Nsinsi Enɔ eke Ikɔ-ntiense

Enye ɔfiɔk kpukpru ŋkpɔ, onyuŋ ekeme ndinam kpukpru ŋkpɔ. Otode ke Uŋwana eke Christ ye utom eke Edisana Spirit, odudu Esie odu ke kpukpru ebiet. Edi uduot Esie ndidiɔŋ nnyin.

Enye ɔfiɔk ini edem nnyin, ini idude idahaemi, ye nsinsi ini iso nnyin. Ŋkpɔ ndomokiet idibeke Enye.

Ikoot President Nelson “ndikere celestial” ekpep nnyin ndidomo ndinyene ukem ŋkukut ye uduot nte Ete eke Heaven nnyin.

Ke ntak edisana edu esie, Ete Heaven nnyin ɔnɔ nnyin ofuri nti enɔ, kiet-kiet asaŋade ye nsinsi ekikere ye ŋkukut ke esit.

Enye nko edi ubiɔŋ utom nditim mmek.

Jesus Christ ama ekpe akpatre ekɔm-urua ɔnɔ eti ifet oro ye nsɔŋurua iyip Esie.

Ndusuk ini nnyin imikeme ndinim nte ke unen mbumek ɔwɔrɔ ndinam ŋkpɔ ekededi emi nnyin iyomde. Edi koro ema ekekpe ekom urua oro ɔwɔrɔ ke unen mbumek edi nsasana enɔ.

Nnyin idi mme asaŋautom, ndien mme asaŋautom enyene ubiɔŋ-utom ebaŋa ŋkpɔ. Ke ndaha emi, nnyin iminyene ubiɔŋ-utom ibaŋa mbumek emi nnyin inamde otode ifiɔk emi nnyin inyenede ye mme enɔ emi enɔde nnyin. Nnyin ikemeke ndinam mbumek ndien itre ndin-yene ubiɔŋutom mbaŋa utip mbumek.

Nsidi ntak emi nnyin inyenede unen mbumek?

Man imek eti.

Man imek Christ.

Man imek nsinsi uwem—imek ifiak imek.

Ntiense otode Edisana Spirit okpon akan ndikut ke enyin. Enye edi akpan ntiense mbaŋa Ete ye Eyen. President Russell M. Nelson ekpep ete, “Ke mme usen emi edidide, idimemke ndidu uwem ke spirit ke ndausuŋ, ndiwut, nnɔ ndɔŋ-esit ye ndien-ndien uteŋe eke Edisana Spirit miduhe.”

Nditɔ-eka iren ye iban, emi edi ntak eke nnyin kiet-kiet iyomde odudu Edisana Spirit mfin emi.

Ikɔ-ntiense otode Edisana Spirit ekeme ndidi ke ediwak usuŋ . Nte ikaŋ edomode ke ŋkim-ŋkim ubet-ufɔk, enye ekeme ndidi ke mbre-mbre ye iwiwa. Enye ekeme ndidi nte usiaha-utin suŋ-suŋ ye ke ini akade iso. Enye ekeme ndidi nte uŋwana ikaŋ, ke esisit ini ayarade ata ifiɔk. Ke usuŋ ekededi, enye oto Edisana Spirit.

Ami ŋkekpon ke ediye idut Jamaica; ekedi inem ye utibede ŋkpɔ. Nte ededi, kini ami ntɔŋɔde akamba ufɔknwed, mme ufan ye mbon class mi ikikemeke ndifiɔk ntak eke ami mmekde ndidi owo Ufɔk Abasi Jesus Christ. Mmɔ eyebup mi ete “Nso inam fi okoduk ufɔk Abasi oro?” “Nso inam fi enim utɔ mbuk oro ke akpanikɔ?”—etiŋde ebaŋa Akpa Nkukut. “Nso ntak anam fi okot ŋwed oro?”—etiŋde ebaŋa Ŋwed Mormon. “Ndi afo emetim enim kpukpru oro ke akpanikɔ?” Ye “Nsidi ntak emi afo abiatde uwem fo efep?”

