Ebʼ lix profeet li Dios

Ex raarookil saaj, xchaq’al ru li ch’utub’aj-ib’ li yooko chirilb’al anajwan. Ak xe’qab’i’ oxib’ lix yo’yookil apostol li Jesukristo. A’an xchaq’al ru osob’tesink! Ut toj taqab’i jun chik, li Elder Henry B. Eyring Toj wan li ninq’ehik sa’ musiq’ej!

Sa’ li chihab’ xnume’ kiqatzol chan ru xq’axb’al ru li ruchich’och’ rik’in li na’leb’ kixk’ul laj David ut laj Goliat. Ma jultik eere li oob’ chi pek? Anajwan tinwotz jun li seraq’ wan sa’ li Najter Chaq’rab’ li kiwil sa’ insaajilal ut kiwaj wank jo’ li nak’utb’esin re a’an. Li Santil Hu moko naxye ta lix k’ab’a’, li ixq aj Sunem taqaye re xb’aan naq a’an xk’ab’a’ lix tenamit.

Sa’ jun kutan li profeet aj Eliseo kinume’ sa’ li tenamit Sunem, naqil naq wan “jun li ixq nim xwankil; li kirelaji ru chi xik chi wa’ak sa’ rochoch. Rajlal naq nanume’ laj Eliseo aran, junelik naxik chi wa’ak sa’ rochoch li ixq a’an.” Naq nink’oxla, jwal sa xch’ool laj Eliso naq kib’oqe’ chi wa’ak sa’ rochoch! Ak kinume’ naab’al sut naq sa’ jun kutan li ixq kixye re lix b’eelom, “Anajwan xink’e reetal naq li winq a’in, a’an jun xsantil taql li Dios.”

Li ixq kixye, “Anajwan xink’e reetal.” Chanchan naq kixk’ul laj Eliseo chi ink’a’ kixnaw naq a’an jun profeet; a’an kixk’ul xnawom xch’ool rik’in li Santil Musiq’ej naq kirab’i ut kiril chi k’utuk laj Eliseo. (Jultikaq qe naq maak’a’ chaq li jalam-uuch sa’eb’ chaq li kutan a’an! Jo’kan naq ch’a’aj chaq xnawb’al ru li profeet yal rik’in rilb’al xnaq’ ru.)

A’b’an moko aran ta naraqe’ li seraq’. Sa’ jun li kutan li ixq kixye re lix b’eelom, “Qayiib’aq junaq xch’ina na’aj, … ut aran tqak’e xch’aat, xmeex, jun xk’ojarib’aal ut jun xsaqenk, re naq jo’q’e tol’elq qik’in, taaxik aran chi hilank.“

Li tiikil ixq a’in kiwan xch’ool chixyiib’ankil jun li na’ajej b’ar wi’ truuq taakanaaq li profeet naq taawulaq sa’ li tenamit a’an!

Naru naqatzol jun xnimal ru na’leb’ rik’in li seraq’ a’in.

Li Qaawa’ kixk’e chixnaw li ixq aj Sunem naq laj Eliseo a’an chaq jun xprofeet li Dios ut a’an kixk’ul sa’ li rochoch.

Laa’o ajwi’ naru naqak’ul jun xnawom qach’ool chirixeb’ lix profeet li Dios sa’ qakutankil ut xteeb’al li qak’a’uxl ut li qaam—li qochoch—re xk’ulb’al li esilal chirix li qaChoxahil Yuwa’ sa’eb’ li roso’jik li kutan a’in.

Ex raarookil saaj nawaj naq teepatz’ eerib’: “Ma wan xnawom inch’ool chirixeb’ lix yo’yookil profeet li Dios?”

Qayoob’aq sa’ xtiklajik.

K’a’ru jun li profeet? Jun profeet a’an jun winq b’oqb’il xb’aan li Dios chi aatinak sa’ xk’ab’a’. Wankeb’ li profeet anajwan sa’ ruchich’och’ jo’ chanchan naq ke’wan najter q’e kutan.

