Man Kpukpru owo Ekɔri ke Ifiɔk

Nte mbon Ufɔk Abasi Jesus Christ Mme Ndisana Owo ke Ukperedem Usen, emi ebɔde edidiɔŋ eke nsaŋa eke Mbuot Abasi, nnyin imikeme ndinyene uŋwam eke mfɔn-mma andikpep. Edisana Spirit ɔfiɔk kpukpru ŋkpɔ etie ntiense abaŋa akpanikɔ eye onyuŋ “ti [nnyin] kpukpru ŋkpɔ.” President Russell M. Nelson ama etiŋ ediwak ini abaŋa ufɔn ndikop uyo Jehovah. Enye ama ekpep nnyin nte ikemede ndikoot ndausuŋ Edisana Spirit onyuŋ aka iso ebeŋe nnyin ndikɔri ukeme spirit nnyin ndibɔ eriyarare.”

Mfin emi ami nkoot mbufo nte ese ubiɔŋutom eke Edisana Spirit, akpan-akpan nte ebehede ndikpep ye ndibɔ ukpep ikɔ Abasi ke ufɔkiduŋ ye ke Ufɔk Abasi. Ebɔ Edisana Spirit eto akam mbuɔtidem ye nte nnyin iwanade ndidu uwem odotde ndibɔ nsɔŋurua enɔ mi. Eti ŋwed ukpepŋkpɔ Ufɔk Abasi Ndikpep ke Usuŋ nte Andinyaŋa Ekekpebde owut nsio-nsio usuŋ efen Jehovah ekenimde emi aŋwamde ndikoot odudu Edisana Spirit.

Kiet ke otu usuŋ emi , edi ndikoot ukpepŋkpɔ ntiŋ-enyin. Ke ini edem, nnyin ima isikere ibaŋa ukpepŋkpɔ nte ufaŋ emi ete ye eka mme andikpep enyenede ndikoot Spirit nsin ke mbeŋidem mmɔ ndien mmɔ ebuana se mmɔ ekekpepde ye nditɔ-ɔwɔŋ ye mbon ubet ukpepŋkpɔ, emi ubiɔŋutom mmɔ ekesidide ndikpaŋ utɔŋ. Edi se itimde ifɔn edi ke ini nyin, nte mme ɔbɔ-ukpep, ŋko itienede ibeŋidem ye kini andikpep anamde ebiet ukpep emi aŋwamde ndibɔ eriyarare eke idem owo nsin ke esit ye ekikere nnyin. Ndien, nte enɔde nnyin ifet ndibuana se nnyin ikpepde ito ukpep nnyin ye Edisana Spirit, nnyin iŋwam kiet eken ndibɔ ukpep nyuŋ ŋkɔri ke ifiɔk Nte nnyin idade ifɔk ukpep eke ikɔ Abasi isin ke edinam, Spirit ndien ɔtɔŋɔ-ntak etie ntiense abaŋa akpanikɔ mmɔ.

Kpa nte edide ke kpukpru ŋkpɔ, Jesus Christ edi mfɔn-mma uwutŋkpɔ. Enye okoot kpukpru nnyin ete idi mme ɔbɔ-ukpep ke ntiŋ-enyin inyuŋ ikara ikɔ-ntiense eke idem nnyin. Enye ama okoot mbet Esie ete ebeŋidem ndikpep ndibuana se mmɔ ekpepde enyuŋ enam utom ke mbuɔtidem Enye ama ɔbɔŋ akam ɔnɔ mmɔ, okut edisana ukeme mmɔ, akpaŋ utɔŋ ɔnɔ mmɔ, onyuŋ aŋwam mmɔ ndifiɔk ke ema eyom mmɔ.

Nte mme andikpep, nnyin imikeme ndiwuk enyin ke ŋkɔri mme ɔbɔ-ukpep, ke ndiyɔ unana mmɔ, ye ke ndiŋwam mmɔ ndikɔri ido spirit eke mbet ofuri uwem. Nte mme ɔbɔ-ukpep, kini nnyin isinde unen mbumek nnyin ke ndutim ukpepŋkpɔ, nnyin iwut Edisana Spirit uduŋ nnyin ndibɔ ukpep nto Enye.

