Ilon wan wi’ li Dios ut taawanq aayu’am

Sa’ li junio xnume’, kiwan jun nimla rahilal aran Lesoto, a’an jun li tenamit saʼ xtzʼe li saqʼe aran Africa. Jun ch’ina kamion neke’xik wi’ jun may chi saaj ixq re li rama Maputsoe ut wuqub’eb’ laj jolominel yoo chi xik sa’ li tenamit Maseru, re naq te’xch’utub’ rib’ li saaj ixq sa’ li distrito. Naq wankeb’ sa’ b’e sa’ li eq’la, jun li b’eeleb’aal ch’iich’ li kiraj xq’axb’al jalan chik, ki’ok sa’ junpaat sa’ xb’e li kamion. Maak’a’ xna’aj malaj xhoonal li kamion re xjalb’al xb’e, jo’kan naq sa’ junpaat ke’xten rib’, ke’t’ane’ sa’ li b’e, ut ke’ok chi k’atk.

Ke’kam o’laju chixjunileb’, ut wan sa’ xyanqeb’ waqib’ li saaj ixq, wiib’ laj jolominel, jo’ ajwi’ li awa’b’ej re li rama ut li rixaqil. Eb’ li ke’kole’, eb’ lix junkab’al, ut eb’ li ramiiw ke’xnumsi xjosq’il, xrahileb’ xch’ool, ut xyot’ikeb’ xch’ool. Us ta ra xch’ooleb’ ut ink’a’ natuqla xk’a’uxleb’, ke’xk’ojob’ xch’ool chirib’ileb’ rib’ ut ke’xsik’ li Dios rik’in santil b’ich, loq’laj hu, ut tijok, ut chi jo’kan ke’xtaw li tuqtuukilal. Li xSetso’ana Selebeli, li wuqlaju chihab’ wan re, kixye: “Li Jesukristo nokoxra ut wan qik’in, us ta jwal ra qach’ool.”

Jun saaj ixq ut jun aj jolominel li ke’k’ame’ sa’ b’anleb’aal ke’ril lix Hu laj Mormon chixkab’ichaleb’. Chan jun reheb’, “Toje’ yooko chirilb’al lix Hu laj Moroni, ut laj Moroni naxye tz’aqal li naqeek’a laa’o. … Naq na’aatinak laj Moroni, chanchan naq naxye, “Tento taatzol li aatin a’in xb’aan naq tz’iib’anb’il choq’ aawe re aatenq’ankil chixnumsinkil laa ch’a’ajkilal.””

Sa’ xmuqlajikeb’ li ke’kam, jun Setenta re Area, li Elder Siyabonga Mkhize, kixye, “Tento taqasik’ li Qaawa’ sa’ li hoonal a’in ut taqatz’aama chiru naq tixk’ojob’ qach’ool ut … tixkotz li rahilal naqeek’a.” Li awa’b’ej reheb’ li Saaj Ixq sa’ jun chik li rama aran Leribe, li xMampho Makura, kixye: “Sik’omaq li Qaawa’, ut tawomaq li metz’ew re xk’ulub’ankil li rajom a’an. Li Jesukristo a’an “laj yoob’anel ut laj choyonel re li qapaab’aal” [Hebreos 12:2]. Mex’el rik’in, chex’iloq b’an wan wi’ a’an.”

Sik’omaq a’an. Li raatin li xMampho naxka’suti li raatin laj Alma choq’ re laj Helaman, li Ralal: “Chawil naq tat-iloq wan wiʼ li Dios ut taawanq aayuʼam.” Laj Alma ki’aatinak chirix li Liahona jo’ jun li eetalil choq’ re laj Lehi ut lix tenamit: “Moko chʼaʼaj ta xkʼeebʼal aaxik rikʼin li raatin li Kristo, li tixkʼut chawu jun li tiikil bʼe saʼ li sahil chʼoolejil re junelik, joʼ chanru naq moko chʼaʼaj ta choqʼ rehebʼ li qayuwaʼ xkʼeebʼalebʼ xxik rikʼin li kʼutlebʼaal bʼe aʼin, li tixkʼut chiruhebʼ jun tiikil bʼe saʼ li yeechiʼinbʼil chʼochʼ.” Laj Alma kixye naq wi eb’ a’an teʼiloq taaruuq teʼwanq chi yoʼyo. … Ut wi [laa’o] nokoʼilok naru nokowan chi yoʼyo chi junelik qʼe kutan.”

