Re naq chixjunil teʼwaklesiiq li raamebʼ

Jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, osob’tesinb’ilo rik’in jun qochb’een li na’oken sa’ Roxichal li Dios, jo’kan naq ak wan tz’aqal aj tenq’ahom qe. Li Santil Musiq’ej chixjunil naxnaw, li yaal naxch’olob’, ut “tixjultika qe chixjunil” li k’a’aq re ru. Li Awa’b’ej Russell M. Nelson kixye naab’al sut naq aajel ru rab’inkil lix yaab’ xkux li Qaawa’. A’an kixk’ut chiqu chan ru taqakanab’ li Santil Musiq’ej chixk’amb’al qab’e, ut k’iila sut kooxb’oq chixkawresinkil qib’ chixk’ulb’al qana’leb’ rik’in li Dios.

Anajwan, nekexinb’oq chixk’oxlankil lix k’anjel li Santil Musiq’ej sa’ xtzolb’al ut xk’utb’al li evangelio sa’ li junkab’al ut sa’ li iglees. Li Santil Musiq’ej nak’eeman naq tz’aamanb’il rik’in paab’aal ut naq wan qak’ulub’ chixk’ulb’al li maatan a’in. Sa’ li hu TLi K’utuk jo’ li Kolonel tz’iib’anb’il resil jun tuub’ chi na’leb’ kixkawresi li Qaawa’ re qatenq’ankil chixb’oqb’al li Santil Musiq’ej chi k’anjelak jo’ aj tenq’ahom qe.

Jun reheb’ li na’leb’ a’an xbʼoqbʼalebʼ re teʼxyal xqʼe chi tzolok. Junxil, maare naqak’oxla naq li k’utuk naraj naq jun yuwa’b’ej malaj aj k’utunel tixb’oq li Musiq’ej naq naxkawresi rib’ xjunes, toja’ naq tixye k’a’ru xtzol chaq reheb’ li kok’al malaj li tzolom li neke’ab’ink re. A’b’an chaab’il chik li tzolok naq laa’o, jo’ tzolom, nokowulak ajwi’ chi kawresinb’ilo, ut naq laj k’utunel nokoxtenq’a chixk’ulb’al qajunes qib’ li k’utb’esinb’il na’leb’ sa’ qach’ool ut sa’ qak’a’uxl. Ut naq k’eeb’il qahoonal chixwotzb’al li na’leb’ xqaxok rik’in tzolok ut rik’in xtenq’ li Santil Musiq’ej, naqatenq’a qib’ chiqib’il qib’ re naq taanimanq qanawom ut taawaklesiiq li qaam. Naq naqayu’ami li na’leb’ re li evangelio, li Musiq’ej naxk’ut wi’chik xyaalalil a’an.

Sa’ li k’anjel ajwi’ a’in, a’an li Jesukristo li naxk’ut chiqu xb’aanunkil. A’an nokoxb’oq chixk’eeb’al qach’ool chi tzolok ut chixch’oolaninkil qapaab’aal qajunes qib’. Li Kristo kixb’oqeb’ lix moos chixkawresinkil rib’ choq’ re li tzolok, chixwotzb’al li na’leb’ neke’xtzol, ut chi k’anjelak rik’in paab’aal. Kitijok chirixeb’, kiril lix loq’alileb’, kirab’iheb’, ut kixtenq’aheb’ chixnawb’al naq raab’ileb’ ut ajb’ileb’ ru.

Jo’ aj k’utunel, jwal us raj naq taqak’oxla chan ru te’k’iiq li tzolom, li b’ar wan aajel ru choq’ reheb’, ut chan ru te’xtaaqe li Jesukristo chiru chixjunil lix yu’ameb’. Jo’ tzolom, naq naqoksi lix taql qach’ool chi tzolok, naqak’ut chiru li Santil Musiq’ej naq wan qach’ool chi tzole’k xb’aan.

