B’aanu laa k’anjel chi anchal aach’ool

Li k’a’ru kinb’aanu sa’ li simulador kik’anjelak we re xjultikankil naq re naq chaab’ilaqo chixb’aanunkil k’a’ruhaq—maare xch’e’b’al li so’sol ch’iich’, ch’e’ok jukub’, b’ojok, malaj yal xnawb’al k’a’ruhaq—naraj ru li kawil ch’oolej ut li yalok q’e.

Naru nakanumsi k’iila chihab’ chixtawb’al junaq aaseeb’al malaj chixchaab’ilob’resinkil junaq laa maatan. Maare tatk’anjelaq chi jwal kaw toj reetal naq taakanaaq choq’ xcha’al laa yu’am. A’b’an wi nakak’oxla naq a’an naraj naxye naq taakanab’ xchaab’ilob’resinkil ut xtzolb’al, chi ka’ch’inq taa’oso’q laa nawom ut laa seeb’al li xataw chaq junxil rik’in xyalb’al aaq’e.

Nak’anjelak a’in rik’ineb’ li seeb’al jo’ li xtzolb’al junaq chik aatinob’aal, xch’e’b’al junaq li k’anjeleb’aal re son, ut xch’e’b’al li so’sol ch’iich’. Nak’anjelak ajwi’ rik’in li wank choq’ xtzolom li Kristo.

Sa’ wiib’ oxib’ li aatin, li wank choq’ tzolom naraj ru li yalok q’e.

Moko a’an ta li yalok q’e yal nachal, ut moko yal nak’ulman ta.

Li paab’aal chirix li Jesukristo a’an jun maatan, a’b’an xk’ulb’al a’an tento taqasik’ ru chi kok’ aj xsa’ b’ar wi’ naqaj ru xteneb’ankil qib’ chi anchal “qametz’ew, qak’a’uxl, ut qakawilal.” A’an jun k’anjel re wulaj wulaj. Rajlal hoor. Naraj ru li tzolok chi kok’ aj xsa’ ut jun k’ojob’anb’il ch’oolej. Li qapaab’aal, malaj li qatiikilal chiru li Kolonel, nakawu naq nayale’ qix rik’in li ch’a’ajkilal naqanumsi sa’ li qayu’am sa’ ruchich’och’. Ut li qapaab’aal nakana chi junelik xb’aan naq naqach’oolani, naqoksi rajlal, ut ink’a’ naqakanab’ qib’ chi t’ane’k.

A’ut, wi ink’a’ naqoksi li paab’aal ut lix wankilal aj q’unb’esinel, na’ok chi sachk sa’ qach’ool li k’a’ru sant chaq choq’ qe—na’ok chi sachk sa’ qach’ool li k’a’ru yaal chaq choq’ qe.

Li aaleek li maajun wa neke’qak’ulub’a chaq neke’ok chixq’unb’esinkil qach’ool ut noko’ok chixk’oxlankil naq maare moko yib’eb’ ta ru.

Lix xamlel li xnawom ch’oolej li wan chaq ewer moko tooxtiqwasi ta chiru naab’al chik li kutan. Naraj ru ch’oolaniik re naq toj taawanq chi tz’ab’tz’o.

Sa’ li Ak’ Chaq’rab’, li Kolonel kixk’ut jun jaljookil ru aatin chirix jun aj jolominel li kixk’e reheb’ lix moos jun loq’laj teneb’ahom—a’an li tumin li talento k’ab’a’inb’il. Li moos li ke’roksi chi ch’olch’o lix talento kitam li talento chiruheb’. Li moos li kixmuq lix talento kisach lix talento chiru.

K’a’ru li na’leb’ naxk’ut a’an? Li Dios naxk’e qamaatan—li nawom, li seeb’al, li hoonal—ut naraj naq te’qoksi a’an ut te’qachaab’ilob’resi re naq toohe’rosob’tesi laa’o ut xkomoneb’ chik li ralal xk’ajol a’an. Moko nak’ulman ta a’an wi neke’qak’uula li maatan a’an jo’ jun trofeo li nawulak chiqu rilb’al jo’q’ehatq. Li qamaatan neke’k’anjelak ut neke’k’i ka’ajwi’ naq neke’qak’e chi k’anjelak.

Maare taaye, “A’b’an Elder Uchtdorf, maak’a’ inmaatan chi moko inseeb’al—maare wan, a’b’an maajun reheb’ a’an aajel ru.” Maare nakawileb’ laa komon li neke’k’utun lix maataneb’ chi saqen ut chi k’a’jo’ xchaq’al ru, ut taaweek’a naq yal maak’a’ aawankil ut maak’a’at aj-e sa’ xyanqeb’ a’an. Maare taak’oxla naq sa’ li yu’am rub’elaj a’in, sa’ li kutan naq ke’k’eeman li maatan ut li seeb’al, yal maak’a’ wan sa’ laa sek’—mas wi’chik naq nakajuntaq’eeta a’an rik’ineb’ li sek’ nujenaqeb’ ut numtajenaqeb’ xsa’ ke’xk’ul xkomoneb’ chik li kristiaan.

