Rilb’aleb’ li komon chi junjunqil

Ex was wiitz’in, b’antiox eere naq nekeyal eeq’e chi chalk rik’in li Jesukristo naq ch’a’aj wanko sa’ li ruchich’och’. Chaab’ilex; k’a’jo’ xchaq’alil eeru; laa’ex ralalex li Dios chejunjunqalex. Nintz’aama naq taqak’e reetal lix wankil li Santil Musiq’ej naq naqayal qaq’e sa’ komonil chixtaaqenkil li Jesukristo chi anchal qach’ool, ut naq taqeek’a xsahil xch’ool a’an naq nokoloq’onin sa’ li rochoch li Qaawa’.

Li Awa’b’ej Russell M. Nelson kixye: “A’an a’in xq’ehil choq’ eere laa’ex ut choq’ we laa’in re naq taqakawresi qib’ choq’ re li xkab’ xk’ulunik li Qaawa’, a’ laj Kolol qe, li Jesukristo. A’an a’in xq’ehil re naq taqajayali qib’ rik’in li qawanjik jo’ xtzolom a’an. Sa’ li ruchich’och’ a’in li nujenaq rik’in li k’a’aq re ru naru najalb’ehink qe, chan ru naru taqab’aanu a’in?”

Chan li Awa’b’ej Nelson: “Li loq’onink chi kok’ aj xsa’ sa’ li santil ochoch tooxtenq’a. Sa’ li santil ochoch, naqajayali qib’ rik’in li Jesukristo. … Noko’ok chixnawb’al ru a’an. … Yalaq ani nasik’ok re li Jesukristo chi anchal xch’ool, tixtaw a’an sa’ li santil ochoch.”

Jo’kan ut, ninpatz’ chan ru taqayal qaq’e sa’ komonil chixtaaqenkil li Jesukristo? Naqatenq’a li qakomon chi junjunqil. Xtenq’ankileb’ jo’ naxb’aanu li Kolonel naraj naq taqatoq’ob’aheb’ ru, naq q’unaq qach’ool, naq tookuyuq, ut naq taqaraheb’ chi maak’a’ li jitok. Naq naqatenq’aheb’ li komon chi junjunqil, naqab’oqeb’ chi chalk rik’in li Kristo ut chi loq’onink sa’ li rochoch li Qaawa’ re xk’ulb’al lix wankilal aj tojol-ix. Naraj ajwi’ naxye naq naqayal qaq’e sa’ komonil chixtaaqenkil li Qaawa’ naq naqab’oq li jun sa’ li b’e li nawulak sa’ rochoch li Qaawa’.

Li Jesukristo naxk’ut naq nim xwankil rilb’aleb’ li qakomon chi junjunqil rik’in rahok ut chi maak’a’ li jitok. Maare jultik aawe li ixq aj Samaria sa’ li yo’leb’aal ha’. Li ixq a’in maare kireek’a naq maak’a’ xloq’al, naq xjunes wan, naq nalukta xch’ool, ut naq maa’ani na’ilok re. Maare kireek’a naq moko k’ulb’il ta. Ak oob’ xb’eelom ke’wan, ut li wan rik’in anajwan moko xb’eelom ta. Wankeb’ li maare te’xq’ab’a xb’aan naq ink’a’ neke’xnaw k’a’ru naxk’ul sa’ xyu’am. Maare xmaak a’an naq xjunes rib’ naxik chixxokb’al li ha’ naq ak xtiqwo’ ru li kutan. A’ut, li ixq a’an wan sa’ xyanqeb’ li xb’eenil li ke’rab’i li Jesukristo chixyeeb’al naq a’an li Mesias. Naq naril li Jesus, li ixq a’an jun xrab’in li Dios.

Li Jesukristo kixk’ut chiru li ixq naq sa’ xk’ab’a’ a’an, taak’ehe’q li junelik yu’am re li ani taa’uk’aq re li yo’yookil ha’. A’an kixye, “A’ut li taa’uk’aq re li ha’ tink’e laa’in, maajo’q’e chik taachaqiq re: li ha’ tink’e laa’in wanq rik’in jo’ jun yu’amha’ nab’ululnak re li junelik yu’am.”

Li ixq aj Samaria kireek’a lix rahom li Kolonel ut kixnaw rik’in li Musiq’ej naq a’an li Mesias. Chirix li kiril, li ixq kiq’aj sa’ tenamit ut kixb’oqeb’ jalan chi chalk ut chirilb’al, ut naab’aleb’ ke’xpaab’ naq li Jesus “a’an tz’aqal laj Kolol re li ruchich’och’.” Li Kristo kiril li jun chi komon rik’in rahok; jo’kan naq jalaneb’ chik ke’ok chixtaaqenkil chi anchaleb’ xch’ool.

