Edomo enyuŋ Esɔŋɔ ke Christ

Ndima nditɔ-eka mi iren ye iban, ami mokop ima Jehovah nte nnyin isobode kiet. Ami ndu ke nsuhɔde idem nditiŋ ikɔ nnɔ mbufo. Ami mbɔŋ akam nte yak spirit esin ke esit mbufo se Jehovah oyomde ete mbufo ekop, akan mme ikɔ emi ami nditiŋde.

Ke anyan ini emi ebede, ami mma nyom ndifiɔk physics ye ibat ke ufɔk ŋwed. Ami mma ŋkop ndik. Ami mma ntɔŋɔ ndikere ke ami nyom ndifiɔk ŋkpɔ emi okponde akan mi. Nte nkopde nte awakde akan mi, ntre ke ekekak mi ndika iso ndomo ndinam. Ubiɔŋɔ mi ama anam mi nkere ke mme ukeme mi ekedi ikpikpu. Ami mma ntɔŋɔ ndikere ndifiak edem, ndinam ŋkpɔ emi ememde idem akan emi.

Idem ama emem mi. Nte Ami mbɔŋde akam, Ami mma nkop suŋ suŋ nsɔŋɔ eke Jehovah. Ami mma nkop nte Enye ɔdɔhɔde esit mi ete, “Ami kendomo fi nse, edi Ami ŋko kendu ye afo.”

Ami nkɔfiɔkke ini oro se kpukpru mme ikɔ oro ekewɔrɔde. Edi ami mma mfiɔk se anade nte nnam—ami mma ntɔŋɔ utom.

Ke ndikere nyuŋ nnam utom ke mme isua emi eketienede, ami mma ndifiɔk etop nsɔŋidem emi ke mme ŋwed Abasi: “Ami mekeme ndinam ŋkpukpru ŋkpɔ oto ke Christ emi ɔnɔde mi odudu ”

Ami mma mkpep nte ke udomo mi ye physics ke akpanikɔ ekedi enɔ otode Jehovah. Enye ekekpep mi ete ke ye unwam Esie, ke ami mekeme ndinam mme ŋkpɔ oro etiede nte usuŋ iduhe edieke nyenede mbuɔtidem nte ke Enye oyodu do ndinwam mi. Oto ke enɔ emi, Jehovah akanam ndiwut nyuŋ nsɔŋɔ mi idem.

Ikɔ emi wut ɔwɔrɔ ediwak ŋkpɔ. Ndiwut ŋkpɔ idighe ndidomo nse. Edi ndikɔri ke ukeme. Ndiwut ibio ukwak edi ndidomo enye nse. Edian ufiop, udobi, ye odudu, tutu ata uduot esie edi onyuŋ ɔwɔrɔ ada. Idem imemke ukwak emi ke ndiwut enye. Ke akpanikɔ, enye akabade edi ŋkpɔ emi owo ekemede ndidori enyin, ŋkpɔ emi enyenede odudu ekem ndimen mme mbiomo efen.

Jehovah odomo nnyin ese kpa ke ukem usuŋ oro ndisɔŋɔ nnyin idem. Ndidomo nse emi idighe ke mme ini emem mme mfɔn-ŋkpɔ. Enye edi ke mme ini emi akakde nnyin akan se nnyin ikikerede ke iyikan iyɔ. Jehovah ekpep ete ke ana nte nnyin ika iso ikɔri inyuŋ ikpaha mba ke mme ukeme nnyin, ete nnyin ukutre, ete ika iso idomo ukeme nnyin.

Ke ini ikade iso inyene mbuɔtidem ke Jesus Christ—kpa ke ini mme ŋkpɔ etiede nnyin nte ikemeke nditibe ke ini oro—nnyin ikabade ikop odudu ke spirit ikan akpa. Mme edisana mbuk ŋwed Abasi etim esɔŋɔ akpanikɔ emi.

Prophet Moroni, ke nte uwut-ŋkpɔ, ema edomo enyuŋ esɔŋɔ ke utɔ usuŋ ntem. Enye okodu mme akpatre isua esie ikpɔŋ. Enye ama ewet ete ke enye ikinyeneke mme ufan, ete ke ema ewot ete esie, ete ke ema esobo ikɔt esie. Mbon ekeyomde ndiwot enye ema eyom enye.

Edi Moroni ikikpaha mba. Edi, enye ama emiŋ ikɔ ntiense esie kabaŋa Jesus Christ ke mme usan ɔnɔ mme owo emi enye mididuho uwem ikut, emi esinide ubon mbon emi ekeyomde ndiwot enye. Enye ekewet ɔnɔ nnyin. Enye ama ɔfiɔk ete ke usuk eyesak mme ikɔ esie. Enye ama ɔfiɔk ete ke usuk eyesin mmɔ. Edi enye ama aka iso ewet.

Ke ndidomo esie, ema enehede mbuɔtidem Moroni enyuŋ enam ɔsɔŋɔ. Enye ama enehede asana. Mme ikɔ esie asaŋa ye odudu owo emi ɔkɔyɔde tutu esim utit. Nnyin imikeme ndikop odudu oro nte nnyin ikotde ikɔ ntiense esie.

“Idahaemi ami, Moroni, nwet ekpri nte ɔfɔnde ye ami; ndien ami nwet nnɔ nditɔ eka mi, mme Lamanite; ndien ami nyeyom nte mmɔ efiɔk ete ke isua awakde akan ikie inaŋ ye edip ebe efep tɔŋɔ ekenɔ idiɔŋɔ eke edidi Christ

“Ndien ami mɔkɔbi mme ŋwed emi, ke mma ŋketiŋ mme ikɔ ifaŋ ke usuŋ item nnɔ mbufo.

“Sese, ami nyeteme mbufo nte ke ini mbufo edikotde mme ŋkpɔ, edieke edide ɔniɔŋ ke Abasi ete mbufo ekot mmɔ, ete ke mbufo eyeti nte Jehovah akatuade nditɔ owo mbɔm, tɔŋɔ ke ini emi ekebotde Adam tutu ɔsuhɔde esim ini emi mbufo edibɔde mme ŋkpɔ emi, ndien ekere ebaŋa enye ke mme esit mbufo.

“Ndien ke ini mbufo edibode mme ŋkpɔ emi, ami nteme mbufo nte yak mbufo ebup Abasi, nsinsi Ete, ke enyiŋ Christ, mme mme ŋkpɔ emi idighe akpanikɔ; ndien edieke mbufo ebupde ke esit akpanikɔ, ye ata ediyom, enyene mbuɔtidem ke Christ, enye eyeyarede akpanikɔ esie ɔnɔ mbufo, ke odudu Edisana Spirit.

“Ndien ke odudu Edisana Spirit mbufo emekeme ndifiɔk akpanikɔ eke kpukpru ŋkpɔ.”

Ekeyet ikɔ ntiense Moroni asana ke ini ikpɔŋ, edi enye ayama ye unwana ndida ofuri emana usuŋ ete eyom Ete ke Heaven ye Andinyaŋa nnyin Jesus Christ.

Prophet Ŋwed Mormon efen, Jacob, ke ekedomo enyuŋ esɔŋɔ nte eyen emi okokutde mme ukut ye ɔkpɔsɔŋ mfuhɔ. Edi ete esie, Lehi, ama ekpep enye ete ke Abasi eyediɔŋ enye oto ke mme idomo.

“Ndien sese, ke uyen fo afo emebɔ mme ukut ye ɔkpɔsɔŋ mfuhɔ, ke ntak idiɔk-ido nditɔ eka fo.

“Edi, Jacob, akpa eyen mi ke wilderness, afo emefiɔk odudu Abasi; ndien enye eyesio mme ukut fo enim ke udori ɔnɔ fi.

“Ke ntre, eyediɔŋ ukpɔŋ fo, ndien afo eyedu ke emem ye eyen eka fo, Nephi; ndien mme usen fo edidi ke utom Abasi fo. Ke ntre, ami mefiɔk ke efak fi, ke ntak edinen ido Andifak fi; koro afo omokut ete ke uyɔhɔ ini enye edi ndida eriyaŋa ndi nnɔ mme owo.”

Prophet Joseph Smith ama enyene utɔ edidomo emi ye edisɔŋɔ emi ke ini enye okodude ke ufɔk-ŋkpɔkɔbi Liberty. Ke mme ntɔtuŋɔ ɔkpɔsɔŋ ubiak esie, Prophet Joseph Smith ama ofiori:

“O Abasi, afo odu ke mmong? …

“Adanga didie ke ubɔk fo editre?”

