Li xnawom ch’oolej, jun maatan li junelik nakana

Li Dios naxnaw chixjunil ut q’axal nim xwankil. Rik’in lix saqen li Kristo ut lix k’anjel li Santil Musiq’ej, lix wankilal yalaq b’ar natawliik. Li Dios naraj qosob’tesinkil.

Naxnaw k’a’ru naqak’ul sa’ qayu’am junxil, anajwan, ut sa’ li junelik q’e kutan. Maak’a’ naru xmuqb’al chiru.

Li Awa’b’ej Russell M. Nelson kooxb’oq “chixk’oxlankil li k’a’ru re choxa,” li naxwaklesi qach’ool chixb’aanunkil li rajom li qaChoxahil Yuwa’ ut chi wank jo’ chanru a’an.

Xb’aan naq tz’aqal lix wankil, li qaChoxahil Yuwa’ naxk’e qe a’ yaal k’a’ru chi maatanil, a’ yaal re lix nawom chirix li junelik q’e kutan.

Wan ajwi’ sa’ qab’een xsik’b’al ru li b’e chaab’il.

Li Jesukristo kixtoj xtz’aq li maatan a’an rik’in lix kik’el.

Maare wan naq naqak’oxla naq rik’in xtaql qach’ool naru naqasik’ yalaq k’a’ chi b’e naqaj. A’b’an, xb’aan naq kitojman xtz’aq, li xtaql ch’oolej, a’an jun loq’laj maatan.

Laa’o aj taql, jo’kan naq nakana jun li k’anjel sa’ qab’een. Li wan sa’ qab’een, a’an xsumenkil li qab’aanuhom a’ yaal naxye k’a’ru li qanawom ut li qaseeb’al. Naq naqasik’ ru junaq b’e, junelik wan sa’ qab’een xsumenkil li k’a’ru na’ux aran.

K’a’ut naq kik’eeman xtaql qach’ool?

Re xsik’b’al li us.

Re xsik’b’al li Kristo.

Re naq junelik toosutq’iiq chixsik’b’al li junelik yu’am.

Li k’a’ru naqanaw rik’in li Santil Musiq’ej jwal nim wi’chik chiru li naqanaw rik’in xsa’ uhej. Li Santil Musiq’ej naxch’olob’ xyaalal li Yuwa’b’ej ut li K’ajolb’ej. Li Awa’b’ej Nelson kixye, “Sa’ li kutankil chalel, tookamq raj sa’ musiq’ej chi maak’a’ li b’eresink, li k’amok b’e, li k’ojob’ank ch’oolej, ut li ochb’eeniik chi rajlal xb’aan li Santil Musiq’ej.”

Ex was wiitz’in, aajel ru xk’ulb’al xwankil li Santil Musiq’ej sa’ li kutan a’in.

Jalan jalanq li nachal wi’ qanawom rik’in li Santil Musiq’ej. Naru nachal chi jun xaqaamil chanchan li bombiiy li naloch sa’ jun na’ajej q’ojyin ru. Naru nachal chi timil timil chanchan li saqewk. Maare nalemlotk jo’ roq saqen li naxkut chaab’il na’leb’ a’ yaal jo’q’e. Maak’a’ naxye chan ru nachal, a’an nachal rik’in li Santil Musiq’ej.

Laa’in kink’i aran Jamaica; jwal chaab’il ut k’a’jo’ xsahil. A’b’an, naq kin’ok sa’ li colegio, li wech saajil ut li wamiiw ink’a’ neke’xtaw ru k’a’ut naq kin’ok sa’ lix Iglees li Jesukristo. “K’a’ut b’i naq kat-ok sa’ li iglees a’an?” chankeb’. “Chan ta b’i ru naq xapaab’ li seraq’ a’an?”—chankeb’ chirix li Xb’een K’utb’esink. “K’a’ut naq yookat chirilb’al li hu a’an?”—chankeb’ chirix lix Hu laj Mormon. “Ma yaal naq nakapaab’ chixjunil a’an?” Ut “K’a’ut naq nakasach aayu’am.”

Ra a’an, ut jwal ra wi’chik naq a’aneb’ lin komon li ke’yehok re.

A’ut li ink’a’ ke’xnaw, a’an naq ak kink’ul inna’leb’ rik’in li Santil Musiq’ej. Naq kinumta li na’leb’ a’an sa’ waam, kikotz b’ayaq inrahil, ut “chiru junpaat, sa’ wilob’aal choxa teeto kiwil.”

Maare laa’at ajwi’ kak’ul xkomoneb’ li patz’om a’an. Maare anajwan ajwi’ nakatpatz’iik chi jo’kan.

Wan choq’ qe chiqajunil li maatan ut li na’leb’ k’eeb’il xb’aan li Santil Musiq’ej.