Naqil xwankilal li tenq’ank chi junjunqil sa’ jun li esilal chirixeb’ lix apostol li Kristo, laj Pedro ut laj Jwan. Maare najultiko’ eere li winq li sik xyo’la, ut li wulaj wulaj naxyokob’ rib’ chixk’atq li rokeb’aal li santil ochoch re xpatz’b’al xleemox. Li winq a’in maare kireek’a naq maak’a’ xloq’al, naq junes wan, naq nalukta xch’ool, ut naq maa’ani na’ilok re. Maare kireek’a naq moko k’ulb’il ta.

“Ut laj Pedro kixye re, maak’a’ in’oor, maak’a’ inplaat; a’b’an li k’a’ru wank we tink’e aawe: sa’ xk’ab’a’ li Jesukristo, laj Nazaret, waklin ut b’een.”

Laj Pedro kixchap lix nim uq’ ut kixwaklesi, toja’ naq kik’ira li winq. Chirix li sachb’a-ch’oolej a’an, li winq ki’ok sa’ li santil ochoch rochb’een laj Pedro ut laj Jwan, ut “nab’eek chik ut yoo chixnimankil ru li Dios.” Laj Pedro ut laj Jwan ke’xtenq’a li jun chi komon naq ke’xjayali rik’in li rochoch li Qaawa’, ut li winq a’in ki’ok chixtaaqenkil li Kristo chi anchal xch’ool.

Ex wamiiw, wan naq laa’in ajwi’ naweek’a naq maak’a’ inloq’al, naq injunes wankin, naq nalukta inch’ool, ut naq maa’ani na’ilok we. Wan naq naweek’a naq moko k’ulb’ilin ta. Kikub’e inha’ ut kink’ojob’aak jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan naq 19 chihab’ wan chaq we. Jun chihab’ chik chirix a’an kink’ul lin b’oqb’al chi k’anjelak jo’ misioneer, a’b’an toj wan naab’al li na’leb’ maji’ nintzol chirix lix tiklajik chaq li Iglees.

Naq toj ak’in sa’ li mision, kinnaw naq junxil li ani wankeb’ xxe’ toonil aran Africa ink’a’ ke’ru chixk’ulb’al chixjunil li osob’tesiik re li loq’onink sa’ li rochoch li Qaawa’. Naq kinnaw a’an, kinjosq’o’, kisach inna’leb’, kiwiib’an inch’ool, ut kinxuwak. K’a’jo’ xrahilal li kiweek’a, jo’kan naq ink’a’ chik kinru chixk’eeb’al reetal li Santil Musiq’ej chiru jarub’aq kutan.

A’ut, jwal chaab’il li wochb’een, laj Kevin Vick, ut a’an kinril rik’in rahok, kuyuk, ut q’unil ch’oolej. Rajlal ewu naq kiril lix wiib’ankil lin ch’ool, a’an kixye we, li saaj aj Elder Johnson, “Nakatinra.” Chirix xnumik wiib’ xamaan, kinkanab’ wib’ chireek’ankil lix rahom laj Kevin. Kintaw xkawilal inch’ool re tijok chiru lin Choxahil Yuwa’ sa’ xk’ab’a’ li Jesukristo. Naq kintijok, kink’ame’ sa’ li tasal 6 re li Tzol’leb’ ut Sumwank, raqal 21–23, li naxye:

“Kʼe reetal, laaʼin li Jesukristo, li Ralal li Dios. … Laa’in li saqen li nalemtz’un sa’ q’ojyin. …

“… Bʼeresi laa kʼaʼuxl saʼ li qʼojyin naq kat-elajin chiwu saʼ laa chʼool, re taaruuq taanaw chirix lix yaalalil li kʼaʼaq re ru aʼin.

“Ma ink’a’ kinye tuqtuukilal re aak’a’uxl chirix li na’leb’ a’an? Kʼaʼru xkʼutbʼal xyaalal naru nakakʼul li naqʼaxok ta re li nachal chaq rikʼin li Dios?”

Naq toj yookin chirilbʼal, kinaq jun naʼlebʼ saʼ inchʼool. Kinaq sa’ inch’ool li kutan naq kinkuy insa’ ut kintijok re xnawb’al naq lix Hu laj Mormon a’an li raatin li Dios, ut naq laj Jose Smith a’an li profeet li kixk’ojob’ wi’chik li evangelio. Kinaq sa’ inch’ool li sumwank kin’ok wi’ sa’ li rochoch li Qaawa’ li jwal kaw nikinxlaq’ab’ rik’in li Jesukristo. Kiweek’a lix rahom ut li ruxtaan li Kolonel, ut naq kixk’e chinnaw naq Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, a’an lix awa’b’ejihom sa’ li ruchich’och’, ut naq aajel ru a’an re qakawresinkil choq’ re li xkab’ xk’ulunik. Xb’aan naq kinaq a’an sa’ inch’ool, kinru wi’chik chixk’eeb’al reetal li Santil Musiq’ej ut chixnawb’al naq li Jesus a’an li Kristo ut laa’in lix tzolom.