Ami mmɔnɔ ekɔm mbaŋa andikpep kiet emi okootde mi ndidi eti ɔbɔ-ukpep. Kini ami ŋketɔŋɔde college, Ami ke ndudue ŋkekere ke ufɔkŋwed edi ŋkpɔ emi anade ami nyɔ man eyak mi mbre-mbre inemesit. Usen kiet, ke ŋkurede ndikot ŋwed kiet emi ami ŋkewetde, akwa andikpep mi ama ɔdɔhɔ mi ete ke imɔ ikere ke ami ndi owo enyenede akwa enɔ nditim ŋkere ŋkpɔ. Ami ŋkifiɔkke se oro ɔwɔrɔde. Enye ama ɔdɔhɔ ete ke ntimde nsin ifik ami mmekeme ndidi eti ɔbɔ-ukpep. Akananam utɔ ekikere oro iduk-ke mi esit. Ima, ndɔngesi, ye ikoot esie ama okpuhɔre ndaha edika ŋwed mi onyuŋ ɔdiɔŋ uwem mi mfɔn-mfɔn.

Ifiɔk ukpep efen emi ɔfɔnde ke ndikoot Edisana Spirit edi ndikpep nnen-nnen ukpepŋkpɔ emi edide akpanikɔ. Emi ɔwɔrɔ ke ndikpep nyuŋ nbɔ item ikɔ Abasi nnyin enyene oruŋ ke ikɔ Abasi ndien inaha nnyin ikpuhɔre se Jehovah akayarade. Edi, nnyin iwuk enyin ke se idide akpan ye nsinsi ifiɔk ukpep ikɔ Abasi emi ayakde Spirit etie ntiense abaŋa akpanikɔ. Efen, nnyin itiene uwutŋkpɔ Andinyaŋa. Enye ama ɔdɔhɔ ete, “Ukpepŋkpɔ eke nnɔde idige okim, edi edi eke andidɔŋ mi.”

Ekut ukpepŋkpɔ eke edide akpanikɔ ke mme ŋwwd Abasi ye ke ikɔ mme prophet eyo emi. Item Jehovah ndikpep ŋwed Abasi nte owo ye nte mme ufɔkiduŋ ye ndika ufɔk Abasi kpukpru udua man ikpep ikɔ Abasi Esie ɔnɔ eti ndaha ndibɔ ukpepŋkpɔ Esie nyuŋ ŋkop uyo Esie. Nnyin iduŋɔre mme ŋwed Abasi man ifiɔk mbuk, ifiɔk ukpep emi mmɔ ekpepde ye nte idade mme akpanikɔ emi isin ke uwem nnyin. Ewe edidiɔŋ ke edi ndinyene ŋwed Abasi ke enyɔŋ nnuenubɔk nnyin. Kere baŋa nte Adam ye Eve, Abinadi, mme akwa Andikpep Jesus Christ edisede ufɔkiduŋ nnyin mme ubet ukpepŋkpɔ nyin man ekpep nnyin ŋkpɔ. Mmɔ ekeme ke ini nnyin itimde ikpep ikɔ Christ? Ye ŋkaiso nsinifik, nnyin imikeme ndikpep ndifiɔk nyuŋ mma mme ŋwed Abasi inyuŋ idotenyin ite ke mmɔ enyene mme ibɔrɔ enɔ mme mbume eke ukpɔŋ.

Ama odu ini mbemiso nnyin idɔ-ndɔ emi ŋwan mi Kristi, ekeŋwanade ndikop ima Abasi ye ndifiɔk uduak emi Enye enyenede ɔnɔ enye. Nte enye ɔbɔŋde akam oyom ndausuŋ, ntuk kiet ama edi ete yak enye aka institute, ke ntre enye ama esin enyiŋ ke class eke Obufa Testament. Usuŋ emi andikpep institue esie ekekpepde ŋkpɔ oto ŋwed Abasi, kpa usuŋ emi enye akakamade mmɔ, ama owut ima emi enye ekenyenede ɔnɔ ikɔ Abasi. Nte enye odukde, Edisana Spirit ama etiŋ ke odu ɔnɔ enye ete ke enyene ŋkpɔ odude ke ŋwed Abasi emi enye oyomde. Ima emi andikpep esie ekenyenede ɔnɔ ŋwed Abasi ye ntuk otode Edisana Spirit ama ɔnɔ enye udɔŋ nditɔŋɔ akamba ukpep eke ikɔ Abasi—emi ekekabade edi isaŋ ofuri uwem eke ntɔtuŋɔ ŋkabare-esit ye nti utom.

