Li ak’ob’resiik rik’in li Jesukristo

Li Jesus “kinume’ yalaq b’ar chixb’aanunkil li us.” Kama’an naxye li Santil Hu sa’ Ingles sa’ li hu Hechos. Jwal k’osb’il ru li aatin a’an! Relik chi yaal, li Jesus kixb’aanu naab’al li us! A’an a’an tz’aqal li us—jo’ ajwi’ tz’aqal xyo’leb’aal li us! Kixq’axtesi chixjunil lix yu’am re xb’aanunkil li us. A’an “aj uxtaan ut tuulan, nab’ay chi josq’o’k ut maaka’ch’in ut maak’a’ roso’jik lix rahom ut lix tiikilal xch’ool.”

Yalaq aatin naqaye chi k’osb’il ru chirix lix chaab’ilal ut li ruxtaan moko tz’aqalaq ta! Relik chi yaal kixye li apostol aj Jwan, naq wi taqayal xtz’iib’ankil resil chixjunileb’ li usilal naxb’aanu li Kolonel, “chixjunil li ruchich’och’ moko tz’aqalaq ta choq’ xna’ajeb’ li hu te’tz’iib’amanq.”

Yal ajlanb’ileb’ li esil sa’ li loq’laj hu chirix li usilal kixb’aanu chaq li Jesus, ut jwal neke’xtoch’ qach’ool ut nokohe’xk’e chixk’oxlankil chan raj ru rilb’al chi kristiaanil li sachb’a-ch’oolej kixb’aanu ut li na’leb’ kixk’ut. Ki’aatinak rik’ineb’ li tz’eqtaananb’ileb’, kixch’e’ li yaj li wan awas chirix, kixk’ojob’ xch’ool li lub’lu, kixk’ut li na’leb’ li narachab’ qamusiq’, ut kixb’oqeb’ aj maak chixjalb’aleb’ xk’a’uxl. Reheb’ li saqlep rix, li mutz’, ut li ixq aj yumb’eet; reheb’ li yeeq roq, li tz’ap xik, ut li mem; reheb’ li na’b’ej ra xch’ool, li yuwa’b’ej li naxuwak, ut li xmalka’an; reheb’ li jitb’il, li k’utb’il xxutaan, ut li rahob’tesinb’il; reheb’ li kamenaq chi tib’elej ut chi musiq’ej, li Jesus kixyeechi’i naq naru te’ak’ob’resiiq. Relik chi yaal, xk’osb’al ajwi’ ru li na’leb’ a’an ink’a’ natz’aqlok!

Chixjunil li kixye ut kixb’aanu li Jesus kirak’ob’resi xwanjikeb’ li kixk’irtesiheb’, li kirosob’tesiheb’, li kixtzoleb’, ut li kirach’ab’eb’ chiru li maak. Ink’a’ kinajto’ rik’ineb’, ut relik chi yaal ink’a’ taanajto’q aawik’in. Qayehaq naq chiru li hoonal a’in li Jesus yooq chixyeeb’aal aawe li aatin a’in:

“At walal, kuyb’il sachb’il chik laa maak.”

“At ixqa’al, aawe ninye, waklin.”

“Chatch’aje’q.”

“Chi moko laa’in tatink’e sa’ tojb’a-maak. Ayu ut chalen anajwan matmaakob’ chik.”

“At inrab’in, laa paab’aal xkolok aawe. Ayu sa’ tuqtuukil usilal.”

Yal junpaat naq li Kolonel kixye li aatin a’an, a’b’an li aatin a’an anchal kixte ru li xtoon choxa re naq taawanq xna’aj li kuyuk maak, li k’irtesiik, li ak’ob’resiik, li tuqtuukil usilal, ut li junelik yu’am. Ut li chaab’il esilal, a’an naq li Jesus naxyeechi’i qe ajwi’ laa’o naq too’ak’ob’resiiq. Chiqajunilo naru too’ak’ob’resiiq, b’antiox re li Jesukristo. Laa’at ajwi’ tatruuq. Li ak’ob’resiik wan sa’ xch’oolil li na’leb’ kixk’uub’ li qaYuwa’ choq’ reheb’ li ralal xk’ajol. A’in li Iglees re li ak’ob’resiik! A’in li Iglees re li ak’ yu’am!