Choq’ we laa’in, li Jamaica a’an chanchan li Palmyra choq’ re laj Jose Smith. A’an lin Loq’laj K’iche’. Ink’a’ ninnaw b’ar tz’aqal kixwiq’ib’ rib’ laj Jose re tijok sa’ li Loq’laj K’iche’, a’b’an ninnaw b’ar tz’aqal kinwan laa’in naq kin’ok sa’ lin Loq’laj K’iche’. Kinwan sa’ li wochoch aran Calle Four Grove, Mandeville, Jamaica, sa’ waqib’ oor re eq’la, jun li miercoles oxib’ chihab’ xkub’ik inha’. Kinnumsi li k’a’ru jwal loq’ aran xb’aan naq wiib’ xamaan chaq jun li chaab’il misioneer ixq kinixb’oq chirilb’al lix Hu laj Mormon. Li Hermana Audrey Krauss wan arin sa’ li ch’utub’aj-ib’ a’in anajwan rik’in lix junkab’al, ut ninra a’an chi junelik.

Li kinnumsi chaq kinixjal.

Ex was wiitz’in, ink’a’ yal naqato’oni xnawom qach’ool chiru jun k’amok. Li nawom a’in li naxk’e li qaChoxahil Yuwa’ taakanaaq raj chi junelik xb’aan naq li ani xk’ehok re, a’an wan chi junelik. Ink’a’ raj taa’oso’q li nawom a’an. Ink’a’ raj taaq’unaaq chi moko taaka’ch’ino’q xb’aan li k’a’ru najala sa’ li qayu’am malaj sa’ li ruchich’och’. Taakawuuq b’an raj, xb’aan naq jo’ lix talento li moos sa’ li jaljookil ru aatin chirixeb’ li talento, lix nawom inch’ool a’an jun maatan tento xk’ihob’resinkil—ut ink’a’ xmuqb’al.

Li xk’oxlankil li kink’ul junxil sa’ lin yu’am, naq kiyale’ wix ut kintawasiik sa’ inch’ajomil, a’an kinixtenq’a chi nawok injunes wib’. Ink’a’ yal ninpaab’aan malaj ninyo’onink, us ta aajel ru li na’leb’ a’an sa’ li b’e li nawulak sa’ xnawb’al chi ch’olch’o. Jwal us naq yookat chixtawb’al aab’e rik’in patz’ok, tzolok, tijok, kuyuk sa’, ut tz’ilok-ix sa’ aak’a’uxl. Maakanab’ a’an. Chixjunil li nakab’aanu re xsik’b’al aanawom taa’uuchinq choq’ aawe. Ma wan ani malaj k’a’ru taakanab’ chixmaq’b’al a’an chawu? “Kʼaʼru xkʼutbʼal xyaalal naru nakakʼul li naqʼaxok ta re li nachal chaq rikʼin li Dios?”

Chixjunileb’ li ralal xk’ajol li Dios naru neke’xnimob’resi ut neke’xkawob’resi xnawomeb’. Jo’ laj Jose Smith, li kixchʼolobʼ xnawom us ta xik’ ki’ile’, laaʼo naru naqaye, “Kinnaw aʼan, ut kinnaw naq li Dios naxnaw, ut inkʼaʼ kinru chixtzʼeqtaanankil xyaalal, chi moko kiwan inchʼool chixbʼaanunkil.”

Ex was wiitz’in, chekanab’ lee nawom chi nimank sa’ lee raam chanchan ch’ina iyaj toj reetal naq taamoq jo’ jun lee loq’laj nawom jwal ch’olch’ochi maak’a’ roso’jik.

Wi kub’enaq aaha’ ut k’ojob’anb’ilat jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, a’ut toj nakaye, “Ink’a’ ninnaw ma ninnaw,” chijultiko’q aawe li aatin a’in li natawman sa’ li tij re li loqʼlaj waʼak: “Re taaruuq taawanq junelik lix Musiqʼ rikʼinebʼ.” B’antiox re li na’leb’ a’an, chiqajunilo naru too’ok sa’ li b’e re xsik’b’al qanawom chi tz’aqal.

A’an a’in li yaal: Maak’a’ naxye chan ru nachal laa nawom—ma chanchan li saqewk malaj sa’ k’utb’esinb’il matk’—toj aajel ru naq taasik’ xk’ulb’al li loq’laj maatan a’in.

Xyeeb’al “Nawaj paab’ank” nokoxtenq’a chixk’ulb’al qanawom rik’in li Dios. Wi naqil naq yoo chi lajk li qanawom, chijultiko’q qe naq a’an li naqab’aanu li narisi xwankil li qanawom. A’b’an moko xikenaq ta chi junajwa li qanawom. Yal tento taqasik’ xch’oolaninkil.

Jwal us raj roksinkil lix taql qach’ool choq’ re li paab’ank.

