Neke’se’ek ut neke’b’antioxink
Nak’utun naq jwal kaw xpaab’aleb’ aj paab’anel aran Africa naq neke’xnumsi li ch’a’ajkilal ut naq neke’xsume lix k’anjel li Iglees naq toj ak’ choq’ reheb’.
Numenaq jun chihab’ chaq, kinraqe’ sa’ lin k’anjel rik’ineb’ li Awa’b’ej re li Setenta ut kiyeeman resil arin sa’ li jolomil ch’utub’aj-ib’. Xb’aan naq ke’xye lin k’ab’a’ rik’ineb’ li ink’a’ chik te’k’anjelaq jo’ aj b’eresinel, wankeb’ li komon li ke’xk’oxla naq laa’in ajwi’ ink’a’ chik tink’anjelaq. Naq xraqe’ li ch’utub’aj-ib’, naab’aleb’ neke’xb’antioxi we lin k’anjel ut neke’xpatz’ rusilal li Dios sa’ lin b’een. Wankeb’ ajwi’ li ke’raj xloq’b’al wochoch aran Lago Salado. Kisaho’ inch’ool xnawb’al naq eb’ li komon nikine’xk’oxla, ut naq ink’a’ raj ch’a’aj xk’ayinkil wochoch sa’ jun kutan. A’b’an maji’ ninwulak aran.
Sa’ lin ak’ k’anjel, laa’in wochb’een xMonica wanko aran Africa, b’ar wi’ li Iglees jwal yoo chi k’iik. Jwal ch’ina-us li k’anjelak sa’ xyanqeb’ aj paab’anel re li Area Africa Sur ut rilb’al lix rahom li Qaawa’ choq’ reheb’. Nasaho’ inch’ool chirilb’al naq wankeb’ k’iila paay ru li junkab’al aran, ut wankeb’ ajwi’ li komon jwal tzolb’ileb’ ut li neke’roksi xseeb’al ut xhoonal chixtenq’ankileb’ li ras riitz’in.
A’b’anan, rik’in naq jalan jalanq li wankeb’ sa’ li tenamit a’an, wankeb’ ajwi’ li neb’a’ li neke’ok sa’ li Iglees ut neke’xjal xwanjikeb’ b’antiox re li usilal li nachal rik’in xtojb’al li lajetqil, rik’in li paab’ank, ut rik’ineb’ lix tzoleb’aal li Iglees. Wankeb’ li tzoleb’aal Success in School, EnglishConnect, BYU-Pathway Worldwide, ut li Fondo Perpetuo para la Educación, li neke’xtenq’a naab’aleb’ li saaj sa’ li Iglees.
Chan li Awa’b’ej James E. Faust, “Li iglees maare ink’a’ len naxkelo li ani xnimal ru rik’in, a’b’an naxwaklesi yalaq ani re naq xnimalaq ru.”
Nak’utun naq jwal kaw xpaab’aleb’ aj paab’anel aran Africa naq neke’xnumsi li ch’a’ajkilal ut naq neke’xsume lix k’anjel li Iglees naq toj ak’ choq’ reheb’. Junelik neke’xsume rik’in sahil ch’oolej. Neke’xyu’ami jun na’leb’ kixk’ut li Awa’b’ej Russell M. Nelson:
“Li sahil ch’oolejil naqeek’a mas b’ab’ay rilom rik’in li naqanumsi sa’ li qayu’am, ut wan naab’al rilom rik’in chan ru naqil li qayu’am.
“Naq naqataaqe lix k’uub’anb’il na’leb’ li kolb’a-ib’ re li Dios … jo’ ajwi’ li Jesukristo ut lix evangelio, naru naqeek’a xsahil qach’ool, maak’a’ naxye k’a’ru li nak’ulman—malaj li ink’a’ nak’ulman—sa’ li qayu’am.”
Aran Africa neke’xtaw sahil ch’oolej us ta yoo li ch’a’ajkilal. Neke’xnaw naq li qasumwank rik’in li Kolonel nokoxtenq’a chixsumenkil li qach’a’ajkilal rik’in li se’ek sa’ qilob’aal ut li b’antioxink sa’ qach’ool.
Inyehaq resil b’ayaq li nink’ul rik’ineb’ aj paab’anel a’in, li naxk’ut li na’leb’ a’an—xb’een wa sa’ li tenamit Mozambique.