Rik’in li kub’iha’ ut li Santil Musiq’ej, nokoyo’la wi’chik ut naru toowanq “sa’ ak’ yu’am.” Li ak’ob’resiik a’an jwal naxwaklesi xyo’onihomeb’ li ke’riiqa chaq li maak malaj ke’xk’ul rahilal xb’aan naq jwal ch’a’ajkilanb’il xyu’am malaj po’jenaq lix sumal malaj lix junkab’al. Moko aajel ta ru naq taa’ak’ob’resiiq xyu’am li Jesukristo, a’b’an a’an ajwi’ kixk’ul li kub’iha’ ut kixk’ut chiqu chi saqen ru b’ar wan li b’e kixkawresi choq’ qe.

Ut ink’a’ yal jun sut naq too’ak’ob’resiiq. Wan naq naqak’oxla naq ka’ajwi’ rik’in li kub’iha’ naru too’ak’obresiiq. Moko jo’kan ta. Ink’a’ na’oso’ qahoonal chixb’aanunkil. Naru too’ak’ob’resiiq wulaj wulaj! Relik chi yaal naru ajwi’ rajlal xamaan naq naqaket jun ch’uyul li kaxlan wa ut jun ch’ina sek’ chi ha’ re xjultikankil li maatan kixk’e laj Kolol qe, li kikam re naq tooruuq chi ak’ob’resiik jarub’ sut taqaj! Li Jesus nokoxkanab’ chi ak’ob’resiik jarub’ sut taqaj.

Chi yalb’il qaq’e ut chi sa qach’ool sa’ jun li ak’ yu’am rik’in li Kristo, naru too’ok choq’ “ak’il yo’ob’tesihom,” ut taanume’q li k’a’aq re ru q’eel, ut ak’aq chik chixjunil. Aran wan li kuye’k choq’ reheb’ li ani neke’xyal xq’e ut ink’a’ neke’xkanab’ xpaab’ankil lix wankilal li Kolonel chixk’irtesinkileb’, us ta jwal t’ilob’resinb’ileb’ xb’aan li maak sa’ li ruchich’och’. Li Kolonel ink’a’ kixkanab’ xyalb’al xq’e chixb’aanunkil rajom lix Yuwa’ ut chixb’aanunkil lix k’anjel re xtojb’al rix li maak, us ta kixk’ul rahilal li kixk’e chi siksotk, chi elk xkik’el ruuchil xtiqob’, chixnumsinkil xrahil li tz’ejwalej jo’ ajwi’ li musiq’ej, ut chixtz’aamankil naq li k’ahil sek’ taa’isiiq. Aran ajwi’ li Jesus kixk’ut chiqu chan ru xkuyb’al li paab’ank rik’in li Dios.

Naq noko’ok sa’ sumwank rik’in li Dios ut naqayal qaq’e chixpaab’ankil, naru taqak’ul “jun li ak’ ch’oolej” ut “jun li ak’ musiq’ej.” Ch’inqil ch’inqil, naq naqab’oq lix chaab’ilal li Kristo sa’ li qaam ut naqakanab’ xk’oxlankil naq maak’a’ taqaja’le, noko’ok choq’ xtenamit li Kristo xb’aan naq naqak’e a’an jo’ qaDios. Li Jesus jwal naraj tooxtenq’a jo’ li qaRey ut aj Ilol qe ut li Awa’b’ej re tuqtuukilal, ut laa’o taqaye ma taqakanab’ chixb’aanunkil sa’ qach’ool ut qak’a’uxl.

Li jalb’a-k’a’uxlej naxte li okeb’aal choq’ re li ak’ob’resiik sa’ qayu’am. Li Awa’b’ej Russell M. Nelson kooxtenq’a chixtuqub’ankil lix paaltil qana’leb’ chirix li jalb’a-k’a’uxlej, ut nink’oxla naq anajwan ak xoo’ok chixtawb’al ru.

Nasaho’ inch’ool chirab’inkileb’ li saaj komon chixyeeb’al k’a’ru naraj naxye li jalb’a-k’a’uxlej choq’ reheb’. Xwab’i jun li saaj ixq li kixye chi se’se’ li ru, “Naq nink’oxla li jalb’a-k’a’uxlej re wulaj wulaj, naweek’a sahil ch’oolej ut yo’onink.” Naweek’a xrahomeb’ ut xsahil xch’ooleb’ inChoxahil Yuwa’ ut li Jesukristo. Ink’a’ ninxuwa xjilosinkil wib’ rik’in li Dios rik’in tijok re naq tinpatz’ intenq’ankil rik’in li k’a’ru ch’a’aj choq’ we. Ninnaw naq ink’a’ yal neke’raj xsik’b’al junaq inpaaltil. Ye’b’ileb’ li ruq’ chinq’alunkil. A’an li jalb’a-k’a’uxlej naq nawil laa’in,” chan. Li saaj ixq a’in naxnaw naq rik’in li Jesukristo, naru taa’ak’ob’resiiq!

