Sa’ usilal rik’in li Dios

Naq nintzol li loq’laj hu, wankeb’ li aatin jwal neke’wulak chiwu xb’aan naq neke’xk’ul rib’ rik’in li k’a’ru kink’ul sa’ lin yu’am. Laa’in kinnumsi k’iila chihab’ sa’ jun li k’anjel contador forense xk’ab’a’. Sa’ xk’ab’a’ lin k’anjel a’an, jwal nink’e reetal li aatin reconciliar li wan sa’ li loq’laj hu sa’ kaxlan aatin. Sa’ li k’anjel a’an, li reconciliar naraj naxye xb’aanunkil jar paay chi ajlank, b’irok-ix, ut tz’ilok-ix re xjunajinkileb’ ru li esilal chirix lix tuminal jun li compañía. Naraj ajwi naxye naq lin k’anjel laa’in, a’an xk’eeb’al reetal naq li k’a’ru tz’iib’anb’il chirix lix tuminal li compañía naxk’ul rib’ rik’in li chaq’rab’ chirix li tumin. Jwal ninyal inq’e chixtuqub’ankil a’ yaal k’a’ru ink’a’ naxk’ul rib’, ut k’iila sut kinnumsi k’iila hoor chixtuqub’ankil junaq li paaltil us ta jwal ka’ch’in.

Li apostol aj Pablo kirelaji chiruheb’ aj Korintio naq te’xk’am wi’chik rib’ “sa’ usilal rik’in li Dios.” Li k’ame’k wi’chik sa’ usilal rik’in li Dios naraj naxye naq wanko wi’chik sa’ komonil rik’in li Dios, malaj naq ak’ob’resinb’il li qasumwank rik’in li Dios chirix naq kipo’e’ chaq sa’ xk’ab’a’ li qamaak. A’an ajwi’ li reconciliar, malaj ut xjunajinkil li k’a’ru naqaj rik’in li k’a’ru naraj li Dios, jo’ ajwi’ xb’aanunkil li na’leb’ kixk’ut li Awa’b’ej Russell M. Nelson, a’an xkanab’ankil li Dios chi numtaak sa’ qayu’am.

Li loq’laj hu naxye naq kanab’anb’ilo chixb’aanunkil qajunes li naqaj, ut “chixsik’b’al ru li b’e re li kamk li junelik taakanaaq, malaj li b’e re li junelik yu’am.” A’b’an wi ink’a’ naqayal qaq’e, maare too’ok chixsikb’al ru li b’e li ink’a’ naxk’ul rib’ rik’in li rajom li Dios.

Li profeet aj Jakob kixye naq wi ink’a’ chik wanko sa’ komonil rik’in li Dios, naru taqak’am wi’chik qib’ sa’ usilal ka’ajwi’ “xb’aan lix tojb’al rix li maak xb’aan li Kristo.” Aajel ru xk’eeb’al reetal naq nokosutq’i rik’in li Dios a’ yaal re li uxtaan, ut a’an naraj naxye naq ka’ajwi’ xb’aan xtojb’al rix li maak naq naru toowanq sa’ usilal rik’in li Dios.

Naq nakak’oxla laa yu’am, maare taanaq sa’ laa ch’ool naq najt kaweek’a aawib’ rik’in li Dios xb’aan naq kakanab’ chawix. Maare ink’a’ chik kayal aaq’e chi tijok malaj chixpaab’ankileb’ lix taqlahom. Wan sa’ qab’een xyeeb’al ma toonajto’q rik’in li Dios jo’ ajwi’ ma too’ok wi’chik sa’ usilal rik’in. Li Qaawa’ kixch’olob’ naq wan sa’ qab’een naq kixye: “Jilonqex wikʼin ut laaʼin tinjiloq eerikʼin; sikʼomaqin chi yalbʼil eeqʼe ut tineetaw; chextzʼaamanq, ut texkʼuluq; chextochʼoq, ut taateemanq cheru.”

K’a’ru naxb’aanu li Kolonel re qatenq’ankil chixtuqub’ankil li qasumwank rik’in? Choq’ we laa’in, jwal ninxik chi uub’ej sa’ li b’e a’an naq ninb’aanu li k’a’ru naxye li Awa’b’ej Nelson ut naq ninjal ink’a’uxl wulaj wulaj. Wan chi jo’kan xb’aan naq li k’ame’k wi’chik sa’ usilal rik’in li Dios naraj naxye xtuqub’ankil li qasumwank rik’in li Dios, rik’in risinkil li maak li najot’ok re.

