɔŋ-akam, ndikere ke spirit, ye ndituak-ibuot. Enye ama asaŋa aka iso ibibene chapel oro onyuŋ okosio cross ke edem ikpehe. Enye onyuŋ ɔdɔhɔ ke imɔ isikama cross oro ke esop mme Protestant ye Catholics. Mma mbup enye mme enye esida nso anam ɔnɔ nditɔ-eka nnyn irenowo ye iban Jews, ndien enye edika ŋkaŋ efen ke ibibene iso oro ndien enye oduri Nta-nta-ɔfiɔŋ David osio.
Ndien mma mbup,“Nso ke afo anam ɔnɔ mme anam utom Latter-day Saints?” Enye ama onuk mme idiɔŋɔ oro osioŋo onyuŋ anyan ubɔk ke akamba itie-uwa eke eto emi odude ke ufɔt edisana-ebiet. Enye ama ɔdɔhɔ ke mbon Ufɔk Abasi Jesus Christ Mme Ndisana Owo ke Ukperedem usen etim enyuŋ ediɔŋ bread ye mmɔŋ ke enyɔŋ itie-uwa. Mma mbup mme esimen akamba itie-oku etiede nte ɔwuhɔ ɔtɔ-kiet do efep mbemiso esop nditɔ-eka iren ye iban mbon Jew, Cathilic, Protestant. Enye ete ke itie-uwa oro ada itie kiet, koro ediwak ido ukpono oro etiene eda itie-uwa oro enam ŋkpɔ ke mme usuŋ efen.
Abraham ama ɔbɔp itie-uwa, ɔbɔp Isaac odori, onyuŋ ebeŋeidem ndiwa ŋkukure eyeneren esie, edi ema etre enye, nte Jehovah ɔkɔdɔhɔde, “Se Ami mi”! Ika-faŋ ke Akwa Ami Ndudu mme kiet ke otu mme prophet Esie ekedɔhɔ ete, “Se ami mi”?
Ke ini Edikwɔrɔ-ikɔ Esie ke Enyɔŋ-obot, Andinyaŋa ama ɔdɔhɔ nnyin inam emem ye nditɔ-eka iren ye iban mbemiso nnyin idika itie-uwa. Paul ama ekpep ete ke enam nnyin “isana” ke itie-uwa oto ke Erisio-isop Jesus Christ.
Prophet Lehi “ɔkpɔŋ ufɔk esie … ye mme ndiye ŋkpɔ esie. … [Ekekem] enye ama ɔbɔp itie-uwa … onyuŋ ɔfɔp uwa … , onyuŋ ɔkɔm Abasi.“
Bible ye Ŋwed Mormon ekpep nnyin ndikpono Jesus Christ ke mme itie-uwa. Ke ewe ntak?
Akpa ete ye eka nnyin, Adam ye Eve ema ebɔp enyuŋ etuak-ibuot ke itie-uwa. Ke ema ekebin mmɔ esioŋo ke Inwaŋ Eden, ndien ekenyuŋ etuak-ibuot ke “ediwak usen,” angel ama edise onyuŋ ebup ɔkpɔsɔŋ mbume emi ekemede ndibup owo nnyin kiet-kiet: “Ntak emi mbufo efɔpde uwa enɔ Abasi?”
Adam ama ɔbɔrɔ, “Ami ndiɔŋɔke.”
Ibɔrɔ angel ɔkɔnɔde ke suŋ-suŋ ibɔrɔ unyime Adam ekedi ŋkpɔ mkpaidem, “Emi edi ke mbiet uwa Ikpɔŋ-ikpɔŋ Eyen emi Ete Obonde. Ke ntre mbufo eyenam kpukpru se edinamde ke enyiŋ Eyen, mbufo eyetua-mkpɔfiɔk enyuŋ ekot Abasi ke enyiŋ Eyen ke nsinsi.”
Okpokoro udia-ɔbɔŋ ye mme itie-uwa ke temple ada ɔnɔ nwaidem Jesus Christ ye anana-mbiet Usio-isop Esie.