Ke akpatre, nte Ndikpeb ke Usuŋ nte Andinyaŋa Ekekpebde etemede, ukpepŋkpɔ ye edibɔ-ukpep nnyin kpukpru ini ana ɔkɔŋɔ ke Jesus Christ. Nnyin imikeme nditiŋ ikɔ ke ukpono ye ke ediwak ini ibaŋa Enye inyuŋ iyom ediwak ifet nditiŋ ikɔ-ntiense, nnɔ ekɔm, nyuŋ mma Enye. Ke itie ekededi, nte nnyin itide Enye, nyin imikeme ndinyene “Spirit esie edidu ye [nnyin].”

Usuŋ kiet ndinim Jesus Christ ke ufɔt ukpepŋkpɔ nnyin edi ndisɔŋɔ ntiŋ ete ke Enye edi mfɔn-ma uwutŋkpɔ, ye ofuri idiɔŋɔ ifiɔk ukpep ikɔ Abasi. Kpa ke ini owo mmitiŋke nnen-nnen ibaŋa Enye ke mbuk ŋwed Abasi kiet, nnyin imikeme ndiwut Enye nte uwutŋkpɔ ifiɔk ukpep emi ekpepde. Nnyin imikeme ndibup esisit ete, “Ndi afo emeti ini kiet emi Jesus Christ okowutde ifiɔk ukpep ŋkpɔ emi?”

Nnyin nko imikeme ndiwuk enyin ke Enye ke ndikpep mbaŋa mme enyiŋ, ubiɔŋ utom, ye edu Esie, idige man ifiɔk se Enye akanamde kpɔt edi man itim ifiɔk owo emi Enye edide nko. Nte uwutŋkpɔ, kini ikpepde ibaŋa ŋkabare-esit, edi akpan ŋkpɔ ndifiɔk nte ekemede ndikabare esit. Edi enye edi akpan ŋkpɔ ŋko nditi se Jesus Christ akanamde man ŋkabare-esit odu inyuŋ ifiɔk se ŋkabare-esit ekpepde nnyin abaŋa Enye, abaŋa ata uduot ye ido Esie. Nso ke ifet nnyin ndikabare-esit etiŋ abaŋa ima, ime, ye mbɔm Esie, se Enye enimde ke akpanikɔ abaŋa edisana ukeme nnyin, unyime Esie ndisio isop idiɔkŋkpɔ nnyin, ye idara emi Enye enyenede ke ndifen nnɔ nnyin? Ndien ndifiɔk mme enyiŋ Esie—utɔ nte Eyenerɔŋ Abasi, Andifak, ye Andikɔk—aŋwam nnyin ndikut ete ke ŋkabare-esit edi ikoot Esie ndinam nnyin isana, ndikpuhɔre nyuŋ ŋkɔk nnyin, Ndiwuk enyin ke se Enye akanamde ɔnɔ nnyin ye se oro etiŋde abaŋa owo emi Enye edide ekeme ndiŋwam nnyin ndinyene mbuɔtidem emi “adade aka ŋkabare-esit.”

Ndusuk ini, nnyin idikemeke ndisɔp ŋkut edu Andinyaŋa nte esinede ke mbuk eke ŋwed Abasi. Nte uwutnkpɔ, kini ikotde ibaŋa nte Nephi eke obotde ubom, nnyin imikeme ndiwuk enyin ke Nephi kpɔt. Edi ndiwuk enyin ke Andinyaŋa ekeme ndiŋwam nnyin ndikut ete ke owo ikitimke mme ŋwed emi inim ndikpep nnyin mbaŋa akwa ndaha eke Nephi edi man ewut nnyin akwa ndaha Abasi—ete ke Enye ɔnɔ nnyin ukeme ndinim mbet Esie onyuŋ afak nnyin ke ini afanikɔŋ.