Eb’ li profeet a’aneb’ aj ilol ut aj k’utb’esinel na’leb’. A’an naraj naxye naq neke’ru chirilb’al li ink’a’ nokoru chirilb’al ut naru neke’aatinak chirix li chalel kutan. Naru nokohe’xkawresi rub’elaj li ch’a’ajkilal. Eb’ li profeet neke’xkul li chaq’rab’ ut lix muqmuukil na’leb’ li Qaawa’. Li xb’ele raqalil li paab’aal na’aatinak chirix naq li muqmuukil na’leb’ wan sa’eb’ li roso’jik li kutan a’in. Naxye, “Laaʼo naqapaabʼ chixjunil li ak xkʼutbʼesi li Dios, chixjunil li naxkʼutbʼesi anajwan, ut naqapaabʼ naq toj tixkʼutbʼesi kʼiila naʼlebʼ li xninqalebʼ ru ut ninqebʼ xwankil chirix lix Awaʼbʼejihom li Dios.”

Li Elder Gary E. Stevenson kixye, “Li Qaawa’ toj naxk’utb’esiheb’ lix taqlahom ut li rajom chiruheb’ lix profeet anajwan xb’aan naq naraj qak’amb’al sa’ li sahil ch’oolejil sa’ li yu’am a’in ut li choxahil loq’alil sa’ li yu’am chalel.”

Eb’ li profeet neke’xjultika ajwi’ li evangelio ut musiq’anb’ileb’ jo’ aj k’utunel ut aj k’amol esil choq’ reheb’ chixjunil li kristiaan sa’ ruchich’och’.

Li junjunq chi komon sa’ li Xb’eenil Awa’b’ejil ut lix Molameb’ li Kab’laju chi Apostol a’an profeet, aj ilol na’leb’, ut aj k’utb’esinel. Rik’in naq neke’k’anjelak jo’ jun ch’utam rub’el lix b’eresihom li Qaawa’, wankeb’ xwankil chixch’olob’ankil ut chixk’utb’al xyaalal li tzol’leb’ ut chixxaqab’ankileb’ li chaq’rab’ choq’ re lix Iglees. Neke’tijok ut neke’aatinak, xb’aan naq li na’leb’ k’uub’anb’ilaq xb’aaneb’ li molam tento naq k’ulub’anb’ilaq. Chi jo’kan li Qaawa’ naxk’ut chiqu naq taa’uxq li rajom.

Eb’ li profeet neke’xch’olob’ xyaalal li Kristo—Lix wanjik, lix k’anjel, ut lix diosilal.

Qilaq junqaq li ch’olob’ahom ke’xk’e li profeet sa’ lix Hu laj Mormon.

Laj Abinadi kixye:

“Li Dios ajwi’ taakub’eeq sa’ xyanqeb’ li ralal xk’ajoleb’ li winq, ut tixtojeb’ rix lix tenamit.

“Ut rik’in naq nawan sa’ li tz’ejwalej, Ralal li Dios taayemanq re.”

Laj Samuel aj Lamanita kixch’olob’ ajwi’ naq li Jesukristo a’an “li Ralal li Dios, lix Yuwaʼil li choxa ut chʼochʼ, laj Yoʼobʼtesihom re chixjunil li kʼaʼaq re ru chalen chaq saʼ xtiklajik.”

Li profeet aj Moroni kixye, “Wilom li Jesus, ut … kinraatina chi k’utk’u chiru wilob’aal.”

Naq li Kristo kirula’aniheb’ laj Nefita, xb’een wa kixb’oqeb’ kab’laju chi apostol. Ut a’an kixye reheb’ li kristiaan, “Osob’tesinb’ilex wi teek’e eexik rik’in li raatineb’ li kab’laju a’in li keb’in sik’ chaq ru.”

Anajwan, nawaj aatinak rik’ineb’ li na’b’ej yuwa’b’ej malaj li wankeb’ sa’ xb’een xk’iiresinkileb’ li kok’al. A’an ajwi’ li Qaawa’ kik’utuk chiruheb’ laj Adan ut li xEva li yaal chirix li k’uub’anb’il na’leb’. Ut kixye reheb’, “Nink’e eere jun taqlahom, naq teek’ut li k’a’aq re ru a’in chi moko ramb’il ta chiruheb’ lee ralal eek’ajol.”

K’a’ru naraj naxye k’utuk chi maak’a’ taak’uula? A’an xtzolb’aleb’ li yaalil na’leb’ re li evangelio, wank xnawom qach’ool sa’ junjunqal, ut xwotzb’al li nawom a’an rik’ineb’ li qakok’al. A’an roksinkil li hoonal re xk’utb’al li k’ub’k’u jo’ ajwi’ li na’leb’ ink’a’ kawresinb’il. A’an wank jo’ chanru li na’leb’ ut li ch’olob’ahom a’an.