Wan jun xnimal ru esil chirix li tuqub’ank a’an sa’ li loq’laj hu, naq naxye resil laj Enos. Kiwan sa’ xyu’am laj Enos li ink’a’ naxk’ul rib’ rik’in li Dios. Ut laj Enos kixk’ut chiqu naq lix tojb’al rix li maak naru tooxk’am wi’chik sa’ usilal rik’in li Dios. Kixye naq naraj xjalb’al xk’a’uxl, kixk’ut naq tuulan xch’ool ut naq naraj xyalb’al xq’e. Kik’ame’ wi’chik sa’ usilal rik’in li Dios naq kirab’i jun li xyaab’ kuxej li kixye, “At Enos, kuyb’il aamaak, ut laa’at tat-osob’tesiiq.” Laj Enos kixnaw naq wan xwankilal li jalb’a-k’a’uxlej ut li k’amok-ib’ sa’ usilal naq kixye, “Ut laa’in, aj Enos, kinnaw naq li Dios ink’a’ kiru chi tik’ti’ik; jo’kan naq oso’jenaq li maak sa’ inb’een.”

Xk’amb’al qib’ sa’ usilal narisi li maak sa’ qab’een ut naxk’ojob’ li qach’ool ut xch’ooleb’ ajwi’ li qas qiitz’in. Nokoxkawresi sa’ komonil, naxq’unb’esi qach’ool, naxk’e qametz’ew chixtaaqenkil li Jesukristo, ut naxk’e xkawilal qach’ool chiru li Dios. Nakawu wi’chik inch’ool sa’ xk’ab’a’ jun chik li chaab’ilal li nayo’la rik’in li k’amok-ib’ sa’ usilal, li nawil sa’ raatin laj Enos: “Ut chirix naq … kiwab’i li aatin a’in, lin paab’aal ki’ok chi wank chi ink’a’ na’eek’an chirix li Qaawa’.”

Sa’ lin ka’ch’inal, lin mama’ naraw li ru che’ ab’aal xk’ab’a’. Wan naq laa’in nink’anjelak sa’ li rawimq chiru li saq’ehil naq yoo xq’ehil li q’olok ab’aal. Xb’aan naq yal ka’ch’inin, kink’e reetal naq li k’anjel ninb’aanu, a’an yal xchapb’al jun li cubeet re naq tintaqe’q sa li che’ chixxokb’aleb’ li ab’aal.

Kijala chi us li k’anjel re q’olok ab’aal naq lin mama’ kixloq’ jun li nimla ch’iich’, a’an li chiq’leb’ ab’aal nayeeman re. Li ch’ich’ a’an naxchap xtoonal li che’ ut naxchiq’ chi kaw re naq li ab’aal te’t’ane’q sa’eb’ li yoy li k’ochob’anb’ileb’ chixxokb’aleb’ li ab’aal. Naq na’ok li ch’iich’ chixchiq’b’al li che’, kiwil naq chi junpaat neke’t’ane’ li ab’aal chixjunileb’. Kiwil ajwi’ naq maak’a’ naxye ma junpaat malaj najt naxchiq’ li che’, wankeb’ li ab’aal li ink’a’ neke’t’ane’. Relik chi yaal, ink’a’ neke’eek’an.

Naru xt’anb’aleb’ li ab’aal xmaak li k’a’ru wan sa’ xtib’el, a’an li etileno xk’ab’a’. Xb’aan li etileno, naq’uno’ lix chapb’al rib’ li ab’aal rik’in li che’. Jo’kan naq li roq li ab’aal naxkoq rib’ rik’in li che’ xb’aan naq naq’uno’ lix chapb’al rib’.

Sa’ li loq’laj hu, naqil naq lix toonal laj Isai, a’an jun jajlookil ru aatin chirix li Mesias, li Jesukristo, li ke’xye chaq li profeet naq taayo’laq sa’ riyajil laj Isai, li xyuwa’ li rey aj David. Li etileno naxq’unb’esi xchapb’al li ab’aal rik’in li che’, ut chi jo’kan ajwi’, li q’etok chaq’rab’, li wiib’ank ch’oolej, ut li xuwak naru te’xq’unb’esi qachapb’al rik’in lix toonal laj Isai, li Jesukristo, ut naru qach’iq’b’al re naq taqajach qib’ rik’in. Us ta jwal kaw qapaab’aal, tento taqil qib’ junelik re naq ink’a’ taaq’unb’esiiq li qachapb’al rik’in li Jesukristo.

Sa’ li Tzol’leb’ ut Sumwank, nayeeman ajwi’ reheb’ laj paab’anel naq naru te’t’ane’q. Naxye: “A’ut naru naq jun li winq taat’ane’q chaq sa’ li usilal ut taa’elq chaq rik’in li yo’yookil Dios.” Naxye ajwi’, “Relik chi yaal, joʼkanebʼ ajwiʼ li santobʼresinbʼilebʼ cheʼril ajwiʼ ribʼ.” Re naq ink’a’ te’t’ane’q, li Qaawa’ kixye, “Jo’kan naq chiril rib’ li iglees ut che’tijoq junelik, maare anchal te’t’ane’q sa’ li aaleek.”