Ma taawaj ru ak’ob’resiik? Ma tatruuq ajwi’ laa’at chi ak’ob’resiik? K’e reetal ani aj-ik’in kiwulak li Jesus—li kixtzoleb’, li kixk’irtesiheb’, li kixwaklesiheb’, ut li kixkuyeb’ xmaak. Ma kiril k’a’ru xch’uutileb’ malaj k’a’ru xna’ajeb’ sa’ li tenamit, malaj li tumin wankeb’ re? Ma kixtiheb’ ru li tiikeb’ xch’ool rik’ineb’ laj maak? Ma kixsik’eb’ ru xb’aan naq jwal k’ulub’ejeb’ wi’chik malaj jwal raab’ileb’ wi’chik? Ink’a’.

Wankeb’ li ke’wulak rik’in li Jesus chi kaw xpaab’aaleb’, ut li ke’xpaab’ naq taaruuq tixk’irtesiheb’—wan li ixq li na’el xkik’el chalen chaq kab’laju chihab’, wan lix jolomileb’ laj puub’ aj Roma li kamk re li ralal, wan li saqlep rix, wan laj Jairo, ut wan li mutz’ aj Bartimeo xk’ab’a’. Ke’xyal rix lix paab’aal, ut ke’xyo’oni naq lix chaab’ilal ut lix wankilal laj Tzolonel aj Nazaret tixjal xwanjikeb’ ut tixte li ak’ b’e choq’ reheb’. Ut joʼkan kixbʼaanu. Maak’a’jo’ li k’irtesink kixk’e.

A’b’an li Jesus kirisob’tesiheb’ ajwi’ li moko kaweb’ ta xpaab’aal, a’an ajwi’ jun li winq li yaj xka’ch’in ut kixye li maare aayehom ajwi’ laa’at, a’an “Qaawa’, ninpaab’; tenq’ahin sa’ lix majelal lin paab’aal.” Ut kiruxtaanaheb’ ajwi’ ru li maajun sut neke’xsik’ li Jesus, a’aneb’ ajwi’ jun li ixq li kitawman chaq chixmuxb’al lix sumlajik, li xmalka’an sa’ li tenamit Nain, li yaj aj winq chire li ha’ Betesda, ut li winq mutz’ chalen chaq sa’ xyo’lajik. Ma wan naq nakaweek’a naq li Jesus nanume’ chixb’aanunkil li us sa’ laa yu’am us ta ink’a’ yookat chixsik’b’al chi moko xtaaqenkil?

Li Jesus kixk’e li ak’ob’resiik reheb’ li yeeb’ileb’ resil sa’ li loq’laj hu, ut reheb’ ajwi’ chixjunil li ke’raj rab’inkil ut xsumenkil; maare a’an li ak’ob’resiik chirix naq ke’wan sa’ maak, sa’ yajel, malaj sa’ li kamk.

K’a’ru naraj naxye a’an choq’ aawe ut choq’ we? Lix chaab’ilal li Jesus ut li ruxtaan nawulak yalaq b’ar. Li ak’ob’resiik wan sa’ xch’oolil li na’leb’ kixk’uub’ chaq li Dios! Li ak’ob’resink, a’an tz’aqal xk’anjel li K’ajolb’ej! Jun li ak’ kutan, li ak’ b’e, malaj li ak’ yu’am, a’an tz’aqal xch’oolil li chaab’il esil re li evangelio!

Jo’kan ut, ma yaal naq ink’a’ chik tatruuq chi ak’ob’resiik xmaak naq junxil kat-el sa’ laa sumwank rik’in li Dios? Ink’a’. Ma ink’a’ chik truuq taak’ul jun li ak’ b’e xb’aan naq k’iila sut xatmaakob’k? Ink’a’. Ma maak’a’ chik xja’lenkil li resilal laa yu’am xb’aan naq ak xanajtob’resi aawib’ rik’in li Kristo? Ink’a’. Ka’ajwi’ lix k’anjel laj tza na’usaak rik’in xyeeb’al naq sachenaqat chi junawja. Ink’a’ sachenaqat.

