Aʼanebʼ xraqolebʼ aatin xjunesebʼ ribʼ
Wi xqapaab’ li Jesukristo, xoo’ok sa’ sumwank rik’in li Dios, ut xqajal qak’a’uxl chirix li qamaak, sahaq li raqleb’aal aatin.
Sa’ xraqik lix Hu laj Mormon naqil li chaab’il na’leb’ kixye laj Moroni, “chalqex rik’in li Kristo,” “chitz’aqloq eere eeru rik’in,” “chetzʼeqtaana choqʼ eere chixjunil li moko us ta,” ut “chera li Dios chi anchal eemetzʼew, eekʼaʼuxl, ut eekawilal.” Ut sa’ xraqik li raatin, ki’aatinak chirix li wakliik chi yo’yo jo’ ajwi’ li raqb’a-aatin sa’ roso’jik.
Chan laj Moroni, “Chi seebʼ tinxik chi hilank saʼ lix hilobʼaal li Dios, toj reetal naq lin musiqʼ ut lin tibʼel teʼxjunaji wiʼchik ribʼ, ut tinkʼameʼq joʼ aj qʼaxol u chiru li iqʼ, re eekʼulbʼal chiru lix sahil raqlebʼaal aatin li xnimal ru Jehova, li Junelik aj Raqol Aatin rehebʼ li yoʼyo joʼ ajwiʼ li kamenaq.”
Ninpatz’ k’a’ut naq laj Moroni kiroksi li aatin “sahil” re xch’olob’ankil li raqb’a-aatin sa’ roso’jik. Ke’wan chik li profeet sa’ lix Hu laj Mormon li ke’xye naq li raqb’a-aatin a’an jun “kutan nim xloqʼal” ut jun kutan li taqoyb’eni “rikʼin rilobʼaal li paabʼaal.” Aʼb’anan, naq laa’o naqoyb’eni li raqb’a-aatin, wan naq naqak’oxla jalan chik raatineb’ li profeet, maare “xutaan ut xuwajel maak,” rahil xebʼesiik ut xiw,” ut “rahil chʼoolejil li maakʼaʼ rosoʼjik.”
Laa’in nink’oxla naq lix jalanileb’ li na’leb’ a’an naxk’ut naq lix tzol’leb’ li Kristo kixtenq’a laj Moroni ut xkomoneb’ chik li profeet chiroyb’eninkil li xnimal ru kutan a’an rik’in yo’onink, ut ink’a’ rik’in li xiw, a’ li xiw li ke’xjultika naq tixnumsi li ani moko kawresinb’il ta sa’ musiq’ej. K’a’ru kixnaw laj Moroni li tento taqanaw laa’o?
Ninpatz’ naq li Santil Musiq’ej tooxtenq’a naq yooko chi k’oxlak chirix li na’leb’ re sahil ch’oolejil ut uxtaan kixk’uub’ li qaChoxahil Yuwa’, lix k’anjel li Kolonel jo’ aj Tojol-ix, ut chan ru naq toowanq “chixsumenkil tzʼaqal li qamaak saʼ xkutankil li raqbʼa-aatin.”
Lix na’leb’ li Yuwa’b’ej re sahil ch’oolejil
Li rajom lix k’anjel li Yuwa’b’ej, a’an xk’eeb’al li b’e b’ar wi’ li ralal xk’ajol te’xk’ul xtib’el, te’ok chixnawb’al b’ar wan li “us ut li ink’a’ us,” te’k’iiq sa’ musiq’ej, ut te’xik chi uub’ej sa’ li junelik q’e kutan.
Li “xtaql ch’oolej” jo’ naxye sa’ li Tzol’leb’ ut Sumwank, wan tz’aqal sa’ xyi lix k’anjel li Dios re xkʼeebʼal chi uxmank lix kolbʼal chiru li kamk ut lix yuʼam chi junelik li ralal xk’ajol. Sa’eb’ li loq’laj hu, naxye naq li xtaql ch’oolej a’an li wankilal re xsik’b’al qab’e.
