Xnawb’al anihat laa’at
Maak’a’ naxye b’ar wanko sa’ xb’ehil li wank choq’ tzolom, taajalaaq li qayu’am chi tz’aqal wi naqak’e reetal aniho tz’aqal laa’o.
Wiib’ oxib’ chihab’ chaq li qarab’in xk’ul jun nimla na’leb’ sa’ lix mision. A’an xk’e inliceens re tinwotz b’ayaq li k’a’ru xtz’iib’a choq’ qe sa’ li xamaan a’an:
“Ewer jun komon li yoo chi sutq’iik sa’ li Iglees xtz’aama chiqu naq tooxik sa’ junpaat wan wi’ a’an. Naq xoowulak aran, xqataw a’an chi chunchu chi ch’och’, ut mas naq yoo chi yaab’ak. A’an xye qe rik’in yaab’ak, naq maak’a’ chik xtrab’aaj, naq taa’isiiq sa’ li ochoch wan wi’, ut naq taakanaaq wi’chik chi maak’a’ rochoch.”
Li qarab’in xye: “Xin’ok chi sik’ok sa’eb’ lin loq’laj hu, re xtawb’al junaq aatin, junaq na’leb’ li taatenq’anq re. Naq yookin chixsik’b’al junaq raqal li mas chaab’il, xink’oxla sa’ inch’ool, “K’a’ru yookin? A’an maawa’ li k’a’ru tixb’aanu raj li Kristo. Maawa’ a’in jun ch’a’ajkilal li naru nintuqub’ laa’in, a’b’an a’an jun xrab’in li Dios li naraj xtenq’ankil.” Xintz’ap lin hu ut xinwiq’la chixk’atq a’an, ut xooyaab’ak sa’ wiib’al ut xinq’alu, toj reetal naq a’an xxaqab’ rib’ re xnumsinkil li ch’a’ajkilal a’in.”
Chirix naq xk’ojob’aak xch’ool li ixq a’an, li qarab’in xroksiheb’ li loq’laj hu re xtenq’ankil a’an chixtawb’al ru naq wan xloq’al chiru li Dios, ut re xk’utb’al jun na’leb’ mas aajel ru sa’ li yu’am a’in—naq laa’o raarookil alalb’ej ut rab’inb’ej chiru li Dios, jun Dios li naxtoq’ob’a qu chi tz’aqal re ru naq wanko sa’ rahilal, ut wan xch’ool chiqatenq’ankil re taqaxaqab’ wi’chik qib’.
Nim xwankil naq li xb’een na’leb’ neke’xk’ut li misioneer, a’an naq li Dios a’an li qaChoxahil Yuwa’, ut nokoxra. Chixjunil chik li na’leb’ nak’utman, wan chi xaqxo sa’ xb’een li na’leb’ chirix aniho laa’o.
Li xSusan H. Porter, li Jolomil Awa’b’ej re li Tzoleb’aal reheb’ li Kok’al, kixye: “Naq nakanaw ut nakataw ru jo’k’ihal raab’ilat xb’aan li Dios, chixjunil najala. Najala li nakaweek’a chawix naq nakatmaakob’k. Najala li nakaweek’a naq nakak’ul li ch’a’ajkilal. Najala laa k’a’uxl chirixeb’ lix taqlahom li Dios. Najala laa k’a’uxl chirixeb’ laa was aawiitz’in, ut laa seeb’al re xb’aanunkil li chaab’il.”
Na’ilman li jalaak a’in naq naqil li k’a’ru kixk’ul laj Moises chirix naq kiraatina li Dios, chi k’utk’u chiru li rilob’aal. Naq yookeb’ chi aatinak, li Dios k’iila sut kiraatina laj Moises chirix lix choxahil eechanihom, ut kixye, “Moises, … laa’at li walal.” Li Dios kixch’olob’ naq laj Moises wan choq’ xjalam-uuch li Ralal junaj chirib’il. Laj Moises ki’ok chixtawb’al ru ani tz’aqal a’an, naq wan jun k’anjel tento tixb’aanu, ut naq wan jun xChoxahil Yuwa’ li narahok re a’an.
Chirix naq kixk’ul a’in, kichal laj tza chiraalenkil, ut kixye xk’ab’a’ chi jo’ka’in, “At Moises, ralalat li winq.” A’in jun xiwxiwil k’anjeleb’aal naroksi laj tza. Li qaChoxahil Yuwa’ junelik naxjultika qe rik’in rahok naq laa’o li ralal xk’ajol a’an, a’ut laj tza junelik naxyal xq’e chixk’utb’al chiqu lix majelal qametz’ew. A’ut laj Moises ak xtzol naq maawa’ yal jun “ralal li winq.” A’an kixye re laj Satanas: “Anihat laa’at? Xb’aan naq k’e reetal, laa’in jun ralal li Dios.” Laa’o ajwi’, naq yooko chixnumsinkileb’ li ch’a’ajkilal sa’ li yu’am a’in, malaj naq naqeek’a naq wan ani yoo chixk’utb’al lix majelal li qametz’ew, tento ajwi’ naq taawanq xkawilal qach’ool rik’in xnawb’al aniho tz’aqal. Tento too’iloq taqe’q, moko taq’a ta. Naq naqab’aanu chi jo’kan, naru naqaye chi kaw qach’ool, “Laa’in jun ralal li Dios.”