Nnyin imikeme ndiwuk enyin nko ke akwa utom eke Jesus Chris ke edisana uduak inemesit eke Ete Heaven. Enye ekeme ndikpuhɔ usuŋ emi uwem nnyin akade man ikut ndaha nnyin ke enyin nsinsi uduak Abasi ke itie ndikut uduak oro ke enyin ibioibio ndaha nnyin. Ikɔ Abasi idige ndinam ibat ŋkpɔ emi owo oyomde; enye edi eti etop ete ke Jesus Christ ama akan idiɔkŋkpɔ ye mkpa. Enye oto ke ndibɔ utibe mfɔn Esie oto ke ndinim ediomi nnyin ye Abasi ke nnyin ikeme ndidu uwem inemesit idahaemi inyuŋ ibeŋe idem inɔ uwem ye Ete nnyin eke Heaven ke ini nsinsi. Nte nnyin ikpepde ndikut Ete eke Heaven ye Andinyaŋa ke ŋwed Abasi, nnyin iyedifiɔk mmɔ mfɔn-mfɔn ndien nnyin iyekut ediwak ima ye odudu Mmɔ ndien-ndien ye ke akamba usuŋ ke uwem nnyin.

Ami ke ofuri ini nditi spirit eke emi ŋkekopde nte iwaad kini andikpep nnyin ekekpepde abaŋa mme akpatre usen ke uwem Andinyaŋa. Enye ama aŋwam nnyin ndikut se mme ŋkpɔ-ntibe ke ubet enyɔŋ, ke Gethsemane, Golgotha, ye ukpɔk udi adade ɔnɔ. Enye ama abuana ata esit ekɔm esie abaŋa Andinyaŋa ye akwa udɔŋ esie nditiene Enye. Ukpepŋkpɔ esie ekedi ndikoot Edisana Spirit nditie ntiense mbaŋa Jesus Christ. Ndien edisana Spirit eke ami ŋkekopde ke class oro ama anam mbuɔtidem mi ɔtuŋɔ onyuŋ anam ima ye esit ekɔm mi kabaŋa Andinyaŋa okpon. Odudu ukpep andikpep oro akaiso ndidu ye ami ke ofuri uwem mi. Nte eke etiŋde ebaŋa andikpep efen, “Nnyin imikeme ndiwan ubɔk nyin ke ikaŋ mbuɔtidem Esie.

Ke ufɔkiduŋ ye ke mbono ufɔk Abasi nnyin, nte nnyin iwukde enyin ke Jesus Christ, ikpep ukpepnkpɔ Esie, inyuŋ ikpep ke ntiŋ-enyin, nnyin ikoot Edisana Spirit ndinam mbuɔtidem nnyin ɔtuŋɔ ke Jesus Christ onyuŋ aŋwam nnyin ndikabare ntie nte Enye, emi edide uduak ofuri edikpep ye ndibɔ-ukpep ke ikɔ Abasi.

Ami mmɔnɔ ekɔm mbaŋa mme Andikpep ke uwem mi, tɔŋɔ ke nti ete ye eka mi ye mme adausuŋ ye mme andikpep tutu esim irenowo ye iban emi ekekotde ndikpep nyuŋ ntiŋ ikɔ-ntiense ke enyɔŋ-obot emi, emi ekeŋwamde nnyin ndifiɔk nyuŋ ntiene Jesus Christ. Ndien ami mmɔnɔ ekɔm mbaŋa Edisana Spirit, mfɔn-ma Andikpep. Oto ke Edisana Spirit ke ami mfiɔk ke Ete eke Heaven ama nnyin onyuŋ enyene mfɔn-ma uduak ɔnɔ nnyin; ke Jesus edi Christ, Andinyaŋa ye Andifak ererimbot, ndien ke efiak eda ikɔ-Abasi ye ufɔk Abasi Esie edi. Ami ke esit ekɔm ntie ntiense mbaŋa mme ŋkpɔ emi ke enyiŋ Jesus Christ, amen.