Sa’ jalan chik hoonal, laj Alma ki’aatinak chirix li k’anti’ yiib’anb’il rik’in q’an ch’iich’ li kixtaqsi laj Moises naq eb’ laj Israelita ke’rahob’tesiik xb’aaneb’ li k’anti’ neke’kamsin. Li Qaawa’ kixye re laj Moises naq tixyiib’ jun k’anti’ ut naq tixtaqsi sa’ ru’uj jun che’, ut naq tixye naq “chixjunil li tiwb’il xb’aan junaq k’anti’, taak’iraaq naq taaril a’an.” Laj Alma kixch’olob’ naq li k’anti’, a’an reetalil li Kristo, li taataqsiiq chiru krus. Naab’aleb’ ke’ilok ut ke’k’iraak, a’ut laj Alma kixye naq wankeb’ ajwi’ li “li qʼaxal kawujenaqebʼ” ut ink’a’ ke’raj ilok, jo’kan naq ke’kam.

Kixpatz’ laj Alma:

“Wi ta taaruuq texkʼirtesiiq yal rikʼin xbʼeresinkil lee rilobʼaal re taaruuq texkʼirtesiiq, ma inkʼaʼ raj texʼiloq saʼ junpaat, malaj ut teeraj raj bʼan xkawobʼresinkil lee raam chi maakʼaʼ eepaabʼaal, ut texqʼemoʼq raj, re naq inkʼaʼ raj teebʼeresi lee rilobʼaal, re bʼan texʼosoʼq raj?

“… Bʼeresihomaq bʼiʼ lee rilobʼaal, ut tikibʼomaq xpaabʼankil li Ralal li Dios, naq aʼan taachalq chixtojbʼal rix lix tenamit, ut naq aʼan tixkʼul rahilal ut taakamq re xtojbʼal rix lix maakebʼ; ut naq aʼan taawakliiq chaq wiʼchik saʼ xyanqebʼ li kamenaq, li tixkʼe chi uxmank li wakliik chi yoʼyo, re naq chixjunilebʼ li winq teʼxaqliiq chiru, re taaraqeʼq aatin chirixebʼ saʼ li kutan re rosoʼjik ut re raqbʼa-aatin, aʼ yaal joʼ chanru xkʼanjelebʼ.”

Relik chi yaal, li aatin “tat-iloq wan wiʼ li Dios” wan xyaalal choq’ qe sa’ li junelik q’e kutan, a’ut wan ajwi’ xyaalal sa’ li qayu’am sa’ ruchich’och’. Chinaq sa’ aach’ool li raatin li saaj ixq aj Lesoto, li Hermana Selebeli, li xye—“Li Jesukristo nokoxra ut wan qik’in, us ta jwal ra qach’ool.”

Ak re li ruchich’och’—b’ar wi’ najosq’ob’resin laj tza ut nokopaalto’ chiqajunil—naq taaka’ch’ino’q, taach’a’ajko’q, ut taaraho’q qach’ool, ut taqanumsi li sachk, li rahob’tesiik, ut li k’a’ru moko tiik ta. Ka’ajwi’ rik’in li ilok wan wi’ li Dios naq li kristiaan, li junkab’al, ut li tenamit neke’ru chi usaak. Li Awa’b’ej Russell M. Nelson kixye: “Xb’aan naq li Kolonel, sa’ xk’ab’a’ lix junelikil mayej aj tojol-ix, kixtoj qix chiru li q’unal, li sachk, ut li maak, ut xb’aan naq kixnumsi chixjunil li rahilal, k’a’uxlej, ut iiq eek’ulum [chi’ilmanq Alma 7:11–13], chi jo’kan naq, wi teejal eek’a’uxl chi yaal ut teesik’ lix tenq’, naru textaqe’q sa’ xb’een li xiwxiwil ruchich’och’ a’in.”

