Xk’oxlankileb’ li karneer

Li Jesukristo, a’an li Chaab’il aj Ilol Karneer. Loq’eb’ lix ketomq choq’ re, chixjunjunqaleb’. Li Jesus kixk’ut li k’aak’alenk xul, ut kixch’olob’ rik’in raatin ut xb’aanuhom chan ru xna’leb’eb’ aj ilol xul li chaab’ileb’: neke’xnaw xk’ab’a’eb’ li karneer, neke’xraheb’, neke’xsik’eb’ li sachenaq, neke’xk’e xtzakemq, ut neke’xk’am xb’e re naq te’sutq’iiq chaq. Li Jesus naraj naq laa’o ajwi’ took’aak’alenq chi jo’kan.

Naru naqatzol naab’al lix na’leb’ li Qaawa’ chirix rilb’aleb’ li qakomon rik’in li najter profeet aj Moroni—a’an ajwi’ jun li chaab’il aj ilol xul. Jwal ch’a’aj kixnumsi xyu’am, chi maak’a’ li celular, li ulul ch’iich’, ut li internet. A’b’an kiru chixnawb’al b’ar wankeb’ lix karneer. Chan ru kixnaw? Yal junpaat naxch’olob’ k’a’ru kixb’aanu sa’ Moroni 6. Aran naxye naq eb’ li komon “ke’k’ehe’ sa’ ajl sa’ xyanq li tenamit re lix iglees li Kristo, ut ke’k’uulaman xk’ab’a’eb’, re naq te’jultikamanq ut te’ch’olaniiq xb’aan lix chaab’il aatin li Dios, re te’kanaaq sa’ li tiikil b’e. … Eb’ li komon re li Iglees “ke’ch’utla chi kok’ aj xsa’, re kuyuk sa’ ut re tijok, ut re raatinankil rib’ chirib’ileb’ rib’ chirix lix chaab’ilal li raameb’” (Moroni 6:4–5; tiqb’il xkawilal li aatin).

Li naxk’oxla laj Moroni, a’aneb’ li komon ut ani xkab’a’eb’. Laj Moroni narajlaheb’ li komon re naq chixjunileb’ te’jultikamanq. Nak’eeman reetal ma wankeb’ li xe’sach malaj ch’a’aj wankeb’, re naq eb’ laj paab’anel te’xk’uub’ xna’leb’ chirixeb’. Chanchan laj ilol karneer li kixkanab’ li b’elelaju ro’k’aal (chi kolb’ileb’ ajwi’ naq tinye) ut kixsik’ chaq li jun li kisach xjunes (chi’ilmanq Lukas 15:4–7), wan ajwi’ sa’ qab’een laa’o xnawb’al b’ar wankeb’ li qaketomq—xk’eeb’al reetal b’ar xkoheb’ ut xsik’b’aleb’ ajwi’.

Naq kink’anjelak jo’ awa’b’ej re mision aran India, kinpatz’ re jun li saaj awa’b’ej re jun li rama chirixeb’ li k’anjel naxjayali sa’ li chihab’ chal re: “Jarub’eb’ li saaj winq taakawresi chixk’ulb’al li Tijonelil re Melkisedek?” chankin. Chi seeb’ kichaq’ok: “Wuqub!” chan.

Maare yal xyo’ob’ li ajl a’an chankin! Chi junpaat, xrisi jun li hu b’ar wi’ ak xtz’iib’a li ajl jun toj sa’ wuqub’. Ak wankeb’ oob’ li k’ab’a’ej tz’iib’anb’il aran—tz’aqal yaal naxnaweb’ ru ut ak xk’uub’ xna’leb’ sa’ lix molameb’ li elder re naq te’xb’oqeb’ chixk’ulb’al li santil tijonelil sa’ xyu’ameb’. Yaal ajwi’, kinpatz’ re anihaqeb’ raj li xwaq ut li xwuq kab’a’ej sa’ li hu. “Ah Presidente,” chan, ut ki’ok chixsursurinkil xjolom naq kixye, “Ch’olch’o chiqu naq te’qataw ani te’kub’eeq xha’ sa’ xtiklajik li chihab’ li te’ruuq xk’ulb’al li tijonelil sa’ xraqik li chihab’.” Li chaab’il aj jolominel a’in naxnaw li k’anjel re ajlank.