Mozambique
Wiib’ oxib’ po chaq, kinjolomi jun li ch’utub’aj-ib’ re jun li estaca li yal jun chihab’ wan re, a’b’an ak wankeb’ 10 lix teep. Numenaq 2.000 li komon ke’ok sa’ li ch’ina kapiiy ut sa’ oxib’ li muheb’aal t’ikr li ke’xk’ojob’ chirix. Li awa’b’ej re li estaca wan 31 chihab’ re, 26 wan re li rixaqil, ut wiib’eb’ lix kok’al. Naxjolomi li ak’ estaca a’in us ta ch’a’aj xwaklesinkil, ut ink’a’ napo’ xch’ool—nase’ek b’an ut nab’antioxin.
Sa’ jun li entrevista rik’in li patriarca, kinnaw naq jun yajel kiketok re li rixaqil, ut jwal ch’a’aj xtojb’al lix b’an. Koo’aatinak chirix a’an rik’in li awa’b’ej re estaca, toja’ naq kootijok sa’ xb’een li qana’chin re resob’tesinkil. Kinpatz’ re li patriarca jarub’eb’ li osob’tesink naxk’e.
“Maare waqxaqib’, maare lajeeb’” chan.
“Ma chi po?” chankin.
“Chi xamaan!” chan. Xinye re naq jwal xiikil a’an chiru yal jun xamaan.
“Elder Godoy,” chan, “neke’k’ulun li komon rajlal xamaan, a’aneb’ ajwi’ li ak’ komon ut eb’ li saaj.” Aran ajwi’ ink’a’ napo’ xch’ool—yal nase’ek b’an ut nab’antioxink.
Chiru jun li ewu sabado kin’el sa’ jun li ch’utam re li estaca, ut naq yookin chi xik sa’ li hotel, wankeb’ chire b’e li yookeb’ xloq’b’al lix wa. Kinpatz’ re li naxch’e’ qab’eleb’aal ch’iich’ k’a’ut naq jwal q’ojyin neke’loq’ok. Kixch’olob’ chiwu naq neke’k’anjelak chi kutan re naq truuq te’loq’oq chi q’ojyin.
“Ah xintaw ru,” chankin. “Neke’k’anjelak anajwan re naq truuq te’wa’aq wulaj.”
“Ink’a’” chan. “Neke’k’anjelak chi kutan re naq te’wa’aq ewu.” Kink’oxla naq maare li qakomon sa’ li Iglees ink’a’ neke’xk’ul li majelal a’an, a’b’an kixye we naq neke’xk’ul ajwi’. Wulajaq chik naq wankin sa’ li ch’utam re domingo, ak xinnaw li majelal wankeb’ wi’, jo’kan naq jwal kitoch’e’ li waam naq neke’se’ek sa’ rilob’aal ut neke’b’antioxink sa’ xch’ool.
Zambia
Naq yookin chi xik sa’ ch’utam wochb’een li awa’b’ej re estaca, kiqil jun li sumal chire li b’e li neke’b’eek rik’in xk’uula’al ut wiib’eb’ xkok’al. Kooxaqli re xyeechi’inkil xk’amb’aleb’. Jwal ke’saho’ xch’ool. Naq kinpatz’ reheb’ jo’ najtil chik te’xik raj chi oqej, li yuwa’b’ej xye we naq maare te’b’ayq raj 45 k’asal malaj jun hoor chik, a’ yaal reheb’ li kok’al. Neke’xkuy li b’e a’an rajlal domingo, ut ink’a’ neke’po’ xch’ool—yal neke’se’ek ut neke’b’antioxink.
Malawi
Chiru jun domingo rub’elaj li ch’utub’aj-ib’ re estaca, kinwulak rik’in wiib’eb’ li rama li neke’roski li eskweel jo’ xch’utleb’aaleb’. Osach inch’ool xb’aan naq ink’a’ jwal chaab’ileb’ li ochoch a’an, ut maak’a’ li jwal aajel ru chi sa’. Naq kin’aatinak rik’ineb’ li komon aran, ok raj we chixpatz’b’al xkuyb’al li maak naq yib’eb’ ru lix ch’utleb’aal, a’b’an saheb’ xch’ool naq nach’ wan li ch’utleb’aal, ut ink’a’ jwal najt li b’e. Aran ajwi’, maajun napo’ xch’ool—junes neke’se’ek ut neke’b’antioxink.
Zimbabue
Chirix xnumsinkil jun li sabado sa’ ch’utam rik’ineb’ laj jolominel, li awa’b’ej re estaca kinxk’am sa’ li k’anjel re domingo sa’ jun li ochoch to’oninb’il. Wankeb’ 240 li komon sa’ li ch’utam a’an. Li obiisp kixye resileb’ 10 li ak’ komon li toje’ xe’kub’e xha’ chiru li xamaan a’an. Neke’tam li komon sa’ wiib’eb’ li ch’ina sala, ut wankeb’ ajwi’ li komon chunchuukeb’ chirix kab’l, b’ar wi’ neke’ril li k’anjel chiru li ventaan ut li okeb’aal. Maajun napo’ xch’ool—junes neke’se’ek ut neke’b’antioxink.
