Ayu ut jo’kan ajwi’ chab’aanu laa’at

Maare 91 chihab’ ma na’yola li Kristo, laj Ammon, jun misioneer sa’ lix Hu laj Mormon, kixye re li rey aj Lamoni, “Nawaj wank saʼ xyanqebʼ li tenamit aʼin chiru jun kʼamok; … [ut] tinwanq … choqʼ aamoos.” Xb’aan naq li tenq’ank kixb’aanu choq’ re li rey, laj Ammon kiru chi “aatinak chi kaw xchʼool, … ut kixye [re li rey aj Lamoni] … k’a’ru chi wankilal” kixb’aanu wi’ li tenq’ank a’an. Re xq’ajkamunkil, li rey kixye naq “yalaq k’a’ru naraj [laj Ammon] … [li rey] tixk’e re.” Laj Ammon ka’ajwi’ kiraj naq li rey taarab’i resil lix evangelio li Jesukristo. Lix tenq’ laj Ammon kixk’ameb’ “li aamej chi milebʼ saʼ li jalbʼa-kʼaʼuxlej.”

Sa’ li qakutan, li tenq’ank toj naxk’ameb’ li qas qiitz’in sa’ li evangelio. Li Hermana Bevan yoo chaq chi k’anjelak jo’ misioneer naq kiyajer, jo’kan naq ki’ajman naq taasutq’iiq sa’ rochoch re naq taab’ane’q. A’b’an ink’a’ kiraqe’ xk’anjel, toj kiru b’an chi k’anjelak sa’ xtenamit jo’ misioneer aj tenq’anel.

Naq yoo chi b’eek sa’ jun li parque, li Hermana Bevan ut li ramiiw ke’eek’asiik xch’ool chi aatinak rik’in jun na’b’ej ut lix kok’al kaahib’eb’, a’ut ke’wiib’an xch’ool, ut kinume’ li junkab’al. Wulajaq chik, ke’sutq’i sa’ li parque ut neke’tijok sa’ xch’ooleb’ re xpatz’b’al naq te’ril wi’chik li junkab’al aran. Sachb’a-ch’oolej naq ke’ril wi’chik li na’b’ej sa’ tz’aqal li na’ajej ak ke’ril chaq wi’. Aran ut, li Hermana Bevan ut li ramiiw ke’xk’e xsahil xch’ool li ixq, ke’raatina, ut ke’xnaw naq jwal wan sa’ aajel ru. Ke’xtenq’a, toja’ naq ke’xb’oq chi tzolok chirix li evangelio.

Sa’ xk’ab’a’ li tenq’ank ut li b’oqok ke’xb’aanu, li na’b’ej ut li ralal asb’ej ke’kub’e xha’, jo’ ajwi’ jun chik reheb’ li kok’al sa’ li chihab’ jun chik. Toj yookeb’ chi wulak sa’ li iglees. Li Hermana Bevan kixnaw naq a’an li Dios li kimusiq’ank re, ut kixk’e reetal “naq kiwan tz’aqal b’ar naraj li Dios naq twanq.”

Jo’ ke’xb’aanu laj Ammon ut li Hermana Bevan, naq naqatenq’aheb’ li qas qiitz’in, “chaabʼil li qabʼaanuhom li naqakʼut chiruhebʼ,” jo’kan naq neke’raj xnawb’al “xyaalal li oyb’enink [li] wan qik’in.”

Li Jesukristo nokoxb’oq ut naxye, “Ayu ut jo’kan ajwi’ chab’aanu laa’at.”

Li Awa’b’ej Russell M. Nelson kixtz’aama naq “chixjunileb’ li saaj winq li k’ulub’ejeb’ … te’xkawresi rib’ ut te’xik sa’ mision,” ut naq li junjunq chi saaj ixq “taatijoq re tixnaw ma naraj li Qaawa’ naq taaxik sa’ mision.” Kixye naq “lee rajom chi k’anjelak sa’ mision, ma re jultikank aatin malaj re tenq’ank, texrosob’tesi laa’ex ut k’iheb’ chik.” Eb’ li misioneer aj tenq’anel neke’xk’ut xyaalal naq yalaq ani naru nak’anjelak. Anajwan chixjunileb’ li saaj winq ut ixq li k’ulub’ejeb’ ut li neke’raj, naru neke’k’anjelak sa’ mision chiru li Qaawa’, ka’ajwi’ junjunqeb’ ink’a’.