Li Kristo kixk’uub’ xk’anjel lix Iglees re naq ch’a’aj raj naq junaq li komon taasachq chiqu, xb’aan naq naxraheb’ chixjunil. Chixjunileb’ li komon sa’ jun li barrio, maak’a’ naxye aniheb’, wankeb’ naab’aleb’ aj ilol re—malaj aj k’aak’alenel—li wankeb’ xk’anjel chi ilok sa’ xb’eeneb’ ut chixk’oxlankileb’. Relik chi yaal, junaq li saaj winq wan li obiispil li na’ilok sa’ xb’een, jo’ ajwi’ eb’ aj ilol komon winq, aj jolominel reheb’ li saaj komon, eb’ aj k’utunel re li seminario, eb’ laj jolominel sa’ li tijonelil, ut xkomoneb’ chik—yal re naq te’k’anjelaq sa’ komonil chanchan k’iila yoy li te’chapoq re wi nat’ane’. Us ta yal jun reheb’ li yoy a’an wan, li saaj winq a’an toj kolb’ilaq rix ut nawb’ilaq ru. A’b’anan, wan ajwi’ naq maajun li yoy wan. Wankeb’ li neke’sach rajlal sa’eb’ li choql—ut maajun na’ilok reheb’. Chan ru took’aak’alenq chi chaab’il? Naru taqatzol li k’anjel re ajlank.

Li Iglees naxk’e li k’anjeleb’aal re naq taqab’aanu ajwi’ a’an—xk’eeb’aleb’ li komon sa’ ajl. Li informe trimestral, a’an jun reheb’ li k’anjeleb’aal a’an. Nokoxtenq’a chirajlankileb’ li komon k’iila sut ut chixk’eeb’al reetaleb’ li maa’aniheb’ malaj li neke’raj ru qatenq’ ut li qarahom. Li lista de acción y entrevistas naxye xk’ab’a’eb’ li te’raj ile’k chi seeb’, jo’ ajwi’ li hu chirixeb’ li recomendacion re li santil ochoch. Eb’ li k’anjeleb’aal a’in nokohe’xtenq’a chixk’oxlankileb’ li komon. Ani taaraj jun xk’anjel, xk’ojob’ankil sa’ li tijonelil, malaj xtenq’ankil chi k’anjelak sa’ li santil ochoch? Ani taqatenq’a chixkawresinkil rib’ choq’ re jun li mision? Ani ink’a’ xwulak sa’ ch’utam? Li k’anjeleb’aal a’in nokoxtenq’a chixkoxlankileb’ li komon.

Ninnaw ru jun li junkab’al aj Estados Unidos li kixk’ul xk’anjel aran Africa. Sa’ li xb’eenil domingo naq ke’wulak aran, ke’ok sa’ li jun ajwi’ chi teep re li Iglees li kiwan sa’ li tenamit a’an, ut ke’k’ule’ rik’in nimla sahil ch’oolejil. Naq kiwa’leb’o’, li na’b’ej ak xk’ul xb’oqb’al jo’ li awa’b’ej re li Komonil re Tenq’ank, ut li yuwa’b’ej xb’oqe’ jo’ aj jolominel reheb’ li Saaj Winq! Kixpatz’ re li awa’b’ej re li rama, li anchal lub’lu wan, jarub’eb’ li saaj winq wankeb’ sa’ li teep. Li jolominel, li jwal xyal xq’e chixwaklesinkil li Iglees aran, kixjayali li ruq’ toj sa’ xraqik li sala ut xye, “Wahi’keb’ li wiib’.” Li winq ink’a’ kixpaab’ naq yal wiib’eb’ wan, jo’kan naq kixk’am jun li listado sa’ rochoch ut kiril naq wankeb’ jun may li saaj winq sa’ li hu a’an. Kixpatz’ re li awa’b’ej re li rama naq te’wanq wiib’eb’ lix consejero li saajeb’ ut li neke’xnaw aatinak sa’ raatinob’aal, toja’ naq kichunla rik’ineb’ rochb’eeneb’ ajwi’ li wiib’ chi saaj winq ut ke’ril xk’ab’a’eb’ li jun may.