K’a’jo’ raj naq nawaj aaq’alunkil ut aatenq’ankil chixtawb’al ru li xnimal ru yaal a’in: Laa’at loq’laj yo’yookil saqen, xmusiq’ejil alal li Dios li maak’a’ roso’jik! Ut k’a’jo’ wi’chik xnimal laa seeb’al chiru li naru nakak’oxla laa’at.

Jo’ neke’xye laj utzu’ujinel aatin, laa’at nakatchal sa’ li ruchich’och’ “rik’in choxahil saqen”!

Li resilal li na’ajej nakatchal wi’ chaq k’a’jo’ xchaq’al ru, jo’ ajwi’ li na’ajej tatwulaq wi’. Kaakanab’ chaq li choxa re chalk arin, a’b’an maajun wa kanab’anb’ilat xb’aan li choxa.

Yalaq k’a’ru naru nakatwulak chixb’aanunkil, maak’oxla naq yal maak’a’at aj-e.

Wan laa maatan!

Sa’ li Tzol’leb’ ut Sumwank, li Dios kixye:

“Kʼiila maatan wan, ut re li junjunq chi [kristiaan] kʼeebʼil jun maatan xbʼaan xMusiqʼ li Dios.

“Re junjunq kʼeebʼil li jun, ut re junjunq chik kʼeebʼil li jun chik, re naq chixjunilebʼ teʼchaabʼilobʼresiiq rikʼin.”

Junjunq reheb’ li qamaatan wankeb’ resil sa’ li loq’laj hu. Naab’aleb’ chik maak’a’eb’ resil.

Jo’ kixye li profeet aj Moroni, “Meetz’eqtaana xyaalaleb’ li maatan naxk’e li Dios, xb’aan naq k’iheb’, ut neke’chal chaq rik’in li junaj chi Dios.” Naru neke’xk’utb’esi rib’ chi “jalanq paay … ; a’b’anan a’an li junaj chi Dios li nak’anjelank re chixjunil rik’in chixjunileb’.”

Maare yaal naq li qamusiq’ejil maatan moko junelik ta neke’k’utun, a’b’an a’an moko naraj ta naxye naq moko aajeleb’ ta ru. Ma naru tinwotz eerik’in junjunq reheb’ li musiq’ejil maatan li nawil sa’ xyu’ameb’ k’iila komon chiru chixjunil li ruchich’och’? K’oxla ma osob’tesinb’ilat rik’in junaq malaj junjunq reheb’ li maatan jo’eb’ a’in:

• Toq’ob’ank.

• Xk’eeb’aleb’ reetal li kristiaan li yal tz’eqtaananb’ileb’.

• Xtawb’al li sahil ch’oolej junelik.

• Wank choq’ aj k’amol tuqtuukilal.

• Xk’eeb’aleb’ reetal li kok’ sachb’a-ch’oolej.

• Yehok aatin tz’aqal aj rahonel.

• Kuyuk maak.

• Jalok k’a’uxlej.

• Kuyuk.

• Xch’olob’ankil li k’a’aq re ru chi saqen ru.

• Xnawb’al wank rik’ineb’ li kok’al.

• Xxaqab’ankileb’ xk’anjel laj jolominel sa’ li Iglees.

• Xtenq’ankileb’ laa was aawiitz’in chixnawb’al naq k’ulub’anb’ileb’.

Maare ink’a’ taawileb’ li maatan a’in sa’ li k’utb’esink seeb’al na’uxman sa’ laa teep. A’b’an nawoyb’eni naq taak’e reetal naq k’a’jo’ x’aajelileb’ ru sa’ lix k’anjel li Qaawa’ ut chan ru naq nakatoch’, nakawosob’tesi malaj nakakol ajwi’ junaq reheb’ li ralal xk’ajol li Dios rik’ineb’ li maatan a’an. Chajultika: “Rik’in li k’a’ru ka’ch’in ut moko nimob’resinb’il ta, nak’ehe’ chi uxmank li xninqal ru na’leb’.”

Jo’kan ut, qab’aanuhaq li qak’anjel us ta ka’ch’in.

Ex raarookil was wiitz’in, ex raarookil wamiiw, nintz’aama naq li Musiq’ej texxtenq’a chixk’eeb’aleb’ reetal li maatan ut li seeb’al xk’ehom eere li Dios. Toja’ ut, naq laa’o, jo’eb’ li tiikil moos sa’ lix jaljookil ru aatin li Qaawa’, te’qak’e chi k’iik ut teqak’e chi k’anjelak.