Ekedi ŋkpɔ ubiak, akpan-akpan kini enye otode mbon emi ami mmade.

Edi se mmɔ mikifiɔkke ekedi emi: Ami mma nyene ifiɔk-ukpep nto Edisana Spirit. Nte ikɔ-ntiense oro ɔyɔhɔde esit mi, enye ama ɔsuhɔre ubiak otode mme usen, ndien “ke esisit ini kiet, ŋkukut heaven ama [ɔbiɔŋɔre] ke iso mi.”

Ndusuk ekeme ndidi ema ebup fi oruk mbume emi. Ndusuk kpa idahaemi ke ebobup fi nte ekebupde mi.

Enɔ ye ntiense Edisana Spirit odu ɔnɔ kpukpru owo.

Jamaica edi ɔnɔ mi ukem se Palmyra ekedidi ɔnɔ Joseph Smith. Enye edi Edisana Ikɔt-eto mi. Ami mfiɔkke ata ebiet emi Joseph ɔkɔtɔŋɔde edɔŋ ɔboŋ akam ke Edisana Ikɔt-eto, edi ami mmɔfiok ata ebiet eke ami ŋkodude kini Edisana Ikɔt-eto mi ɔkɔwɔrɔde osu. Enye eketibe ke Four Grove Road, Mandeville, ke Jamaica, ke ufɔk uyere-mmɔŋ mi, ke ŋkanika itiokiet usenubɔk ke usen Wednesday kiet ke isua ita ebede tɔŋɔ ŋkena baptism ŋkure. Nsasana ifiɔk-ukpep emi eketibe koro ke urua iba ke edem eti ɔkwɔrɔ ikɔ eyeneka ŋwan kiet ama ɔdɔhɔ mi ete ŋkot Ŋwed Mormon. Sister Audrey Krauss oduk mbono emi mfin ye ufɔkemana Esie, ndien ami mme ma enye.

Ifiɔk-ukpep oro ama ɔkpuhɔ mi.

Nditɔ-eka irenowo ye iban, owo inɔhɔ ikɔ-ntiense ndida nnam utom ke esisit ini kpɔt. Enɔ emi otode Ete eke Heaven nnyin akana edi nsinsi koro andinɔ enye edi nsinsi. Ikɔ-ntiense idinyene ini emi enye edikurede. Enye idimemke mme ndinime ekpri koro ŋkpɔ ke uwem mi okpuhɔre mme ŋkpɔ ke ererimbot okpuhɔre. Enye ana akaiso ɔsɔŋɔ koro, kpa nte eyen-ufɔk oro ke ŋke-mbuk eke talents, ikɔ-ntiense idem mi edi enɔ emi anade nnam ɔtɔt—idighe ndibubuk enye.

Ke ndiwɔŋɔre enyin nse mkpɔsɔŋ usen idomo ye ukɔbɔ emi ami nkokutde nte enyen-ɔwɔŋ anwam mi ndisim ebiet emi ami ndifiɔkde idahaemi ke idem mi Ami nnimke ke akpanikɔ, ndorike-enyin, mme mbuɔtke-idem kpɔt, okposukedi emi edide ubak ŋkpɔ eke mbuɔtidem ke usuŋ ndibɔ ɔsɔŋɔ ntiense. Ami mmetoro mbufo ke ndinam usuŋ mbufo nto ndibup mbume, ndikpep, ndibɔŋ akam, ntre-udia ye ndikere ke esit. Mbɔk kutre. Oro odot ofuri ukeme ndibine usuŋ emi man ɔbɔ ikɔ-ntiense. Anie mme nso ke afo ediyak man emen oro efep? “Ewe akwa ntiense ke afo edinyene ekekande emi oto Abasi?”