Ninb’antioxi naq kiwan jun li qana’ k’utunel li kinxb’oq chi tzolok chi jwal us wi’chik. Naq kintikib’ tzolok sa’ li universidad, nink’oxla naq tinkuy li tzolok yal re naq tinruuq chi tz’aqonk sa’eb’ li deporte. Sa’ jun kutan, li qana’ k’utunel kiril jun li hu xintz’iib’a, ut kixye we naq seeb’ inch’ool jo’ aj k’oxlanel. Laa’in ink’a’ ninnaw k’a’ru naraj naxye a’an. A’an kixye naq wi tinyal inq’e, jwal chaab’il wi’chik tintzoloq. Maajun wa nink’oxla li na’leb’ a’an. Li raatin li qana’ k’utunel kixjal xb’ehil intzolb’al ut k’a’jo’ li usilal kixwaklesi sa’ lin yu’am.

Jun chik li na’leb’ li aajel ru re xb’oqb’al li Santil Musiq’ej, a’an xk’utb’al li tzol’leb’ tz’aqal yaal. A’in naraj naxye naq lix xe’il li naqatzol ut naqak’ut sa’ li evangelio, a’an li raatin li Dios, ut ink’a’ naqanimob’resi malaj naqatz’il rix li na’leb’ moko k’utb’esinb’il ta xb’aan li Qaawa’. Naqajayali b’an li na’leb’ ch’olch’o re li evangelio, li naxkanab’ li Musiq’ej chixch’olob’ankil li yaal. A’an ajwi’ li Kolonel li naqataaqe. A’an kixye, “Li k’a’ru nink’ut laa’in moko we ta, re b’an li kitaqlank chaq we.”

Li na’leb’ li tz’aqal yaal natawman sa’eb’ li loq’laj hu ut li raatineb’ li profeet re li kutan a’in. Xpaab’ankil li relajihom li Qaawa’ naq taqileb’ li loq’laj hu qajunes jo’ ajwi’ sa’ qajunkab’al ut naq toowulaq sa’ li iglees rajlal xamaan re xtzolb’al lix evangelio, k’a’jo’ naq nokoxtenq’a chixtzolb’al lix na’leb’ ut chirab’inkil lix yaab’ xkux. Naqatz’ileb’ rix li loq’laj hu re xtawb’al ru li seraq’, li na’leb’ nak’utman, ut chan ru xyu’aminkil li na’leb’ a’an sa’ li qayu’am. A’an jun xnimal ru osob’tesink naq wankeb’ li loq’laj hu qik’in. Qayehaq naq laj Adan ut xEva, laj Abinadi, malaj li xnimal ru aj K’utunel Jesukristo te’wulaq raj sa’ li qajunkab’al malaj li qatzoleb’aal. Naru ajwi’ naq te’wulaq qik’in, naq naqatzeka xsahil li raatin li Dios. Wi naqayal qaq’e, naru taqataw ru ut taqara li loq’laj hu, ut naru taqapaab’ naq tixk’ut li na’leb’ jwal aajel ru choq’ qe.

Rub’elaj naq koosumla, li xKristi, li wixaqil, ch’a’aj chiru xk’eeb’al reetal lix rahom li qaChoxahil Yuwa’ ut xtawb’al ru li na’leb’ kixk’uub’ li Dios choq’ re. Naq kitijok re xpatz’b’al xb’eresinkil, kichal sa’ xk’a’uxl naq tento taa’okenq sa’ li instituto, jo’kan naq kixtz’iiba’ rib’ sa’ jun li tzolok chirix li Ak’ Chaq’rab’. Naq laj k’utunel kixk’ut li na’leb’ sa’ li loq’laj hu, ut naq naxchap li hu sa’ ruq’, uuchin chiru naq naxra li raatin li Dios. Naq li wixaqil na’oken sa’ li tzolok, li Santil Musiq’ej kixye sa’ xch’ool naq wan jun li na’leb’ sa’ li loq’laj hu li taaraj ru. Lix rahom laj k’utunel choq’ re li loq’laj hu ut lix wankil li Santil Musiq’ej ke’xwaklesi xch’ool li wixaqil chixtzolb’al li raatin li Dios—toja’ naq ki’ok sa’ jun b’e b’ar wi’ taajalaaq xch’ool ut tixq’axtesi lix yu’am re li Dios.

