Lix Hu laj Mormon—jun xchaq’al ru maatan li maak’a’jo’ xnimal xloq’alil sa’ li qayu’am
Naq naqatzeka xsahil li raatin li Kristo li natawman sa’ lix Hu laj Mormon, li Musiq’ej tooxtenq’a chixtawb’al ru li junelikil yaal.
Ma jultik aawe jun maatan xak’ul li xjal laa yu’am? Chiru li po octubre a’in naxket kak’aal chihab’ chalen chaq naq kink’ul jun reheb’ li xnimal ru maatan sa’ lin yu’am. Naq wankin chaq sa’ li eskweel, kink’e reetal naq jun reheb’ li qech tzolonelil saqen li rilob’aal nak’utun chiruheb’ chixjunileb’ chik li saaj. Nawulak chaq chiwu wank chi nach’ rik’in a’an. Sa’ jun kutan kixye we naq a’an komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Toja’ naq kixk’e jun maatan we: lix Hu laj Mormon. Kixk’e inb’oqb’al chirilb’al junjunq perel ut chirix a’an xnawb’aleb’ ru wiib’ li ramiiw li naru neke’xsume inpatz’om. Eb’ li amiiw a’an, a’aneb’ li misioneer.
Naq kinnaweb’ ru li misioneer, ke’xk’ut chiwu lix tzolom li Kristo ut ke’xk’e inb’oqb’al chixtaaqenkil lix b’oqom li profeet aj Moroni: “Ut naq teekʼul li kʼaʼaq re ru aʼin, nawaj relajinkil cheru naq chepatzʼ re li Dios, li Junelik Yuwaʼbʼej, saʼ lix kʼabʼaʼ li Kristo, ma inkʼaʼ yaal li kʼaʼaq re ru aʼin; ut wi texpatzʼoq rikʼin xʼanchalil eechʼool, chi tiik eerajom, chi wank eepaabʼaal chirix li Kristo, aʼan tixkʼutbʼesi cheru li yaal chirix, rikʼin lix wankil li Santil Musiqʼej” (Moroni 10:4).
Kiwil naab’al perel sa’ lix Hu laj Mormon ut kintijok. Us ta toj maji’ nintaw ru chixjunil li k’a’aq re ru neke’xk’ut chiwu li misioneer, kiweek’a sa’ li waam naq li k’a’ru yookin chirilb’al chaab’il ut nachal chaq rik’in li Dios. Kich’ola xyaalal chiwu lix yeechi’ihom laj Moroni: “Rik’in lix wankil li Santil Musiq’ej naru teenaw li yaal chirix chixjunil li k’a’aq re ru” (Moroni 10:5).
Chirix naq kikub’e inha’ sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, junjunq reheb’ li wamiiw ke’xyal inq’unb’esinkil chixpaab’ankil naq moko us ta li xinb’aanu. A’b’anan, rajlal sut naq xinnumsi li ch’a’ajkilal a’an, xintaw xnawom inch’ool naq xwil li loq’laj hu ut naq xintijok re naq tinkanaaq chi tiik chiru xb’ehileb’ li sumwank li kin’ok wi’ rik’in li Dios. Chalen chaq a’an, lix Hu laj Mormon nikinrochb’eeni ut a’an jun maatan li maak’a’jo’ xnimal xloq’alil chiru li wanjik sa’ li ruchich’och’.
Lix Hu laj Mormon moko yal a’an ta jun hu. A’an jun chik ch’olob’anb’il esil chirix li Jesukristo, li tz’iib’anb’il xb’aaneb’ naab’aleb’ li najteril profeet rik’in xmusiq’ li profeetil aatin ut li k’utb’esinb’il na’leb’.
Li jun chi naʼlebʼ qʼaxal nim tzʼiibʼanbʼil resil saʼ lix Hu laj Mormon aʼan lix kʼulunik ut lix kʼanjel li Qaawaʼ Jesukristo saʼ xyanqebʼ laj Nefita, kaʼchʼin chik chirix lix waklijik chi yoʼyo. Lix Hu laj Mormon “naxkʼut xyaalal li tzolʼlebʼ re li evangelio, naxkʼut chi tzoltzo li kʼuubʼanbʼil naʼlebʼ re li kolbʼa-ibʼ, ut naxye rehebʼ li winq kʼaʼru tento teʼxbʼaanu re xkʼulbʼal li tuqtuukilal saʼ li yuʼam aʼin, ut li kolbʼa-ibʼ chi junelik saʼ li yuʼam toj taachalq” (Xtikib’ankil lix Hu laj Mormon).