Laj Elder Holgado, a’an jun reetalil naq naru took’anjelaq sa’ mision maak’a’ naxye chan ru wanko. A’an kiyo’la rik’in jun yajel genetico li naramok re chi k’anjelak jo’ misioneer aj k’utunel. Laj Elder Holgado kib’oqe’ chi k’anjelak jo’ misioneer aj tenq’anel ut kik’anjelak sa’ xk’uuleb’aal kab’l li obiisp, b’ar wi’ kixtenq’a naab’al li kristiaan. A’an kixkawresi li k’uuleb’aal, kixk’e li tzakemq sa’ boolx, ut kixteniheb’ li karton.

Naq laj Elder Holgado ki’aatinak sa’ li ch’utam re li loq’laj wa’ak chirix xraqik lix mision, kixye naq “li Dios narajeb’ ru li misioneer aj tenq’anel. Naraj naq taqara li qas qiitz’in ut took’anjelaq chiruheb’. Eb’ li misioneer a’in neke’xk’uula li papel higienico, neke’xk’e li tzakemq sa’ boolx, neke’xyiib’ li meex, ut q’uneb’ xch’ool rik’ineb’ li ras riitz’in.”

Ink’a’ na’ajman naq k’eeb’ilaq aataqlankil malaj laa placa re naq taab’aanu li us. Chixjunil laa k’anjel, li Kolonel naxk’e reetal. Naqatenq’aheb’ li qas qiitz’in chi chalk rik’in li Kristo naq nokok’anjelak chi q’un qach’ool. Chiqajunilo naru naqatenq’a anihaq sa’ xk’ab’a’ li Kristo ut rik’in lix wankil li Santil Musiq’ej, ut naru naqak’ut qapaab’aal chirix li Jesukristo. Li tenq’ank nokoxkanab’ chixk’utb’al qib’ jo’ yo’yookil mayej k’ulub’anb’il chiru li Dios.

Li Jesukristo nokoxb’oq ut naxye, “Ayu ut jo’kan ajwi’ chab’aanu laa’at.”

Jun saaj misioneer li yoo chaq chi k’anjelak kinumsiik chi k’anjelak jo’ misioneer aj tenq’anel kiwan xch’a’ajkilal ut kiraj ru k’irtesiik xb’aan lix wankil li Kristo. Li tenq’ank chi anchal xch’ool kixk’e li wankilal a’an re. Chan a’an, “Kiweek’a naq sa’ xyi lin ch’a’ajkilal, kiweek’a li Kristo chinwaklesinkil. Jwal ch’ina-us rilb’al naq li Qaawa’ naxtenq’aheb’ li kristiaan sa’ li k’uuleb’aal tzakemq, sa’ li santil ochoch, ut rik’in lix evangelio.”

Kiniman xsahil xch’ool li misioneer a’in, ut chi jo’kan ki’osob’tesiik a’an rochb’een lix junkab’al. Li Musiq’ej kikana sa’ rochocheb’, ke’wulak sa’ li santil ochoch chi kok’ aj xsa’, ut jwal ke’xjayali wi’chik li Kristo sa’ xjunkab’aleb’. Li misioneer a’in naxpaab’ naq li Kristo kixkol lix yu’am ut kirosob’tesi lix junkab’al sa’ xk’ab’a’ li k’anjel naxb’aanu.

Li Awa’b’ej Nelson kixye, “Naq wan qach’ool chixtenq’ankil ut chixkawob’resinkil li qas qiitz’in, nak’utman xyaalal li qajom chi k’irtesiik” xb’aan lix wankil li Kolonel re xtojb’al qix.

Li Jesukristo nokoxb’oq ut naxye, “Ayu ut jo’kan ajwi’ chab’aanu laa’at.”