Sa’ lix Hu laj Mormon, maajun chik na’leb’ jwal k’iilasutinb’il wi’chik chiru li na’leb’ a’in: “A yaal joʼ chanru nekepaabʼ lin taqlahom texʼusaaq saʼ li chʼochʼ; aʼbʼan aʼ yaal joʼ chanru inkʼaʼ nekepaabʼ lin taqlahom, texʼisiiq chaq chiwu.” Li k’a’ru ke’xk’ul li tenamit sa’ lix Hu laj Mormon chiru k’iila cient chihab’ naxk’ut xyaalalil li aatin a’in. Li “usaak” naraj naxye li wank chi b’eresinb’il ut chi osob’tesinb’il xb’aan li choxa sa’ xyu’ameb’. Li “usaak” naraj naxye naq maak’a’ xmajelaleb’, re naq te’ruuq chi sumlaak, chi k’iiresink kok’al, ut chixtenq’ankileb’ li ras riitz’in. Li “usaak” naraj naxye naq te’ruuq chi numtaak sa’ xb’een li ch’a’ajkilal ut li yale’k-ix. Rik’in li rusilal li Kristo, “chixjunil li kʼaʼaq re ru kikʼanjelak saʼ junajil choqʼ re lix chaabʼilaleb’,” kixsaqob’resi ruheb’, ut kixkawresi lix sumwank rik’in li Dios.

Laj Alma kixch’olob’ naq li ilok wan wi’ li Dios naraj naxye xpaab’ankileb’ lix taqlahom, relajinkil junelik chiru naq tatxtenq’a, raatinankil a’an sa’ chixjunil li nakab’aanu, ut xkanab’ankil naq taanujaq aach’ool chixb’antioxinkil li Dios chi kutan ut chi q’eq. Li raatin ut lix taqlahom li Dios natawman sa’eb’ li loq’laj hu ut sa’ raatineb’ lix moos. Natawman sa’ “Li Junkab’al: Jun Jek’inb’il Aatin choq’ re li Ruchich’och’.” Natawman ajwi’ sa’ li hu Choq’ re Xkawilaleb’ li Saaj. Li jolomil na’leb’ choq’ li Saaj Winq ut Saaj Ixq chiru li chihab’ a’in, a’an li aatin “Chexʼiloq wan wiʼ li Kristo,” li nachal chaq sa’ li aatin kixye li Qaawa’ re laj Jose Smith ut laj Oliver Cowdery: “Chexʼiloq wankin wiʼ saʼ li junjunq eekʼoxlahom; miwiibʼan eechʼool, mexxuwak.” Sa’ li hu Choq’ re Xkawilaleb’ li Saaj neke’tawman lix taqlahom ut lix na’leb’ li Dios jwal aajeleb’ ru, ut naxk’ut chan ru too’iloq wan wi’ li Qaawa’ re naq taqsik’ ru li chaab’il b’e. Li hu a’an naxk’e qana’leb’ chiqajunilo, ink’a’ ka’ajwi’ xna’leb’ li saaj.

Jun li na’leb’ jwal aajel ru sa’ li hu Choq’ re Xkawilaleb’ li Saaj wan sa’ li jun ch’ol li naxye naq “Loq’ laa junxaqalil.” Naxye aran: “Il laa junxaqalil—ut xjunxaqalileb’ laa was aawiitz’in—rik’in oxloq’. Naq nakasik’ ru laa waq’, laa wismal, ut chan ru nakat-ilok, patz’ aawib’, “Ma yookin chixk’eeb’al xloq’al lin xaqalil jo’ jun maatan k’eeb’il xb’aan li Dios?””

