សូមកុំលះបង់ចោលសេចក្តីអាណិតអាសូររបស់ខ្លួនចេញឡើយ
បងប្អូនមានសិទ្ធិទទួលបានជំនួយ និងការព្យាបាលដ៏ទេវភាពភ្លាមៗ ទោះបីជាមានគុណវិបត្តិមនុស្សលោករបស់បងប្អូនក៏ដោយ ។
មានពេលមួយអ្នកគ្រូបង្រៀនម្នាក់បានបង្រៀនថា ត្រីបាឡែន—ទោះបីជាធំប៉ុនណាក៏ដោយ—ក៏មិនអាចលេបមនុស្សបានដែរ ពីព្រោះត្រីបាឡែនមានបំពង់កតូច ។ ក្មេងស្រីម្នាក់បានជំទាស់ថា « ប៉ុន្តែត្រីបាឡែនបានលេបយ៉ូណាស » ។ អ្នកគ្រូបានឆ្លើយតប « វាមិនអាចទៅរួចទេ » ។ ដោយនៅតែមិនជឿ ក្មេងស្រីនោះបាននិយាយថា « អ៊ីចឹង នៅពេលដែលខ្ញុំទៅដល់ស្ថានសួគ៌ ចាំខ្ញុំសួរគាត់ » ។ អ្នកគ្រូបានញញឹមតិចៗ ហើយសួរថា « ចុះបើយ៉ូណាសជាជនមានបាប ហើយមិនបានទៅស្ថានសួគ៌វិញនោះ ? » ក្មេងស្រីរូបនោះបានឆ្លើយថា « បើអ៊ីចឹងអ្នកគ្រូអាចសួរគាត់បាន » ។
យើងសើច ប៉ុន្តែយើងមិនគួររំលងពីឥទ្ធិពលដែលដំណើររឿងរបស់យ៉ូណាសផ្តល់ដល់អស់ « អ្នកដែលស្វែងរកសុភមង្គលដ៏សុភាពរាបសា » នោះទេ ជាពិសេសអ្នកដែលមានការតស៊ូដោយសារតែការសាកល្បង ឬកាលៈទេសៈលំបាក ។
ព្រះបានបញ្ជាយ៉ូណាសឲ្យ « ទៅកាន់ក្រុងនីនីវេ » ដើម្បីប្រកាសប្រាប់ពីការប្រែចិត្ត ។ ប៉ុន្តែក្រុងនីនីវេគឺជាសត្រូវដ៏ឃោរឃៅរបស់អ៊ីស្រាអែលពីបុរាណ—ដូច្នេះហើយយ៉ូណាសបានដើរឆ្ពោះទៅទិសដៅខុសឆ្ងាយតាមទូកទៅកាន់ក្រុងតើស៊ីស ។ នៅពេលដែលគាត់ជិះទូកគេចចេញពីការហៅរបស់គាត់ មានព្យុះដ៏ធំមួយបានកើតឡើងដែលបោកបក់ស្ទើតែលិចទូកទៅហើយ ។ ប្រាកដណាស់ការមិនគោរពប្រត្តិបតិរបស់គាត់គឺជាដើមហេតុ នោះយ៉ូណាសស្ម័គ្រចិត្តឲ្យគេបោះគាត់ចូលទៅក្នុងទឹក ។ ការណ៍នេះធ្វើឲ្យសមុទ្រដែលបោកបក់ខ្លាំងស្ងប់ទៅវិញ ដែលជួយសង្គ្រោះអ្នកជិះទូកជាមួយគាត់ ។