Ofuri eyeneren ye eyen-aŋwan Abasi ekeme ndinyene ata ntɔtuŋɔ, ata ɔkpɔsɔŋ, ye ata ɔsɔŋɔ ifiɔk nnɔ idem mmɔ. Ukem nte Joseph Smith, emi ɔkɔsɔŋɔde ikɔ-ntiense esie kesioho ubiɔŋɔre, nnyin imikeme ndisɔŋɔ ntiŋ ete “Ami mma mfiɔk oro, ndien ami mma mfiɔk nte ke Abasi ɔfiɔk, ndien ami ŋkemeke ndikaŋ oro, nyuŋ ndomoke ndinam ntre.”

Ndima nditɔ-eka mi irenowo ye iban, eyak ekpri mkpasip ikɔ-ntiense anam utom ke esit fo tutu enye etibe esehe ekesim nsinsi ubɔŋ ɔsɔŋɔ ifiɔk

Edieke afo edide owo emi ekeduɔkde mmɔŋ enyuŋ esɔŋɔ nte owo Ufɔk Abasi Jesus Christ Mme Ndisana Owo ke Ukperedem Usen edi esuk eŋwa-ŋwana ye “ami ntimke mfiɔk mme ami mmɔfiɔk, mbɔk ti eŋwɔŋɔ emi ke akam udiaɔbɔŋ: “Man mmɔ enyene Spirit Esie edidu kpukpru ini ye mmɔ.” Oto ke eŋwɔŋɔ emi, nnyin kiet-kiet imikeme ndibine usuŋ ikɔ-ntiense ye eke ɔsɔŋɔ ifiɔk.

Idahaemi se akwa akpanikɔ mi: Ke usuŋ ekededi emi owo ɔbɔde ikɔ ntiense—ekpededi enye edi suŋ-suŋ nte usiahautin mme edi ke ediye ŋkukut—oro osuk oyoyom mbumek ndibɔ nsɔŋurua enɔ emi

Ndidɔhɔ ete“ ami mmemek ndinim ke akpanikɔ” anam oro edi mmem-mmem ndibɔ ntiense nto Abasi. Edieke afo okutde nte ikɔ-ntiense fo ɔsuhɔre, ti ete ke edi mbumek emi nnyin imekde ɔsuhɔre odudu ikɔ-ntiense. Edi ikɔ-ntiense ikaha baba ebiet kiet. Nnyin inyene ndimek nditɔŋɔ ntak nyiri ye ikɔ-ntiense oro.

Ndimek ndinim ke akpanikɔ edi akwa eti ye akwa usuŋ kiet ndida unen mbumek nnyin nnam utom.

Ami ŋkwe eti usuŋ efen eke ami mkpedade unen-mbumek mi nnam utom akan ami ndida enye mkpeme ikɔ-ntiense mi.

President Nelson ekpep ete: “Ami mbeŋe mbufo nte ekara ikɔ-ntiense mbufo. Enam utom eyom enye. Enyene enye. Ekpeme enye. Ebɔk enye man enye edikɔri. Nnɔ enye akpanikɔ.

Ke okim, mme ikɔ emi kara, utom, kpeme, da yene, kpeme, ye nɔ udia etie nte ndinɔ asaŋa-utom ubiɔŋ utom mbaŋa akpan ye nsɔŋurua ŋkpɔ.

Ke ini ntɔŋɔ Ufɔk Abasi, Parley P, Pratt ama okop iyatesit ye Prophet Joseph Smith onyuŋ emek nditiŋ idiɔk mbaŋa enye ye Ufɔk Abasi. Kini John Taylor emi Parley ekekpepde ikɔ Abasi ekedide obio, Parley ama ada enye ɔwɔŋɔre ada onyuŋ owuk enye ete okutiene Joseph. John Taylor ɔdɔhɔ Parley ete:

“Mbemiso afo ɔkpɔŋ Canada, afo ama etiŋ akwa ikɔ-ntiense abaŋa nte Joseph edide Prophet Abasi, … ndien afo ɔkɔdɔhɔ ete ke imɔ ifiɔk mme ŋkpɔ emi ito eriyarade ye enɔ Edisana Spirit.