Naxye ajwi’ sa’ Choq’ re Xkawilaleb’ li Saaj: “K’e xloq’al li wank sa’ sumalej ut eb’ li saqil eek’ahom re sumalil. Ink’a’ us li jot’ok ut li sahilank chirix a’an. Naq moko sumsuukeb’ ta jun winq ut jun ixq, moko us ta xtoch’b’al junjunq xcha’al li tib’elej li loq’eb’, us ta toj wan xt’ikr li kristiaan. Sa’ li nakasik’ ru xb’aanunkil, rilb’al, rab’inkil, xk’oxlankil, xyeeb’al, malaj xtaqlankil, maab’aanu yalaq k’a’ru nareek’asi li saqil eek’ahom re sumalil sa’ xch’ool jalan chik li kristiaan malaj sa’ aach’ool laa’at.”

Li na’leb’ a’in naxk’e chiqak’oxla li raatin li Awa’b’ej Nelson:

“Maak’a’ chik taapo’resinq re laa yu’am chi mas sa’ junpaat jo’ xq’etb’al li choxahil chaq’rab’ [re saq ru ch’oolej]. Choq’ reheb’ li ani xe’ok sa’ sumwank rik’in li Dios, li muxuk-ib’ mas sa’ junpaat tixsach laa paab’aal.

“… Li wankilal chi k’ehok yu’am a’an li jun chi wankilal re diosilal li naxkanab’ li qaChoxahil Yuwa’ naq eb’ li ralal xk’ajol te’xk’anjela. Xb’aan a’in, li Dios xk’eheb’ li chaq’rab’ q’axal kaw chirix chan ru naq taa’oksimanq li yo’yookil ut choxahil wankilal a’in. Li wank sa’ sum aatin a’an ka’ajwi’ choq’ re jun winq ut jun ixq li sumsuukeb’ chirib’ileb’ rib’.

“Wankeb’ naab’al sa’ li ruchich’och’ ink’a’ neke’paab’ank re a’in, a’b’anan ink’a’ nanawman ru li yaal yal rik’in li k’a’ru neke’xk’oxla li kristiaan. Li Qaawa’ ak xye naq maajun kristiaan li moko saq ta ru xch’ool taa’ok sa’ li choxahil awa’b’ejihom. … Wi ak xaq’et li chaq’rab’ a’in, nintz’aama chawu naq taajal aak’a’uxl. Tatchalq rik’in li Kristo, ut taak’ul lix kuyb’al laa maak chi tz’aqal wi nakajal aak’a’uxl chi tz’aqal chirixeb’ laa maak [chi’ilmanq Isaias 1:16–18; Tzol’leb’ ut Sumwank 58:42–43].”

K’e reetal naq sa’ lix Hu laj Mormon, li usaak ink’a’ na’oso’ xmaak li neb’a’il—na’oso’ b’an xmaak li isiik chiru li Qaawa’. Naq wan li Qaawa’ aawik’in, naraj naxye naq wan lix Musiq’ sa’ laa yu’am. Ak k’eeb’il lix Saqen li Kristo reheb’ chixjunil li neke’chal sa’ ruchich’och’. Jo’kan ajwi’, wankeb’ li neke’kub’e xha’ ut neke’xk’ul xkomon chik li saqen rik’in li maatan re li Santil Musiq’ej. Li Santil Musiq’ej nokoxmusiq’a ut nokoxb’eresi, naxnimob’resiheb’ li qamaatan ut li qaseeb’al, ut nokoxtenq’a chixtz’eqtaanankil li maa’us, li ink’a’ us, ut li k’a’ru maak’a’ na’ok wi’.

Laa’ex ut laa’in naqanaweb’ ru li ani ke’xk’ul li maatan re li Santil Musiq’ej, a’ut xb’aan naq ink’a’ chik neke’xpaab’ lix taqlahom li Dios, sachenaq li maatan a’an chiruheb’. Nanaq sa’ lin ch’ool jun winq li ink’a’ chik komon sa’ li Iglees xb’aan lix maak. Naq ki’isiik, kixye naq kipo’ xch’ool. Kijite’ xb’aaneb’ laj jolominel li wankeb’ xpaaltil naq kixk’oxla. A’an naxnaw naq moko us ta lix b’aanuhom, a’b’an kixyal xkolb’al rib’ rik’in xk’eeb’al li maak sa’ xb’eeneb’ jalan. Moqon, ak sa nareek’a rib’ chi maak’a’ li Iglees sa’ xyu’am. Moko teneb’anb’il ta chik chi k’anjelak, chi loq’onink, ut chirilb’aleb’ li komon.

