Yalb’il qix ut k’eeb’il qakawilal rik’in li Kristo

Ex was wiitz’in raarookex inb’aan, naweek’a lix rahom li Qaawa’ naq nokoch’utla sa’ komonil. Naweek’a intuulanil naq nekexwaatina. Nintz’aama naq li Musiq’ej tixk’am sa’ lee ch’ool li k’a’ru naraj li Qaawa’ naq teerab’i, chi mas wi’chik chiru li aatin tinye.

Mas najter laa’in kin’ok chixtzolb’al li fisica ut li matematicas sa’ jun nimla tzoleb’aal. Xweek’a naq moko tz’aqal ta inna’leb’. Kin’ok chireek’ankil naq yookin chixtzolb’al li k’a’ru maajo’q’e tintaw ru. A’ yaal naq kiweek’a naq moko tz’aqal ta inna’leb’, kika’ch’ino’ lix kawilal inch’ool chixyalb’al inq’e. Xb’aan xlajik inch’ool, kin’ok chireek’ankil naq maak’a’ na’ok wi’ lin k’anjel. Kink’oxla naq maare us raj naq tinkanab’ li tzolok, ut tin’ok chixb’aanunkil k’a’ruhaq chik li moko ch’a’aj ta.

Kiweek’a naq q’un inmetz’ew. Naq kintijok, kiweek’a naq li Qaawa’ yoo chixk’ojob’ankil inch’ool. Kiwab’i a’an chixyeeb’al sa’ ink’a’uxl, “Yookin chixyalb’al aawix, a’ut toj wankin aawik’in.”

Sa’ li kutan a’an, ink’a’ kintaw tz’aqal xyaalalil chixjunil li aatin a’an. A’ut kinnaw k’a’ru tento tinb’aanu—kin’ok chi k’anjelak.

Naq yookin chi k’oxlak ut chi k’anjelak chalen chaq li chihab’ a’an, xin’ok chixtawb’al ru li aatin a’in sa’eb’ li loq’laj hu: “Chixjunil naru chiwu, sa’ xk’ab’a’ li Kristo li nak’ehok inkawilal.”

Xintzol naq li ch’a’ajkilal xweek’a naq yookin chixtzolb’al li fisica a’an jun maatan yoo chixk’eeb’al we li Qaawa’. A’an yoo chixk’utb’al chiwu naq chi tenq’anb’il xb’aan a’an, naru ninb’aanu li k’a’ru ink’a’ raj taaruuq chiwu wi ta moko wan ta inpaab’aal naq a’an tinxtenq’a. Rik’in li maatan a’in, li Qaawa’ yoo chi k’anjelak re xyalb’al wix ut re xk’eeb’al inkawilal.

K’iila paay xyaalalil li aatin yalok-ix. Naq naqayal rix k’a’ruhaq, ink’a’ yal naqatz’il rix. Naqak’e ajwi’ xkawilal a’an. Naq naqayal rix jun ch’iich’, naqak’e aalil iiq sa’ xb’een. Na’oksiman li tiq, li k’a’ru aal, ut li tiikisink, toj reetal naq nak’utun xkawilal ut xwankilal li ch’iich’. Moko naq’una ta li ch’iich’ naq nayale’ rix. Nawulak b’an chi kanaak chi paab’ajel, naniman xkawilal re naq mas wi’chik li iiq naru naxk’am.

Li Qaawa’ naxyal ajwi’ qix laa’o, re xk’eeb’al qakawilal. Ink’a’ nachal li yale’k-ix sa’ xhoonalil li hilank malaj li k’ojk’ookil ch’oolej. Nachal naq naqeek’a naq tawasinb’ilo chi mas wi’chik chiru li k’a’ru naru naqakuy. Li Qaawa’ naxk’ut chiqu naq tento taanimanq li qakawilal, ut ink’a’ toolub’q sa’ li qak’anjel, naq maajo’q’e taqakanab’ a’an, naq toj yalb’ilaq b’an qaq’e.

Naq ink’a’ nalaj qapaab’aal chirix li Jesukristo—us ta mas ch’a’aj wanko wi’ sa’ li hoonal a’an—naniman li qamusiq’ejil metz’ew. Sa’eb’ li loq’laj hu naxk’ut xyaalal li na’leb’ a’in.

Qayehaq, jo’ka’in naq li profeet aj Moroni kiyale’ rix ut kik’ehe’ xkawilal. A’an kiwan xjunes rib’ chiru naab’al chihab’ sa’ xraqik lix yu’am. Kixtz’iib’a naq maak’a’eb’ chik ramiiw, naq ak xkamsiik lix yuwa’, ut naq xe’sache’ lix tenamit. A’an yoo chi taaqeek xb’aaneb’ li ani xe’raj raj xkamsinkil.

