Anajwan nin’ilok chik

Rik’in rahok naqaka’suti li raatin li Awa’b’ej Oaks chirix lix kamik li Awa’b’ej Russell M. Nelson. Ut rik’in rahok, ut chi ra qach’ool, naqak’oxlaheb’ li rahilal aran Michigan toje’, ut li rahilal na’ux sa’ ruchich’och’ wulaj wulaj. Naqak’oxlaheb’ li k’a’aq re ru a’in rik’in rahok ut paab’aal chirix li Qaawa’ Jesukristo.

Sa’ xb’ele ch’ol lix hu laj Jwan naxye resil naq li Jesus ut eb’ lix tzolom ke’nume’ chiru jun laj lemoox li mutz’ chalen chaq xyo’lajik. Aran eb’ lix tzolom li Jesus ke’ok chixtz’ilb’al rix jar paay chi musiq’ejil na’leb’ ut chixpatz’b’al k’a’ut naq mutz’ kikana li winq a’an. Li xnimal ru aj K’utunel kichaq’ok rik’in xb’aanunkil yal jun li ch’ina na’leb’. Kichuub’ak sa’ ch’och’ ut kixyu ru re xyiib’ankil b’ayaq li seb’. Toja’ naq kixyul xsa’ ru li winq rik’in li seb’, ut kixye re naq tixch’aj rib’ sa’ li Ha’ Siloe. Li mutz’ kixpaab’ li k’anjel a’an ut “na’ilok chik naq kisutq’i chaq,” chan li loq’laj hu. K’a’jo’ xnimal ru li reetalil li yaal chiru li rajomeb’, raatineb’, malaj xjosq’ileb’ li neke’raj xsachb’al li yaal.

Wankeb’ li ke’xxuwa naq li sachb’a-ch’oolej a’in tixk’e xwankilal li Jesus chirisinkileb’ sa’ xk’anjel, jo’kan naq li xik’ neke’ilok re li Kolonel ke’ok chi patz’iink rik’in li winq li xk’iraak chaq ut rik’in josq’il ke’xye, “Naqanaw naq [li Jesus], a’an aj maak.” Chirix naq li winq xrab’iheb’ junpaataq, kixye, “Wi a’an aj maak, ink’a’ ninnaw laa’in. Jun ajwi’ li ninnaw chi us: mutz’in naq xinwan ut anajwan nin’ilok chik.”

Li Jesus kixtikib’ xch’olob’ankil li na’leb’ a’an naq kixye reheb’ lix tzolom naq ki’ux li k’irtesiik a’an “re naq lix nimal xwankil li Dios taak’utb’esiiq.” K’ehomaq reetal naq wiib’ sut sa’ li esilal a’in nayeeman naq li Jesus “kixyul”xsa’ ru li winq, ut naq li yuluk nachoye’ rik’in li ch’ajok. Naq li esilal naxye naq “lix nimal xwankil li Dios taak’utb’esiiq,” maare naraj naxye naq ok re chi b’aanumank jun li k’ojob’anb’il k’anjel.

Jun reetalil chik li tz’aqal yaal, a’an naq laj yiib’ahom re li choxa ch’och’ kik’anjelak rik’in tz’aqal xyiib’ahom: a’an li chuub’ ut li ch’och’! Li ch’uub’ ut li ch’och’ naxk’ut chiqu naq li Dios naru toorosob’tesi rik’in yalaq k’a’ru naraj. Chanchan laj Nahaman li ink’a’ naraj atink sa’ li Nima’ Jordan malaj li ralal xk’ajoleb’ aj Israel li ink’a’ ke’raj rilb’al li k’anti’ k’ochob’anb’il chiru li xuq’, wan naq laa’o naqatz’eqtaana li qakolb’al xb’aan naq yal ka’ch’in li nachal wi’.