“…Ami idahaemi mmenyene ukem ikɔ-ntiense emi ɔkɔnode fi inemesit ke ini oro. Edieke utom emi ekedide akpanikɔ ke ɔfiɔŋ itiokiet emi ebede, enye edi akpanikɔ mfin emi. Edieke Joseph Smith ekedide prophet ke ini oro, enye osuk edi prophet idahaemi.”

Ami nnɔ ntiense nte ke Joseph Smith ekedi prophet Abasi ndien ke ubiɔŋutom prophet emi enye ɔkɔbɔde ke akaka iso mfin emi. Jesus Christ ada usuŋ ke utom emi.

Ami ŋkot mbufo nte ekere ebaŋa usuŋ fo emi adade aka ɔsɔŋɔ ntiense eke Jesus Christ ye ikɔ-Abasi Esie. Kara ikɔ ntiense fo; kama unen mbumek fo ke eti usuŋ yuŋ fiɔk andinɔ enye ye kpukpru ndiye edu Esie. Ami ntie ntiense nte ke odudu oro odu ke esit idem fo. Iduhe owo ndomokiet emi ekemede ndimek nnɔ fi. Iduhe owo ndomokiet emi ekemede ndimen enɔ emi mfep. Afo emekeme ndimek ndinim ke akpanikɔ

Ami mmeŋwɔŋɔ ke nte afo anamde emi, ikɔ ntiense fo eyedi“odu-uwem obube mmɔŋemi asiahade aka nsinsi uwem” Enye eyedi ɔsɔŋɔ ye ntak, ndien enye eyekama fi ke mme ini afanikɔŋ. Enye eyeŋwam fi ndikɔri mme enɔ eke spirit. Enye eyeŋwam fi ke utom uŋwam eke idem fo. Enye eyedi ŋkpɔ-ekɔŋ ndida ŋwana Satan ye mme asua fo. Ikɔ-ntiense fo eyedi ŋkpɔ idara nte afo okutde enye ŋko ke idem nditɔ, nditɔ-nditɔ ye nditɔ eyeyen fo ye ke idem mbon emi afo amade onyuŋ anamde ŋkpɔ ɔnɔ. Enye eyenyene odudu kini afo abuanade enye ye ke adade enye etiŋ ikɔ-ntiense.

Edieke afo ɔfiɔkde, afo ɔmɔfiɔk. Ami mmɔfiɔk nte ke ami mmɔfiɔk. Nnyin imoyom ediwak ɔsɔŋɔ ntiense eke Jesus Christ ye ikɔ-Abasi Esie. Nam isaŋ sim do! Eyom enye! Oro edi ke usɔp! Emi edi akpatre emana—emana eke uyɔhɔ ini.

Jesus Christ okofiori akpanikɔ emi ete: “Enyɔŋ ye isɔŋ eyebe efep, edi ikɔ Mi idibehe ifep.”

Nditɔ-eka irenowo ye iban, ikɔ-ntiense Jesus Christ ikinaha nte edi enɔ eke esisit ini. Iduhe se ibaŋade enye emi edi eke mibighike—idihe andinɔ enye, idihe enɔ emi ke idem esie, idihe andida enɔ emi ndi, idihe owo emi enɔ emi abaŋade. Ekpekam etiŋ ebaŋa ikɔ-ntiense fo ke ukem usuŋ ntem. Okposuk ke “enyɔŋ ye isɔŋ eyebe efe,” ikɔ-ntiense ye ntiense fo abaŋade ikɔ-Abasi Jesus Christ idibehe ifep. Idahaemi edi ini ndimum nsɔŋurua enɔ emi nkama. Ke enyiŋ Jesus Christ, amen.