Maak’a’ chik junaq chaab’il chiru xkolb’al rix innawom naq nink’oxla laa’in.

Li Awa’b’ej Nelson kixye: “Nintz’aama cheru naq teek’e reetal lix nawom eech’ool. Chexk’anjelaq re xk’ulb’al. Chek’ul a’an sa’ eeb’een. Cheril chi us. Chech’oolani, re taanimanq. Chech’oolani rik’in li yaal.”

Choq’ we, li aatin teek’e reetal, chexk’anjelaq, cheril, chek’ul, ut chech’oolani a’an lix k’anjel jun aj taql li xk’ul xmertoomil chirix li k’a’ru nim xloq’al ut aajel ru.

Sa’ xtiklajik li Iglees, laj Parley P. Pratt kijosq’o’ rik’in li profeet aj Jose Smith ut kixsik’ xwech’b’al rix a’an ut li Iglees. Naq kiwulak laj John Taylor li kirab’i li evangelio rik’in laj Parley, laj Parley kiraatina ut kixye naq ink’a’ raj tixtaaqe laj Jose. Laj John Taylor kixye re laj Parley:

“Naq maji’ nakat-el Canada, xach’olob’ xyaalal naq laj Jose Smith a’an xprofeet li Dios, … ut xaye naq xanaw xyaalalil a’an rik’in li maatan re li Santil Musiq’ej.

“… Anajwan juntaq’eet chik innawom rik’in laa nawom li xsaho’ wi’ chaq aach’ool junxil. Wi yaal li k’anjel waqib’ po chaq, toj yaal ajwi’ anajwan. Wi profeet laj Jose Smith sa’ li kutan a’an, toj profeet a’an anajwan.”

Ninch’olob’ xyaalal naq laj Jose Smith a’an xprofeet li Dios ut naq li profeetil wankilal kixk’ul toj wan xwankil sa’ li kutan a’in. Li Jesukristo naxb’eresi li k’anjel a’in.

Nakatinb’oq chixsik’b’al laa b’e re xk’ulb’al aanawom chi ch’olch’o ru chirix li Jesukristo ut lix evangelio. Kawresi laa nawom aajunes aawib’; oksi lix taql aach’ool chi chaab’il ut k’e reetal ani laj k’ehonel ut chixjunil lix loq’laj chaab’ilal. Ninye naq li wankilal wan aawik’in. Maa’ani tixsik’ ru laa b’e choq’ aawe. Maa’ani naru chirisinkil li maatan a’in. Laa’at naru nakasik’ paab’ank.

Ninye naq wi taab’aanu a’in, laa nawom a’anaq jun “yoʼlebʼaal li yoʼyookil haʼ, li nabʼululnak choqʼ re li yuʼam li junelik nakana.” A’an li taak’ojob’aaq ut li taaxik wi’ laa ch’ool, ut tixk’e aametz’ew sa’eb’ laa ch’a’ajkilal. Rik’in a’an tatruuq chixk’ulb’al musiq’ejil maatan. A’an tatxtenq’a sa’ laa k’anjel. A’an tatxtenq’a chixpleetinkil laj Satanas ut eb’ li xik’ neke’ilok aawe. Laa nawom tixk’e xsahil aach’ool naq taawil chi k’utb’esiik wi’chik rik’ineb’ laa kok’al, laa wi, ut laa xikin i, ut eb’ laa was aawiitz’in nakara ut nakawil. K’a’jo’aq xmetz’ew laa nawom naq taawotz ut taawoksi re xch’olob’ankil li yaal.

Naq wan laa nawom, nakanaw ajwi’ naq wan. Laa’in ninnaw naq ninnaw. Neke’qaj ru xkomoneb’ chik li neke’xnaw chi ch’olch’o naq tz’aqal yaal li Jesukristo ut lix evangelio. Naru nakanaw! Sik’ a’an! Jwal aajel ru! Wanko sa’ roso’jikeb’ li kutan—lix kʼojlajik lix tzʼaqalil ru li kutan.

Li Jesukristo kixye: “Li choxa ut li ruchich’och’ te’nume’q, a’ut li waatin ink’a’ taanume’q.”

Ex was wiitz’in, ink’a’ yal naqato’oni li qanawom chirix li Jesukristo chiru jun k’amok. Ink’a’ na’oso’ li nawom a’an—ink’a’ na’oso’ aj k’ehol re, chi moko li maatan, chi moko li ani xk’amok chaq re, chi moko li ani eetalinb’il xb’aan. Kama’anaq raj ajwi’ laa nawom. Us ta “li choxa ut li ruchich’och’ te’nume’q,” laa nawom chirix lix evangelio li Jesukristo ink’a’ taanume’q. Anajwan ak wanko sa’ li hoonal re xchapb’al qib’ chiru li chaab’il maatan a’in. Sa’ xk’ab’a’ li Jesukristo, amen.