A’ut naqak’e ajwi’ reetal sa’ lix Hu laj Mormon naq wan li na’leb’ saqen ru ut loq’, ut naq rub’elaj lix yo’lajik li Jesus, eb’ li profeet ke’xye naq “moko ch’ina-us ta taa’iloq chi moko wanq xloq’al; maak’a’aq junaq k’a’ tawi’ ru tqak’e wi’ xwankil.” Ak re li Dios naq naxtaqla chaq jun li loq’laj esil rik’in jun li ak’ Presidenta re li Komonil re Tenq’ank li yoo xk’a’uxl, malaj jun li ch’ajom aj awinel maak’a’ xtzolb’al, jun misioneer toje’ xtikib’ xk’anjel, malaj jun li k’uula’al sa’ xwa’leb’aal xul.

Ma taanaw k’a’ru taab’aanu wi li Dios naxtaqla chaq jun laa tenq’ li moko nimob’resinb’il ta, malaj ink’a’ jwal saqen ru? Ma wan aach’ool chixyalb’al aaq’e sa’ lix evangelio li Kristo us ta k’iila sut taaraj li chuub’ ut li ch’och’? Maare ink’a’ taqanaw k’a’ru aj-e li yooko chixk’ulb’al, ut wan naq chiqajunilo taqaj xyeeb’al raatin jun li cheek’el ixq, li kixye: “Qaawa’, ma ink’a’ taak’e we jun li wosob’tesinkil li ch’olch’o ru?”

Ab’i resil jun chik li na’leb’ li k’utk’u xyaalal, a’an jun na’leb’ chirix li loq’laj tijonelil. Naq kixtz’iib’a resil chan ru kiwakli chaq li najter Iglees, laj Lukas kixye, “Naq kixch’utub’eb’ li kab’laju, li Jesus kixk’eheb’ xkawilal ut xwankileb’.”Ink’a’ nak’eeman li maatan a’an sa’ xk’ab’a’ lix tzolb’aleb’, lix wankilaleb’ sa’ li tenamit, chi moko lix xe’toonileb’. Ink’a’ nak’eeman li maatan a’an sa’ jun li nimla tzoleb’aal choq’ reheb’ aj jolominel iglees. Nak’eeman ka’ajwi’ rik’in xk’eeb’al li uq’ej xb’aan li ani ak xk’ul ajwi’ li uq’ej sa’ xb’een, chalen chalen rik’in tz’aqal xyo’leb’aal li wankilal, a’an li Qaawa’ Jesukristo.

Ut sa’ jun li Iglees b’ar wi’ wan qana’leb’ chirix li uxtaan, ma ink’a’ raj taak’utunq li yaal rik’in naq li osob’tesiik ut li sumwank neke’wulak ajwi’ rik’ineb’ li qakamenaq, a’aneb’ li qakomon li ak xikenaqeb’? Ma us raj naq te’xk’ul tojb’a-maak yal xb’aan naq maak’a’ li evangelio sa’ xyanqeb’ malaj xb’aan naq ke’yo’la naq toj maji’ wankeb’ li loq’laj k’anjel ut li sumwank chixsutameb’? Lix iglees li Jesukristo reheb’ laj Santil Paab’anel sa’ Roso’jikeb’ li Kutan narosob’tesiheb’ li santil ochoch sa’ xk’ab’a’ li Qaawa’ re naq taab’aanumanq xk’anjel li kolb’a-ib’ sa’ xk’ab’a’eb’ li kamenaq, ut naxb’aanu ajwi’ li loq’onink ut li loq’laj k’anjel choq’ reheb’ li yo’yo. Li ninnaw laa’in, a’an naq li eetalil a’in chirix lix na’leb’ ut lix rahom li Qaawa’ choq’ reheb’ li kamenaq jo’ ajwi’ li yo’yo ink’a’ natawman sa’ xyanqeb’ laj Kristiano—ka’ajwi’ sa’ jun ajwi’ li iglees li naxk’utb’esi li na’leb’ a’an, a’an Lix Iglees li Jesukristo reheb’ laj Santil Paab’anel sa’ Roso’jikeb’ li Kutan.