Li xb’eenil lix Hu laj Mormon: Jun chik ch’olob’anb’il esil chirix li Jesukristo kipuktesiman sa’ jun ch’ina tenamit aran Nueva York sa’ li po marzo re 1830. Yal 23 chihab’ wan chaq re li profeet aj Jose Smith naq kixchoy xjaltesinkil ru li hu sa’ 1829. Haye’ kixchoy xjaltesinkil chixjunil li hu chiru 75 chi kutan, ut li risinkil chiru hu kib’ay wuqub’ po.
Sa’ li kutankil a’in, haye’ 80.000 li misioneer sa’ numenaq 150 chi tenamit yookeb’ chi k’anjelak chi maak’a’eb’ xtojb’al ut neke’xk’e lix yu’am re xch’olob’ankil xyaalal naq lix Hu laj Mormon tz’aqal yaal ut naq naxch’olob’ xyaalal li Jesukristo.
Sa’ li seminario reheb’ laj jolominel re mision sa’ li po junio re li chihab’ a’in, li Awa’b’ej Russell M. Nelson, kixwotz li xnimal xnawom xch’ool chirix lix Hu laj Mormon: “Lix Hu laj Mormon a’an li raatin li Dios. Chi sa’ a’an nak’utman lix tzol’leb’ li Kristo ut nach’olob’aman lix tojb’al rix li maak xb’aan li Kolonel jo’ maajun chik tz’iib’anb’il hu naxb’aanu.”
Nawaj xwotzb’al oxib’ li na’leb’ li naru nokohe’xtenq’a chixk’ojob’ankil xkawil li qajalajik chiru li Jesukristo rik’in xtzolb’al lix Hu laj Mormon:
1. Yalomaqe eeq’e ut k’ehomaq eech’ool chi tzolok rajlal kutan
Jo’ laj Alma ut eb’ li ralal laj Mosiah, tento “taqatz’ileb’ rix li loq’laj hu chi yalb’il qaq’e, re taaruuq taqanaw ru li Dios” ut tookawob’resiiq sa’ li yaal (Alma 17:2).
Naq wanko chaq chi k’anjelak jo’ aj jolominel sa’ li Mision Georgia Atlanta, li wixaqil ut laa’in kiqapatz’ reheb’ li misioneer naq te’ril lix Hu laj Mormon chiru 30 k’asal wulaj wulaj. Li teneb’ahom a’an kixnimob’resi li qapaab’aal ut kooxtenq’a chixsik’b’aleb’ ut chixyo’oninkileb’ li sachb’a-ch’oolej.
Maare ink’a’ chik naqataw li hoonal a’an chirix li qamision re xtzolb’aleb’ li loq’laj hu wulaj wulaj, a’b’an wi nekek’e sa’ xb’een na’ajej xtzolb’al lix Hu laj Mormon rik’in tijok wulaj wulaj, teetaw xnimal eekawilal sa’ musiq’ej ut xkawilal eech’ool rik’in li Qaawa’ ut rik’ineb’ lix yeechi’ihom.
2. Tzekahomaq xsahil li raatin li Kristo re naq wanq xyaalal li tzolok nekeb’aanu
Laj Nefi naxye, “Chetzeka xsahil li raatin li kristo; xb’aan naq k’ehomaq reetal, li raatin li Kristo tixye eere chixjunil li k’a’aq re ru tento teebaanu” (2 Nefi 32:3).
Xtzekankil xsahil ink’a’ naraj naxye yal rilb’al—naraj b’an naxye xtz’ilb’al rix ut xyu’aminkil. Naq neketzol lix Hu laj Mormon, k’ehomaq chan ru naru nekek’e xyaalal li tzolok nekeb’aanu sa’eb’ li loq’laj hu. Qayehaq:
-
Naru nekeroksiheb’ li k’anjeleb’aal neke’tawman sa’ li aplicacion Biblioteca del Evangelio.
-
Naru nekek’eheb’ reetal li junelikil yaal li nokohe’xtenq’a chixtawb’al ru lix na’leb’ li Dios ut li neke’k’amok qe chi ok sa’ sumwank rik’in li Dios.
-
Naru nekejuch’ li ch’ol aatin wankeb’ xyaalal choq’ qe ut xtz’iib’ankil li na’leb’ naxk’e sa’ qak’a’uxl li Musiq’ej re xk’uulankil resil li naqatzol.
