Edi Jehovah Ese Esit
Kpukpru se Abasi oyomde ndida nam uduak Esie nnyuŋ nwam nnyin ndidi owo emi Enye oyomde edi nnyin kpukpru ndiyak esit nnyin kpukpru nnɔ Enye.
Ke ini ekedɔhɔde ete ekemek obufa edidem ke Israel ke otu nditɔ iren Jesse, prophet Samuel, nte ekesede akpan Jesse, Eliab, ɔdɔhɔ, ke idaraesit ete, “Ke akpanikɔ enye emi Jehovah ediyetde aran odu enye ke iso.” Edi Eliab ikidihe isuŋ-utom Jehovah ekemekde. Andinyaŋa ama asian Samuel: “Kuse enye iso, kunyuŋ use nte enye ɔkɔŋde; koro Ami mmesin enye: koro Jehovah iehe nte owo esede; koro owo esede ke enyin owo, edi Jehovah ese esit.”
Ke ini David mme ikidihe andikop odudu nkan mme enyenede ifiɔk-usɔ akan ke otu nditɔ eka esie,, esit esie ama ɔsɔŋ ke iso Abasi Enye ama ama Abasi ke ofuri esit esie onyuŋ enyene ntɔtuŋɔ udɔŋ ndikop item Esie. Enye ama enyene ɔkpɔsɔŋ mbuɔtidem ke ima Abasi, odudu, ye edidiɔŋ ekenwɔŋɔde, nte enye okosiode owut ke inii aknwanade ekɔŋ ye uko onyuŋ akan Goliath oto ke odudu Abasi.
Mbuk emi ekpep nnyin ette ke kpukpru se Abasi oyomde ndida nam uduak Esie nnyuŋ nwam nnyin ndidi owo Enye oyomde nnyin idi edi nnyin kpukpru ndiyak esit nnyin kpukpru nnɔ Enye. Etiŋde ɔnɔ ekpe-mbet, Enye ɔnɔ ewuhɔ, “Mbufo enyene ndima Jehovah Abasi mbufo ke ofuri esit mbufo ŋkpo.” Ke Prophet Joseph Smith, Enye ete, “Sese, Jehovah oyom esit ye ekikere eke onyimede.” Kabaŋa mbon Nephi, Andinyaŋa emi ekesetde ɔnɔ ikoot emi: “Mbufo edi-nɔ mi uwa mbuŋɔ esit ye edimem spirit.”
Nsidi ntak oro enyenede ufɔn? Andinyaŋa ekekpep ette edieke idiyakde esit nnyin inɔ Enye ofuri-ofuri, ke ntak uwa erifak Esie eyediɔŋ nnyin ye nsɔŋɔ ye eno spirit nnyin iyomde ndida nkan mme afanikɔŋ ererimbot, ikpan idomo, ibɔ ndausuŋ ye ifiɔk, inyuŋ ikop idara ye emem ke uwem nnyin. Otode ke mkpri ŋkpɔ eyewɔrɔ ŋkpɔ emi okponde” Enye ɔkɔdɔhɔ ke Enye ”eyenam mmeme ŋkpɔ akabade okop odudu” onyuŋ ɔdiɔŋ nnyin ye kpukpru se nnyin iyomde man iforo ke uwem isɔŋ emi inyuŋ ibɔ nsinsi uwem. Enye ete, “Ɔfɔfɔn ɔnɔ mmɔ eke esit asanade,” “koro mmɔ eyekut Abasi.”
Ami mmenim ke ntak edi emi, ke ekpri mbak, Jesus Christ ama esisɔp nditunɔ mme Scribes ye Pharisees ke ini utom Esie mi ke isɔŋ Okposuk edi eketiŋde-enyin ke ndinim ibet Esie, mmɔ ekenam ntre ke idiɔk ntak. Enye ama esisua ɔnɔ mmɔ, ɔdɔhɔ, “Mbon obio emi esaŋa ekpere mi ke inua, enyuŋ ekpono mi ke edeme mmɔ; edi esit mmɔ ɔkpɔŋ mi anyan ebiet.”