Xb’een sut naq laa’in kink’irtesiik naq yoo chi k’utb’esiik chiwu li tz’aqal yaal, ink’a’ kink’ul rik’in yuluk seb’ chi moko sa’ li ha’ Siloam. A’b’an li kiroksi li Qaawa’ re ink’irtesinkil, a’an yal perel hu, relik chi yaal, a’an lix Hu laj Mormon! Li na’leb’ ch’olob’anb’il chirix li hu a’in naxk’ul xwech’b’al rik’ineb’ li ink’a’ neke’paab’an, ut wan naq juntaq’eeteb’ xjosq’il rik’ineb’ li ke’xye re li mutz’ naq moko yaal ta li k’irtesiik li kixnaw naq ak kixk’ul chaq.

Wankeb’ li neke’xye we naq li k’a’ru kichal wi’ li hu a’an ink’a’ naru, yal b’alaq’, xutaanal ajwi’, ut naxmux li santilal. Jwal kaw li aatin a’an neke’xye, us ta elajik te’xnaw k’a’ru kichal chaq wi’ li hu a’an, xb’aan naq yal jun esilal wan li naxch’olob’ k’a’ru kichal wi’, a’an li aatin li naxye naq kichal rik’in “lix maatan ut lix wankilal li Dios.” Ka’ajwi’ a’an. Us ajwi’ a’an. A’b’an li wankilal xink’ul xb’aan lix Hu laj Mormon sa’ lin yu’am, a’an jun sachb’a-ch’oolej chanchan ajwi’ li chuub’ ut li ch’och’ li xyule’ chiru xsa’ ru li mutz’. A’an jun li ch’iich’ ninchap wi’ wib’, jun li k’utb’esinel saqen li na’ok sa’ waam ut li nikinxtaqsi sa’ choxa. Naxsaqenob’resi ru lin b’e naq nachal li q’ojyin ruhil choql. Ut tz’aqal yaal naq nachal a’an sa’ lin yu’am.

Ut xb’aan naq kixk’e chiwil lix rahom ut li ruxtaan laj Kolol we, ninwotz eerik’in lin nawom. Lix na’ xyuwa’ li winq li kik’irtesiik ke’xye naq taa’ab’iiq raj raatin a’an xb’aan naq “ak wan xchihab’.” Jo’kan ajwi’ laa’in. Naru xpaab’ankil raatin li winq a’an xb’aan naq ak wan xchihab’. Jo’kan ajwi’ laa’in. Wiib’ po chik ma ninket 85 chihab’. Ak kamk chaq we a’ut toj yo’yookin. Ak kinb’eek rik’ineb’ li rey ut li profeet, rik’ineb’ li awa’b’ej ut li apostol. Ut li jwal chaab’il, a’an naq wan naq nanumta xsachsookil inch’ool xb’aan lix Santil Musiq’ li Dios. Nink’oxla naq taa’oxloq’iiq b’ayaq li aatin ninye.

Anajwan ut, ex was wiitz’in, junxil kin’ok chixnawb’al chi anchal inch’ool naq Lix Iglees li Jesukristo reheb’ laj Santil Paab’anel sa’ Roso’jikeb’ li Kutan naxk’ojob’ wi’chik li najter Iglees re li Ak’ Chaq’rab’—ut wan xkomon chik— xb’aan naq ink’a’ kinru chixtz’eqtaanankil xyaalal lix k’ojlajik chi ak’il. Chirix naq kink’ul lin nawom a’an junxil, ak kink’ul mil sut chik—maare lajeeb’ mil—xkomon chik innawom naq tz’aqal yaaleb’ li na’leb’ li kin’aatinak wi’ anajwan. Jo’kan naq jwal sa lin ch’ool chirochb’eeninkil li wamiiw aj Jerusalen, b’ar wi’ ninb’icha li aatin a’in chi yal ka’ch’in xyaab’ inkux:

Sa’ xk’ab’a’ li Jesukristo, amen.