Lix Hu laj Mormon wan xwankilal re xsumenkileb’ lix patz’om li qach’ool. Laj Nefi kixye, tento “taqajuntaq’eeta chixjunileb’ li loq’laj hu qik’in, re naq taawanq choq’ re qachaab’ilal ut qatzolb’al” (1 Nefi 19:23).
Naq naqatzeka xsahil li raatin li Kristo, li raatin tixte rokeb’aaleb’ chaq li k’utb’esinb’il na’leb’ ut tixk’ut chiqu li k’a’ru tento taqab’aanu sa’ jalan jalanq xhoonalil li qayu’am re nach’ok rik’in a’an chi us.
3. Wotzomaq lix nawom eech’ool chirix lix yaalalil lix Hu laj Mormon
Jo’ naq laj Lehi kiraj xwotzb’al li ru li che’ re li yu’am rik’in lix junkab’al (chi’ilmanq 1 Nefi 8:12), naq naqataw xnawom qach’ool chirix lix Hu laj Mormon, nak’i li qajom re xwotzb’al li sahilal li nachal sa’ xk’ab’a’ xnawb’al lix evangelio li Jesukristo.
Jun reheb’ li qamisioneer, li Hermana Benson, li wan sa’ li ch’utub’aj-ib’ anajwan, kixye we naq naraj xtenq’ankil li riitz’in. Sa’ li hoonal a’an, li riitz’in yoo chaq chixkawresinkil rib’ re xik sa’ li universidad ut ink’a’ naxpatz’ xik sa’ li mision. Kiweek’a naq tink’e xb’oqb’al li Hermana Benson chirilb’al lix Hu laj Mormon chiru kaahib’ po sa’ xtiklajik lix mision, ut chixjuch’b’aleb’ li raqal neke’wulak chiru ut chirix a’an tixtaqla lix Hu laj Mormon a’an re li riitz’in.
Li Hermana Benson kixtaqla lix Hu laj Mormon li juch’inb’il xsa’ re li riitz’in re naq li riitz’in taaril wulaj wulaj sa’ q’ojyin. Chirix chik a’an kixye we: “Rub’elaj lin mision, li wiitz’in ink’a’ naxnaw ma naraj xik sa’ jun mision. Chi ka’ch’inq, rik’in xnumik li hoonal, naq yoo chaq chirilb’al lix Hu laj Mormon, kixtaw xnimal tuqtuukilal sa’ lix yu’am ut kixtikib’ xk’oxlankil xik sa’ jun mision.”
Wiib’ xamaan chik ma naraqe’ lix mision li Hermana Benson, li riitz’in kixk’ul lix b’oqb’al re xik sa’ jun mision. Anajwan yoo chaq chi k’anjelak sa’ li Mision Mexico Tuxtla Gutiérrez. Rik’in lix Hu laj Mormon, laj Elder Benson kixtaw xyaalal lix yu’am sa’ musiq’ej, li kik’amok re chi xik chi k’anjelak chiru li Qaawa’ ut chixyo’oninkil naq us taa’elq chixjunil. Sachb’a-ch’oolej li kixb’aanu—ut k’eeb’il chi uxmank rik’in lix wankilal li raatin li Kristo.
Ex was wiitz’in, nekexinb’oq chixtz’ilb’al rix lix Hu laj Mormon. Naq naqatzeka xsahil li raatin li Kristo li natawman sa’ lix Hu laj Mormon, li Musiq’ej tooxtenq’a chixtawb’al ru li junelikil yaal ut chixwotzb’al chi anchal qach’ool lix nawom qach’ool rik’ineb’ li ani kawresinb’ileb’ xb’aan li Qaawa’ re naq te’rab’i li raatin a’an. Li Qaawa’ kixye, “Li sik’b’ileb’ ru inb’aan neke’rab’i lix yaab’ inkux ut ink’a’ neke’xkawob’resi li raameb’” (Tzol’leb’ ut Sumwank 29:7). Ninch’olob’ xyaalal naq li ani neke’patz’ok chiru li Dios rik’in paab’aal te’xtaw xnawom xch’ool chirix lix yaalalil ut lix choxahilal lix Hu laj Mormon rik’in xwankil li Santil Musiq’ej. Ninch’olob’ xyaalal a’in sa’ xk’ab’a’ li Jesukristo, amen.