Nayeeman ajwi’ sa’ li hu Li K’utuk jo’ li Kolonel naq li naqatzol ut li naqak’ut tento tixjayali li Jesukristo. Jwal us raj naq too’aatinaq chi kok’ aj xsa’ ut rik’in oxloq’ chirix li Kristo, ut naq taqaye resil qanawom chirix ut qarahom choq’ re, ut naq taqab’antioxi a’an. Yalaq b’ar wanko, naq najultiko’ qe li Kristo, “taaruuq taawanq … lix Musiqʼ qik’in.”

Naru naqajayali li Jesukristo naq nokok’utuk wi naqaka’jultika naq a’an li tz’aqal reetalil chixjunileb’ li na’leb’ sa’ li evangelio. Us ta ink’a’ yeeb’il lix k’ab’a’ sa’ jun seraq’ sa’ li loq’laj hu, naru taqach’olob’ naq li Jesus naxk’ut li na’leb’ chi tz’aqal. Maare taqapatz’, “Ani tixye jun seraq’ naq li Jesukristo kixk’ut li na’leb’ a’an?”

Naru ajwi’ taqajayali li Kristo naq neke’qatzol lix k’ab’a’, lix k’anjel, ut lix chaab’ilal, ut naq naqatzol k’a’ru kixb’aanu ut naqasik’ xnawb’al ani a’an. Naq nokotzolok chirix li jalb’a-k’a’uxlej, aajel ru xnawb’al chan ru taqajal qak’a’uxl. A’ut aajel ajwi’ ru xjultikankil li kixb’aanu li Jesukristo re naq tooruuq chixjalb’al qak’a’uxl, ut aajel ru xnawb’al k’a’ru naxk’ut li jalb’a-k’a’uxlej chirix lix na’leb’ li Jesukristo. Naq li Jesus nokoxkanab’ chixjalb’al qak’a’uxl, k’a’ru taqanaw chirix lix rahom, lix kuyum, li ruxtaan, lix nawom chirix li qaloq’alil, li rajom chixtojb’al rix qamaak, ut lix sahil xch’ool rik’in li kuyuk maak? Ut xnawb’aleb’ lix k’ab’a’—jo’ lix Karneer li Dios, laj Tojol-ix, ut laj B’anonel—nokoxtenq’a chixk’eeb’al reetal naq li jalb’a-k’a’uxlej naraj naxye naq a’an naraj qach’a’jb’al, qajalb’al, ut qak’irtesinkil. Naq naqak’oxla k’a’ru kixb’aanu choq’ qe ut k’a’ru naxk’utb’esi a’an chirix lix na’leb’, naru taqak’ul “qapaabʼaal choqʼ re li jalbʼa-kʼaʼuxlej.”

Wan naq ink’a’ naqil sa’ junpaat lix na’leb’ li Kolonel sa’ jun seraq’ sa’ li loq’laj hu. Naq naqil li seraq’ chirix laj Nefi naq kixyiib’ li jukub’, maare yal naqil laj Nefi. A’b’an xk’oxlankil li Kolonel nokoxtenq’a chirilb’al naq li hu a’in moko kik’uulaman ta re xk’utb’al xnimal ru laj Nefi, re b’an xk’utb’al xnimal ru li Dios—naq a’an naxk’e qametz’ew re xpaab’ankil lix taqlahom ut naq a’an nokoxkol chiru li qach’a’ajkilal.