Naq yoo chiraatinankileb’ li saaj winq ut ixq, li Awa’b’ej Russell M. Nelson kixye: “Anihat ut laa’at? Xb’een wa, laa’at jun ralal li Dios, laa’at ralal xk’ajol li sumwank, ut laa’at jun xtzolom li Jesukristo. Naq nekek’ulub’aheb’ li yaal a’in, li qaChoxahil Yuwa’ texxtenq’a chixk’ulb’al lee rajom chi wank chi junelik chiru lix santil ilob’aal a’an.”
Xb’aan a’in naq sa’ jun raqal sa’eb’ li loq’laj hu li nayeeman chi kok’ aj xsa’, li Dios naxjultiko qe aniho chiru a’an. K’iila k’ab’a’ej kiru raj kiroksi sa’ li tij re li loq’laj wa’ak, a’ut a’an xye qe naq taqapatz’ xk’ab’a’ rik’in li aatin, “At Dios, li Junelik Yuwa’b’ej.”
A’ yaal naq noko’ok chixk’eeb’al reetal aniho tz’aqal, naniman li qapaab’aal naq li qaChoxahil Yuwa’ xk’uub’ jun na’leb’ re naq tooruuq chi sutq’iik wi’chik rik’in a’an. Li Elder Patrick Kearon kixye, “Li xchaq’al ru na’leb’ kixk’ut li qaYuwa’, a’ ajwi’ li “ch’ina usil” na’leb’ kixk’uub’, a’an xkawresiman re xk’amb’al eeb’e sa’ lee rochoch, ink’a’ re xramb’al eeb’e … Li Dios rajlal yoo chesik’b’al.” K’oxlahomaq li na’leb’ a’in chiru junpaat—li qaYuwa’, li narahok qe, li nanumta xwankilal “rajlal yoo chesik’b’al.”
Maak’a’ naxye b’ar wanko sa’ xb’ehil li wank choq’ tzolom, taajalaaq li qayu’am chi tz’aqal wi naqak’e reetal aniho tz’aqal laa’o. Nawaj xk’utb’al cheru wiib’ li na’leb’ li te’tenq’anq qe chixtawb’al ru li na’leb’ a’in.
Xb’een wa, li tijok.
Naq li Kolonel yoo chixtikib’ankil lix k’anjel sa’ li ruchich’och’, kib’eresiik toj sa’ li yamyookil ch’och’ re “taawanq rik’in li Dios.” Maare us naq ink’a’ chik taqak’oxla naq yal yooko chi tijok, naq taqak’e b’an li qahoonal re raatinankil li Dios ut “wank rik’in a’an” wulaj wulaj.
Laa’in xintaw naq us wi’chik li tijok ninb’aanu naq ninkawresi wib’ chiru junpaat chiraatinankil lin Yuwa’. Sa’eb’ li loq’laj hu, nak’ute’ chiqu naq a’in jun na’leb’ li nak’anjelak chi yaal. Sa’ li resil laj Jose Smith; laj Nefi, eb’ li ralal laj Helaman; ut laj Enos, chixjunileb’ neke’xk’e xch’ool chi k’oxlak rub’elaj naq nayeeman naq neke’raatina li Dios. Laj Enos kixye naq kitz’okaak li raam naq li raatin lix yuwa’ ki’ok sa’ xchamal lix ch’ool. Eb’ li raqal a’in neke’xk’ut chiqu naq aajel ru xkawresinkil qib’ wulaj wulaj chi “wank rik’in li Dios.”
Reheb’ laj Nefita, li Kolonel kixye, “Naq nakattijok, okan sa’ laa tz’aptz’ookil na’aj, ut naq xatz’ap li okeb’aal, tijon chiru laa Yuwa’.”
Maak’a’ naxye ma a’an jun tz’aptz’ookil na’ajej malaj jun warib’aal, li k’a’ru na’ajman ru a’an xtawb’al jun na’ajej b’ar wi’ tatruuq chi tijok aajunes, b’ar wi’ taawanq chi ch’anch’o laa waam ut taawek’a li raatin li xyaab’ kuxej “ch’anch’o ut q’un na’aatinak.” Naru naqatikib’ rik’in xk’oxlankil li k’a’ru naqab’antioxi, ut k’a’ru li na’leb’ naqaj xpatz’b’al chiru li qaYuwa’. Us naq taqayal qaq’e naq ink’a’ yal taqaye chi juntaq’eet li aatin, naq taqaatina b’an li qaYuwa’, chi kaw xyaab’ qakux wi naru.