Sa’ kaxlan aatin, nayeeman li aatin “albedrío moral.” Wan naq li aatin “moral” naraj naxye “chaab’il,” “maak’a’ xb’alaq’,” ut “saq ru.” Wan naq li aatin “albedrío” na’aatinak chirix li qab’aanuhom malaj li qak’anjel.” Jo’kan ut, naru naqaye naq li “albedrío moral” naraj naxye naq taqaye qajunes qib’ naq taqab’aanu li chaab’il, li maak’a’ xb’alaq’, li saq ru, ut li oxloq’.
Sa’ lix yo’ob’tesihom li Dios wan “li k’a’ru nak’anjelak jo’ ajwi’ li k’a’ru k’anjelanb’il.” Ut li xtaql ch’oolej, a’an li “wankilal chi k’anjelak qajunes qib’,” li nokoxtenq’a jo’ ralal xk’ajol li Dios re naq laa’aqo aj k’anjenel, ut maawa’o li k’a’ru yal k’anjelanb’il.
Li ruchich’och’ kiyo’ob’tesiman jo’ jun na’ajej b’ar wi’ li ralal xk’ajol li qaChoxahil Yuwa’ te’yale’q rix re naq taa’ilmanq ma “te’xb’aanu chixjunil li k’a’aq re ru li b’arwan tixtaqlaheb’ wi’ li Qaawa’ lix Dios.” Li rajom li ruchich’och’ ut li qab’eenik arin, a’an qatenq’ankil re naq tooruuq chi k’anjelak ut chi wank jo’ naxpatz’ qe li Qaawa’.
Li Qaawa’ kixye re laj Enok:
“Kʼe reetalebʼ aʼin laa was aawiitzʼin; aʼanebʼ xyiibʼahom tzʼaqal li wuqʼ, ut kinkʼe rehebʼ lix nawomebʼ, saʼ li kutan kebʼinyoʼobʼtesi wiʼ; ut saʼ li Awimq Eden kinkʼe laaʼin re li winq lix taql xchʼool;
“Ut rehebʼ laa was aawiitzʼin kinye, ut kinkʼe ajwiʼ taqlahom, naq teʼxra ribʼ chiribʼilebʼ ribʼ, ut naq teʼxsikʼ wu laaʼin, lix Yuwaʼebʼ.”
Li tz’aqal rajom li xtaql ch’oolej, a’an naq taqoksi re xraab’al li qas qiitz’in ut re xsik’b’al li Dios. Ut li wiib’ chi na’leb’ a’in neke’xk’ul tz’aqal rib’ rik’in li xb’een ut li xkab’ xninqal ru taqlahom re xraab’al li Dios chi anchal li qach’ool, li qaam, ut li qak’a’uxl, ut xraab’al li qas qiitz’in jo’ naqara qib’.
K’eeb’il qataqlankil—ink’a’ yal tijb’il malaj yeeb’il qe, taqlanb’il b’an—naq taqasik’ xraab’al li qas qiitz’in ut xtaaqenkil li Dios. Chinyehaq naq sa’ li loq’laj hu, li aatin “moral” ink’a’ yal naxch’olob’ li xtaql ch’oolej, naxk’e b’an jun choxahil taqlahom chirix roksinkil li xtaql ch’oolej.
Wan rajb’al naq naqab’icha jun li b’ich “Sik’ li us” xk’ab’a’.“ Moko xqak’ul ta li xtaql qach’ool yal re naq taqab’aanu yalaq k’a’ru naqaj yalaq jo’q’e naqaj. Jo’ k’uub’anb’il sa’ xna’leb’ li qaYuwa’, xqak’ul li xtaql qach’ool re b’an naq taqasik’ ut taqayu’ami li na’leb’ tz’aqal yaal sa’ li junelik q’e kutan. Jo’ “aj b’aanunel qajunes qib’,” tento taqak’e qach’ool sa’ li k’a’ru chaab’il, “taqab’aanu k’iila k’a’aq re ru chi yal ajb’il qab’aan, ut taqak’e chi uxliik naab’al li tiikilal.”