Nte nnyin inamde inyuŋ ikponode ediomi nnyin, ibɔde edinam udia-ɔbɔŋ ke ufɔk Abasi ye endowment ye edidian-kiet ke temple, nnyin imadian idem nnyin ye Andinyaŋa, inyene akwa unen ndibɔ mbɔm Esie, ukpeme, edinam-asana, erikɔk, ye nduɔk-odudu,
Mbɔm ye Ukpeme Oto mme Ediomi
Nte ekpri eren isua 15, ŋkebupde ete mi mme ami mmekeme nditre ndika esop udia-ɔbɔŋ—ke Sunday kiet kpɔt ke January man ŋka saŋa-saŋa mbre ball mbon America. Enye ɔkɔdɔhɔ ke ami mmokpon ŋkem ndimek ŋkpɔ nnɔ idem mi edi ɔdɔhɔ mi ŋkere mbaŋa ikɔ-item kiet. Enye ɔkɔdɔhɔ, “Edieke afo emekde nditaba udia-ɔbɔŋ ini kiet, eyenehede emem ndimek nditaba ini efen.”
Edieke Andinyaŋa edide akwa andida-ndian, ɔwɔrɔ andidiɔk edi andisuan. Enye, Satan odomo nnyin man adiaŋade nnyin ɔkpɔŋ ndisana ebiet ntuak-ibuot nnyin, ye ukpeme Jesus Christ. Ini emi nnyin ituakde-ibuot inɔ AndinyaɔWa, nnyin imebɔ “odudu ndiŋwana ye udim mfina eke ererimbot.” Nnyin ima ibiat ini ke nneme ye Enye, nnyin imenyene eŋwɔŋɔ ke iyenyene “erinyaŋa iwɔrɔ ke ubɔk Satan.” “Ndien, nte nnyin inimde mme ediomi nnyin, Enye ɔdiɔŋ nnyin ye Ekesie ɔkpɔsɔŋ odudu.” Oh, didie ke mma ifiɔk ndinyene nneme ye Andinyaŋa oto ediomi enamde ke ndisana itie-uwa.
Ndibɔp ifiɔk abaŋade nsinsi Erisio-isop Andinyaŋa udim ke udim, ifiɔk ke ifiɔk ɔnɔ editibe spirit emi akpande ŋkari andidiɔk. Ekpri Elder Jaggi ke Mexico, Zuster Jaggi ke Belgium, ye mme missionary eken ke ofuri ererimbot eyekut mme ufan mmɔ nte ebɔde edidiɔŋ uduɔk-mmɔŋ ye enɔ edisana spirit edieke mme ufan mmɔ edukde esop udia-ɔbɔŋ ke akpa urua emi ekutde mmɔ.
Akparawa kiet ke Tonga mme Somoa eyewak ndinam sealing ke ufɔk Ɔbɔŋ edieke mmɔ ekebeŋede-idem ebet enyuŋ ebɔ endowement mmɔ ibihike nte mmɔ ekekure akamba ufɔkŋwed. Ke endowement, ekpeb owo ndinam, ndikop, ye ndinim ibet ition emi enɔde uwem mmɔ odudu ye ukpeme Nte nnyin inamde ediomi ye Jehovah, eda ebuana emi osiode usiene edi. Nnyin iyewut nte nnyin ikopde item inyuŋ ima Enye. Nsɔŋɔ nnyin ye odudu eyekɔri ye enwɔŋɔ kiet-kiet inamde inyuŋ inimde.
Ndikere-mbaŋa ye Ndinam-asana
Ima isuhɔre-idem inyuŋ itɔŋɔ-edɔŋ ke itie-uwa Jehovah, emi edi ufaŋ ndikere-mbaŋa, “ise ntaŋ-idem odude [nnyin] esit, … [isuhɔre idem-nnyin] ke iso Abasi.” Mbemiso nsaaŋa ye mme ufan mi ŋwɔrɔ nte akparawa, eka mi ediwak ini eyedɔhɔ, “Ti owo emi afo edide, ndien fiak duŋɔre ama edisim ufɔk.” Ndusuk okoneyo mmesitaba edifiak-nse mi koro nkedisim ufɔk ke idiɔk ini. Mmatua ŋkpɔfiɔk ke nditaba mme akpan ini oro ye eka mi.