Emi edi eti editi ɔnɔ kpukpru mbet Esie, ke ibaŋake se nnyin inamde kpɔt—ikɔ nnyin ye edinam—edi nko ntak nnyin inamde se Jesus Christ ɔdɔŋde nnyin inam—udɔŋ ye ekikere nnyin. Enye ete,“Koro Ami, Jehovah, nyekpe ikpe nnɔ kpukpru owo etiene utom mmɔ, etiene udɔŋ esit mmɔ.” Ete Heaven nnyin oyom se ikande unam-unim edinam nkop-item ye utom oto nditɔ Esie. Enye oyom nntin inam mme ŋkpɔ oro ke nkoi-nam, koro nnyin imade Enye ye ofuri esit nnyin Enye oyom nnyin inyene udɔŋ nditie nte Enye.
Edieke nsɔŋ-idem spirit esit nnyin ebehede Andinyaŋa—se Enye oyomde ke idem eti mbet—didie ke nnyin ididuŋɔde esit nnyin man idiɔŋɔ me enye enen ke iso Abasi?
Ibihike, nwan mi ye ami ikinyɔŋ mission ke Portugal idi, ima inam ediwak use-idem man idiɔŋɔ ndaha nsɔŋ-idem nnyin. Ndusuk use-idem oro akabaŋa nsɔŋ-idem esit nte ndise iyip, ndise esit, ye ndise odudu-idem. Mmenim ke Andinyaŋa onyuŋ ɔnɔ nnyin mme udomo spirit emi ikemede ndida ndiɔŋɔ ndaha nsɔŋ-idem esit nnyin ke spirit. Yak mbuana ekpri ye mbufo.
Ndise Esit Mbufo ye Udomo-ŋkpɔ Spirit
Akpa, se isede, mme akpan-ŋkpɔ, ye uduak.
“Koro ebiet emi ŋkpɔ-uto fo odude, do nko ke esit fo odu,” Jesus ekekpep. Nkpɔ-uto edi ŋkpɔ ɔsɔŋurua ɔnɔ nnyin, ŋkpɔ emi inɔde ukeme ye ini. Ebiet emi imade ndiinɔ ini nnyin, inɔ ntiŋ-enyin, afiak edi ŋkpɔ ɔnɔde nnyin udɔŋ ndinam se inamde, etiŋ ediwak abaŋa esit nnyin. Andinyaŋa ama asian ette ke ini Enye okotde ediwak, emek ekpri “Koro esit mmɔ esinede ke mme ŋkpɔ ererimbot emi, mmɔ enyuŋ eyom ukpono owo.” Ndi ami mmanam Andinyaŋa edi akpa-ŋkpɔ ke uwem mi? Ndi enyin mi edi kiet ke ndise ubiɔŋ Esie ke kpukpru se ami nnamde? afo omodomo ndinam akpaniko ke ofuri nkpo se afo anamde?
Udiana, unyime nnyin ndinam ibet Abasi.
Ke kpukpru nwed ikiɔ-Abasi, Jehovah ye mme prophet Esie esuk eme asian ye nsiɔŋ-ibuot edian ye esit emi ɔsɔŋde. Nephi ama eteme nditɔ eka esie, ete: “Edi didie mbufo imaha ndinim ibet Jehovah? Didie ke mbufo editak, ke ntak isɔŋ esit mbufo?” Ye Ikɔt Ufɔk-Abasi ke Missouri, Jehovah ama asian, “Edi owo eke minamke ŋkpɔ ekededi tutu edɔŋ enye, onyuŋ ɔbɔ ibet ye esit eyihe, onyuŋ enim enyeye nsɔŋ-ibuot, eyesuŋi enye.” Ke ini Andinyaŋa mibeŋeke mfɔn-mma ke ndinim ibet Esie, Enye oyom ete nnyin inyene udɔŋ inyuŋ iwana ndinim mmɔ ye ofuri esit nnyin.