Aran, eb’ li saaj a’an ke’xtikib’ k’anjelak. Chiru wiib’ oxib’ po, ke’xtaw chixjunileb’ li saaj winq sa’ li hu a’an. Chi junjunqaleb’ li k’ab’a’ej, eb’ li karneer sachenaq a’an ke’b’oqe’ xb’aaneb’ li ras riitz’in ut ke’xk’ul xch’oolaninkil! Naq maji’ naxket jun chihab’, junelik neke’wulak junaq 21 chi saaj winq rajlal domingo. B’antiox re li Dios naq eb’ li saaj ke’rajlaheb’ li komon.

Jun lin raarookil amiiw kiq’axon sa’ jun li tenamit aran Estados Unidos rochb’een lix junkab’al re naq taatzoloq sa’ universidad . Chi seeb’ kixk’ul xb’oqb’al re xjolominkil lix molameb’ li xb’eenil. Naxxuwa b’ayaq xb’een lix entreviist rik’in li awa’b’ej re li oqech, jo’kan naq kixkawresi rib’ chi us. Kixye re li awa’b’ej naq wankeb’ oxib’ lix jayalihom choq’ re li chihab’ chal re: (1) te’xb’aanu rilb’aleb’ li komon 90 por ciento, (2) jun li tzolok chirix li evangelio rajlal xamaan, ut (3) jun li actividad rik’ineb’ li winq rajlal po.

Chi se’se’ ru, li awa’b’ej kixpatz’ re li wamiiw, “Ma taanaw xk’ab’a’ jun li elder li ink’a’ chik nawulak sa’ qayanq, li truuq taatenq’a chi wulak sa’ santil ochoch chiru li chihab’ a’in?” Osach xch’ool li wamiiw. Kixtz’il rix ut xnaq sa’ xch’ool jun li k’ab’a’ej. “Tz’iib’a li k’ab’a’ej a’an,” chan li awa’b’ej. Toja’ naq li awa’b’ej kixye li patz’om a’an oxib’ sut chik—ut xraqe’ li entreviist. Li saaj winq a’an ki’el sa’ li entreviist rik’in jun ak’ na’leb’ jwal nim sa’ xk’a’uxl chirix li jolomink ut li k’anjel re rilb’aleb’ li komon. Sa’ xtiklajik li entreviist, naxk’oxlaheb’ li k’anjel, li tzolok, ut li actividad. A’b’an sa’ xraqik li entreviist, naxk’oxla xk’ab’a’eb’ li komon! Li kaahib’ chi k’ab’a’ej a’an ke’ok choq’ tz’aqal xjayalihom lix k’anjel rik’ineb’ li elder.

Naq kink’anjelak jo’ awa’b’ej re mision, kinwulak sa’ jun reheb’ lin rama chiru li domingo eq’la. Kink’e reetal naq li awa’b’ej re li rama k’iila sut narisi jun li ch’ina hu ut natz’iib’ak chiru. Kiwaj xpatz’b’al re k’a’ru a’an chirix li xraqik li qatij. Naq xraqe’ li ch’utam, toj maji’ nin’ok chixpatz’b’al re naq li lider misional kixseeb’a rib’ chi wulak chiru li pulpito, b’ar wi’ xk’ul li hu a’an. Laa’in xintaaqe li lider misional toj sa’ lix ch’utam b’ar wi’ neke’xk’uub’ xk’anjel chirix li misionerik. Naq maji’ natikla li ch’utam, kirisi li hu sa’ xweex. Tz’iib’anb’il aran xk’ab’a’eb’ naab’aleb’ li komon li ink’a’ xe’wulak sa’ li loq’laj wa’ak. Yal wiib’ oxib’ k’asal xnume’, ut chixjunileb’ aj k’anjel sa’ li ch’utam ak xe’xye naq te’wulaq rik’in wiib’ oxib’ reheb’ li komon a’an, re naq te’ril ma us wankeb’ ut te’xk’e chixnaweb’ naq k’oxlanb’ileb’ chaq. A’an a’an tz’aqal li k’ehok sa’ ajl.