Mfin ami nyom ndise ebuana ye Ete ke Heaven. Ke ndaha ukpono mi ke usen ke usen ntɔŋɔ edɔŋ ndibɔŋ akam, ke ntiede mkpere mbri mi mme mbohode ye ekpuk mi, nsikut idem mi ɔtɔŋɔde edɔŋ ke itie-uwa, ŋkerede mbaŋa nnyuŋ nsede uwem mi. Ami mmekere mbaŋa udia-ɔbɔŋ, ofuri mbio uyo, ekebuŋde enyuŋ ewai enɔ nnyin, kpukpru edi idiɔŋɔ mbomo ikpɔk-idem Andinyaŋa nnyin. Ami meti se President Dallin H. Oaks ekekpepde ette, “Ibio bread kiet edi saŋa-saŋa, kpasuk nte mme owo emi ediade enye edide saŋa-saŋa.” Mma ntɔŋɔ edɔŋ ndibɔŋ akam, mmekere nte ami ndikemede ndinɔ Abasi uduak mi.
Elder David A. Bednar ekekpep ete “Ewuhɔ udia-ɔbɔŋ edi edisana ye edifiak ŋkot ikot ete editua-ŋkpɔfiɔk ke akpanikɔ enyuŋ ekabade edi obufa ke spirit. Edinam ndibuana eke udia-ɔbɔŋ, ke esit ye ke idem esie, ifenke ndudue. Edi nte nnyin ibeŋede-idem ke akpanikɔ inyuŋ ibuanade ke edisana ewuhɔ emi ye mbuɔŋɔ esit ye, spirit onyuŋ anuahade, ndien enwɔŋɔ edi ke nnyin kpukpru ini imekeme ndinyene Spirit Jehovah edidu ye nnyin. Ndien ke odudu ndinam-asana Edisana Spirit nte ada-nsaŋa nnyin kpukpru ini, nnyin imekeme kpukpru ini ndinyene edifen nnɔ ke ndudue nnyin.”
Ini eke Amy ye ami inehede ise ifiɔk nnyin ke uwem, nnyin imadara enɔ mfɔn-ma ima ye nwaidem Jesus Christ. Imokut ŋko nte etatde afai eke hell eyak. Nnyin idikeme didie ikan ndik ubiere-ikpe, nnyekidem, ndobo, cancer, diabetes, utɔk eke ŋkpɔ-ofim, ubiat-enyiŋ, ubuŋ idibi, ye edinana eyen, eyeneka eren, ye ete? Koro Jesus ama ɔŋwɔŋ cup nnyekidem, cup afai—ɔnɔ mi, ɔnɔ ufɔkemana mi, ɔnɔ kpukpru nnyin!
Gethsemane, otode Adam Abram, unyime eke altusfineart.com © 2025
“Ndot-ndot cup” Enye ama ɔŋwɔŋ ke Inwaŋ Gethsemane ndien ukut Esie “okpon” ke cross ke Calvary eyak nnyin ibon mme mkpɔsɔŋ, emiom, afai, iyatesit, ye nnyekidem eke enyɔŋ itie-uwa Jehovah inyuŋ “isana ke ndibɔ Edisana Spirit, kpukpru ini.”
Sister Patricia Holland ete, “Ntɔtuŋɔ akam mbɔŋde nnɔ fi ye idem-mi edi ke nnyin iyekpɔŋ inɔ kpukpru, inim idem-nnyin ke ite-uwa enwɔŋɔ Abasi ye emem, ebiet eke ikpidodu mme se ikpinanam.”