Lesotho
Kinwulak sa’ li chaab’il tenamit a’in, a’an ajwi’ “xtenamiteb’ li tzuul” nayeeman re, re naq tinwil jun li distrito li ok re chi k’anjelak jo’ estaca. Chirix naq kinnumsi jun li sabado sa’ ch’utam, kinwulak sa’ li ch’utam re domingo sa’ jun li rama li nak’anjelak sa’ jun li ochoch to’oninb’il. Maak’a’ chik xna’ajeb’ li komon chi sa’, ut ke’tam chirix kab’l re naq te’okenq chire okeb’aal. Kinye re li awa’b’ej re rama naq aajel ru jun li ochoch jwal nim wi’chik. Osach inch’ool naq xye we naq a’aneb’ yal xyijacheb’ li komon. Li jun xyijach chik taak’ulunq sa’ xkab’il li ch’utam naq naraqe’ li xb’een. Aran ajwi’, maajun napo’ xch’ool—junes neke’se’ek ut neke’b’antioxink.
Kinsutq’i Lesoto jun sut chik naq ke’kam li saaj komon naq kitoch’e’ lix b’eleb’aal ch’iich’, li ak yeeb’il resil xb’aan li Elder D. Todd Christofferson. Naq kinwulak rik’ineb’ lix junkab’al ut eb’ laj jolominel, kink’oxla naq jwal ra toowanq. A’b’anan, kiwil naq jwal kaw xch’ooleb’ li komon ut neke’xkuy li ch’a’ajkilal a’an rik’in waklesink ch’oolej.
Li xMpho Aniciah Nku, kaalaju chihab’ wan re, li ki’el chi yo’yo sa’ li toch’e’k a’an ut wan sa’ li jalam-uuch a’in, kixye: “Kanab’ aawib’ sa’ ruq’ li Jesus ut il a’an, xb’aan naq rik’in li Jesus taatuqlaaq aach’ool, ut tatxtenq’a chi k’iraak.”
A’an yaal wiib’ oxib’ li esilal li neke’xk’ut naq saheb’ xch’ool xb’aan naq neke’xjayali xyu’ameb’ rik’in lix evangelio li Kristo. Neke’xnaw b’ar te’xtaw xtenq’ankil ut xyo’onihom.
Lix wankil li Kolonel re k’irtesink
K’a’ut naq li Kolonel naru chiqatenq’ankil, maak’a’ naxye chan ru li qawanjik? Nach’olob’aak li na’leb’ a’an sa’eb’ li loq’laj hu:
“Ut a’an taaxik, ut tixnumsi li rahilal ut ch’a’ajkilal ut xyalb’al rix, li jar paay wan. …
“… Ut tixkʼul saʼ xbʼeen lix majelal lix kawilalebʼ, re naq lix saʼ xchʼool nujenaqaq chi uxtaan, … re taaruuq tixnaw … chanru xkʼeebʼal xtenqʼankilebʼ lix tenamit joʼ chanru xmajelal lix kawilalebʼ.”
Li Elder David A. Bednar kixye naq maajun rahilal wan sa’ tib’elej chi moko ch’oolej li ink’a’ xnawom li Kolonel. “Maare wan naq laa’o taqaye, “Maajun naxnaw k’a’ru yookin chixnumsinkil. ….” Yaal ajwi’, maare maajun aawas aawiitz’in. A’b’an li Ralal li Dios naxnaw chi tz’aqal tz’aqal.” K’a’ut naq naxnaw? Xb’aan naq “ak kireek’a ut kixkuy li qiiq najter chaq.”
Tinraq xyeeb’al waatin rik’in xyaab’asinkil raatin li Kristo sa’ Mateo 11:
“Chalqex wik’in chejunilex li lub’luukex ut tawajenaqex xb’aan lee riiq, ut laa’in texinhiltasi.
“K’ulumaq lin iiqleb’ sa’ eeb’een ut tzolomaq eerib’ wik’in, xb’aan naq tuulanin ut q’un lin ch’ool, ut teetaw xhilob’aal eeraam.
“Xb’aan naq moko ra ta lin iiqleb’, ut li nink’e cheriiqani moko aal ta.”
Chanchan li wankeb’ Africa, laa’in ajwi’ ninnaw naq yaal a’an. Tz’aqal yaal aran Africa, ut yalaq b’ar. Ninch’olob’ xyaalal a’in sa’ xk’ab’a’ li Jesukristo, amen.