Jehovah ama okut ke ufen Joseph usuŋ edinam asana eke ediyɔ esie ke ini Enye ɔkɔbɔrɔde:

“Eyen mi, yak ukpɔŋ fo enyene emem; afanikekɔŋ fo ye mme ukut fo edidi esisit ini;

“Ndien ke ini oro, edieke afo ɔyɔde nte ɔfɔnde, Abasi eyemenede fi ke enyɔŋ; afo eyekan kpukpru mme asua fo.”

Uwut-ŋkpɔ edidomo ye edisɔŋɔ emi okponde akan eketibe oto Usio-isop Andinyaŋa. Enye ama emen mme idiɔk-ŋkpɔ ererimbot odori ke idem Esie. Enye ama obiom mme ubiak nnyin ye mme ukut nnyin. Enye ama ɔnwɔŋ ndotndot cup. Enye ama owut mbuɔtidem ke ofuri ini.

Ke ntak ediye Usio-isop Esie, Jesus Christ ekeme ndisɔŋɔ nnyin idem ke mme ini idomo nnyin. Enye ɔfiɔk nte ɔdɔŋde nnyin esit ke ntak emi Enye okokutde mme ofuri mfina emi nnyin idikutde ke uwem emi. “Enye eyeda ɔnɔ idem esie mme ubiak ye mme udɔŋɔ ikɔt esie … man enye ɔfiɔk ke obukidem nte enye ɔdɔŋde ikɔt esie esit nte asaŋade ye mme mmemidem mmɔ”

Nnyin imikpep ite ke ini okodude ke Inwaŋ Gethsemane, Andinyaŋa ama obup Ete mme idomo oro ekeme ndibe Enye mfep—edi Enye ŋko ama ɔdɔhɔ ete ke edieke edide uduak Ete, ndien ke Andinyaŋa eyenam enye. Ke mme ikɔ efen, Andinyaŋa ama eyighe ndien itimke ifiɔk edi Enye ama enyene mbuɔtidem ke Ete Esie ke Heaven.

Nditɔ eka iden ye iban, edidomo ye edisɔŋɔ mbufo iditiehe nte eke Moroni mme eke Jacob mme eke Prophet Joseph. Edi enye eyedi. Ekeme ndidi suŋ-suŋ-suŋ, oto mme idomo ke uwem ufɔk. Ekeme ndidi nto ke udɔŋɔ mme mbiara ekikere mme mfuhɔ mme ndobo.

Ami metie ntiense nte ke mme ini emi iwutke ite ke Jehovah efre mbufo. Edi, mmɔ ewut ete ke Enye ama mbufo ekem ndiyet nyuŋ nsɔŋɔ mbufo. Enye ke anam mbufo esɔŋ idem ekem ndibiom mbiomo nsinsi uwem.

Edieke nnyin ikade iso ye mbuɔtidem ke utom nnyin, Jehovah eyenam nnyin isana. Enye eyesɔŋɔ nnyin idem. Ndien usen kiet, nnyin iyise edem ndien ikut ite ke mme idomo oro ekedi uwut-ŋkpɔ ima Esie. Nnyin iyikut ite ke Enye akanam nnyin ikeme ndida ye Enye ke ubɔŋ. Nte Apostle Jehovah Paul eketiŋde ke utit uwem esie, “Ami mma ŋwana eti eŋwan, mma mfehe mbuba mi mma, mesɔŋɔ mmum mbuɔtidem nkama.”

Ami metie ntiense nte ke Abasi ɔfiɔk mbufo. Enye ɔfiɔk mme idomo emi esimde mbufo. Enye odu ye mbufo. Enye idifreke mbufo. Ami ntie ntiense nte ke Jesus Christ edi Eyen Abasi. Enye edi odudu nnyin, Andifak nnyin, ye idorenyin nnyin. Edieke nnyin idoride enyin ke Enye, Enye eyenam odudu spirit nnyin edi ukem ukem ye ofuri idomo emi ekotde nnyin ete ibɔ. Ami ntiŋ ikɔ ntiense ntre ke edisana enyiŋ Jesus Christ, amen.