Li k’a’ru nat’ane’ chi chiq’b’il naru najuntaq’eetaak rik’in li aatin sa’ li loq’laj hu li naxye resil li k’a’ru ak xq’ano’ chi tz’aqal choq’ re li sache’k, ut li ok re chixk’ulb’al reeqaj lix b’aanuhom. Li aatin a’an naxch’olob’ ajwi’ a’ yaal k’a’ru li q’ajenaq, li po’jenaq, malaj li oso’jenaq xmetz’ew re naq taat’ane’q ut taasachq.

K’a’ru naraj naxye li q’ano’k a’an? Ma naraj naxye naq naru toowulaq b’ar wi’ ink’a’ chik naru xjalb’al qana’leb’? Ink’a’. Naq nawil laa’in, naraj b’an naxye naq naru toowulaq b’ar wi’ ink’a’ naqaj xjalb’al qana’leb’. Lix b’anul li q’ano’k re sache’k, a’an xb’aanunkil li k’a’ru naxkawresi li qachapb’al rik’in li Jesukristo. Ak xqaye naq rik’in li jalb’a-k’a’uxlej, laj Enos kiwulak b’ar wi’ ink’a’ chik na’eek’an lix paab’aal. Li jalb’a-k’a’uxlej naxk’e qametz’ew—naq naqab’aanu chi junpaat ut chi kok’ aj xsa’. Li Awa’b’ej Nelson kixye, “Maak’a’ wan li q’axal na’ach’ab’ank, nachaab’ilob’resink, ut li q’axal aajel ru choq’ re li qab’eenik chi uub’ej, chiru xk’anjelankil rajlal, wulaj wulaj, li jalb’a-k’a’uxlej.”

Rochb’een xjultikankil li jalb’a-k’a’uxlej, li profeet aj Jakob kixye naq xk’eeb’al reetal li ruq’ li Dios sa’ qayu’am, xsik’b’al ut xk’ulb’al qana’leb’ rik’in li Dios, ut rab’inkil li Dios naru ajwi’ tooxkawresi re naq ink’a’ taa’eek’anq li qapaab’aal. Chan ajwi’ laj Jakob, “Jo’kan ut, naqatz’ileb’ rix li profeet, ut wan k’iila na’leb’ naqak’ul chi k’utb’esinb’il, ut li musiq’ej re profeetil aatin, ut rik’in chixjunil a’in li nak’utuk xyaalal qe, naqataw jun qayo’onihom, ut li qapaab’aal ink’a’ chik na’eek’an.” Naq noko’ab’in chiru raatineb’ li profeet ut li apostol, naru taak’ojob’aaq qach’ool rik’in yo’onink, kawilal, ut metz’ew re naq li qapaab’aal ink’a’ taa’eek’anq.

Laa’in wilom naq wi taqaj too’ok wi’chik sa’ usilal rik’in li Dios, tento taqaj ajwi’ xjalb’al qak’a’uxl. Xjalb’al qak’a’uxl ut xk’ulb’al qosob’tesinkil rik’in lix tojb’al rix li maak naru tixkawresi li qapaab’aal re naq ink’a’ taa’eek’anq. Naq ink’a’ na’eek’an qapaab’aal, naqaj tookanaaq sa’ usilal rik’in li Dios. Neke’sutink li wiib’ chi na’leb’ a’an sa’ qayu’am.

Ex was wiitz’in, nekexinb’oq chixk’amb’al wi’chik eerib’ sa’ usilal rik’in li Dios sa’ xk’ab’a’ lix tojb’al rix li maak. Ninch’olob’ xyaalal naq xpaab’ankil li qasumwank naxkawresi qachapb’al rik’in li Kolonel re naq ink’a’ tooq’ano’q choq’ re li sache’k. Ninch’olob’ xyaalal naq li wank sa’ usilal rik’in li Dios, sa’ xk’ab’a’ lix tojb’al rix li maak, naxkawresi li qapaab’aal re naq ink’a’ taa’eek’anq.

Ninnaw naq li qaChoxahil Yuwa’ nokoxra, ut naq kixtaqla li Ralal raaro xb’aan, li Jesukristo, re naq tooxkol, tixtoj qix, ut tooxk’am wi’chik sa’ usilal. Ninch’olob’ xyaalal li Jesukristo, ut ninb’aanu ajwi’ sa’ xk’ab’a’ li Jesukristo, amen.