A’ut laj Moroni ink’a’ kilaj xch’ool. A’an kixtz’iib’a lix nawom xch’ool chirix li Jesukristo chiru perel ch’iich’ choq’ reheb’ li ani maajun wa taaril a’an, ut choq’ reheb’ li ralal xk’ajoleb’ li ani xe’xyal xq’e chixkamsinkil a’an. Kitz’iib’ak choq’ qe laa’o. Kixnaw naq wankeb’ li te’eetz’unq re li raatin. Kixnaw naq wankeb’ ani te’xtz’eqtaana a’an. A’ut ink’a’ kixkanab’ tz’iib’ak.

Naq kiyale’ rix laj Moroni, kitz’ile’ rix lix paab’aal ut kik’ehe’ xkawilal. Kikana chi saqob’resinb’il ru. Sa’ li raatin a’an, nak’utun li wankilal nak’eeman re li ani nakuyuk toj sa’ roso’jik. Naru naqeek’a li wankilal a’an naq naqil li raatin:

“Anajwan laaʼin, aj Moroni, nintzʼiibʼa kaʼchʼinaq joʼ chanru ninkʼoxla naq us; ut nintzʼiibʼak choqʼ rehebʼ li was wiitzʼin, ebʼ laj Lamanita, ut nawaj raj naq teʼxnaw naq ak xeʼnumeʼ numenaq kaahibʼ cient rikʼin junmay chihabʼ chalen chaq naq kikʼeeman li eetalil chirix lix kʼulunik li Kristo.

“Ut ninkʼe chaq xtzʼapbʼal li tzʼiibʼanbʼil esil aʼin, chirix naq ninye junjunq li aatin re elajink cheru.

“Kʼehomaq reetal, nawaj relajinkil cheru, naq joʼqʼe teeril li kʼaʼaq re ru aʼin tzʼiibʼanbʼil, wi aʼan xchaabʼilal xnaʼlebʼ li Dios naq teeril ru, naq chijultikoʼq eere chanru ruxtaanal chaq li Qaawaʼ choqʼ rehebʼ li ralal xkʼajolebʼ li winq, chalen chaq xyoʼobʼtesinkil laj Adan toj reetal ajwiʼ xqʼehil naq teekʼul li kʼaʼaq re ru aʼin, ut chetzʼil rix saʼ eechʼool.

“Ut naq teekʼul li kʼaʼaq re ru aʼin, nawaj relajinkil cheru naq chepatzʼ re li Dios, li Junelik Yuwaʼbʼej, saʼ lix kʼabʼaʼ li Kristo, ma inkʼaʼ yaal li kʼaʼaq re ru aʼin; ut wi texpatzʼoq rikʼin xʼanchalil eechʼool, chi tiik eerajom, chi wank eepaabʼaal chirix li Kristo, aʼan tixkʼutbʼesi cheru li yaal chirix, rikʼin lix wankil li Santil Musiqʼej.

“Ut rikʼin lix wankil li Santil Musiqʼej naru teenaw li yaal chirix chixjunil li kʼaʼaq re ru.”

Lix nawom xch’ool laj Moroni kiyale’ rix sa’ li junaatalil, a’ut nalemtz’un jo’ jun saqen re xk’amb’aleb’ xb’e chixjunileb’ li tasal tenamit li te’sik’oq re li qaChoxahil Yuwa’ ut li Kolonel Jesukristo.

Jun chik profeet sa’ lix Hu laj Mormon, laj Jakob, kiyale’ rix ut kik’ehe’ xkawilal naq toj ka’ch’in, naq yoo chixnumsinkil naab’al li ch’a’ajkilal ut li rahil ch’oolejil. A’ut laj Lehi, lix yuwa’, kixk’ut chiru a’an naq li Dios taarosob’tesi sa’ xk’ab’a’ lix yalb’al rix.

“Ut k’e reetal, sa’ aaka’ch’inal kanumsi li ch’a’ajkilal ut naab’al li rahil ch’oolejil, sa’ xk’ab’a’ lix yib’aleb’ ru laa was.

“Aʼbʼanan at Jakob, xbʼeen yoʼlajenaq chiwu saʼ li yamyookil chʼochʼ, laaʼat nakanaw ru lix nimal ru li Dios, ut aʼan taarosobʼtesi laa chʼaʼajkilal choqʼ re laa chaabʼilal.

“Joʼkan naq taaʼosobʼtesiiq laa waam, ut laaʼat tatwanq saʼ xyaalalil aawochbʼeen laj Nefi, laa was; ut taanumsiiq laa kutan rikʼin kʼanjelak chiru laa Dios. Joʼkan ut, ninnaw naq tojbʼil aawix, saʼ xkʼabʼaʼ lix tiikilal xchʼool laj Tojol aawix; xbʼaan naq xakʼe reetal naq saʼ xtzʼaqalil ru li kutan aʼan taachalq re xkʼambʼal li kolbʼa-ibʼ rehebʼ li winq.”