Taachalq li kutan naq tooxaqab’aaq chiru li qaChoxahil Yuwa’ li wan xtoq’ob’ahom re xq’axtesinkil li qamertoomil re. A’an taaraj xnawb’al k’a’ru xqab’aanu rik’ineb’ li maatan xk’e qe—mas wi’chik, chan ru naq xe’qoksi re rosob’tesinkileb’ li ralal xk’ajol. Li Dios naxnaw aniho tz’aqal laa’o, k’a’ru naru nokowulak chixb’aanunkil, ut xb’aan a’an naq nim li k’a’ru naroyb’eni qik’in.

A’b’an a’an ink’a’ naroyb’eni naq k’a’jo’ xnimal, xteram, malaj xloq’al li taqab’anu re naq toowulaq aran. Sa’ li ruchich’och’ kixyo’ob’tesi a’an, li k’iik nak’ulman chi ka’ch’inq ut rik’in kuyuk—a’b’an chi k’ok’ aj xsa’ ut chi chaab’il.

Chijultiko’q eere naq li Jesukristo ak kixb’aanu li k’a’ru ink’a’ raj tooruuq laa’o naq kinumta sa’ xb’een li kamk ut li maak.

Li qak’anjel laa’o a’an xtaaqenkil li Kristo. A’an qak’anjel risinkil qib’ chiru li maak, xsutq’isinkil qib’ wan wi’ li Kristo, ut b’eek chiru lix b’e, chi ka’ch’inq. Naq naqab’aanu a’an, chi yalb’il qaq’e ut chi tiik, rik’in xnumik li hoonal neke’qakanab’ chi ixb’ej lix b’ak’leb’ li sachk ut li paaltil, ut chi ka’ch’inq natiikob’resiiq qu, toj reetal li kutan naq taatz’aqloq qu rik’in li Kristo.

Naru neke’qak’ul li qosob’tesinkil. Natz’aqlok ru li k’a’ru yeechi’inb’il. Li okeb’aal teetookeb’ sa’ ka’kab’ ru. Qasik’om laa’o ma too’ok ut taqatikib’.

Maare timil timil taak’ulmanq. Us ajwi’ a’an.

B’ar wi’ li paab’aal moko kaw ta, tikib’omaq rik’in li yo’onink rik’in li Kristo Jesus ut lix wankilal re saab’esink ut saqob’resink.

Li qaYuwa’ naxpatz’ qe naq taqab’aanu li k’anjel a’in re paab’aal ut tzolomil ink’a’ yal jo’ aj numel, jo’ b’an aj paab’anel li neke’xtz’eqtaana Babilonia ut neke’xb’eresi lix ch’ooleb’, lix k’a’uxleb,’ ut lix yokb’ toj aran Sion.

Naqanaw naq lix yalb’al qaq’e yal xjunes rib’ ink’a’ tooxk’e chi wank sa’ li choxahilal. A’b’an naru nokoxk’e chi wank chi tiik ut chi teneb’anb’il rik’in li Jesus li Kristo, ut a’an naru nokoxk’e chi wank sa’ li choxahilal.

B’antiox re li qaraarookil Kolonel, maak’a’ k’a’ru naru naramok qe re naq ink’a’ raj toonume’q chi uub’ej. Wi naqak’e li qoyb’enihom ut li qapaab’aal rik’in a’an, li qanumik chi uub’ej ch’olch’o. A’an naxyeechi’i qe naq taqak’ul lix kawilal, lix wankilal, li rusilal li numtajenaq. Chi ka’ch’inq, chi b’ayatq, nokonach’o b’ayaq sa’ li xnimal ru kutan tz’aqal re ru b’ar wi’ toowanq rik’in a’an ut rik’ineb’ li ani raarookeb’ qab’aan sa’ li junelikil loq’alil.

Re wulak aran, tento taqab’aanu li qak’anjel anajwan ut chixjunil chik li kutan. Nokob’antioxin chirix li yokb’ xe’qak’e ewer, a’b’an moko tookanaaq ta yal rik’in a’an. Naqanaw naq toj naab’al li b’e tento toob’eeq wi’, a’ut ink’a’ taach’inaaq qach’ool xb’aan a’an.

A’an naxk’ut tz’aqal aniho laa’o—jo’ xmoos li Kristo.

Nintz’aama ut ninb’oqeb’ chixjunileb’ li komon sa’ li Iglees, ut chixjunileb’ chik li te’raj tz’aqonk, naq te’xkanab’ rib’ sa’ ruq’ li Kolonel ut te’xteneb’ rib’, chi wan royb’enihomeb’ ut chi yalb’ileb’ xq’e chixb’aanunkil lix k’anjeleb’ chi anchal xch’ooleb’, re naq tz’aqalaq lix sahilal xch’ooleb’ ut naq, sa’ jun kutan, te’xk’ul chixjunil li k’a’ru wan re li Yuwa’b’ej. Ninch’olob’ xyaalal a’in sa’ xk’ab’a’ li Jesukristo, amen.