Sa’ li ch’utam rub’elaj li yu’am a’in, li wan resil sa’ li loq’laj hu, nak’utun naq aajel ru li xtaql ch’oolej chi junelik. Laj Lucifer kixpo’resi xch’ool rik’in lix na’leb’ li qaYuwa’ choq’ reheb’ li ralal xk’ajol, ut kixsik’ xsachb’al li xtaql ch’oolej. K’ehomaq reetal, laj tza kixpo’resi xch’ool tz’aqal chirix li xtaql ch’oolej.
Li Dios kixye, “Jo’kan ut, rik’in naq laj Satanas kixpo’resi xch’ool chiwu, ut kixsik’ xsachb’al lix taql xch’ool li winq, kintaqla naq taakutmanq taq’a.”
Lix na’leb’ laj tza, a’an xmaq’b’al chiruheb’ li ralal xk’ajol li Dios li wankilal naq te’wanq “jo’ aj b’aanunel xjuneseb’ rib’” li neke’xk’anjela li tiikilal. Kiraj naq eb’ li ralal xk’ajol li qaChoxahil Yuwa’ te’kanaaq jo’ li kʼaʼru yal kʼanjelanbʼil.
Li k’anjelak ut li chaab’ilo’k
Li Awa’b’ej Dallin H. Oaks kixye naq lix evangelio li Jesukristo nokoxb’oq chixnawb’al jun na’leb’ ut chi chaab’ilo’k rik’in xk’anjelankil lix taql qach’ool. Aʼan kixye:
“Naab’aleb’ li raqal sa’ li Santil Hu ut li loq’laj hu re li qakutan neke’aatinak chirix jun raqb’a-aatin sa’ roso’jik, b’ar wi’ chixjunileb’ te’q’ajkamuuq a’ yaal lix b’aanuhomeb’ malaj li rajomeb’ lix ch’ool. A’b’an, wankeb’ chik li raqal li neke’xch’olob’ ajwi’ naq taaraqe’q aatin chiqix a’ yaal jo’ chanru xkana qana’leb’.
“Li profeet aj Nefi kixch’olob’ li raqb’a-aatin sa’ roso’jik chi jo’ka’in: “Ut wi tzʼajnil chaq lix kʼanjelebʼ, tzʼajaqebʼ ajwiʼ ru naq tento teʼkanaaq ut wi tzʼajebʼ ru tento naq inkʼaʼ nekeʼru chi wank saʼ li rawaʼbʼejihom li Dios” [1 Nefi 15:33; tiqbʼil xkawil li aatin]. Laj Moroni kixye, “Li ani tzʼaj ru toj tzʼajaq ajwiʼ ru; ut li ani tiik xchʼool, toj tiikaq ajwiʼ xchʼool” [Mormon 9:14; tiqbʼil xkawil li aatin].”
Li Awa’b’ej Oaks kixye ajwi’: “Rik’in li na’leb’ a’an naqak’e reetal naq sa’ li raqb’a-aatin sa’ roso’jik, ink’a’ ka’ajwi’ taatz’ilmanq rix chixjunil li us ut li ink’a’ us b’aanunb’il—a’an li qab’aanuhom. Taak’eemanq ajwi’ reetal chan ru xookana xb’aan li qab’aanuhom ut li qak’oxlahom—a’an li qana’leb’.”
Lix tojb’al rix li maak xb’aan li Kolonel
Ink’a’ tz’aqal li qak’anjel ut li rajom qach’ool re naq tookole’q. “Chirix chixjunil li nokoru chixbʼaanunkil,” nokok’ame’ wiʼchik saʼ usilal rikʼin li Dios, ka’ajwi’ xb’aan li uxtaan ut li usilal k’eeb’il xb’aan lix junelikil mayej li Kolonel re xtojb’al rix li qamaak.