Anam ita, Ntiŋ-enyin Nnyin ke Ndikpep mme Ŋwed Abasi nyuŋ nyom Eriyarade
Jehovah ama eteme Oliver Cowdery, “kama mme ikɔ emi ke esit fo.” Ekot nnyin yak itiŋ-enyin iduŋɔde mme ŋwed-ikɔ-Abasi, ndien ke odudu Edisana Spirit, iyom man ibɔ ifiɔk ye ntiense kabaŋa akpanikɔ gospel ke esit nnyin.
Prophet Abinadi ama aduat mme oku andiɔk king Noah sia mikanamke ntre, ete, “Afo uyakke esit fo unɔ ifiɔk; ndien, afo unyeneke ifiɔk.” Ndi ami ke nnam eti ukeme ndikpep ŋwed-ikɔ-Abasi ofuri usen nnyuŋ nyak esit mi nnɔ ndidiɔŋɔ mmɔ oto ke akam?
Anam inaŋ, mme Ekikere Nnyin ye Ikɔ
Andinyaŋa ekekpep ete “mme ndiɔi ekikere eto esit ewɔrɔ“ ye nte “oto ke uyuhɔ esit ndien inua etiŋ.“ Ndaha ekikere nnyin ye ikɔ edi eti ŋkpɔ owutde ndaha edisana esit nnyin. Ndi ami nnyene ediwak ndiɔi ekikere mbaŋa edinam me uduak mbon efen, ye idem mi nko? Ndi ami mmesisɔp nkaha ndibiere ikpe nyuŋ mbiom mbon efen? Ndi ami mmesiyom efaŋa me unen ke ma ndue? Ndien ke abaŋade ikɔ mi? Ndi mmɔ emenere enyuŋ ediɔŋ mbon emi eduŋde ye ami? Mmei mmɔ esida utɔk ye iyaresit edi?
Ke ini udomo idem mi ekekurede, abia-usɔbɔ mi ama ɔdɔhɔ mi ete, ke akpatre, esit mi okop nsɔŋ—idem, edi mkpri mfina ema edu emi edide se esede idahaemi,, mbemiso edikpon. Enye ndien editeme mme ukpuhɔde ke usuŋ ukama-idem. Kpantre nko, nte afo anamde udomo spirit esit fo onyuŋ okut mme idiɔk idiɔŋɔ ɔtɔŋɔde ndinyɔni nduk ndi, mbɔk kunyek idem! Andinyaŋa ama ɔnɔ andifɔn-nkan ibɔk ye usɔbɔ spirit ada anwam nnyin. Enye akam ɔŋwɔŋɔ ndinɔ mbufo obufa esit! Emi edi ndusuk edinam emi edibɔpde odudu spirit esit fo.
Ndinam Esit Mbufo Ɔfɔn ye Udomo-ŋkpɔ Spirit
Akpa, Sɔŋɔ Ebuana Fo ye Christ
Nte nnyin inɔde ini ke usen ndisaŋa mkpere Christ, esit nnyin eyekpuhɔde. Ndikpep ikɔ-ŋwed-Abasi ke usen, asaŋade nnen-nnen akam ye ndisitre udia, eyedibede ima fo ye Andinyaŋa onyuŋ ɔsɔŋɔ mbuotidem fo ye udɔŋ ndikabare-esit onyuŋ ayak esit fo ɔnɔAbasi ke nsuhɔre-idem. Kere baŋa uwut-ŋkpɔ Nephi emi: “Koro, mma ntua nɔ Jehovah; ndien sese enye ama edi se mi, onyuŋ anam esit mi emem ndien ami mma nnim kpukpru mme ikɔ emi ete mi eketiŋde.”
Nte nnyin ikade iso ibɔk mfri mbuɔtidem otoke ndinen udɔŋ ye edinam, nnyin iyekut ukem ediyet esit nnyin nte mme Nephites: “Mmɔ ema ewak nditre-udia enyuŋ ebɔŋ-akam, enyuŋ enyene iwuk ke nsuhɔre-idem, etuak-eda ke mbuɔtidem ke Christ, ekesim ediyɔhɔ ukpɔŋ mmɔ ye idara ye idɔŋesit, edi ntre, onyuŋ ekesim eriyet ye erinam-esit mmɔ esana, edinam-asana otode ke ediyak esit mmɔ nnɔ Abasi.”