Kama’an kikana sa’ xyu’am, a’b’an timil timil ki’ok chixk’eeb’al reetal naq maak’a’ chik li Santil Musiq’ej ut li Dios sa’ xyu’am. Junxil, li Santil Musiq’ej naxk’ojob’ xch’ool, naxk’am xb’e, ut naxkawob’resi xch’ool wulaj wulaj, ut ki’ok chirajb’al naq tixk’ul wi’chik a’an. Jo’kan naq ki’ok chixjalb’al xk’a’uxl, ut kixk’ul chi ak’il li kub’iha’ rik’in ha’ ut li Santil Musiq’ej.

Eb’ li kristiaan neke’xsik’i yalaq b’ar li sahil ch’oolejil, li tenq’, ut li na’leb’ choq’ re xyu’am. Lix k’ihaleb’ a’an yookeb’ “chixqʼaxbʼal li aajel raj ru xsikʼbʼal.” A’ut ink’a’ na’ajman naq “kama’aqo li kok’al, chi moko eek’asinb’ilaqo ut k’amb’ilaqo xb’aan li iq’ yalaq b’ar xb’aan k’a’aq re ru chi na’leb’il.” Naq noko’ilok wan wi’ li Dios, naru natuqla li qaam us ta wan li ch’a’ajkilal, ut naru nak’i li qapaab’aal us ta nawiib’an qach’ool ut nayale’ qix sa’ musiq’ej. Naru taqak’ul metz’ew us ta xik’ ilb’ilo malaj wanko sa’ junaatal. Naru nak’ojla qach’ool us ta maji’ tz’aqal wanko. Maajun chik b’e wan, ka’ajwi’ li kixkawresi li Dios: “Sutq’inqex chaq wik’in re naq texinkol, chejunilex li wankatqex chaq sa’ xmaril li ruuchich’och’, xb’aan naq laa’in li Dios ut maak’a’ chik junaq.”

Li ilok wan wi’ li Dios ink’a’ naraj naxye naq yal naqakanab’ jun xna’aj li Dios sa’ qayu’am, naraj b’an naxye naq naqak’e li Dios xb’een xb’een sa’ li qayu’am. Jun sut chik tinjultika li xuwajel toch’e’k aran Lesoto. Sa’ lix ch’aat sa’ li b’anleb’aal, jun reheb’ laj jolominel reheb’ li Saaj Ixq, li ink’a’ naxpaab’ naq wan jun Dios rub’elaj naq ki’ok sa’ li Iglees, kixye naq anajwan chik li rajom lix yu’am, a’an xnawb’al k’a’ut naq kikole’. “Wi ta truuq tintaw xsumenkil li patz’om a’an,” chan, “tintaw raj naq yookin chi k’anjelak rajlal chiru li Dios.” “Junxil nink’oxla naq ninra li Dios, a’b’an anajwan k’a’jo’ wi’chik naq ninra. Anajwan li Dios wan xb’een xb’een sa’ inyu’am.”

Ninch’olob’ xyaalal li Yuwa’b’ej, li K’ajolb’ej, ut li Santil Musiq’ej, li junajinb’ileb’ li raatin, lix k’a’uxl, ut lix k’anjel jo’ li junaj chi Dios li naru noko’ilok wi’ re xtawb’al chixjunil li k’a’ru us. Ninch’olob’ xyaalal lix tojb’al rix li maak xb’aan li Jesukristo, li nachal wi’ li wankilal re xtz’aqob’resinkil ru li chaq’al ru aatin a’in: “Chexʼiloq wankin wiʼ laaʼin, ut chexkuyuq toj saʼ rosoʼjik, ut taawanq eeyuʼam; xbʼaan naq re li ani nakuyuk toj saʼ rosoʼjik tinkʼe li junelik yuʼam.” Sa’ xk’ab’a’ li Jesukristo, amen.