ជាអព្ភូតហេតុ យ៉ូណាសគេចផុតពីសេចក្តីស្លាប់នៅពេលដែល « ត្រីមួយយ៉ាងធំ » ដែលព្រះអម្ចាស់ « បានរៀបចំ » ឲ្យលេបគាត់ ។ ប៉ុន្តែគាត់ដេកនៅក្នុងពោះត្រី ជាកន្លែងដែលងងឹត និងកខ្វក់អស់រយៈពេលបីថ្ងៃ រហូតដល់ទីបំផុតត្រីបានក្អែគាត់ចេញនៅលើដីគោក ។ បន្ទាប់មក គាត់ទទួលយកការហៅរបស់គាត់ទៅកាន់ក្រុងនីនីវេ ។ ប៉ុន្តែ នៅពេលដែលទីក្រុងនេះប្រែចិត្ត និងបានរួចផុតពីការបំផ្លិចបំផ្លាញ យ៉ូណាសអាក់អន់ចិត្តនឹងសេចក្តីមេត្តាករុណាដែលបានបង្ហាញទៅដល់សត្រូវរបស់គាត់ ។ ព្រះបានបង្រៀនយ៉ូណាសដោយអត់ធ្មត់ថា ទ្រង់ស្រឡាញ់ និងខិតខំជួយសង្គ្រោះបុត្រាបុត្រីទាំងអស់របស់ទ្រង់ ។
ដោយបានធ្វើខុសជាច្រើនដងនៅក្នុងកាតព្វកិច្ចរបស់គាត់ យ៉ូណាសផ្តល់នូវទីបន្ទាល់ដ៏រស់រវើកថា នៅក្នុងជីវិតរមែងស្លាប់ « មនុស្សទាំងអស់បានធ្លាក់ » ។ យើងមិនសូវនិយាយញឹកញាប់អំពីទីបន្ទាល់នៃការធ្លាក់ទេ ។ ប៉ុន្តែការមានការយល់ដឹងអំពីគោលការណ៍ និងទីបន្ទាល់ខាងវិញ្ញាណអំពីមូលហេតុដែលយើងគ្រប់គ្នាតស៊ូជាមួយបញ្ហាប្រឈមខាងសីលធម៌ ខាងរាងកាយ និងខាងស្ថានភាពលំបាកនានា គឺជាពរជ័យដ៏អស្ចារ្យមួយ ។ នៅលើផែនដីនេះ ស្មៅអាក្រក់លូតលាស់ សូម្បីតែឆ្អឹងដ៏រឹងមាំក៏អាចបាក់បានដែរ ហើយ អ្វីៗទាំងអស់ « ខ្វះមិនដល់សិរីល្អនៃព្រះ » ទេ ។ ប៉ុន្តែស្ថានភាពនៃជីវិតរមែងស្លាប់នេះ—គឺជាលទ្ធផលពីការជ្រើសរើសដែលលោកអ័ដាម និងនាងអេវ៉ាធ្វើ—គឺចាំបាច់ណាស់ចំពោះហេតុផលដែលយើងមានជីវិតនេះ ៖ « ដើម្បីឲ្យ[ យើង ]អាចមានសេចក្តីអំណរ » ! ដូចជាឪពុកម្តាយដើមរបស់យើងបានរៀនមកហើយថា មានតែតាមរយៈការភ្លក់នូវរសជាតិជូរចត់ និងអារម្មណ៍ឈឺចាប់នៃការធ្លាក់នៃលោកិយប៉ុណ្ណោះ ទើបយើងអាចចាប់កំណើតបាន ហើយថែមទាំងមានអំណរ និងសុភមង្គលដ៏ពិតផងដែរ ។
ទីបន្ទាល់អំពីការធ្លាក់ មិនមែន ជាការដោះសាពីអំពើបាប ឬការខ្វះយុទ្ធសាស្រ្តធ្វើកាតព្វកិច្ចរបស់ជីវិត ដែល តែងតែ តម្រូវឲ្យមានការខិតខំប្រឹងប្រែង គុណធម៌ និងការទទួលខុសត្រូវជានិច្ចនោះទេ ។ ប៉ុន្តែទីបន្ទាល់នៃការធ្លាក់គួរតែសម្រាលនូវការខកចិត្តរបស់យើង នៅពេលដែលមានអ្វីខុសប្រក្រតី ឬយើងមើលឃើញសីលធម៌ធ្លាក់ចុះនៅក្នុងសមាជិកគ្រួសារ មិត្តភក្តិ ឬអ្នកដឹកនាំ ។ ជាញឹកញាប់អ្វីៗបែបនេះបណ្ដាលឲ្យយើងលិចលង់ទៅក្នុងការនិយាយស្ដីរិះគន់ចម្រូងចម្រាស ឬការអាក់អន់ចិត្ដ ដែលឆក់យកសេចក្ដីជំនឿរបស់យើង ។ ប៉ុន្ដែទីបន្ទាល់នៃការធ្លាក់គួរតែជួយយើងឲ្យកាន់តែដូចជាព្រះ ដូចដែលបានរៀបរាប់ដោយយ៉ូណាសថា ទ្រង់ « មានព្រះហឫទ័យអាណិតអាសូរ ទ្រង់យឺតនឹងខ្ញាល់ ហើយមានសេចក្តីសប្បុរសជាបរិបូរ » ដល់មនុស្សទាំងអស់—រួមទាំងខ្លួនយើងផងដែរ—នៅក្នុងស្ថានភាពមិនល្អឥតខ្ចោះដែលចៀសវាងមិនរួចរបស់យើង ។
លើសពីការបង្ហាញពីផលប៉ះពាល់នៃការធ្លាក់ នោះដំណើររឿងរបស់យ៉ូណាសដឹកនាំយើងយ៉ាងមានឥទ្ធិពលទៅរកទ្រង់ ដែលអាចជួយសង្គ្រោះយើងពីផលប៉ះពាល់ទាំងនោះ ។ ការលះបង់ខ្លួនឯងរបស់យ៉ូណាសដើម្បីជួយសង្គ្រោះមិត្តរួមនាវារបស់គាត់គឺពិតដូចជាព្រះគ្រីស្ទណាស់ ។ ហើយនៅពេលដែលព្រះយេស៊ូវត្រូវបានគេសាកសួរពីទីសម្គាល់អស្ចារ្យនៃភាពជាព្រះរបស់ទ្រង់ចំនួនបីលើក នោះទ្រង់មានបន្ទូលថា មានតែ « ទីសម្គាល់របស់យ៉ូណាស » ប៉ុណ្ណោះ នឹងត្រូវបានប្រទានឲ្យ ដោយប្រកាសថាកាល ដែលយ៉ូណាសនៅក្នុង « ពោះត្រីធំអស់៣ថ្ងៃ៣យប់យ៉ាងណា កូនមនុស្សក៏នឹងនៅក្នុងផ្ទៃផែនដី៣ថ្ងៃ៣យប់យ៉ាងនោះដែរ » ។ ក្នុងនាមជានិមិត្តរូបនៃការសុគត និងការមានព្រះជន្មរស់ឡើងវិញដ៏រុងរឿងរបស់ព្រះអង្គសង្គ្រោះ យ៉ូណាសអាចនឹងមានភាពមិនល្អឥតខ្ចោះ ។ ប៉ុន្តែនេះក៏ជាអ្វីដែលធ្វើឲ្យទីបន្ទាល់ផ្ទាល់ខ្លួន និងការតាំងចិត្តរបស់គាត់ចំពោះព្រះយេស៊ូវគ្រីស្ទ ដែលបានធ្វើឡើងនៅក្នុងពោះរបស់ត្រីបាឡែន គួរឲ្យរំជួលចិត្ត និងបំផុសគំនិតជាខ្លាំងដែរ ។
ការស្រែកយំរបស់យ៉ូណាសគឺជាការស្រែកយំរបស់បុរសល្អម្នាក់ដែលស្ថិតក្នុងវិបត្តិ ។ មួយផ្នែកធំកើតចេញពីកំហុសរបស់គាត់ផ្ទាល់ ។ ចំពោះពួកបរិសុទ្ធម្នាក់ នៅពេលមានគ្រោះមហន្តរាយកើតឡើងដោយទម្លាប់ដ៏គួរឲ្យសោកស្ដាយ មតិយោបល់ ឬការសម្រេចចិត្តមួយ ទោះបីជាមានចេតនាល្អជាច្រើនផ្សេងទៀតនិងការខិតខំប្រឹងប្រែងដោយសេចក្តីសុចរិតក្តី ក៏វាអាចជាការបំផ្លិចបំផ្លាញ ហើយបន្សល់ទុកនូវអារម្មណ៍ត្រូវគេបោះបង់ចោលដែរ ។ ប៉ុន្តែទោះបីជាមូលហេតុ ឬគ្រោះមហន្តរាយដែលយើងប្រឈមមុខមានកម្រិតណាក៏ដោយ យើងតែងតែ ទទួលអាម្មណ៍នូវសេចក្តីសង្ឃឹម ការព្យាបាល និងសុភមង្គលជានិច្ច ។ ចូរស្ដាប់យ៉ូណាស ៖
« ទូលបង្គំបានអំពាវនាវដល់ព្រះយេហូវ៉ា ដោយព្រោះទុក្ខលំបាករបស់ទូលបង្គំ … ទូលបង្គំបានអំពាវនាវនៅក្នុងពោះនៃស្ថានឃុំព្រលឹងមនុស្សស្លាប់ ។ …
« ដ្បិតទ្រង់បានបោះទូលបង្គំទៅក្នុងទីជំរៅ គឺចុះទៅក្នុងផ្ទៃនៃសមុទ្រ ។ …
« [ ហើយ ]ទូលបង្គំបានពោលថា ទូលបង្គំត្រូវបោះចោលចេញពីចំពោះព្រះនេត្រទ្រង់ ហើយ ប៉ុន្តែ ទូលបង្គំនឹងមើលទៅឯព្រះវិហារបរិសុទ្ធនៃទ្រង់ទៀត ។
« ទឹកបានឡោមព័ទ្ធទូលបង្គំ សឹងតែ នឹងផុតជីវិតផង ទីជំរៅបានហ៊ុមទូលបង្គំជិត ហើយសារ៉ាយបានរុំព័ទ្ធក្បាលទូលបង្គំ ។
« ទូលបង្គំបានចុះទៅដល់ឫសនៃភ្នំទាំងប៉ុន្មាន … ប៉ុន្តែ ទ្រង់បាននាំទូលបង្គំឡើងចេញពីរណ្តៅមកទាំងរស់ ។ …
« កាលព្រលឹង … ទូលបង្គំបានសន្លប់ទៅ នោះទូលបង្គំបាននឹកដល់ព្រះយេហូវ៉ា ហើយសេចក្តីអធិស្ឋាន … ទូលបង្គំបានចូលទៅក្នុងព្រះវិហារបរិសុទ្ធនៅចំពោះទ្រង់ ។
« ពួកអ្នកដែលមើលទៅឯរបស់ឥតប្រយោជន៍ ដែលមិនទៀងទាត់ គេ រមែងលះបង់ចោលសេចក្តីអាណិតអាសូររបស់ខ្លួនចេញ ។
« តែទូលបង្គំនឹងថ្វាយយញ្ញបូជាដល់ទ្រង់ ដោយសំឡេងនៃពាក្យអរដល់ព្រះគុណ ហើយទូលបង្គំនឹង លាបំណន់របស់ទូលបង្គំផង ។ ឯសេចក្តីសង្គ្រោះ នោះកើតមកតែពីព្រះយេហូវ៉ាទេ » ។
ទោះបីជាវាបានកើតឡើងយូរឆ្នាំមកហើយក្តី ខ្ញុំអាចប្រាប់បងប្អូនបានយ៉ាងច្បាស់ពីកន្លែងដែលខ្ញុំកំពុងអង្គុយ និងអារម្មណ៍ដែលខ្ញុំមាន នៅក្នុងជំរៅដ៏ជ្រៅនៃឋាននរកផ្ទាល់ខ្លួន នៅពេលខ្ញុំបានរកឃើញបទគម្ពីរនេះ ។ សម្រាប់នរណាម្នាក់នៅថ្ងៃនេះ ដែលមានអារម្មណ៍ដូចដែលខ្ញុំធ្លាប់មាន—ថាអ្នកត្រូវបានគេបោះចោល