Ut ink’a’ noko’ak’ob’resiik ka’ajwi’ chirix li qamaak ut li qapaaltil. Rik’in lix chaab’ilal ut li ruxtaan li Kolonel, naru too’ak’ob’resiiq chirix li na’leb’ yal k’aynaqo chixk’oxlankil malaj chixb’aanunkil, maare a’an li josq’il, li wech’ok, li ch’inaak ch’oolej, ut xk’eeb’al li maak sa’ xb’een li qas qiitz’in yal re xkolb’al qib’. Naru ajwi’ taajal laa na’leb’ li ak nakatxlub’tesi chiru k’iila chihab’. Naru taatikib’ laa b’e chi ak’il rik’in lix metz’ew li xnimal ru laj Ak’ob’resinel. Maajo’q’e natitz’ chi ak’ob’resink.

Wi toj yookat chixyalb’al aaq’e chirix jun laa maak malaj jun laa ch’a’ajkilal chi k’iilasutinb’il, makanab’ xyalb’al aaq’e. Li Jesus ink’a’ naxram ru laa b’e. Ink’a’ narajla jarub’ sut naru taayal wi’chik. Ayu chi uub’ej. Chayal aaq’e. Chasik’ aatenq’ankil rik’ineb’ laa was aawiitz’in. Ut chapaab’ naq wanq li ak’ob’resiik choq’ aawe jarub’ sut nakatsutq’i rik’in laa Yuwa’ chi anchal aach’ool. Chatz’eq li maakob’k chi jo’maajo’, xka’sutinkil li maak chi jo’ maajo’, ut xpo’resinkil aach’ool rik’in q’etq’etil. Maak’a’ aj-e naq tatsutq’iiq b’ar wi’ xat-el chaq. K’ul chi anchal aach’ool laa ak’ b’e, ma xka’ sut, rox sut, xkaa sut—malaj cientaq sut—li k’eeb’il aawe sa’ xk’ab’a’ lix kik’el aj tojol-ix li Jesukristo.

Ninb’antioxi chi anchal inch’ool li ak’ob’resiik ak xink’ul ut li toj tink’ul.

Laj Kolol qe kixye jun chik li aatin yal k’osb’il ru li naxwaklesi chixjunil li qayo’onihom ut lix sahil qach’ool anajwan. Chirix naq kixnumsi rahilal aran Getsemani ut chirix naq jwal kirahob’tesiik chiru li krus, ka’ajwi’ kixye, “Xtz’aqlok ru.” Xtz’aqlok ru li aatin ke’xye chaq li profeet, ut ak xtoj chaq rix li k’as chirix lix maak ut lix rahilal li ruchich’och’. Li Jesus kixye naq “xtz’aqlok” lix mayej re li junelik q’e kutan. A’b’an lix tojb’al rix li maak toj maji’ taatz’aqloq toj reetal naq li Jesus tixk’ul li ak’ yu’am sa’ li rox kutan, ut naq taa’ak’ob’resiiq ajwi’ a’an chi waklesinb’il xb’aan xwankilal li Yuwa’b’ej.

Xb’aan naq li Jesus junelik kixb’aanu li nawulak chiru lix Yuwa’, ut xb’aan naq “kixnumsi li rajom li Yuwa’b’ej sa’ chixjunil li k’a’aq re ru,” laa’at ut laa’in naru too’ak’ob’resiiq. Chak’ul li ak’ob’resiik, anajwan ajwi’. Li Jesukristo naxtikib’ ut naxtz’aqob’resi ru qapaab’aal, ut junelik naxk’e junaq chik xtz’aqob’ li qayu’am. Li Jesus, a’an li xtiklajik ut li roso’jik—roso’jik li qarahilal, ut xtiklajik li ak’ yu’am rik’in li Dios, ut nokoxkanab’ chixk’ulb’al li rusilal, chixtz’eqb’al li k’a’ru re junxil, ut chixchapb’al wi’chik qab’e sa’ jun li ak’ kutan jarub’ sut taqaj. Relik chi yaal naq lix sahilal ut li rusilal li Kristo toorochb’eeni chiru chixjunil qayu’am. Sa’ xk’ab’a’ li Jesukristo, amen.