Jultik we jun li distrito li wan chaq k’iila hoor sa’ avion rik’in li santil ochoch, b’ar wi’ jwal neke’roxloq’i lix recomendacion re li santil ochoch, us ta maare maajo’q’e te’roksi. Sa’ li xb’een domingo rajlal po, eb’ laj jolominel neke’roksi lix k’anjeleb’aal chirajlankileb’ li komon li ak ke’xk’ul li loq’laj tiqib’aak. Wi neke’ril naq oso’k re junaq li recomendacion, li secretario naxk’e xkutankil jun li entreviist re naq te’xk’e reeqaj. Neke’aatinak chirixeb’ li maak’a’eb’ chik xrecomendacion re naq te’xtz’il rix chan ru te’xtenq’aheb’ chi sutq’iik sa’ xb’ehil li sumwank. Kinpatz’ jarub’eb’ li komon aran wankeb’ lix recomendacion. Osach inch’ool naq ke’xye 98.6 por ciento. Naq kinpatz’ok chirixeb’ li waqib’ li xe’oso’ ru xrecomendacion, eb’ laj jolominel ke’xnaw xk’ab’a’eb’ ut ke’xch’olob’ chiwu li na’leb’ ak ke’xk’uub’ chaq re xtenq’ankileb’ chi sutq’iik!

Wiib’ oxib’ chihab’ chaq anajwan, lin junkab’al kisutq’i Estados Unidos. Kisaho’ qach’ool naq toowulaq sa’ li iglees arin chirix naq xqanumsi 26 chihab’ b’ar wi’ jwal ka’ch’ineb’ li ch’utam. Kinb’oqe’ chi k’anjelak jo’ misioneer re barrio. Chaab’il li lider misional, chaab’il yooko chi k’anjelak, ut yooko chixtzolb’aleb’ li kristiaan jwal chaab’ileb’. Kinpatz’ naq tin’okenq sa’ jun xch’utam li consejo de barrio re naq toohe’xtenq’a chi k’anjelak rik’ineb’ li qas qiitz’in. Osach inch’ool naq junes ke’aatinak chirix xkawresinkil jun li actividad re li barrio. Chirix li ch’utam, kin’aatinak rik’in li lider misional ut kink’oxla naq ink’a’ xe’xk’e xhoonal chixyeeb’al resileb’ li qas qiitz’in li yooko chirilb’al. Naq kichaqok, kixye: “Pues, ink’a’ xe’xk’e inhoonal.”

Aran, xnaq sa’ lin ch’ool jun li ch’utam aran Lahore, Pakistan, b’ar wi’ kinwulak yal wiib’ oxib’ xamaan chaq. Li ch’ina ch’uut a’an kichunla chixsutam jun ch’ina meex sa’ komonil, ut ke’aatinak junes chirixeb’ li komon. Lix k’ab’a’eb’ b’i’. Chixjunileb’ li jolominel ke’xye resil lix k’anjel ut li komon ut li junkab’al li yookeb’ chixk’oxlankil. Chixjunileb’ ke’xk’ul xhoonal chixyeeb’al k’a’ru neke’xk’oxla chirix xtenq’ankileb’ li yookeb’ chixyeeb’al resil. Ke’xk’uub’ xna’leb’ ut ke’xk’ul xk’anjel. Jwal ch’ina-us li na’leb’ neke’xk’ut li qas qiitz’in b’ar wi’ toj ak’ li Iglees sa’ xyanqeb’.

Sa’ lix Iglees li Jesukristo, ak xqak’ul qana’leb’ rik’ineb’ li profeet junxil ut li profeet anajwan—ut rik’in ajwi’ li Kolonel—chirix li k’anjel re rilb’aleb’ li komon. Naqatz’iib’a li k’ab’a’ej, naqak’oxlaheb’, ut naqak’uub’ qana’leb’ chixtenq’ankileb’. Eb’ li jolominel li neke’xb’aanu chi jo’kan maajo’q’e te’xsach xhoonal sa’eb’ lix ch’utam! Chaab’il nak’anjelak li ajlank. A’an xna’leb’ li Qaawa’. Naru taqab’aanu chi jwal us wi’chik. Choq’ re li Dios li nimajwal xwankil, li k’anjel a’in—a’ lix k’anjel ut lix loq’al A’an—nokoril chiqajunjunqal. Ut kama’an raj taqil li k’anjel laa’o chiqajunjunqal, naq nokok’anjelak jo’ xmoos li Dios sa’ li xnimal ru k’anjel re li kolb’a-ib’. Te’uxq li sachb’a-ch’oolej sa’ xyu’ameb’ li qas qiitz’in. Sa’ xk’ab’a’ li Jesukristo, amen.