Udiana, Nam Uduak Fo edi-kiet ye eke Esie
Andinyaŋa ekekpep, “Edieke afo amade Mi, nim ibet Mi.“ Enye okot nnyin ete idiwut ima nnyin ke ndinam nyuŋ nnim ediomi ye Enye. Nte nnyin inwanade ke usen ndinim ibet Esie, ikabade-esit ke idiɔk-ŋkpɔ nnyin, inyuŋ iyɔ ke ndida enyiŋ Esie ndori ke idem nnyin ye ndinam uduak nnyin edi-kiet ye uduak Esie, eyediɔŋ nnyin ye nsaŋa Edisana Spirit kpukpru ini.
Nephi ama ɔdɔhɔ, “Ami mmɔdiɔŋɔ nte edieke mbufo editienede Eyen, ye ɔyɔhɔ ntak ke esit, ke minamke mbubik, minyuŋ ibiaŋake ke iso Abasi, edi ye nkoi nnam, ekabade-esit ekpɔŋ idiɔk-ŋkpɔ, etie ntiense enɔ Ete ette ke mbufo emenyime ndida ndori ke idem mbufo enyiŋ Christ oto uduɔk-mmɔŋ … , ndien ke mbufo edibɔ Edisana Spirit.” Edisana Spirit eyekpeme mbufo onyuŋ anwam mbufo ndidiɔŋɔ uduak Abasi enyuŋ enam nti mbumek.
Akpatre, Ekpono Abasi ye Mbon Efen ye Ofuri Esit Mbufo
Andinyaŋa okot kpukpru owo “ekpono Enye ye ofuri esit mbufo.” Ke ini nnyin imekde ndinam mme ŋkpɔ Abasi ɔdɔhɔde nnyin ette inam—utɔ nte ndinim ibet, ndibuana ke sacrament, ndituak-ibuot ke temple, ye ndima mbon efen—ye eti esit, ye eti udɔŋ, kpukpru edinam ima ye ntuak-ibuot edi akwa ŋkpɔ-ntibe spirit emi ɔsɔŋɔde mbuɔtidem nnyin ye ikɔ-ntiense, onyuŋ ɔyɔhɔ esit nnyin ye idara ye ima inɔ Abasi ye ubon owo.
Mbume prophet Alma ke osuk osiorouyo mfin: “Ndi mbufo ememana ke spirit ke Abasi? Ndi mbufo emebɔ mbiet Esie ke ido mbufo? Nte mbufo emenyene akwa edikabare emi ke esit mbufo?”
Ndito eka iren ye iban, ami mmokot mbufo yak enɔ Andinyaŋa ofuri esit mbufo mfin. Yak kpukpru edinam ntuak-ibuot ye ima edi akpanikɔ ye nkloi-nam. Sio mme ŋkpɔ ubiat-ini ererimbot ye utɔk fep man enyene ini ɔfɔnde ɔnɔ Abasi ofuri usen uwem mbufo. Kabade esit nyuŋ fiak bine Enye ye ofuri esit mbufo, ndien Enye eyefen ɔnɔ mbufo onyuŋ awaŋ mbufo ke ubɔk ima Esie. Ekuyom ɔŋkpɔ isɔŋ emi, edi emek ndinam enyin mbufo edi kiet ɔnɔ ubɔŋ Abasi enyuŋ eyom ŋkpɔ enyenede kiet oro ɔfɔnde akan. Enye ɔdiɔŋɔ ekikere mbufo ye udɔŋ esit mbufo, ndien nte mbufo edide ebine Enye, Enye etediɔŋ mbufo ye odudu, uko, emem, ye idara ke uwem emi ye ibiet ke ebekpo celestial Esie ke nsinsi.
Ami mmɔdiɔŋɔ ke Christ odu uwem. Enye edi Andifak nnyin. Ndien Enye ama fi ye ami ye ofuri esit Esie. Ke enyiŋ Jesus Christ, amen.