Ninnaw naq laatz’ ru li qayu’am, ut wi wankeb’ li qakok’al malaj wi yooko chi xik sa’ k’iila ch’utam, maare ink’a’ taaruuq toowanq chi ch’anch’o ut taqakawresi qib’ chi us, a’ut eb’ li tij a’an li naqab’aanu sa’ junpaat ut chi anchal qach’ool mas wi’chik te’wanq xwankil wi naqayal qaq’e chi “wank rik’in li Dios” naq toj eq’la.
Maare wan ani eere li ink’a’ natijok chiru k’iila kutan, malaj ani ink’a’ nareek’a naq ab’inb’il lix tij. Ninye xyaalal eere naq lee Choxahil Yuwa’ naxnaw eeru, nekexxra, ut naraj rab’inkil lee raatin. A’an naraj aatinak eerik’in. A’an naraj naq taajultiko’q eere anihex laa’ex.
Li Elder Jeffrey R. Holland kixye: “Us ta yookex chi tijok, mas wi’chik naq textijoq. Us ta yookex chi tijok chi kaw, chextijoq chi kaw wi’chik.”
Rochb’een li tijok chi kok’ aj xsa’ ut chi anchal qach’ool, li tzolok sa’ lix Hu laj Mormon wulaj wulaj ut li xik sa’ li santil ochoch tooxtenq’a chixkawresinkil li qach’ool chixk’ulb’al li k’utb’esinb’il na’leb’. A’ yaal naq naqayal qaq’e chi aatinak rik’in li qaChoxahil Yuwa’, a’an toorosob’tesi, ut tixk’e chiqeek’a naq laa’o tz’aqal li ralal xk’ajol.
Xkab’, li ok chixnawb’al naq li Jesus a’an li Kristo
Li jun chi na’leb’ li mas nak’utuk xyaalal naq li qaChoxahil Yuwa’ nokoxra jo’ li ralal xk’ajol, a’an naq kixtaqla li Ralal, laj Kolol qe chiqajunqal, re qatenq’ankil chi sutq’iik sa’ li qochoch. Jo’kan naq aajel ru naq taqanaw ru a’an.
Wiib’ oxib’ chihab’ chaq, naq yookin chi k’anjelak jo’ awa’b’ej sa’ jun oqech, laa’in xink’e xk’ab’a’ jun komon winq re taawanq choq’ aj k’anjenel sa’ li santil ochoch. Chirix xch’olob’ankil naq a’an mas chaab’ilaq jo’ aj k’anjenel, xinsach ut xink’e chiru li computadora li eetalil, “Ink’a’ k’ulub’anb’il” chirix li winq a’an. Naq xink’e reetal naq ink’a’ ninru chixjalb’al li eetalil a’an, xinb’oq li awa’b’ej re li santil ochoch ut xinye, “Mas naq xinsach.” Li awa’b’ej sa’ li santil ochoch xye chi chaab’il xch’ool, “Presidente Eyre, maak’a’ xab’aanu li ink’a’ ta naru chi kuymank ut chi tuqub’amank.” Tz’aqal yaal a’an. Relik chi yaal naq li Jesukristo “kaw xmetz’ew chi kolok.”
Sa’ li chihab’ 2019 xwan jun nimla jalaak sa’eb’ li patz’om re xk’ulb’al xhuhil li santil ochoch. Junxil, xpatz’man ma wan xnawom aach’ool chirix lix k’anjel li Jesukristo jo’ aj Kolonel ut laj Tojol-ix. Anajwan napatz’man ma wan xnawom aach’ool chirix lix k’anjel jo’ laa Kolonel ut laj Tojol aawix laa’at. Lix tojb’al rix li maak xb’aan li Jesukristo ink’a’ yal nak’anjelak choq’ reheb’ jalan, nak’anjelak choq’ aawe laa’at, ut choq’ we laa’in. A’an aj Kolol we. A’an aj Kolol aawe laa’at. Chiqajunqal. Ka’ajwi’ rik’in a’an naru naq laa’at ut laa’in toosutq’iiq chi wank rik’in li qaYuwa’.
Jo’kan ut, ex was wiitz’in, chiqasik’ a’an. Chootzoloq chirix lix wanjik a’an rik’in li Yuwa’b’ej, ut qik’in laa’o chiqajunqal. Chiqab’i li b’ich re rahok li natojok-ix, li nak’ehe’ sa’ qab’een chiqajunqal xb’aan li qaKolonel, a’ yaal naq naqajal li qak’a’uxl. Naq noko’ok chixnawb’al ru li ani “kaw xmetz’ew chi kolok,” noko’ok chixtawb’al ru naq jo’ ralal xk’ajol li Dios, laa’o lix sahil xch’ool a’an—li naxjayali wi’ rib’—ut naq a’an naraj naq tookole’q.
Ninch’olob’ cheru naq wan jun qaChoxahil Yuwa’ li narahok qe. A’ yaal jo’ naqatzol li na’leb’ a’in rik’in tijok chi anchal qach’ool, rik’in xk’ulb’al li k’utb’esinb’il na’leb’, ut rik’in chalk rik’in li Jesukristo, junelik tooruuq chixyeeb’al, “Laa’in jun ralal li Dios.” Sa’ xk’ab’a’ li Jesukristo, amen.