Laj Alma kixye, “Tikibʼomaq xpaabʼankil li Ralal li Dios, naq aʼan taachalq chixtojbʼal rix lix tenamit, ut naq aʼan tixkʼul rahilal ut taakamq re xtojbʼal rix lix maakebʼ; ut naq aʼan taawakliiq chaq wiʼchik saʼ xyanqebʼ li kamenaq, li tixkʼe chi uxmank li wakliik chi yoʼyo, re naq chixjunilebʼ li winq teʼxaqliiq chiru, re taaraqeʼq aatin chirixebʼ saʼ li kutan re rosoʼjik ut re raqbʼa-aatin, aʼ yaal joʼ chanru xkʼanjelebʼ.”
“Laaʼo naqapaabʼ naq saʼ xkʼabʼaʼ lix tojbʼal rix li maak xbʼaan li Kristo, chixjunilebʼ li winq nekeʼru chi koleʼk, rikʼin abʼink chiru li chaqʼrabʼ ut kʼojobʼanbʼil kʼanjel re li Evangelio.” Chiqab’antioxi naq li qamaak ut li qamaa’usilal ink’a’ tooxjit wi chi yaal “nokoyo’la wi’chik,” naqapaab’ laj Tojol-ix, naqajal qak’a’uxl sa’ “xʼanchalil qachʼool” ut “chi anchal li qajom,” ut “nokokuyuk toj sa’ roso’jik.”
Xxuwankil ru li Dios
Naab’alo maare naqak’oxla naq li xaqliik chiru lix raqlebʼaal aatin li Junelik aj Raqol Aatin chanchan ajwi’ li xaqliik chiru li raqleb’aal aatin sa’ poopol. Taajolominq laj raqol aatin. Te’xtz’il rix li qab’aanuhom. Taaraqe’q li aatin. Ut naq naqoyb’eni resil li taak’ulmanq, yooq qak’a’uxl ut numtajenaqaq qaxiw. A’b’an, laa’in nink’oxla naq moko jo’kan ta taawanq.
Li xiw li k’aynaqo chireek’ankil sa’ li ruchich’och’ moko juntaq’eet ta rik’in li xiw yeeb’il sa’eb’ li loq’laj hu, a’an li xiw li naxxuwa ru li Dios. Li xiw re li ruchich’och’ naxwaklesi qak’a’uxl ut naxjot’ qach’ool, a’b’anan xxuwankil ru li Dios naxk’e li tuqtuukilal, xk’ojlajik qak’a’uxl, ut xkawil qach’ool.
Naq naqaxuwa ru li Dios, naqa’oxloq’i li Qaawa’ Jesukristo chi anchal qach’ool ut naqeek’s xnimal ru sa’ li qaam; naqapaab’ lix taqlahom, ut naqoyb’eni li raqb’a-aatin sa’ roso’jik ut li tiikilal li tixk’e chi uxmank. Xxuwankil ru li Dios natikla rik’in xtawb’al ru chi yaal lix diosilal ut lix k’anjel laj Tojol qix, rik’in xq’axtesinkil qach’ool choq’ re li rajom a’an, ut rik’in xnawb’al naq chixjunileb’ li winq ut ixq te’xsume ru li rajom lix ch’ool, lix k’oxlahom, li raatin, ut lix b’aanuhom sa’ xkutankil li raqb’a-aatin.
Xxuwankil ru li Qaawa’, a’an maawa’ royb’eninkil rik’in xiw naq tooxaqliiq chiru li Dios re taaraqe’q aatin chiqix. A’an b’an xyo’oninkil naq sa’ jun kutan taqaye li tz’aqal yaal chiqix, “joʼ chanru tzʼaqal wan,” ut “joʼ chanru tzʼaqal taawanq.”