Wan naq moko neke’sumeek ta li qapatz’om ut naqeek’a naq maak’a’ qaloq’al, naq qajunes wanko, naq nalukta qach’ool, ut naq maa’ani na’ilok qe. A’b’anan, ex wamiiw, tento taqatiikisi qib’ chi uub’ej chixpaab’ankil li Jesukristo ut chixjultikankil li kixye:

“Misach aachʼool chi kʼoxlak.”

“Sa’ li ruchich’och’ teek’ul li rahilal, a’b’anan kawaq eech’ool! Laa’in xinq’ax ru xwankil li ruchich’och’.”

Laa’in ninch’olob’ naq yaal a’in ut yaal li osob’tesink naxyeechi’i li Kolonel.

Jo’kan ut, k’a’ru taqab’aanu re naq us too’elq sa’ xtenq’ankil li komon chi junjunqil jo’ tixb’aanu raj li Kolonel? Xyu’aminkil lix tzol’leb’ li Kristo tooxtenq’a. “Xyu’aminkil lix tzol’leb’ li Kristo,” jo’ kixye li Awa’b’ej Nelson, “naru tixk’ihob’resi li qametz’ew ut xsaqal ru li qach’ool, li tooxtiikisi chi uub’ej sa’ musiq’ej.

“Naq naqasik’ xyu’aminkil lix taqenaqil chaq’rab’ li Jesukristo, … li Kolonel nokoxtaqsi sa’ xb’een lix wankil li t’anenaqil ruchich’och’ a’in, nokorosob’tesi rik’in xnimal li rahok, li tuulanil, li chaab’ilal chi k’ehok, li tenq’ank, li ramok-ib’, li tuqtuukilal, ut li hilob’aal.”

“Li qatiikisinkil chi uub’ej sa’ musiq’ej li naqak’ul naq naqayu’ami lix tzol’leb’ li Kristo,” chan li Elder Dale G. Renlund, “moko ka’ajwi’ ta nokoxtiikisi chi wulak b’ar wi’ naru nokowulak sa’ li junelik q’e kutan, nokoxtenq’a aj b’an wi’ chixtenq’ankileb’ li qas qiitz’in chi chaab’il.” Li Elder Renlund naxjultika qe naq “lix k’anjel li Kolonel a’an li k’irtesink. Li qak’anjel laa’o a’an li rahok—rahok ut rilb’aleb’ li qas qiitz’in toj reetal naq te’reek’a naq tento te’jiloq rik’in li Jesukristo.”

Li qawankil chixyu’aminkil lix tzol’leb’ li Kristo taanimanq naq taqil lix Hu laj Mormon wulaj wulaj ut taqak’ul li loq’laj wa’ak rajlal xamaan. Li Awa’b’ej Nelson kixye naq lix Hu laj Mormon “naxk’ut lix tzol’leb’ li Kristo … [ut] naxk’e wi’chik qana’leb’ chirix lix tojb’al rix li maak, chi tz’aqal wi’chik ut chi nim wi’chik xwankil chiru b’araq chik.” Ninra li hu a’in. Xk’ulb’al rik’in tijok li loq’laj wa’ak rajlal xamaan tixnima qanawom chirix lix tojb’al rix li maak xb’aan li Jesukristo, ut tixkawresi li qamusiq’, tixk’ojob’ qach’ool, ut tixk’e li wankilal re choxahilal sa’ li qayu’am. Xb’aan naq “saʼ li kʼojobʼanbʼil kʼanjel re [li tijonelil], nakʼutman li wankilal re choxahilal,” ut li wankilal a’in li nachal rik’in li Jesukristo, nokoreek’asi ut nokoxtenq’a chirilb’aleb’ li komon chi junjunqil.

Naq nawil lix Hu laj Mormon ut nink’ul li loq’laj wa’ak, na’isiik lix rahil inch’ool, ut nawaklesiik inch’ool chirilb’aleb’ li komon chi junjunqil jo’ naxb’aanu li Kolonel, ut nintenq’aak chixtaaqenkil li Jesus xb’een xb’een.

Ex wamiiw, naq taqayu’ami lix tzol’leb’ li Kristo ut taqileb’ li komon chi junjunqil re naq te’xjayali li rochoch li Qaawa’, tooxik chi uub’ej rik’in paab’al chirix li Jesukristo us ta ink’a’ neke’sumeek li qapatz’om ut naqeek’a naq maak’a’ qaloq’al, naq qajunes wanko, naq nalukta qach’ool, ut naq maa’ani na’ilok qe. Taqab’oqeb’ chi chalk rik’in li Jesukristo ut chi loq’onink sa’ li rochoch li Qaawa’ re naq te’xk’ul lix wankilal ut lix rahom aj tojol-ix. Sa’ li rochoch li Qaawa’, taqeek’a “li ruxtaan [li Kolonel]. Taqataw xsumenkileb’ li qapatz’om, us ta q’axal ch’a’ajeb’. [Ut] k’a’jo’ wi’chik naq taqataw ru li sahil ch’oolejil li wan sa’ lix evangelio. Sa’ xk’ab’a’ li Jesukristo, amen.