Lix Hu laj Mormon na’aatinak chirix li 2,060 chi saaj aj pleet jo’ “winq re yaal ut re tiikal k’a’uxlej, xb’aan naq tzolb’ileb’ chixpaab’ankil lix taqlahom li Dios ut chi b’eek chi tiik chiru.” Eb’ li saaj winq a’in ke’ab’in chi tiikeb’ xch’ool chiru laj Helaman, li kiwan choq’ aj jolominel reheb’ ut jo’ xprofeet ut ke’xk’ulub’a naq lix na’eb’ ke’xnujob’resi li raameb’ rik’in li yaal ut li paab’aal.

Ex na’b’ej yuwa’b’ej, sa’ li ruchich’och’ a’in b’ar wi’ naab’al li xyaab’ kuxej ut wan naq naab’al li aak’ab’, li Dios kooxtaqla chixk’iiresinkileb’ li qakok’al sa’ li saqen ut li yaal. A’an kixteneb’ sa’ qab’een xk’utb’al chiruheb’ li qakok’al li yaal chirix li kolb’a-ib’ li naxk’e li evangelio. Wi inkʼaʼ naqabʼaanu laa’o, li ruchichʼochʼ moko tixbʼaanu ta a’an.

Ex raarookil saaj, chiruheb’ li kutan a’in, nekexinb’oq chi wiq’laak, chixteeb’al eech’ool, ut chi tijok rik’in paab’aal chiru li qaChoxahil Yuwa’, ut patz’omaq re naq tixch’olob’ cheru naq eb’ li profeet ut lix apostol li b’oqb’ileb’ xb’aan, a’aneb’ xyaab’ xkux sa’ li ruchich’och’ anajwan.

Li ixq aj Sunem xk’ut chiqu naq naru nawan xnawom qach’ool rik’in li Santil Musiq’ej. Ninch’olob’ naq wi taqanaw naq a’aneb’ li yulb’ileb’ xb’aan li Dios, ink’a’ ch’a’ajaq li qayu’am us ta toj wankeb’ li qach’a’ajkilal xb’aan naq too’ab’inq chiru lix yaab’ xkux rik’in paab’aal, ut yo’onink. Rab’inkil ut xpaab’ankil lix yaab’ xkux li profeet aajel ru re xchapb’al qib’ chiru chixjunil li k’a’ru us toj reetal li xkab’ xk’ulunik li qaKolonel.

Lix ma’usilal li ruchich’och’ yoo chi nimank, a’b’an lix Iglees li Jesukristo ut lix awa’b’ejihom jwal kaw wi’chik chiru a’an. Sion yoo chixtiqib’ankil rib’ jo’ sa’ xhoonalil li ninq’e, ut lix k’ojarib’aal li Kristo ink’a’ taat’ane’q. Li Qaawa’ naroyb’eni naq kawaqo sa’ xnawom qach’ool, naq nujenaqaqo rik’in paab’aal ut naq tqajal qak’a’uxl wulaj wulaj. Li qaKolonel, Jesukristo, naroyb’eni qatenq’ chiqajunjunqal re xb’aanunkil lix k’anjel.

Li profeet aj Jose Smith kixye, “Ex was wiitz’in, ma ink’a’ tooxik chi uub’ej sa’ xnimal ru li k’anjel a’in?” A’b’anan, rik’in naq li esil a’in a’an choq’ eere laa’ex, li saaj, nawaj raj roksinkil li aatin saaj ruuchil ex was wiitz’in. Ma us?

“[Ex saaj], ma inkʼaʼ tooxik chi uubʼej saʼ xnimal ru li kʼanjel aʼin? Chi uubʼej chexxik; inkʼaʼ chi ixb’ej. Kawaq eechʼool [ex saaj]; ut chi uubʼej, chi uubʼej toj saʼ li qʼaxok-u! Chisahoʼq lee chʼool, ut qʼaxal sahaq chiwanq.”

Ninb’antioxi lix na’leb’eb’ ut lix yalb’al xq’e li yo’yookil profeet. Ninch’olob’ chi anchal inch’ool naq b’oqb’ileb’ xb’aan li Dios re xk’amb’al chi uub’ej, xxaqab’ankil, ut xb’eresinkil li rawa’b’ejihom sa’ li ruchich’och’ anajwan. Ut jo’kanaq chi junelik. Junelik li Qaawa’ tixsik’eb’ ru lix moos. Sa’ xk’ab’a’ li Jesukristo, amen.