Li junjunq chi aamej li wanjenaq, li wan, ut li toj taawanq sa’ li ruchich’och’ “taak’ame’q chi xaqliik chiru lix raqleb’aal aatin li Dios, re taaraqe’q aatin chirix xb’aan a’an, a’ yaal jo’ chanru lix k’anjeleb’, ma useb’, malaj ink’a’ useb’.”
Wi tiikilal xqasik’ ut chaab’ilal xqab’aanu—li naraj naxye naq xqapaab’ li Jesukristo, xoo’ok sa’ sumwank rik’in li Dios, ut xqajal qak’a’uxl chirix li qamaak—sahaq li raqleb’aal aatin. Jo’ kixye laj Enos, “tooxaqliiq chiru [laj Tojol qix]; tojaʼ naq taqil li rilobʼaal rikʼin sahil chʼoolejil.” Ut sa’ roso’jik li kutan, “tooq’ajkamuuq choq’ re li tiikilal.”
A’b’anan, wi ink’a’ us li rajom qach’ool ut wi maa’usilal li qak’anjel, xuwajelaq choq’ qe li raqleb’aal aatin. “Tzʼaqalaq re ru qanawom,” ut “jultikaq qe chi kutankil,” ut “taqeek’a chi chʼolchʼo naq wan li maak saʼ qabʼeen.” “Moko taawanq ta qach’ool chixtaqsinkil li qilob’aal re li qaDios; ut taasaho’q raj qach’ool wi ta taaruuq taqataqlaheb’ li pek ut li tzuul chi t’ane’k sa’ qab’een re qamuqb’al chiru rilob’aal a’an.” Ut sa’ roso’jik li kutan “taqak’ul maa’usilal choq’ qaq’ajkamunkil.”
Sa’ roso’jik li kutan, laa’o taqaraq aatin chiqix qajunes qib’. Maa’ani tento tixye raj qe b’ar tooxik. Chiru li Qaawa’, taqach’olob’ xyaalal li k’a’ru xqasik’ sa’ li yu’am a’in ut taqanaw qajunes qib’ b’ar wan li qana’aj sa’ li junelik q’e kutan.
Lin yeechi’ihom ut lin nawom
Li na’leb’ chirix lix sahilal li raqb’a-aatin ink’a’ nak’eeman ka’ajwi’ re laj Moroni.
Laj Alma ki’aatinak chirix li usilal nak’eeman re chixjunileb’ lix tzolom li Kolonel. Aʼan kixye:
“Lix yaalalil li aatin kʼojobʼank wiʼchik, aʼan xkʼambʼal wiʼchik li maaʼusilal choqʼ re li maaʼusilal, malaj li tzʼejwalejil choqʼ re li tzʼejwalejil, malaj ajtzahil choqʼ re li ajtzahil—li chaabʼil choqʼ re li kʼaʼru chaabʼil, li tiikilal choqʼ re li kʼaʼru tiik, li tiikil naʼlebʼ choqʼ re li kʼaʼru tiik ru; li uxtaan choqʼ re li kʼaʼru aj uxtaan.
“… Chatkʼanjelaq chi tiik aanaʼlebʼ, chatraqoq aatin chi tiik, ut chabʼaanu rajlal li chaabʼil; ut wi nakabʼaanu chixjunil li kʼaʼaq re ru aʼin, rikʼin aʼan taakʼul aaqʼajkamunkil; relik chi yaal, taakʼojobʼaaq wiʼchik li uxtaan aawe; taakʼojobʼaaq wiʼchik li tiik ruhil naʼlebʼ aawe; taakʼojobʼaaq wiʼchik aawe jun raqbʼa-aatin tiik; ut taaqʼajkamuuq wiʼchik aawe li chaabʼil.”
Chi sa inch’ool ninch’olob’ xyaalal naq li Jesukristo a’an li yo’yookil Kolonel. Tz’aqal yaal li raatin laj Alma choq’ qe chiqajunilo—anajwan, wulaj, ut chi junelik q’e kutan. Ninch’olob’ xyaalal a’in sa’ lix santil k’ab’a’ li Jesukristo, amen.