Ebiet Erikɔk ye Nduɔk-odudu
Ke ini nnyin idide itie-uwa, idihe ndikibɔ enɔ; nnyin ika ndikpep mbaŋa Andinɔ Enɔ. Ke ukpep-ŋkpɔ oro ye ndibɔp ediomi ke ikut erikɔk. Nephi ete, “Enye ɔmɔyɔhɔ mi ye ima Esie, tutu ekesim ndisobo ikpɔkidem mi.” Ndien edima Andinyaŋa nnyin okot, “Nte mbufo idifiak-ke edem idahaemi itiene mi, ndien etua-mkpɔfiɔk ke mme idiɔk ŋkpɔ mbufo, enyuŋ ekabare-esit, man ami mkpɔkɔk mbufo?”
Ke ini mkpon nkan nditɔ iban nnyin iba, Mackenzie ye Emma, ekedide mkpri, kiet ke otu ndinem mbuk ekedi The Chronicles of Narnia: The Lion, the Witch and the Wardrobe. Kpukpru nnyin ima ima ekpe, Aslan. Kiet ke otu okoneyo inehede iti ikokotde ŋwed oro ekedi ini akwa ekpe ɔkɔnɔde uwem esie ke ibuot Edmund. Nkpɔ editi koro mme ete ye nditɔ-iban ema etuaŋa nte Ifɔt ekedade uwem ekpe oro ke enyɔŋ Okpokoro Itiat. Nkpɔ editi koro idorenyin ama osuk odu, okposuk idiɔk ŋkpɔ-ntibe oro, tutu eti-ŋkpɔ etibe. Uyom idara ama ɔyɔhɔ ekpri ubet oro ke ini ekenamde Aslan eset, okonyuŋ ɔdɔhɔde, “Edieke Ifɔt ɔkpɔdiɔŋɔde se inehede idi nwaidem, … enye akpana ɔdiɔŋɔ ke edieke owo emi enyimede ndibɔ ufen ke ini enye minamke idiɔk ŋkpɔ akpade ke ibuot andinam idiɔk, Okpokoro Itiat oro eyesibe, ndien Mkpa ke idem esie eyefiak edem.”
Jesus Christ ɔkɔk kpukpru udɔŋɔ. Jesus Christ anam nnyin ikeme ndifiak ndu uwem.
Ke ikɔ esie ke akwa mbono Ɔfiɔŋ Duop ke 2022, President Russell M. Nelson ama etiŋ abaŋa mme aka-isaŋ emi ekedide ediberede temple. Ekpri eyeneren ama odu do. President Nelson ekepeb ete:
“Ke ini mme aka-isaŋ oro ekedukde ubet endowment, akparawa oro ama anyan ubɔk ke itie-uwa, emi mme owo etɔŋɔde edɔŋ ndinam ediomi ye Abasi, onyuŋ ɔdɔhɔ, ‘Oh, oro eye. Ebiet edi emi mme owo ndiduɔk odudu ke isaŋ temple mmɔ.’
“… Etie nte enye ikifiɔkke ibaŋa nnen-nnen ebuana odude ke ufɔt ndinam ediomi ye Abasi ke temple ye akwa eŋwɔŋɔ Andinyaŋa:
“‘Etiene mi, kpukpru mbufo emi ekpade mba enyuŋ ebiomde edidobi mbiomo, ndien Ami nyenɔ mbufo nduɔk odudu
“‘Emen ɔkpɔnɔ mi ekɔŋɔ ke itɔŋ mbufo, enyuŋ ekpebe mi; … ndien mbufo eyekut nduɔk odudu enɔ ukpɔŋ mbufo.
“‘Koro okpono mi ememem, mbiomo mi onyuŋ efefere.’ [Matthew 11:28–30; edianded ɔsɔŋɔ].”
“Eyen owo inyeneke ɔtɔ eke odoride ibuot Esie,” edi Enye okot mme mbet Esie edi okpokoro udia-ɔbɔŋ ediduɔk odudu ye Enye do. Ke ini “osukidem ukpɔŋ etɔŋɔde-edɔŋ ke itie-uwa,” emem eyodu. Ubɔk Andinyaŋa nnyin atara: onyuŋ ebri okpokoro Esie Di dituak-ibuot nnɔ Eyen Abasi ke ndisana itie-uwa Esie. Ke enyiŋ Jesus Christ, amen.