លិចចុះទៅក្នុងទឹកយ៉ាងជ្រៅបំផុត ហើយសារ៉ាយសមុទ្ររុំព័ទ្ធក្បាលរបស់បងប្អូន ហើយមានអារម្មណ៍អស់សង្ឃឹម—នោះការអង្វររបស់ខ្ញុំដែលបានបំផុសគំនិតដោយយ៉ូណាសគឺ ៖ សូមកុំលះបង់ចោលសេចក្តីអាណិតអាសូររបស់ខ្លួនចេញឡើយ ។ បងប្អូនមានសិទ្ធិទទួលបានជំនួយ និងការព្យាបាលដ៏ទេវភាពភ្លាមៗ ទោះបីជាមានគុណវិបត្តិមនុស្សលោករបស់បងប្អូនក៏ដោយ ។ សេចក្តីមេត្តាករុណាដ៏គួរឲ្យស្ញប់ស្ញែងនេះចូលមក និងតាមរយៈព្រះយេស៊ូវគ្រីស្ទ ។ ដោយសារទ្រង់ស្គាល់ និងស្រឡាញ់បងប្អូនយ៉ាងល្អឥតខ្ចោះ នោះទ្រង់ប្រទានសេចក្ដីមេត្តាករុណានោះឲ្យទៅបងប្អូនជារបស់បងប្អូន « ផ្ទាល់ » មានន័យថា វាគឺសមយ៉ាងល្អឥតខ្ចោះសម្រាប់បងប្អូន ត្រូវបានបង្កើតឡើងដើម្បីបំបាត់ការឈឺចាប់ផ្ទាល់ខ្លួន របស់បងប្អូន ម្នាក់ៗ និងដើម្បីព្យាបាលការឈឺចាប់ជាក់លាក់ របស់បងប្អូន ។ ដូច្នេះ ចំពោះសេចក្ដីស្រឡាញ់ដល់ព្រះ និងចំពោះសេចក្ដីសុខសាន្តរបស់បងប្អូន សូមកុំព្រងើយកន្តើយចំពោះសេចក្ដីមេត្តាករុណានោះឡើយ ។ ទទួលយកវា ។ សូមចាប់ផ្តើមដោយបដិសេធមិនស្តាប់ « របស់ឥតប្រយោជន៍ ដែលមិនទៀងទាត់ » របស់មារសត្រូវ ដែលនឹងល្បួងបងប្អូនឲ្យគិតថា ភាពធូរស្រាលរកឃើញតែនៅក្នុងការចាកចេញឆ្ងាយពីការទទួលខុសត្រូវខាងវិញ្ញាណរបស់បងប្អូនប៉ុណ្ណោះ ។ ផ្ទុយទៅវិញ សូមធ្វើតាមការដឹកនាំរបស់យ៉ូណាសដែលប្រែចិត្ត ។ ចូរអធិស្ឋានទៅរកព្រះ ។ ចូរងាកទៅរកព្រះវិហារបរិសុទ្ធ ។ ចូរប្រកាន់ខ្ជាប់ទៅនឹងសេចក្តីសញ្ញារបស់បងប្អូន ។ ចូរបម្រើព្រះអម្ចាស់ សាសនាចក្ររបស់ទ្រង់ និងអ្នកដទៃទៀតដោយការលះបង់ និងការដឹងគុណ ។
ការធ្វើនូវរឿងទាំងនេះនាំមកនូវចក្ខុវិស័យនៃសេចក្តីស្រឡាញ់ដ៏ពិសេសរបស់ព្រះសម្រាប់បងប្អូន—ជាអ្វីដែលព្រះគម្ពីរហេព្រើរហៅថា « hesed ( ហេសិដ ) » ។ បងប្អូននឹងមើលឃើញ ហើយទទួលអារម្មណ៍ពីព្រះចេស្តានៃព្រះដ៏ស្មោះត្រង់ មិនចេះនឿយហត់ មិនចេះចប់មិនចេះហើយ និង « សេចក្តីមេត្តាករុណាដ៏ទន់ភ្លន់ទាំងឡាយ » ដែលអាចធ្វើឲ្យបងប្អូន « ខ្លាំងពូកែ… ដល់ … សេចក្តីដោះលែង » ចេញពីអំពើបាបណាមួយ ឬការបរាជ័យណាមួយ ។ ការឈឺចាប់ដំបូង និងខ្លាំងអាចធ្វើការយល់ដឹងអំពីសេចក្តីមេត្តាករុណា និងសេចក្តីស្រឡាញ់របស់ព្រះពិបាកនឹងស្រមៃដល់ ។ ប៉ុន្តែនៅពេលបងប្អូនបន្តអធិស្ថានដើម្បី « លាបំណន់របស់[ បងប្អូន ] » នោះចក្ខុវិស័យបែបនេះនឹងកាន់តែភ្លឺឡើងៗនៅក្នុងព្រលឹងរបស់បងប្អូន ។ ហើយជាមួយនឹងចក្ខុវិស័យនោះ បងប្អូននឹងមិនត្រឹមតែរកឃើញសេចក្តីសង្ឃឹម និងការព្យាបាលប៉ុណ្ណោះទេ ប៉ុន្តែ បងប្អូននឹងរកឃើញអំណរដ៏គួរឲ្យភ្ញាក់ផ្អើលបំផុត សូម្បីតែនៅក្នុងចំណោមការសាកល្បងដ៏លំបាករបស់បងប្អូនក្ដី ។ ប្រធាន ណិលសុន បានបង្រៀនយើងបានយ៉ាងល្អថា ៖ « ពេលជីវិតរបស់យើងផ្តោតលើផែនការនៃសេចក្តីសង្គ្រោះរបស់ព្រះ … និងព្រះយេស៊ូវគ្រីស្ទ ព្រមទាំងដំណឹងល្អរបស់ទ្រង់ នោះយើងអាចមានអំណរ មិនថាមានអ្វីកំពុងកើតឡើង—ឬមិនកើតឡើង—នៅក្នុងជីវិតយើងនោះទេ ។ អំណរកើតមានឡើង ហើយដោយសារតែទ្រង់ » ។
មិនថាយើងកំពុងប្រឈមមុខនឹងមហន្តរាយដ៏ជ្រៅដូចយ៉ូណាស ឬបញ្ហាប្រឈមប្រចាំថ្ងៃនៃលោកិយដែលមិនល្អឥតខ្ចោះរបស់យើង ការអញ្ជើញគឺដូចគ្នា ៖ សូមកុំលះបង់ចោលសេចក្តីអាណិតអាសូររបស់ខ្លួនចេញឡើយ ។ ចូរមើលទៅទីសម្គាល់របស់យ៉ូណាស ព្រះគ្រីស្ទដ៏ព្រះជន្មរស់ ទ្រង់ដែលបានក្រោកឡើងពីផ្នូរបីថ្ងៃរបស់ទ្រង់ បានយកឈ្នះគ្រប់ទាំងអស់—សម្រាប់បងប្អូន ។ ចូរបែរទៅរកទ្រង់ ។ ចូរជឿលើទ្រង់ ។ ចូរបម្រើទ្រង់ ។ ចូរញញឹម ។ ព្រោះនៅក្នុងទ្រង់ និងមានតែទ្រង់មួយអង្គគត់ ដែលមាននូវការព្យាបាលដ៏ពេញលេញ និងសប្បាយរីករាយចេញមកពីការធ្លាក់ ដែលយើងទាំងអស់គ្នាត្រូវការជាចាំបាច់ ហើយស្វែងរកដោយសុភាពរាបសា ។ ខ្ញុំសូមថ្លែងទីបន្ទាល់ថា នេះគឺជាការពិត ។ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