Li profeet aj Jose Smith kixk’ul ajwi’ lix yalb’al rix ut kiniman xkawilal naq kiwan sa’ tz’alam aran Liberty. Sa’ lix yot’ik xch’ool, li profeet aj Jose Smith kixye:

“At Dios, bʼar wankat laaʼat? …

“Jo’ najtil chik taawanq chi ramb’il laa wuq’?”

Li Qaawa’ kiril naq taasantob’resiiq ru laj Jose naq tixkuy li rahilal yoo chixk’ulb’al, ut kixye:

“At walal, tuqtuukilal chiwanq saʼ aawaam; laa chʼaʼajkilal ut laa tawasinkil yal chiru jun chʼina kʼamok taawanq;

“Ut chirix aʼan, wi nakakuy chi us, li Dios tixtaqsi aaloqʼal chi taqeʼq; laaʼat tatnumtaaq saʼ xbʼeenebʼ chixjunil li xikʼ nekeʼilok aawe.”

Li yale’k ix ut li nimob’resiik li q’axal nim, kik’ulman rik’in lix tojb’al rix li maak xb’aan li Kolonel. A’an kixk’uleb’ lix maak li ruchichʼochʼ sa’ xb’een a’an. A’an kixk’am li qarahilal, ut lix rahil qach’ool. A’an kiruk’ li k’ahil sek’. A’an kiwan chi paab’ajel sa’ chixjunil hoonal.

Sa’ xk’ab’a’ naq kixtoj rix li qamaak, li Jesukristo naru chixk’eeb’al qakawilal naq yoo chi yale’k qix. A’an naxnaw chan ru qatenq’ankil, xb’aan naq a’an kireek’a chixjunil li ch’a’ajkilal taaruuq taqeek’a laa’o sa’ li yu’am a’in. “Tixk’ul sa’ xb’een lix rahileb’ ut lix yajeleb’ lix tenamit … re taaruuq tixnaw sa’ li tz’ejwalej chan ru xk’eeb’al xtenq’ankil lix tenamit, jo’ chanru xmajelal lix kawilaleb’.”

Naqanaw naq sa’ li awimq Getsemani, li Kolonel kixtz’aama chiru li Yuwa’b’ej naq taa’isimanq li yale’k-ix sa’ xb’een a’an—a’ut kixye ajwi’ naq wi a’an li rajom xch’ool li Yuwa’b’ej, li Kolonel tixk’ul a’an. Sa’ jalan chik aatin, li Kolonel kixk’ul sa’ xb’een a’an li wiib’ank ch’oolej ut xmaak’a’il li na’leb’ naqak’ul laa’o, a’ut wan xpaab’aal chirix lix Choxahil Yuwa’.

Ex was wiitz’in, li yale’k-ix ut li kawilal nekek’ul laa’ex, maare jalanaq wi’ rik’in li kixk’ul laj Moroni, ut laj Jakob, ut laj Jose Smith. A’ut taachalq chi yaal sa’ eeb’een. Naru naq nachal chi ch’anch’o, rik’ineb’ li ch’a’ajkilal sa’ junkab’al. Naru nachal rik’in li yajel, rik’in xsachik li qajom, rik’in rahil ch’oolejil, malaj rik’in junaatalil.

Ninch’olob’ xyaalal cheru naq eb’ li hoonal a’in ink’a’ neke’xk’ut naq tz’eqtaananb’ilex xb’aan li Qaawa’. Neke’xk’ut b’an naq a’an nekexxra chi tz’aqal, ut naxyal eerix re naq teek’ul lee kawilal. A’an yoo chixk’eeb’al eekawilal re taawanq eemetz’ew chixk’amb’al li iiq sa’ li junelik q’e kutan.

Wi paab’ajelo sa’ li qak’anjel, li Qaawa’ tixyal qix. A’an tixk’e qakawilal. Ut sa’ junaq kutan too’iloq chi ixb’ej ut taqak’e reetal naq li yale’k-ix xqak’ul, a’an reetalil lix rahom a’an. Taqil naq a’an yoo chiqakawresinkil re tooruuq chi wank rik’in a’an sa’ nimla loq’alil. Jo’ kixye li apostol aj Pablo naq yoo chi nach’ok chaq xraqik lix yu’am, “Li chaab’il pleet xinpleeeti, lin b’eenik xinchoy, sa’ li paab’aal xinkana.”

Ninch’olob’ xyaalal naq li Qaawa’ naxnaw eeru. A’an naxnaw ru li yale’k-u nekek’ul. A’an wan eerik’in. Ink’a’ texxkanab’. Ninch’olob’ xyaalal naq li Jesukristo a’an li Ralal li Dios. A’an li qametz’ew, laj Tojol qix, li qayo’onihom. Wi naqakanab’ qib’ sa’ ruq’ a’an, a’an tixnima li qamusiq’ejil metz’ew re taqakuy xk’amb’al chixjunil li yale’k-ix li taachalq sa’ qab’een. Ninch’olob’ xyaalal a’in sa’ lix santil k’ab’a’ li Jesukristo, amen.