Naq nakatb’oqe’ malaj jun laa komon nab’oqe’ chi k’anjelak jo’ misioneer aj tenq’anel, chisaho’q sa’ aach’ool. Wanq chik sa’ laa junkab’al jun laj k’anjel li naruuchila li Qaawa’ Jesukristo. A’an texxwaklesi chejunilex. Maajo’q’e raj taapo’q qach’ool chirix junaq paay chi k’anjel naqak’ul. Jun li qab’ich naxye, “Tinxik bʼar taawaj naq tinxik” ut “Li bʼarwan taawaj tinbʼaanu.” Xk’ulub’ankil li k’anjel jo’ misioneer aj tenq’anel naxk’ut naq tz’aqal yaal li aatin naqab’icha!

Naqaye eere chejunilex li nekexk’anjelak, ut reheb’ ajwi’ li 4.000 chi saaj misioneer aj tenq’anel, nekexqara! Wi naqaye naq li misioneer aj k’utunel neke’k’anjelak jo’ xtz’uumal re li Qaawa’, taqaye naq li misioneer aj tenq’anel a’aneb’ li ruq’ li Qaawa’, ut moko kub’enaq ta xloq’aleb’ jo’ misioneer. Aajel eeru chejunjunqalex sa’ xch’utub’ankil Israel. Li Awa’b’ej Nelson kixye naq “yalaq jo’q’e naq naqab’aanu k’a’ruhaq li natenq’ank re yalaq ani … chi ok sa’ sumwank rik’in li Dios, yooko chi tenq’ank chixch’utub’ankil Israel.”

Jalan jalanq li nekeb’aanu laa’ex jo’ misioneer aj tenq’anel re xch’utub’ankil Israel, ut lee k’anjel naxjal xyu’ameb’ lee ras eeritz’in. Wan naq ink’a’ nekenaw ani na’osob’tesiik xb’aan lee k’anjel, a’b’an li Dios naxnaw. Chijultiko’q eere naq “jo’ch’inal jo’nimal [xexk’anjelak] chaq chiruheb’ lin kok’ iitz’in, … chiwu laa’in [xexk’anjelak] chaq.” Naqab’i lix yaab’ eekux naq nekek’e hoonal sa’ li centro de llamadas re li Iglees; naqil lee se’ naq nekextenq’an sa’ tenamit; ut naqek’e reetal lee saqen naq nekexk’anjelak sa’eb’ li santil ochoch. Nekek’e chi wa’ak li neke’tzokaak, neketiqib’ li t’ust’u, ut nekek’e chi uk’ak li neke’chaqik re.

Yo’oqeb’, “ut jo’kan ajwi’” chiqab’aanu laa’o.

Li tenq’ank naru tixte xch’ooleb’ li kristiaan re naq te’rab’i li evangelio, ut nokoxtenq’a chixq’axtesinkil chixjunil qach’ool re li Kristo. Li tenq’ank naxjal li qaam re naq chanchanaqo li Kristo, ut chi jo’kan naqawaklesiheb’ li qas qiitz’in. Li Awa’b’ej Nelson kixpatz’, “Sa’ li ruchich’och’ a’in li nalub’ub’nak sa’ musiq’ej, ma wan qawankil … chixjalenkil?” “Hehe’, naru!” chan. “Lix tenamit li Qaawa’ re li sumwank, … li kawresinbʼil … rikʼin lix wankil li Dios saʼ nimla loqʼalil” … naru chixwaklesinkil lix yu’am chixjunileb’.” Rik’in li tenq’ank, naqajaleb’ li aamej—ut li ruchich’och’.

Li Jesukristo kinume’ yalaq b’ar chixb’aanunkil li us. Kirileb’ li yaj, kixk’eheb’ chi ilok li mutz’, ut kirula’aniheb’ li ch’a’ajkilanb’il. A’an kixk’uub’ li tzakemq, kitenq’an sa’eb’ li ninq’e re li sumlaak, ut kixk’eheb’ chi wa’ak k’iila mil li yookeb’ chi tzokaak. Naq naqatenq’a li qas qiitz’in chi junjunqil sa’ xk’ab’a’ li Kristo, naniman qasantilal ut qak’ulub’ chixk’ulb’al li maatan re li junelik yu’am. Yo’yo li Jesukristo. A’an aj Kolol aawe ut aj Kolol we. A’an aj Tojol qix. A’an naxk’ut chiqu chan ru rilb’al li qas qiitz’in. Yo’oqeb’ ut jo’kan ajwi’ chiqab’aanu laa’o. Sa’ xk’ab’a’ li Jesukristo, amen.