Naru ajwi’ naqajayali lix k’anjel li Jesukristo li wan sa’ xyi li na’leb’ kixk’uub’ li qaChoxahil Yuwa’ choq’ re xsahil qach’ool. Naru taqajal xb’ehil li qayu’am wi naqak’e reetal naq wan k’a’ru kixk’uub’ li Dios choq’ qe sa’ li junelik q’e kutan, ut wi ink’a’ yal naqil li wanko wi’ anajwan. Li evangelio ink’a’ yal naxk’e qataqlankil; a’an b’an li chaab’il esil naq li Jesukristo kinumta sa’ xb’een li maak ut li kamk. Rik’in xk’ulb’al rusilal li Kristo ut xpaab’ankil li qasumwank rik’in li Dios naru toosaho’q sa’ qayu’am anajwan ut naru taqakawresi qib’ chi wank rik’in li Dios chi junelik q’e kutan. Naq naqanaw rilb’al reetalil li qaChoxahil Yuwa’ ut li Kolonel sa’ li loq’laj hu, too’ok chixnawb’aleb’ ru ut jwal taqak’ul wi’chik xrahomeb’ ut xwankilaleb’ sa’ qayu’am.

Junelik taakanaaq sa’ lin ch’ool li Musiq’ej li kiweek’a sa’ lin saajil naq jun laj k’utunel kixch’olob’ k’a’ru kixk’ul li Kolonel naq raqe’k re lix yu’am. Kooxtenq’a chirilb’al xnimalil ru li kik’ulman aran sa’ li xkabʼ xkʼojaril li kabʼl, Getsemani, Golgota, ut sa’ li muqleb’aal yamyo. Kixye naq jwal naxb’antioxi li Kolonel ut jwal naraj xtaaqenkil a’an. Li kixk’ut a’an kixb’oq li Santil Musiq’ej chixch’olob’ankil xyaalal li Jesukristo. Ut li Musiq’ej li kiweek’a sa’ li tzoleb’aal kixnimob’resi lin paab’aal ut lin rahom ut lix sahil inch’ool chirix li Kolonel. Li kixb’aanu laj k’utunel a’an toj wan wik’in chalen chalen. Jo’ kiyeeman chirix jalan chik aj k’utunel, “Naru xq’ixnankil li quq’ sa’ xxamlel lix paab’aal.”

Sa’ li qajunkab’al ut sa’ li Iglees, naq naqajayali li Jesukristo, naq naqak’ut lix na’leb’ ut nokotzolok chi anchal qach’ool, naqab’oq li Santil Musiq’ej chixkawresinkil li qapaab’aal chirix li Jesukristo ut chiqatenq’ankil chi wank jo’ chanru a’an, ut a’an aj-e chixjunil li tzolok ut li k’utuk sa’ li evangelio.

Ninb’antioxiheb’ laj k’utunel sa’ lin yu’am, a’aneb’ lin na’ inyuwa’, eb’ laj jolominel ut laj k’utunel sa’ li iglees, jo’ ajwi’ eb’ li winq ut ixq li b’oqb’ileb’ chi k’utuk ut chi ch’olob’ank sa’ li xaqarib’aal a’in, li nokohe’xtenq’a chixnawb’al ru ut chixtaaqenkil li Jesukristo. Ut ninb’antioxi li Santil Musiq’ej, li tz’aqal aj Tenq’ahom qe. Rik’in li Santil Musiq’ej ninnaw naq li qaChoxahil Yuwa’ nokoxra ut naq kixk’uub’ xna’leb’ chi tz’aqal re ru choq’ qe; naq li Jesus a’an li Kristo, laj Kolol re ut laj Tojol rix li ruchich’och’; ut naq lix evangelio ut lix Iglees k’ojob’anb’ileb’ wi’chik. Ninch’olob’ xyaalaleb’ li na’leb’ a’in sa’ xk’ab’a’ li Jesukristo, amen.