Xtikibʼankil

Xb’aan li Awa’b’ej Dallin H. Oaks

Awa’b’ej re lix Molameb’ li Kab’laju chi Apostol

Anajwan tooxik chi uub’ej rik’in li jolomil ch’utub’aj-ib’ a’in, jo’ chanru naq k’uub’anb’il, ut rik’ineb’ laj aatinanel ut li b’ich eetalinb’il xb’aan li Awa’b’ej Nelson, li xkawresiman chiru k’iila po.

Ex was wiitz’in, nokoch’utla chi ra qach’ool chirix lix kamik li qaraarookil Awa’b’ej Russell M. Nelson. Nekexwaatina jo’ Awa’b’ej sa’ xb’een lix Molameb’ li Kab’laju, li ak xinxaqab’aak wi’ sa’ li junjunq chi ch’utub’aj-ib’, re teep, re oqech, ut li jolomil ch’utub’aj-ib’, chiru wuqub’ chihab’ rik’in meer.

Tooxik chi uub’ej rik’in li jolomil ch’utub’aj-ib’ a’in, jo’ chanru naq k’uub’anb’il, ut rik’ineb’ laj aatinanel ut li b’ich eetalinb’il xb’aan li Awa’b’ej Nelson, li xkawresiman chiru k’iila po. Li na’leb’ xqajal a’an a’in, li aatin xinye sa’ xtiklajik, ut tin’aatinaq ajwi’ sa’ xna’aj li Awa’b’ej Nelson sa’ li ch’utam sa’ roso’jik, sa’ domingo ewu.

A’an a’in li xb’een sut chiru 75 chihab’ naq jun Awa’b’ej sa’ li Iglees xkam wiib’ oxib’ kutan rub’elaj jun jolomil ch’utub’aj-ib’. Xb’aan a’in, x’ajman ru naq taqak’uub’ chan ru naq taaruuq taqab’aanu li ch’utam rik’ineb’ laj b’eresinel sa’ li jolomil ch’utub’aj-ib’, ut taqaxaqab’ xkutankil lix muqb’al a’an a’ yaal sa’ junpaat jo’ naru chiqu. Li Awa’b’ej Nelson xnaw naq nim xloq’al li jolomil ch’utub’aj-ib’ re te’k’ehe’q xna’leb’ laj santil paab’anel choq’ reheb’ li po chalel. Naqanima ru a’an rik’in xb’aanunkil li ch’utub’aj-ib’ jo’ chanru naq xk’uub’ a’an.

Sa’ li hoonal a’in re rahil ch’oolejil, ak xqab’aanu jun ch’utam re xnimankil ru li Awa’b’ej Russell M. Nelson rub’elajeb’ li ch’utam re li jolomil ch’utub’aj-ib’, ut xqaxaqab’ xkutankil lix muqb’al ka’ch’in chik chirix a’an. Xb’aanuman chixjunil a’in chi k’ulub’anb’il xb’aan lix junkab’al li Awa’b’ej Nelson, ut lix Molameb’ li Kab’laju.

Sa’ xk’ab’a’ naq chiqajunilo li xoob’oqe’ chi aatinak sa’ li jolomil ch’utub’aj-ib’ taqaj raj xnumsinkil li hoonal k’eeb’il qe re xnimankil ru li Awa’b’ej Nelson, xqapatz’ naq chixjunileb’ li te’aatinaq sa’ li ch’utub’aj-ib’ ink’a’ te’aatinaq chi naab’al chirix a’in, ut taaruuq taayeemanq li aatin a’an sa’ lix muqb’al, li ak xqatikib’ xk’uub’ankil.

Li aatin tinye laa’in—li naxk’am rib’ rik’in li ch’utub’aj-ib’ a’in, ut rik’ineb’ li aatin li ak xe’yeeman—a’an a’in: Ninra laj Russell M. Nelson ut mas wi’chik xintzol chirix li evangelio, ut chirix li k’amok b’e sa’ li evangelio, rik’in li wank sa’ komonil rik’in a’an chiru yalaq ani chik li kristiaan li xinnaw ru. A’an jun eetalil choq’ qe, jo’ jun moos ut jo’ aj taaqenel re li Qaawa’ Jesukristo. Ninch’olob’ xyaalal eere li na’leb’ a’in, sa’ xk’ab’a’ li Jesukristo, amen.